Iesu e ha’api’i ra i ni’a i te mou’a

Jesus Preaching Sermon on the Mount [Tē ha’api’i ra Iesu i ni’a i te mou’a], nā Gustave Doré

13–19 nō Fepuare

Mataio 5 ; Luka 6

« E ao tō ’outou »

E hi’o maita’i i te mau mana’o e tae mai ’a tai’o ai ’outou i te Mataio 5 ’e te Luka 6, ’e ’a pāpa’i i te reira i roto i te hō’ē buka tuatāpapara’a ’aore rā nā roto i te tahi atu rāve’a nō te fa’aherehere i te reira. E nehenehe teie arata’i ha’api’ira’a e tauturu ia ’outou ’ia hi’o mai i te tahi mau parau tumu faufa’a rahi i roto i teie mau pene, terā rā, ’ia vai matara noa ato’a ’outou i te tahi atu mau parau tumu tā ’outou iho e ’ite mai i roto i tā ’outou tuatāpapara’a.

Pāpa’i i te mau mana’o e tae mai

I teie taime o tāna tāvinira’a, ’ua pāpū maita’i ē, e ’ere te mau ha’api’ira’a a Iesu mai te mau ha’api’ira’a tā te ta’ata nō tōna tau i mātau i te fa’aro’o. E fāri’i ïa te feiā veve i te bāsileia o te Atua ? E riro ïa i tei marū te fenua ? E ao ïa tō rātou i hāmani-’ino-hia ? ’Aita te mau pāpa’i parau ’e te mau pharisea e ha’api’i ra i taua mau mea ra. Nō te feiā rā tei māramarama mau i te ture a te Atua, ’ua ’ite ïa rātou i te parau mau i roto i te mau parau a te Fa’aora. Te mau ture ra « e mata ra, ’ei mata ïa ho’o » ’e « e riri atu i tō ’enemi », e mau ture iti ïa (Mataio 5:38, 43). ’Ua tae mai rā Iesu Mesia nō te ha’api’i i te ta’ata i te hō’ē ture teitei a’e (hi’o 3 Nephi 15:2–10), tei ’ōpuahia nō te tauturu ia tātou ’ia riro i te hō’ē mahana ’ei mea « maita’i roa ho’i… mai [tō tātou] Metua i te ao ra e maita’i roa ra » (Mataio 5:48).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 5:1–12 ; Luka 6:20–26, 46–49

E tae mai te ’oa’oa vai maoro nā roto i te orara’a mai tā Iesu Mesia i ha’api’i.

’Ua hina’aro te mau ta’ata ato’a i te ’oa’oa, ’aita rā rātou e ’imi nei i te hō’ē ā vāhi. Tē vai ra e ’imi nei i roto i te mana ’e te ti’ara’a o tō te ao, vetahi i roto i te tao’a rahi ’aore rā te ha’amāhara’a i te mau hina’aro o te tino. ’Ua haere mai Iesu Mesia nō te ha’api’i i te ’ē’a ’ia tae i te ’oa’oa vai maoro, nō te ha’api’i i te aura’a mau nō te ti’ara’a ha’amaita’ihia. E aha te ha’api’ira’a tā ’oe e ’apo nei nō ni’a i te roa’ara’a te ’oa’oa vai maoro i roto i te Mataio 5:1–12 ’e te Luka 6:20–26 ? E aha te ta’a-’ē-ra’a i roto i teie hi’ora’a ’e te hi’ora’a a tō te ao nō ni’a i te ’oa’oa ?

E aha tā teie mau ’īrava, ’e tā te Luka 6:46–49, ato’a, e ha’api’i nei nō ni’a i te rirora’a ’ei pipi nā Iesu Mesia ? E aha te fa’aurura’a e tae mai nō te mea e rave, nō te fa’atupura’a i te huru tei fa’ata’ahia i roto i teie mau ’īrava ?

Hi’o ato’a Arata’i nō te mau pāpa’ira’a mo’a, « Ha’amaita’ira’a, e ao tō tei », scriptures.ChurchofJesusChrist.org ; « Sermon on the Mount : The Beatitudes [Te a’ora’a i ni’a i te mou’a : Te mau ha’amaita’ira’a] » (video), ChurchofJesusChrist.org.

Mataio 5:13

« ’O ’outou te miti nō te fenua. »

Erā ’ē te tau te miti i te fa’a’ohipahia nō te ha’avaimaoro, nō te tāmiti ’e nō te tāmā. E aura’a ato’a tō te miti i roto i te ha’apa’ora’a fa’aro’o a te ’āti ’Īserā’ela. E au te reira i te peu tahito ra nō te fa’atusiara’a ’ānimara i raro a’e i te ture a Mose (hi’o Levitiko 2:13 ; Nūmera 18:19). ’Ia mā’aro te miti, ’aita fa’ahou ïa tōna maita’i ’e e « mea faufa’a ’ore » (Mataio 5:13). E tupu te reira ’ia fa’arapuhia te reira i te tahi atu mau mea ri’i vi’ivi’i.

E tāpe’a noa i te reira i roto i te ferurira’a ’a hi’o ai i te Mataio 5:13. E nāhea ’oe ’ia tāpe’a i tō ’oe tāmitira’a ’ei pipi nā Iesu Mesia ? E nāhea ’oe ’ia fa’atupu i tā ’oe ’ohipa ha’avaimaorora’a ’e te tāmāra’a ’ei miti nō te fenua ?

Hi’o ato’a Te Ha’api’ira’a Tumu ’e te mau Fafaura’a 103:9–10.

e miti

« ’O ’outou te miti nō te fenua » (Mataio 5:13).

Mataio 5:17–48 ; Luka 6:27–35

’Ua mono te ture a te Mesia i te ture a Mose.

’Ua māere paha te mau pipi i tō rātou fa’aro’ora’a ia Iesu i te paraura’a mai ē, tītauhia ’ia rahi atu ā tō rātou parauti’a i tō te mau pāpa’i parau ’e tō te mau pharisea (hi’o Mataio 5:20), rātou ho’i tei te’ote’o na i te maita’i rahi nō tā rātou ha’apa’ora’a i te ture a Mose.

’A tai’o ai ’oe i te Mataio 5:21–48 ’e te Luka 6:27–35, e nehenehe e tāpa’o i te huru tei tītauhia i roto i te ture a Mose (« ’Ua fa’aro’o ho’i ’outou ē… ») ’e tā Iesu i ha’api’i nō te fa’ateitei i te reira. I tō ’oe mana’o, nō te aha e mea teitei a’e te ravera’a a te Fa’aora ?

’Ei hi’ora’a, e aha tā Iesu i ha’api’i i roto i te Mataio 5:27–28 nō ni’a i tā tātou hōpoi’a i ni’a i tō tātou mau mana’o ? Nāhea ’oe e hi’opo’a rahi a’e ai i te mau mana’o o tō ’oe ferurira’a ’e o tō ’oe ’ā’au ? (hi’o Te Ha’api’ira’a Tumu ’e te mau Fafaura’a 121:45).

Hi’o ato’a « Sermon on the Mount : The Higher Law [Te a’ora’a i ni’a i te mou’a : Te ture teitei a’e] » (video), ChurchofJesusChrist.org.

Mataio 5:48

Tē tī’ai mau nei ānei te Metua i te ao ra ’ia maita’i roa vau ?

’Ua ha’api’i te peresideni Russell M. Nelson :

« Te ta’o perfect [maitai roa] e ’īritira’a ïa nō te parau hēreni ra teleios, ’oia ho’i, ‘tei oti’… Te hete tumu (infinitif) o teie ihoparau (verbe), ’o teleiono, ïa, tōna aura’a, ‘’ia tae’a i te hope’a o te hō’ē tere roa, ’ia tupu hope roa, ’ia fa’atupu ’aore rā ’ia fa’ahope.’ ’A hi’o maita’i na, ’aita teie ta’o e parau nei ē ‘’aore e hape’ ; tē parau nei rā ‘e rave fa’aoti i te hō’ē fā ātea’…

« […] ’Ua ha’api’i te Fatu : ‘’Aore e ti’a ia ’outou ’ia ti’a i mua i te aro o te Atua i teienei […] nō reira ’a tāmau noa i te fa’a’oroma’i ē tae noa atu i te taime ’outou e maita’i roa ai’ [Te Ha’api’ira’a Tumu ’e te mau Fafaura’a 67:13].

« ’Eiaha na tātou e hepohepo mai te peu e au ē, e mea huru pa’ari ’e te hope’a ’ore tā tātou tauto’ora’a māite i te maita’i-roa-ra’a. Tē tīa’i noa mai ra te maita’i-roa-ra’a. E tae hope mai te reira i muri noa i te Ti’afa’ahoura’a, ’e nā roto ana’e i te Fatu. E tīa ai te reira i te feiā ato’a tei here iāna ’e ’o tē ha’apa’o i tāna mau fa’auera’a » (« Perfection Pending », Ensign, Nov. 1995, 86, 88).

Hi’o ato’a 2 Petero 1:3–11 ; Moroni 10:32–33 ; Te Ha’api’ira’a Tumu ’e te mau Fafaura’a 76:69 ; Jeffrey R. Holland, « ’Ia maita’i roa ho’i ’outou—I te pae hope’a », Liahona, Nov. 2017, 40–42.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 5:1–9.E aha te mau parau tumu i roto i te Mataio 5:1–9 e nehenehe e tauturu i tō ’outou ’utuāfare ’ia riro ’ei vāhi ’oa’oa a’e ? E nehenehe ’outou e mā’iti hō’ē ’aore rā e piti mea faufa’a ta’a ē nō tō ’outou ’utuāfare. ’Ei hi’ora’a, e aha te mau ha’api’ira’a tā tātou e ’ite nei ’o tē nehenehe e tauturu ia tātou ’ia riro ’ei ta’ata fa’atupu hau ? (hi’o Mataio 5:21–25, 38–44). E aha te mau fā tā tātou e nehenehe e ha’amau ? E nāhea tātou ’ia hi’opo’a i te reira ?

Mataio 5:13.’A ’amu ’āmui i te hō’ē mā’a tei tu’uhia te miti papa’ā ’e te tahi mā’a ’aita e miti papa’ā. E aha te ta’a-’ē-ra’a ? E aha te aura’a te parau, « ’o ’outou te miti nō te fenua » ? Nāhea tātou i te rave i te reira ?

Mataio 5:14–16.’Ei tauturura’a i tō ’outou ’utuāfare ’ia māramarama i te aura’a nō te rirora’a ’ei « māramarama o teie nei ao », e nehenehe tā ’outou e hi’ohi’o i te mau puna māramarama i roto i tō ’outou ’utuāfare, i roto i te mau ta’ata tupu ’e i roto i te ao. Pēnei a’e e tauturu-rahi-hia ’outou ’ia fa’a’ite i te mea e tupu ’ia tāpuni-ana’e-hia te hō’ē mōrī. E aha te aura’a o te parau a Iesu ē : « ’O ’outou te māramarama o teie nei ao » ? (Mataio 5:14). ’O vai tei riro na mai te hō’ē māramarama nō tō tātou ’utuāfare ? Nāhea tātou e riro ai ’ei māramarama nō vetahi ’ē ? (hi’o 3 Nephi 18:16, 24–25).

Mataio 5:43–45.’A tai’o ai tō ’outou ’utuāfare i te mau parau a te Fa’aora i roto i teie mau ’īrava, e nehenehe ’outou e paraparau ta’a ’ē nō ni’a i te mau ta’ata tā ’outou e nehenehe e here, e ha’amaita’i ’e e pure nō rātou. Nāhea tātou e fa’arahi ai i te here nō rātou ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Petite est la lumière en moi », Chants pour les enfants, 96.

Ha’amaita’i i tā tātou ha’api’ira’a

’Ei ta’ata hi’o haere. « ’A ara ai ’outou i te mea e tupu ra i roto i te orara’a o tā ’outou [mau tamari’i], e ’ite mai ’outou i te mau taime maita’i nō te ha’api’i atu […] E ti’a ato’a i te mau mana’o tā [rātou] e parau ’aore rā te mau uira’a tā rātou e ani ’e i te hope’a e taime ha’api’ira’a » (Ha’api’ira’a mai tā te Fa’aora, 16).

e mōrī hinu

« ’O ’outou te māramarama o teie nei ao » (Mataio 5:14).