Iesu e poro ra i te a’ora’a i ni’a i te mou’a, nā Gustave Doré

13–19 nō Fepuare

Mataio 5°; Luka 6

« E ao tō ’outou »

E mea faufa’a rahi tō ’oe ti’ara’a nō te ha’api’i i te mau tamari’i. ’A fa’aineine ai ’oe ia ’oe iho i te pae vārua, e arata’i te Fatu ia ’oe.

Tītau i te mana’o

E ani i te mau tamari’i ’ia paraparau mai nō ni’a i te mea tā rātou i rave i teie hepetoma nō te fa’a’ite i te māramarama o te Fatu i te ta’ata—nā roto ānei i te rirora’a ’ei hi’ora’a maita’i ’aore rā te fa’a’itera’a i te here ’e te hamani maita’i.

Ha’api’i i te ha’api’ira’a tumu : Te mau tamari’i ’āpī

Mataio 5:9

E nehenehe au e riro ’ei fa’atupu hau.

E riro ’ei fa’aurura’a rahi te mau tamari’i tā ’oe e ha’api’i ra i te fare, ’a fa’a’ite ai rātou i te here ’e te hāmani maita’i ia vetahi ’ē.

Te mau ’ātivite e au

• ’A tai’o i te Mataio 5:9 i te mau tamari’i ’e ’a fa’ata’a atu ē, e fa’ariro te feiā fa’atupu hau i te mau vāhi ato’a ’ei vāhi hau, noa atu te vāhi tei reira rātou. E pāpa’i i ni’a i te mau ’api parau te tahi mau hi’ora’a nō te tahi mau fifi e fārereihia e te mau tamari’i (’ei hi’ora’a, te ’aimārōra’a te taea’e ’e te tuahine nō te hō’ē tao’a ha’uti). E ani i te tamari’i tāta’itahi ’ia mā’iti mai i te hō’ē ’api parau. ’A tai’o ai ’oe i te huru fa’a’itera’a, e ani i te mau tamari’i ’ia fa’a’ite mai nāhea rātou e riro ai ’ei fa’atupu hau i roto i taua huru fa’a’itera’a ra. ’Aore rā ’a fa’ati’a i te tahi mau tupura’a ’ohipa,’e e tauturu i te mau tamari’i ’ia hi’o mai e feiā fa’atupu hau ānei rātou ’aore rā, ’aita.

• E ani i te tahi mau metua o te mau tamari’i ’ia haere mai i roto i tā ’oe piha ha’api’ira’a, ’e ’ia fa’a’ite mai i te tahi mau hi’ora’a i riro ai tā rātou mau tamari’i ’ei fa’atupu hau i te fare.

Mataio 5:14–16

’Ua hina’aro Iesu ’ia riro vau ’ei māramarama nō vetahi ’ē.

E nehenehe te mau tamari’i na’ina’i e riro ’ei fa’aurura’a pūai maita’i nō vetahi ’ē. Nahea ’oe i te fa’auru ia rātou ’ia fa’a’ana’ana i tō rātou māramarama ?

Te mau ’ātivite e au

• ’A fa’a’ite i te mau tamari’i e rave rahi tao’a e hōro’a nei i te māramarama, ’e ’a fa’a’ite i te hō’ē hōho’a o te mau tamari’i. ’A tai’o i te Mataio 5:14–16 ’e e parau i te mau tamari’i ē, e riro tō rātou hi’ora’a maita’i mai te māramarama nō vetahi ’ē. Nāhea tātou ’ia fa’a’ōhipa i tō tātou māramarama nō te arata’i ia vetahi ’ē i te Atua ra ?

• ’A tū’ama i te mori pata i ni’a i te pāpa’i fare, ’e e ani i te mau tamari’i ’ia pe’e i tō rātou mata te māramarama. ’A fa’a’ohipa i te māramarama nō te arata’i i tō rātou mata e tae atu i te hō’ē hōho’a nō te Fa’aora. Nāhea te māramarama i te tauturu ia tātou ? Nāhea e ti’a ai ia tātou ’ia riro ’ei māramarama nō te ao nei ? ’A tāpo’i i te mori pata. E aha tē tupu mai te mea ’aita tātou e fa’a’ite i tō tātou māramarama, ’aore rā mai te mea e huna tātou i te reira ?

• ’A huna i te hō’ē mori pata i roto i te piha, ’e ’a tūpohe i te mau mōrī. E vaiiho i te mau tamari’i ’ia tāmata i te ’imi mai i te reira. ’A hi’o fa’ahou i te Mataio 5:15, ’e ’a parau nō te aha ’eiaha tātou e huna i tō tātou māramarama.

• E tauturu i te mau tamari’i ’ia ’imi mai ’e ’ia pēni i te mau mori hinu i roto i te ’api ’ātivite o teie hepetoma.

• ’A hīmene ’e te mau tamari’i i te hō’ē hīmene nō ni’a i te rirora’a ’ei māramarama nō vetahi ē, mai te « Brillant pour lui », « Petite est la lumière en moi », ’aore rā, « Vois l’etoile au ciel » (Chants pour les enfants, 38, 96–97, 84).

E ’oa’oa tātou ma te orara’a mai tā Iesu i ha’api’i.

Mataio 5:44–45

Tē hina’aro nei Iesu ’ia here au i te mau ta’ata ato’a.

E ha’amata te mau tamari’i ’āpī i teienei i te ha’api’ipi’i ’ia fa’a’ite i te here, noa atu ’aita rātou e hāmani-maita’i-hia e tō rātou mau hoa, ’aore rā, e tō rātou mau taea’e ’e mau tuahine. ’A tai’o ai ’oe i te Mataio 5:44–45, ’a feruri e mea nāhea te mau ha’api’ira’a a te Fa’aora e tano ai nō te mau tamari’i tā ’oe e ha’api’i ra.

Te mau ’ātivite e au

• ’A fa’ahiti fa’ahou i te Mataio 5:44 ma te fa’a’ohipa i te mau ta’o ’e te mau tupura’a ’ohipa e hāro’aro’a ai ’e e ’ite ai te mau tamari’i ia rātou iho i roto. E ani i te mau tamari’i ’ia fa’a’ite mai i te taime ’a fa’a’ite ai rātou i te here i te hō’ē ta’ata, noa atu e ’ere i te mea ’ōhie. E aha tā teie mau ’itera’a i fa’atupu i roto ia rātou ?

• ’Ei piha ha’api’ira’a, e hīmene i te hō’ē hīmene nō ni’a i te herera’a ia vetahi ē, mai te « Aimez vos freres » (Chants pour les enfants,, 74). E aha tā tātou e ha’api’i mai nā roto mai i teie hīmene nō ni’a i te herera’a ia vetahi ’ē ?

• ’A hōro’a i te mau tamari’i, te mau ’api parau māfatu tei pāpa’ihia i ni’a iho « E fa’a’ite au i tō’u here i te mau ta’ata ato’a ». E ani ia rātou ’ia fa’a’una’una i te māfatu ’e ’ia fa’atautau i te reira i roto i tō rātou fare ’ei fa’aha’amana’ora’a ’ia here ia vetahi ’ē.

Ha’api’i i te ha’api’ira’a tumu : Te mau tamari’i pa’ari a’e

Mataio 5:3–12

E nehenehe au e ’oa’oa ’ia ora ana’e au mai tā Iesu i ha’api’i.

’A tai’o ai ’oe i te Mataio 5:3–12, ’e aha te mau ta’o ’e te mau pereota e puta mai i roto ia ’oe ? Nahea teie mau ha’api’ira’a i te ha’amaita’i i te orara’a ’o te mau tamari’i tā ’oe e ha’api’i ra ?

Te mau ’ātivite e au

• ’A hāmani i te hō’ē tāpura e piti ’ana’ira’a i ni’a i te tāpura ’ere’ere, ma te upo’o parau E ao tō… ’e Ha’amaita’ira’a. E ani i te mau tamari’i ’ia ’imi mai i te Mataio 5:3–12 nō te hi’o mai i te mai maita’i o te feiā tā Iesu i parau e ha’amaita’ihia rātou, ’e te mau ha’amaita’ira’a tāna i fafau ia rātou. I muri iho e fa’a’ī i te tāpura i te mea i ’itehia mai e rātou. E ’āparau ’e te mau tamari’i e aha te aura’a o te maita’i tāta’itahi ’e te ha’amaita’ira’a e tū’ati.

• Pāpa’i i te maita’i tāta’itahi nō roto mai i teie mau ’īrava i ni’a i te hō’ē tāreta ’e te ha’amaita’ira’a e tū’ati i te reira i ni’a i te hō’ē tāreta. ’Ei hi’ora’a, e tai’ohia te hō’ē tāreta « marū », ’e e tai’ohia te tahi ra « e riro ho’i ia rātou te fenua » (īrava°5). ’A vaiiho i te mau tamari’i e fa’atū’ati te mau maita’i ’e te mau ha’amaita’ira’a. E ani i te mau tamari’i ’ia rave mai hō’ē o te mau maita’i i roto i teie mau ’īrava ’o tā rātou e hina’aro e fa’ananea.

Mataio 5:9, 21–24, 38–47

E nehenehe au e riro ’ei fa’atupu hau.

’Ua ha’api’i Iesu ē, te feiā fa’atupu hau e parauhia rātou e mau tamari’i nā te Atua. Nahea ’oe i te fa’auru i te mau tamari’i ’ia riro ’ei fa’atupu hau ?

Te mau ’ātivite e au

• E ani i te hō’ē tamari’i ’ia tai’o pūai mai i te Mataio 5:9. E aha te fa’atupu hau ? E aha te mau rāve’a e riro ai tātou ’ei fa’atupu hau nō tō tātou ’utuāfare ’e nō te mau hoa ? (Nō te tahi mau mana’o, hi’o te mau ’īrava 21–24, 38–47.)

• E ani i te tamari’i tāta’itahi ’ia feruri i te hō’ē tupura’a ’ohipa e tītauhia te tauturu a te fa’atupu hau. E aha tā te fa’atupu hau e rave i roto i te reira tupura’a ’ohipa ?

• E ani i te mau tamari’i ’ia fa’a’ite mai i te mau taime ’a fa’a’ite ai rātou i te here i te ta’ata, noa atu te huru ta’a ’ē o te reira ta’ata i tō rātou, ’aore rā, e mea fifi ’ia here ia rātou.

Mataio 5:14–16

E nehenehe tō’u hi’ora’a e tūrama i te ’ē’a o vetahi ’ē nō te pe’e ia Iesu.

E rave rahi tamari’i tā ’outou e ha’api’i ra tei rave i te mau fafaura’a nō te bāpetizora’a. ’A feruri e nāhea te mau parau a te Fa’aora i roto i te Mataio 5:14–16 e tū’ati ai i tā rātou mau fafaura’a. E aha te mau poro’i a te Fatu i roto i teie tuha’a īrava nō te mau tamari’i i roto i tā ’oe piha ha’api’ira’a ?

Te mau ’ātivite e au

• ’A tauturu i te mau tamari’i ’ia tāmau ’ā’au i te Mataio 5:16. E pāpa’i i te ’īrava i ni’a i te tāpura ’ere’ere. E tai’o ’āmui e rave rahi taime, ma te tūmā i te tahi mau ta’o i te taime tāta’itahi. E ani i te mau tamari’i ’ia pāpa’i hōho’a i te mau mea ’o tā rātou e nehenehe e rave nō te riro ’ei māramarama nō vetahi ’ē. E parau e nāhea te rirora’a ’ei māramarama nō vetahi ’ē i te tauturu ia tātou, ’ia rave i tā tātou mau fafaura’a nō te bāpetizora’a (hi’o Mosia 18:8–10).

• ’A hīmene i te hō’ē hīmene nō ni’a i te fa’a’itera’a i te māramarama ia vetahi ’ē mai te « Petite est la lumière en moi » (Chants pour les enfants,°96). Nāhea tātou ’ia fa’a’ite i te māramarama o te Fa’aora ?

• E ani i te mau tamari’i ’ia pāpa’i hōho’a i te mau mea e hōro’a mai ia tātou te māramarama. ’A tai’o i te Mataio 5:14–16. E ani ia rātou nō te aha Iesu e hina’aro ai ’ia riro tātou ’ei māramarama nō te ao nei.

• E ani e piti tamari’i ’ia hi’o mata i te tahi ’e te tahi, ’e e ani i te hō’ē o rāua ’ia tāmata i te fa’a’ata i te tahi ma te tāpe’a ’ore i te tahi. ’A parau nō ni’a i te mana o te mau tamari’i nō te fa’atupu i te ’oa’oa i roto ia vetahi ’ē.

Fa’aitoito i te ha’api’ira’a i te fare

’A tītau i te mau tamari’i ’ia hi’o i te hō’ē ta’ata tei riro ’ei fa’atupu hau i teie hepetoma. I te ’ōmuara’a o te ha’api’ira’a i te hepetoma i muri nei, ’a ani ia rātou ’ia ’āparau mai ’o vai ’e e aha tā rātou i ’ite.

Ha’amaita’i i tā tātou ha’api’ira’a

Tauturu i te mau tamari’i ’ia ha’a. « ’A ha’api’i ai ’outou i te mau tamari’i, ’a vaiiho ia rātou ’ia patu, ’ia pāpa’i hōho’a, ’ia fa’a’ū, ’ia pāpa’i, ’e ’ia hāmani. ’Ua hau atu teie mau mea i te mau ’ātivite ’ārearea noa—e mea faufa’a te reira nō te ha’api’ira’a mai » (Ha’api’ira’a mai tā te Fa’aora,°25).