« 6–12 nō Fepuare. Ioane 2–4 : ‘’Ia fānau fa’ahou ’outou e ti’a ai’ », Mai, pe’e mai—nō te Paraimere : Faufa’a ’Āpī 2023 (2022)
« 6–12 nō Fepuare. Ioane 2–4 », Mai, pe’e mai—nō te Paraimere : 2023
6–12 nō Fepuare
Ioane 2–4
« ’Ia fānau fa’ahou ’outou e ti’a ai »
I roto i te hō’ē taime poto nō te Paraimere, ’aita tō oe e taime nō te ha’api’i i te mau parau tumu faufa’a ato’a o te Ioane 2–4.. ’A ’imi i te arata’ira’a a te vārua nō ni’a i te mea e ha’apāpū, nō te pāhono maita’i a’e i te mau hina’aro ’e te mau mea e ana’anataehia e te mau tamari’i.
Tītau i te mana’o
Nō te fa’aitoito i te mau tamari’i ’ia fa’a’ite mai e aha tā rātou i ha’api’i mai ’e te ’ohipa i tupu nō rātou, ’a ui atu ia rātou, e aha tā rātou i rave ’aita i māoro a’e nei nō te riro ’ei « rava’ai ta’ata » (Mataio 4:19). E hina’aro paha ’oe e hi’o fa’ahou e ’o rātou i te ha’api’ira’a o te hepetoma i ma’iri a’e nei.
Ha’api’i i te ha’api’ira’a tumu : Te mau tamari’i ’āpī
E hina’aro vau ’ia bāpetizohia vau ’e ’ia ha’amauhia nō te ho’i e ora i pīha’i iho i tō’u Metua i te ao ra.
Tē fa’aineine nei te mau tamari’i tā ’oe e ha’api’i ra ’ia rave i te mau ta’ahira’a faufa’a roa nō te ora fa’ahou i pīha’i iho i te Metua i te ao ra, ma te bāpetizohia (fānauhia i te pape) ’e ’ia ha’amauhia (fānauhia i te Vārua). Nāhea ’oe i te tauturu ia rātou ’ia hāro’aro’a i te faufa’a rahi o teie nā ’ōro’a e piti ?
Te mau ’ātivite e au
-
’A fa’ati’a poto i te ’ā’amu o Iesu e ha’api’i ra ia Nikodemo (hi’o Ioane 3:1–10). ’A fafau i te mau tamari’i ē, ’ia bāpetizo-ana’e-hia rātou, e hōro’a mai te Metua i te ao ra ia rātou te hōro’a o te Vārua Maita’i.
-
E fa’a’ite i te mau tamari’i i te ’api ’ātivite nō teie hepetoma, ’e e ani ia rātou ’ia fa’ata’a mai i te mau hōho’a pāpa’i. ’A tai’o i te Ioane 3:5, e ’a fa’a’ite pāpū ē, tītauhia tātou ’ia bāpetizohia ’e ’ia ha’amauhia nō te ora fa’ahou i pīha’i iho i te Metua i te ao ra.
-
E ani i te mau tamari’i ’ia parau mai e aha tā rātou e rave nō te hōroi i tō rātou rima. ’A fa’a’ite i te hōho’a o te Tamāhine e bāpetizohia ra (Buka hōho’a ’Evanelia, N°104), ’e ’a tauturu i te mau tamari’i ’ia fa’aau i te hōroira’a i tō tātou rima i te pape, i te rirora’a ’ei mea mā i te pae vārua nā roto i te bāpetizora’a.
’Ua here te Metua i te ao ra iā’u, nō reira ’ua hōro’a mai ’oia i te hō’ē Fa’aora nō’u.
Nāhea ’oe i te tauturu i te mau tamari’i ’ia ha’api’i mai i teie parau mau tao’a rahi ?
Te mau ’ātivite e au
-
E ani i te mau tamari’i ’ia fa’a’ī i te mau pereota mai teie te huru : « ’Ua here tō’u nā metua iā’u, nō reira, ’ua°… », tai’o Ioane 3:16. I muri iho e tauturu i te tamari’i tāta’itahi ’ia tāpiti fa’ahou i te Ioane 3:16, ma te mono i te parau « tō te ao » i tōna iho i’oa. ’A tauturu i te mau tamari’i ’ia ’ite e aha tā teie ’īrava e parau nei, te mea tā te Metua i te ao ra i rave nō tōna here ia tātou. E ani i te mau tamariʼi e nīnoʼa i te hō’ē hōhoʼa nō Iesu. ’A vaiiho ia rātou ’ia fa’a’ite mai i tā rātou hōho’a i te tahi ’e te tahi ’e i tō rātou here i te Fa’aora.
-
Hīmene ’āmui i te hō’ē hīmene nō ni’a ia Iesu, mai te « Il envoya son fils aimé » (Chants pour les enfants, 20–21). E ani i te mau tamari’i ’ia ’āfa’i i ni’a te hōho’a o Iesu i te mau taime ato’a e hīmene ai rātou i te hō’ē ta’o mai te « Tamaiti », « Iesu », ’aore rā, « Fa’aora ».
’O Iesu Mesia tō’u « pape ora »
E hāro’aro’a maita’i tā ’oe mau pīahi ato’a ’ia po’ihā rātou. Nāhea ’oe i te fa’a’ohipa i te reira ’itera’a nō te tauturu i te mau tamari’i ’ia hāro’aro’a ē, e hina’aro rahi tō tātou i te pape ora tā Iesu e pūpū mai ?
Te mau ’ātivite e au
-
’A fa’a’ohipa i te hōho’a i roto i te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare nō te fa’ati’a i te ’ā’amu o Iesu ’e te vahine i te ’āpo’o pape (hi’o Ioane 4:5–15). E ani i te mau tamari’i ’ia fa’ati’a fa’ahou mai i te ’ā’amu.
-
’A fa’a’ite i te hō’ē hāpaina pape, ’e e parau i te mau tamari’i nō te aha tātou e hina’aro ai i te pape. ’A tātara poto noa i te Ioane 4:5–15, ’e ’a fa’a’ite pāpū ē, e hōro’a mai Iesu Mesia ’e tāna ’evanelia i te ora i tō tātou vārua, mai te pape e hōro’a i te ora i tō tātou tino.
Ha’api’i i te ha’api’ira’a tumu : Te mau tamari’i pa’ari a’e
E nehenehe au e fa’atura i tō’u metua vahine mai tā Iesu i nā reira.
I te fa’aipoipora’a i Kana, ’ua parau Maria ia Iesu ē, ’ua pau te uaina. ’Ia au i te ’īritira’a a Iosepha Semita, ’ua pāhono atu Iesu i tōna metua vahine ma te ui atu, « e aha tā ’oe e hina’aro ’ia rave au nō ’oe, e teie nei vahine ? ’o tā’u ïa e rave » (i roto Ioane 2:4, nota i raro i te ’api°a). E hi’ora’a maita’i ’o Iesu, nō te huru tātou e fa’ariro ai i tō rātou metua vahine.
Te mau ’ātivite e au
-
E ani i te mau tamari’i ’ia tai’o i te Ioane 2:1–11 ’e ’ia fa’ati’a tāta’itahi fa’ahou mai, i te ’ā’amu nā roto i tā rātou iho mau parau.
-
E ani i te mau tamari’i ’ia tāpura mai i te mau mea e hina’aro tō rātou metua vahine i te tauturu. E ani ia rātou ’ia ha’api’ipi’i mai i te mau parau tā rātou e parau iāna ma te fa’a’ohipa i te tahi mau parau a Iesu : « E aha tā ’oe e hina’aro ’ia rave au nō ’oe ? » (Ioane 2:4, nota i raro i te ’api°a).
-
E ani i te tahi mau metua vahine ’ia haere mai i roto i tā ’oe piha ha’api’ira’a ’e ’ia fa’a’ite mai e aha tā tā rātou mau tamari’i e rave nō te fa’a’ite i te fa’atura ia rātou.
Nā ’ō atu ra Iesu i tōna metua vahine, « E aha tā ’oe e hina’aro ’ia rave au nō ’oe ? » (’Īritira’a a Iosepha Semita, Ioane 2:4 [i roto Ioane 2:4, nota i raro i te ’api°a]).
’Ia bāpetizohia ’e ’ia ha’amauhia e au ïa mai te fānau-fa’ahou-ra’a.
’Ia bāpetizo-ana’e-hia tātou, tā Iesu ïa e parau nei, ’ia « fānauhia i te pape », e fāri’i tātou i te faʼaʼoreraʼa o tā tātou mau hara, ’e e nehenehe « e ō i roto i te bāsileia o te Atua » (Ioane 3:5). Nāhea ’oe i te tauturu i tā ’oe mau pīahi ’ia hāro’aro’a e aha te aura’a te parau, ’ia fānau-fa’ahou-hia ?
Te mau ’ātivite e au
-
’A āno’i haere i te mau parau a te Fa’aora i roto i te Ioane 3:3, ’e ’a vaiiho i te mau tamari’i ’ia pānaho fa’ahou i te reira. Nāhea ’ia bāpetizohia ’e ’ai ha’amauhia e au ai mai te fānau-fa’ahou-ra’a ?
-
’A fa’a’ite i te hō’ē hōho’a o te hō’ē ’aiū fānau ’āpī ’e o te hō’ē ta’ata e bāpetizohia ra ’e e ha’amauhia ra (hi’o Buka hōho’a ’Evanelia, N°104–5). Nāhea tātou e riro ai mai te hō’ē ’aiū fānau ’āpī ’ia oti ana’e tātou i te bāpetizohia ’e i te ha’amauhia ? (hi’o Ioane 3:3–5).
-
E ani i te mau tamari’i ’ia fa’ati’a mai i te mau ha’amana’ora’a nō tō rātou bāpetizora’a. ’A tai’o Mosia 18:8–10 ’e Te Ha’api’ira’a Tumu ’e te mau Fafaura’a 20:37 nō te hi’o fa’ahou i te fafaura’a nō te bāpetizora’a. ’A ha’api’i i te mau tamari’i ē, te ravera’a i te ’ōro’a mo’a i te mau hepetoma ato’a ’o te hō’ē ïa rāve’a nō te tāmau noa te fa’anahora’a nō te fānau-fa’ahou-ra’a.
-
Tauturu i te mau tamari’i ’ia tāmau ’ā’au i te Hīro’a Fa’aro’o 1:4.
’Ua here te Metua i te ao ra iā’u, nō reira ’ua tono mai ’oia i tāna Tamaiti.
Nāfea ’oe i te tauturu i te mau tamari’i ’ia ’ite ē, ’ua tonohia mai Iesu Mesia i te fenua nei ’ei fa’a’itera’a i te here o te Metua i te ao ra ?
Te mau ’ātivite e au
-
E ani i te mau tamari’i ’ia pāpa’i hōho’a i tā rātou tao’a hōro’a au roa a’e, ’e te ta’ata tei hōro’a mai i taua tao’a hōro’a ra. I muri iho, e ani i te hō’ē tamari’i ’ia tai’o te Ioane 3:16. E aha te tao’a hōro’a tā te Metua i te ao ra i hōro’a mai nō tātou ? Nāhea teie tao’a hōro’a e fa’a’ite ai i tōna here ?
-
E ani i te mau tamari’i ’ia ’imi mai i te mau pāhonora’a i te uira’a, « Nō te aha te Metua i te ao ra i tono mai ai ia Iesu Mesia i’ō tātou nei ? », ’a tai’o ai rātou te Ioane 3:16–17 ’aore rā ’a hīmene ai ’aore rā ’a fa’aro’o ai « Il envoya son Fils aimé » (Chants pour les enfants, 20–21).
’Ua pūpū mai Iesu Mesia iā’u te « pape ora ».
Mai ia Iesu i fa’a’ohipa i te pape nō te ha’api’i i te vahine nō Sāmāria, e nehenehe ato’a ’oe e fa’a’ohipa i te pape nō te ha’api’i i te mau tamari’i, nō te aha tātou e hina’aro ai i te ’evanelia a Iesu Mesia.
Te mau ’ātivite e au
-
Ma te fa’a’ohipa i te Ioane 4:5–23, ’a pāpa’i i te mau parau ha’apotora’a nō roto mai i te ’ā’amu o te vahine i te ’āpo’o pape. E ani i te mau tamari’i ’ia hi’o fa’ahou i teie mau ‘īrava nō te fa’anaho i te mau pereota i roto i te ’āna’ira’a tano. E aha tā Iesu i tāmata i te ha’api’i i taua vahine ra ?
-
’A hōro’a i te pape inu nā te mau tamari’i, ’e e ani ia rātou ’ia fa’a’ite mai i te ’ohipa i tupu nō rātou ’ia po’ihā ana’e rātou. ’A parau e aha tā ’outou e fāri’i ’ia roa’a ana’e te pape inu. E ani i te mau tamari’i ’ia fa’a’ite mai te i’oa o te mau mea ’o te fa’a’oa’oa ia tātou nō te hō’ē taime, mai te hō’ē hāpaina pape. E aha te mau mea mai te « pape ora » ’o te fa’a’oa’oa ia tātou e a muri noa atu ?
-
Pāpa’i i ni’a i te tāpura ’ere’ere Nāhea te ’evanelia e riro ai mai te pape ? E ani i te mau tamari’i ’ia feruri, e nāhea rātou i te pāhono i teie uira’a ’a tai’o ai rātou i te Ioane 4:5–23.
Fa’aitoito i te ha’api’ira’a i te fare
’A feruri e ani i te mau tamari’i ’ia hōro’a i te mau melo o tō rātou ’utuāfare te hō’ē hāpaina pape ’ia tae ana’e rātou i te fare. ’Ia rave ana’e rātou i te reira, e fa’a’ite atu rātou i te mea tā rātou i ’apo mai nō ni’a i te pape ora.
Ha’amaita’i i tā tātou ha’api’ira’a
Fa’a’ohipa i te mau ’api ’ātivite. ’A fa’a’ī ai te mau tamari’i i te ’api ’ātivite, ’a fa’a’ohipa i te reira taime nō te hi’o fa’ahou i te mau parau tumu o te ha’api’ira’a.