« ថ្ងៃទី ១៣–១៩ ខែ កុម្ភៈ ។ ម៉ាថាយ ៥; លូកា ៦ ៖ ‹ អ្នករាល់គ្នាមានពរ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៣–១៩ ខែ កុម្ភៈ ។ ម៉ាថាយ ៥; លូកា ៦ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣

ព្រះយេស៊ូវកំពុងថ្លែងទេសនកថានៅលើភ្នំ ដោយ ស្ដាវ ដូរ៉េ

ថ្ងៃទី ១៣–១៩ ខែ កុម្ភៈ

ម៉ាថាយ ៥; លូកា ៦

« អ្នករាល់គ្នាមានពរ »

ឱកាសរបស់បងប្អូនដើម្បីបង្រៀនកុមារគឺមានតម្លៃណាស់ ។ កាលដែលបងប្អូនរៀបចំខ្លួនខាងវិញ្ញាណ នោះព្រះអម្ចាស់នឹងដឹកនាំបងប្អូន ។

អញ្ជើញឲ្យចែកចាយ

សូមស្នើសុំឲ្យកុមារនិយាយអំពីអ្វីមួយ ដែលពួកគេបានធ្វើនៅក្នុងសប្តាហ៍នេះដើម្បីចែកចាយពន្លឺរបស់ព្រះអម្ចាស់ជាមួយនរណាម្នាក់—ប្រហែលជាតាមរយៈការធ្វើជាគំរូល្អ ឬការបង្ហាញសេចក្តីស្រឡាញ់ និងសន្ដានចិត្តល្អដល់អ្នកដទៃ ។

បង្រៀនគោលលទ្ធិ ៖ កុមារតូចៗ

ម៉ាថាយ ៥:៩

ខ្ញុំអាចក្លាយជាអ្នកដែលផ្សះផ្សាគេ ។

កុមារដែលបងប្អូនបង្រៀនអាចមានឥទ្ធិពលដ៏ខ្លាំងនៅផ្ទះ កាលពួកគេប្រព្រឹត្តនឹងមនុស្សដទៃដោយសេចក្ដីស្រឡាញ់ និងសន្ដានចិត្តល្អ ។

សកម្មភាពដែលអាចធ្វើបាន

សូមអាន ម៉ាថាយ ៥:៩ ឲ្យកុមារស្តាប់ ហើយសូមពន្យល់ថា អ្នកដែលផ្សះផ្សាគេធ្វើឲ្យកន្លែងនានាក្លាយជាកន្លែងដែលមានសេចក្ដីសុខសាន្ដ មិនថាពួកគេនៅកន្លែងណានោះទេ ។ សូមសរសេរលើចម្រៀកក្រដាសពីឧទាហរណ៍នៃស្ថានភាពពិបាកៗមួយចំនួន ដែលកុមារអាចជួបប្រទះ ( ឧទាហរណ៍ បងប្អូនឈ្លោះគ្នាដណ្ដើមប្រដាប់លេងមួយ ) ។ សូមអញ្ជើញកុមារម្នាក់ៗឲ្យរើសយកចម្រៀកក្រដាសមួយសន្លឹក ។ កាលបងប្អូនអានសាច់រឿងនីមួយៗ សូមឲ្យកុមារចែកចាយពីរបៀបដែលពួកគេអាចធ្វើជាអ្នកផ្សះផ្សាគេនៅក្នុងស្ថានភាពនោះ ។ ឬសូមចែកចាយសាច់រឿងប្រឌិតពីរបី ហើយជួយឲ្យកុមារវិភាគមើលថា តើមនុស្សដែលពាក់ព័ន្ធនោះគឺជាអ្នកផ្សះផ្សាគេ ឬមិនមែន ។
សូមអញ្ជើញឪពុកម្ដាយរបស់កុមារពីរគូឲ្យមកចូលរួមក្នុងថ្នាក់រៀនរបស់បងប្អូន ហើយចែកចាយគំរូនៃគ្រាដែលកូនៗរបស់ពួកគាត់បានធ្វើជាអ្នកផ្សះផ្សាគេនៅក្នុងផ្ទះ ។

ម៉ាថាយ ៥:១៤–១៦

ព្រះយេស៊ូវសព្វព្រះទ័យឲ្យខ្ញុំធ្វើជាពន្លឺដល់មនុស្សដទៃ ។

កុមារតូចៗអាចមានឥទ្ធិពលដ៏ខ្លាំងមួយសម្រាប់សេចក្ដីល្អទៅលើមនុស្សដទៃ ។ តើបងប្អូនអាចបំផុសគំនិតដល់ពួកគេដើម្បីអនុញ្ញាតឲ្យពន្លឺរបស់ពួកគេចែងចាំងដោយរបៀបណា ?

សកម្មភាពដែលអាចធ្វើបាន

សូមបង្ហាញវត្ថុដែលបញ្ចេញពន្លឺបីបួនដល់កុមារ ហើយសូមបង្ហាញរូបភាពរបស់កុមារផងដែរ ។ សូមអាន ម៉ាថាយ ៥:១៤–១៦ ហើយប្រាប់កុមារថា គំរូល្អរបស់ពួកគេអាចដូចជាពន្លឺសម្រាប់បំភ្លឺឲ្យអ្នកដទៃមើលឃើញផងដែរ ។ តើយើងអាចប្រើពន្លឺរបស់យើងដើម្បីនាំមនុស្សដទៃមកកាន់ព្រះដោយរបៀបណា ?
សូមបញ្ចាំងពន្លឺពិលជុំវិញថ្នាក់រៀន ហើយសូមអញ្ជើញកុមារឲ្យប្រើភ្នែកដេញតាមមើលពន្លឺនោះ ។ សូមប្រើពន្លឺនេះដឹកនាំភ្នែករបស់ពួកគេទៅរករូបភាពរបស់ព្រះអង្គសង្គ្រោះ ។ តើពន្លឺអាចជួយដល់យើងយ៉ាងដូចម្ដេច ? តើយើងអាចក្លាយជាពន្លឺដល់លោកិយដោយរបៀបណា ? សូមគ្របពន្លឺពិលនោះ ។ តើនឹងមានអ្វីកើតឡើង ប្រសិនបើយើងមិនចែកចាយពន្លឺរបស់យើង ឬប្រសិនបើយើងលាក់កំបាំងវានោះ ?
សូមលាក់ពិលមួយនៅក្នុងបន្ទប់ ហើយបិទភ្លើងបន្ទប់ ។ សូមឲ្យកុមារព្យាយាមរកពិលនោះ ។ សូមរំឭក ម៉ាថាយ ៥:១៥ ឡើងវិញ ហើយនិយាយអំពីមូលហេតុដែលយើងមិនគួរលាក់កំបាំងពន្លឺរបស់យើង ។
សូមជួយកុមារឲ្យរក និងផាត់ពណ៌រូបទៀនដែលបង្កប់នៅក្នុងទំព័រសកម្មភាពនាសប្ដាហ៍នេះ ។
សូមច្រៀងជាមួយកុមារនូវបទចម្រៀងអំពីការធ្វើជាពន្លឺសម្រាប់អ្នកដទៃ ដូចជាបទ « ព្រះយេស៊ូវចង់ឲ្យខ្ញុំធ្វើជាពន្លឺ » « រះឡើង » ឬ « ខ្ញុំជាដួងតារា » ( សៀវភៅចម្រៀងកុមារ ទំព័រ ៣៨, ៩៦, ៨៤ ) ។

ព្រះយេស៊ូវកំពុងបង្រៀនពួកសិស្ស — យើងអាចសប្បាយរីករាយតាមរយៈការរស់នៅតាមរបៀបដែលព្រះយេស៊ូវបានបង្រៀនយើង ។

ម៉ាថាយ ៥:៤៤–៤៥

ព្រះយេស៊ូវគ្រីស្ទសព្វព្រះទ័យឲ្យខ្ញុំស្រឡាញ់មនុស្សគ្រប់រូប ។

កុមារតូចៗអាចចាប់ផ្ដើមអនុវត្តក្នុងការបង្ហាញក្ដីស្រឡាញ់នាពេលនេះ ទោះបីជាពេលមានមិត្ត ឬបងប្អូនប្រព្រឹត្តមិនយុត្តិធម៌នឹងពួកគេក្ដី ។ កាលបងប្អូនអាន ម៉ាថាយ ៥:៤៤–៤៥ សូមពិចារណាពីរបៀបដែលការបង្រៀនរបស់ព្រះអង្គសង្គ្រោះអនុវត្តចំពោះកុមារដែលបងប្អូនបង្រៀន ។

សកម្មភាពដែលអាចធ្វើបាន

សូមបញ្ជាក់ ម៉ាថាយ ៥:៤៤ ឡើងវិញដោយប្រើពាក្យ និងស្ថានភាពដែលកុមារនឹងយល់ ហើយអាចប្រៀបមកជីវិតរបស់ពួកគេបាន ។ សូមឲ្យកុមារចែកចាយពីគ្រាដែលពួកគេបានបង្ហាញក្ដីស្រឡាញ់ដល់នរណាម្នាក់ ទោះបីជាវាពិបាកក្ដី ។ តើបទពិសោធន៍ទាំងនេះបានធ្វើឲ្យពួកគេមានអារម្មណ៍យ៉ាងណាដែរ ?
សូមច្រៀងចម្រៀងក្នុងថ្នាក់រួមគ្នាអំពីការស្រឡាញ់អ្នកដទៃ ដូចជាបទ « ចូរអ្នកស្រឡាញ់គ្នា » ( សៀវភៅចម្រៀងកុមារ ទំព័រ ៧៤ ) ។ តើយើងអាចរៀនអ្វីខ្លះ ចេញពីចម្រៀងនេះអំពីការស្រឡាញ់មនុស្សដទៃ ?
សូមចែកក្រដាសរូបបេះដូងដល់កុមារ ដែលមានសរសេរពាក្យ « ខ្ញុំនឹងបង្ហាញក្ដីស្រឡាញ់ខ្ញុំដល់មនុស្សគ្រប់គ្នា » ។ សូមឲ្យពួកគេតុបតែងរូបបេះដូងនោះ ហើយព្យួរវានៅក្នុងផ្ទះរបស់ពួកគេ ទុកជាការរំឭកមួយដើម្បីស្រឡាញ់មនុស្សដទៃ ។

បង្រៀនគោលលទ្ធិ ៖ កុមារធំៗ

ម៉ាថាយ ៥:៣–១២

ខ្ញុំអាចរីករាយ នៅពេលខ្ញុំរស់នៅតាមរបៀបដែលព្រះយេស៊ូវបានបង្រៀន ។

កាលបងប្អូនអាន ម៉ាថាយ ៥:៣–១២ តើពាក្យ និងឃ្លាអ្វីដែលបងប្អូនចាប់អារម្មណ៍ ? តើការបង្រៀនទាំងនេះនឹងប្រទានពរដល់ជីវិតកុមារដែលបងប្អូនបង្រៀនដោយរបៀបណា ?

សកម្មភាពដែលអាចធ្វើបាន

សូមបង្កើតតារាងមួយនៅលើក្ដារខៀនដោយមានជួរឈរពីរសរសេរថា មានពរហើយ… និង ពរជ័យ ។ សូមអញ្ជើញកុមារឲ្យស្រាវជ្រាវក្នុង ម៉ាថាយ ៥:៣–១២ រកមើលពីគុណសម្បត្តិដែលព្រះយេស៊ូវបានមានព្រះបន្ទូលថានឹងមានពរ និងពរជ័យទាំងឡាយដែលទ្រង់បានសន្យាដល់ពួកគេ ។ បន្ទាប់មក សូមបំពេញតារាងនេះជាមួយនឹងអ្វីដែលពួកគេរកឃើញ ។ សូមពិភាក្សាជាមួយកុមារអំពីអត្ថន័យនៃគុណសម្បត្តិនីមួយៗ និងពរជ័យដែលស្របគ្នា ។
សូមសរសេរគុណសម្បត្តិនីមួយៗចេញពីខគម្ពីរទាំងនេះដាក់នៅលើកាតមួយសន្លឹក និងពរជ័យដែលស្របគ្នាចេញពីខគម្ពីរនេះនៅលើកាតមួយសន្លឹកទៀត ។ ឧទាហរណ៍ កាតមួយនឹងសរសេរថា « ស្លូតត្រង់ » និងមួយទៀតសរសេរថា « គ្រងផែនដីជាមរតក » ( ខទី ៥ ) ។ សូមឲ្យកុមារផ្គូផ្គងគុណសម្បត្តិ និងពរជ័យទាំងឡាយ ។ សូមឲ្យកុមាររើសយកគុណសម្បត្តិមួយនៅក្នុងបទគម្ពីរទាំងនេះ ដែលពួកគេចង់អភិវឌ្ឍបន្ថែម ។

ម៉ាថាយ ៥:៩, ២១–២៤, ៣៨–៤៧

ខ្ញុំអាចក្លាយជាអ្នកដែលផ្សះផ្សាគេ ។

ព្រះយេស៊ូវបានបង្រៀនថា អ្នកដែលផ្សះផ្សាគេនឹងត្រូវបានហៅថាជាកូនរបស់ព្រះ ។ តើបងប្អូនអាចបំផុសគំនិតដល់កុមារឲ្យក្លាយជាអ្នកផ្សះផ្សាគេតាមរបៀបណា ?

សកម្មភាពដែលអាចធ្វើបាន

សូមអញ្ជើញកុមារឲ្យអាន ម៉ាថាយ ៥:៩ ឮៗ ។ តើអ្នកផ្សះផ្សាគេគឺជានរណា ? តើមានរបៀបណាខ្លះ ដែលយើងអាចក្លាយទៅជាអ្នកផ្សះផ្សាគេនៅក្នុងក្រុមគ្រួសាររបស់យើង និងដល់មិត្តភក្ដិរបស់យើងនោះ ? ( សម្រាប់គំនិតមួយចំនួន សូមមើល ខទី ២១–២៤, ៣៨–៤៧ ) ។
សូមឲ្យកុមារម្នាក់ៗគិតអំពីស្ថានភាពមួយ ដែលនឹងត្រូវការជំនួយពីអ្នកផ្សះផ្សាមួយរូប ។ តើអ្នកផ្សះផ្សាគេត្រូវធ្វើអ្វីខ្លះនៅក្នុងស្ថានភាពបែបនេះ ?
សូមឲ្យកុមារចែកចាយពីគ្រាដែលពួកគេបានបង្ហាញក្ដីស្រឡាញ់ដល់នរណាម្នាក់ ទោះបីជាបុគ្គលនោះខុសពីពួកគេ ឬពិបាកនឹងស្រឡាញ់ក្ដី ។

ម៉ាថាយ ៥:១៤–១៦

គំរូរបស់ខ្ញុំអាចបំភ្លឺផ្លូវដល់មនុស្សដទៃឲ្យដើរតាមព្រះយេស៊ូវ ។

កុមារជាច្រើនដែលបងប្អូនបង្រៀនបានចុះសេចក្តីសញ្ញានៃពិធីបុណ្យជ្រមុជទឹក ។ សូមគិតអំពីរបៀបដែលព្រះបន្ទូលរបស់ព្រះអង្គសង្រ្គោះនៅក្នុង ម៉ាថាយ ៥:១៤–១៦ ទាក់ទងនឹងសេចក្តីសញ្ញារបស់ពួកគេ ។ តើព្រះអម្ចាស់អាចមានសារលិខិតអ្វីនៅក្នុងវគ្គបទគម្ពីរនេះទៅកាន់កុមារនៅក្នុងថ្នាក់របស់បងប្អូន ?

សកម្មភាពដែលអាចធ្វើបាន

សូមជួយកុមារឲ្យទន្ទេញ ម៉ាថាយ ៥:១៦ ។ សូមសរសេរខគម្ពីរនេះនៅលើក្ដារខៀន ។ សូមអានខគម្ពីរនេះបីបួនដងរួមគ្នា ហើយលុបពីរបីពាក្យចេញរាល់ពេលអានចប់ម្ដងៗ ។ សូមឲ្យកុមារគូរអ្វីៗដែលពួកគេអាចធ្វើបាន ដើម្បីក្លាយជាពន្លឺមួយដល់មនុស្សដទៃ ។ សូមនិយាយអំពីរបៀបដែលការធ្វើជាពន្លឺចំពោះអ្នកដទៃ ជួយយើងឲ្យបំពេញសេចក្តីសញ្ញានៃពិធីបុណ្យជ្រមុជទឹករបស់យើង ( សូមមើល ម៉ូសាយ ១៨:៨–១០ ) ។
សូមច្រៀងចម្រៀងអំពីការចែកចាយពន្លឺជាមួយអ្នកដទៃ ដូចជាបទ « រះឡើង » ( សៀវភៅចម្រៀងកុមារ ទំព័រ ៩៦ ) ។ តើយើងអាចចែកចាយពន្លឺរបស់ព្រះអង្គសង្រ្កោះយ៉ាងដូចម្តេច ?
សូមឲ្យកុមារគូរអ្វីៗដែលផ្ដល់ពន្លឺដល់ពួកយើង ។ សូមអាន ម៉ាថាយ ៥:១៤–១៦ ។ សូមសួរកុមារថា ហេតុអ្វីព្រះយេស៊ូវសព្វព្រះទ័យឲ្យយើងធ្វើជាពន្លឺដល់លោកិយ ។
សូមឲ្យកុមារពីរនាក់ឈរទល់មុខគ្នា ហើយសូមឲ្យកុមារម្នាក់ព្យាយាមធ្វើឲ្យកុមារម្នាក់ទៀតញញឹមដោយមិនប៉ះពាល់គាត់ ។ សូមនិយាយអំពីអំណាចដែលកុមារមាន ក្នុងការនាំមកនូវសុភមង្គលដល់មនុស្សដទៃ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមតាំងចិត្តកុមារឲ្យចំណាំមើលនរណាម្នាក់ដែលជាអ្នកផ្សះផ្សាគេនាសប្ដាហ៍នេះ ។ នៅដើមថ្នាក់នាសប្ដាហ៍ក្រោយ សូមឲ្យពួកគេនិយាយអំពីមនុស្ស និងអ្វីដែលពួកគេបានឃើញ ។

ការកែលម្អការបង្រៀនរបស់យើង

ជួយកុមារឲ្យសកម្មឡើង ។ « នៅពេលបងប្អូនបង្រៀនកុមារតូចៗ សូមអនុញ្ញាតឲ្យពួកគេសង់រូប គូររូប ផាត់ពណ៌ សរសេរ ហើយបង្កើតអ្វីមួយឡើង ។ រឿងទាំងនេះមានន័យច្រើនជាងសកម្មភាពដ៏សប្បាយរីករាយទៅទៀត—វាមានសារៈសំខាន់ណាស់នៅក្នុងការរៀនសូត្រ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ទំព័រសកម្មភាព ៖ ព្រះយេស៊ូវសព្វព្រះទ័យឲ្យខ្ញុំធ្វើជាពន្លឺ