« 6–12 nō Fepuare. Ioane 2–4: ‘’Ia fānau fa’ahou ’outou e ti’a ai’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)

« 6–12 nō Fepuare. Ioane 2–4 », Mai, pe’e mai—nō te ta’ata hō’ē ’e te ’utuāfare : 2023

Hōho’a

Iesu e paraparau ra ia Nikodemo

6–12 nō Fepuare

Ioane 2–4

« ’Ia fānau fa’ahou ’outou e ti’a ai »

’A tai’o ai ’outou i te Ioane 2–4, e ha’api’i mai te Vārua ia ’outou i te mau mea nō ni’a i tō ’outou iho fa’afāriura’a. Tāpa’o i tāna e muhumuhu mai. E ’ite ’outou i te tahi atu ā ’ohipa pae vārua e ’apo mai i roto i te mau mana’o tuatāpapara’a o teie arata’ira’a ha’api’ira’a.

Pāpa’i i te mau mana’o e tae mai

I te hō’ē fa’aipoipora’a i Kana, ’ua taui te Mesia i te pape ’ei uaina—e semeio tā Ioane i parau ’o te « semeio mātāmua » (Ioane 2:11). E parau mau te reira, ’ua rau ho’i te tumu. Noa atu ē ’o te semeio mātāmua teie tā Iesu i rave i mua i te ta’ata, e nehenehe ato’a te reira e fa’ahōho’a i te tahi atu ha’amatara’a semeio—’oia ho’i, te ’ohipa tau maoro nō te tauira’a i tō tātou ’ā’au ’a rahi noa ato’a ai tātou i te riro mai tō tātou Fa’aora te huru. E ha’amata teie semeio nō te orara’a tā’āto’a nā roto i te fa’aotira’a e pe’e ia Iesu Mesia ’e e taui ’e e ora i te hō’ē orara’a maita’i a’e nā roto iāna. Nō te mea e nehenehe te reira semeio e taui roa i te orara’a, e tano maita’i ïa te parau « fānau fa’ahou » nō te fa’ahōho’a i te reira (Ioane 3:7). Teie rā, te fānau-fa’ahou-ra’a, ’o te ha’amatara’a noa ïa nō te ’ē’a nō te ti’ara’a pipi. Tē fa’aha’amana’o nei te mau parau a te Mesia i te vahine samaria i te ’āpo’o pape ra ē, ’ia tāmau ā tātou i ni’a i terā ’ē’a, i te hope’a e riro mai te ’evanelia ’ei « pape piha’a » i roto ia tātou, « i te piha’ara’a ē tae noa atu i te ora mure ’ore ra » (Ioane 4:14).

Hōho’a

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Ioane 2:1–11

I te mau semeio a Iesu Mesia « te fa’a’itera’a i tōna hanahana. »

’A tai’o ai ’oe nō ni’a i te tauira’a te Fa’aora i te pape ’ei uaina, i roto i te Ioane 2:1–11, e nehenehe ato’a ’oe e ’apo mai i te tahi atu ā mana’o nā roto i te ferurira’a i te hi’ora’a a te tahi atu mau ta’ata i reira, mai ia Maria, te mau pipi ’e tē vai atu ra. ’Āhani tei reira ’oe i te ’itera’a i te mau ’ohipa e fa’ati’ahia ra, e aha te mana’o e tae mai nō ni’a ia Iesu ? E aha tā teie semeio e ha’api’i nei ia ’outou nō ni’a iāna ?

Ioane 3:1–21

E ti’a iā’u ’ia fānau-fa’ahou-hia nō te tomo i roto i te bāsileia o te Atua.

I te taime ’a haere ’ōmo’e mai ai Nikodemo ia Iesu ra, e ta’ata hi’ohi’o ri’i noa ’oia. I muri mai rā, ’ua turu pāpū ’oia ia Iesu (hi’o Ioane 7:45–52) ’e ’ua ’āmui roa i te feiā ti’aturi i te hunara’ahia te Fa’aora (hi’o Ioane 19:38–40). E aha te mau ha’api’ira’a tā ’oe e ’ite nei i roto i te Ioane 3:1–21 tei fa’auru ia Nikodemo ’ia pe’e ia Iesu, ’ia fānau-fa’ahou-hia ’oia ?

’Ua ha’api’i mai te peropheta Iosepha Semita ē : « Nā te Vārua o te Atua e fa’atupu i te fānau-fa’ahou-ra’a nā roto i te mau ’ōro’a » (Te Mau Ha’api’ira’a a te Mau Peresideni o te ’Ēkālesia : Iosepha Semita [2007], 109). E aha tā tō ’oe bāpetizora’a ’e tō ’oe ha’amaura’a—’oia ho’i te fānaura’a « i te pape ’e te Vārua » (Ioane 3:5)—i rave nō tō ’oe fānau-fa’ahou-ra’a ? E aha tā ’oe rave nei ’ia tāmau noa teie ’ohipa tau maoro nō te tauira’a ? (hi’o Alama 5:11–14).

Hi’o ato’a Mosia 5:7 ; 27:25–26 ; David A. Bednar, « ’Ia fānau faʼahou ʼoutou e tiʼa ai », Liahona, Mē 2007, 19–22.

Ioane 3:16–17

Tē fa’a’ite nei te Metua i te ao ra i tōna here iā’u nā roto ia Iesu Mesia.

’Ua ha’api’i Elder Jeffrey R. Holland : « Te parau mau rahi mātāmua o te tau mure ’ore, ’o te herera’a ïa te Atua ia tātou ma tōna ’ā’au ato’a ’e te pūai ’e te mana’o ’e te itoito » (« Ananahi ho’i Iehova e rave ai i te mea ta’a ’ē i roto ia ’outou na », Liahona, Mē 2016, 127). Mai te aha te huru ’oe i te ’itera’a i te here o te Atua nā roto i te hōro’a nō tāna Tamaiti ?

Tē hōro’a nei te ’ōro’a mo’a i te taime nō te feruri i ni’a i te here o te Atua ’e i ni’a i te hōro’a nō tāna Tamaiti ? E aha te mau hīmene ’ōro’a e tauturu nei ia ’oe ’ia putapū i tōna here ? E aha tā ’oe e nehenehe e rave nō te fa’ariro i te ’ōro’a ’ei ’ohipa faufa’a a’e ?

’A tai’o noa ai ’oe nō ni’a i te mau ha’api’ira’a ’e te tau tāvinira’a a te Fa’aora, ’a ui ia ’oe iho ē, e nāhea te mau mea tā ’oe e tai’o nei i te tauturu ia ’oe ’ia māramarama ’e ’ia putapū i te here o te Atua.

Ioane 4:24

E vārua ānei te Atua ?

Tē vai ra paha te ta’ata e ta’a ’ore ra i te fa’ahitira’a a Iesu ē, e vārua te Atua. E ha’apāpūra’a faufa’a rahi e vai ra i roto i te ’Īritira’a a Iosepha Semita nō teie ’īrava : « Nō te mea ’ua fafau atu te Atua i tōna Vārua ia rātou ». Tē ha’api’i ato’a nei te heheura’a i tō tātou nei anotau ē, e tino ’ī’o ’e te ivi tō te Atua (hi’o Te Ha’api’ira’a Tumu ’e te mau Fafaura’a 130:22–23 ; hi’o ato’a Genese 5:1–3 ; Hebera 1:1–3).

Ioane 4:5–26

Tē pūpū nei te Mesia i tāna pape ora iā’u.

E aha te aura’a te parau a Iesu i te vahine samaria ē, te ta’ata e inu i te pape tāna e pūpū atu, e’ita roa atu ’oia e po’ihā fa’ahou ? Mai te aha te huru te ’evanelia mai te pape ora ?

’O te ’evanelia a te Mesia te pape ora e fa’ainu i tō tātou vairua.

Hō’ē o te mau parau a te Fa’aora i te vahine samaria ’oia ho’i, e mea faufa’a a’e te huru tātou e ha’amori, i te vāhi tātou e ha’amori (hi’o Ioane 4:21–24). E aha tā ’oe e rave nei nō te « ha’amori i te Metua […] ma te vārua ’e te parau mau » ? (Ioane 4:23).

Hi’o ato’a Arata’i nō te mau pāpa’ira’a mo’a, « Ha’amori », scriptures.ChurchofJesusChrist.org ; Dean M. Davies, « Te mau ha’amaita’ira’a nō te ha’amorira’a », Liahona, Nov. 2016, 93–95.

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Ioane 2–4.’A tai’o ai tō ’outou ’utuāfare i teie mau pene i teie hepetoma, ’a hi’o ta’a ’ē ’ua nāhea te Fa’aora i te fa’a’ohipara’a i te mau mea mātauhia—te fānaura’a, te mata’i, te pape ’e te mā’a—nō te ha’api’i i te mau parau mau pae vārua. E aha te mau tauiha’a i tō ’outou fare e nehenehe e fa’a’ohipa nō te ha’api’i i te mau parau mau pae vārua ?

’A tuatāpapa ai ’outou i teie mau pene, e nehenehe e māta’ita’i ’āmui i te mau video nō ni’a i teie mau ’ohipa i tupu : « Jesus Turns Water into Wine [’Ua taui Iesu i te pape ’ei uaina] », « Jesus Cleanses the Temple [Tē tāmā ra Iesu i te hiero] », « Jesus Teaches of Being Born Again [Tē ha’api’i nei Iesu nō ni’a i te fānau-fa’ahou-ra’a] » ’e « Jesus Teaches a Samaritan Woman [Tē ha’api’i nei Iesu i te hō’ē vahine samaria] » (ChurchofJesusChrist.org).

Ioane 2:13–17.E aha te mau fa’aurura’a ’ino tei tītauhia i tō ’outou ’utuāfare ’ia vaiiho i rāpae i tō ’outou fare ’ia riro te reira ’ei vāhi mo’a—mai te hiero te huru ? E aha tā ’outou e rave ’ia vai noa te reira mau mea i rāpae ?

Ioane 3:1–6.’A paraparau i te mau melo nō te ’utuāfare nō ni’a i te semeio nō te hapūra’a ’e te fānaura’a—te hāmanira’a i te hō’ē mea ora ’e te māramarama. ’Ua ha’api’i Iesu ē, e mea ti’a ia tātou ’ia fānau-fa’ahou-hia hou ’a tomo ai i roto i te bāsileia o te Atua. Nō te aha e fa’ahōho’ara’a maita’i te fānau-fa’ahou-ra’a nō te tauira’a tei tītauhia ia tātou hou ’a tomo atu ai i roto i te bāsileia o te Atua ? Nāhea tātou e ’ite ai i te ’ohipa nō te fānau-fa’ahou-ra’a pae vārua ?

Ioane 3:16–17.E ani i te mau melo o te ’utuāfare ’ia fa’ahiti fa’ahou ā i teie ’īrava nā roto i tā rātou iho mau parau mai te mea ra ē, tē ha’api’i ra rātou i te reira i te hō’ē hoa. ’Ua nāhea Iesu Mesia i te tauturura’a ia tātou ’ia putapū i te here o te Atua ?

Ioane 4:5–15.E aha tā te Fa’aora i ha’api’i ia tātou ’a fa’aau ai ’oia i tāna ’evanelia i te pape ora ? E nehenehe paha te ’utuāfare e hi’o i te tahi pape e tahe ra ma te fa’ata’a i te huru pape maita’i. Nō te aha i tītauhia ai ia tātou ’ia inu i te pape i te mau mahana ato’a ? E aha te mau tātarara’a nō te fa’aaura’a o te ’evanelia a Iesu Mesia i te « pape pīha’a […] i te pīha’ara’a ē tae noa atu i te ora mure ’ore ra » ? (Ioane 4:14).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « E here tō te Atua », Te mau hīmene,, 107.

Ha’amaita’i i tā’u iho tuatāpapara’a pāpa’ira’a mo’a

E ’imi i te mau taipe. Pinepine te mau pāpa’ira’a mo’a i te fa’a’ohipa i te mau tao’a, te mau ’ohipa e tupu, te ’ohipa e ravehia ’ei fa’ahōho’ara’a i te mau parau mau pae vārua. E nehenehe teie mau taipe e fa’arahi i tō ’outou māramaramara’a i te ha’api’ira’a tumu e ha’api’ihia ra. ’Ei hi’ora’a, ’ua fa’ahōho’a te Fa’aora i te fa’afāriura’a i te fānau-fa’ahou-ra’a.