Jesus Teaching the People by the Seashore [Tē ha’api’i nei Iesu i te ta’ata i te pae tahatai], nā James Tissot

20–26 nō Fepuare

Mataio 6–7

« I ha’api’i ho’i ’oia ia rātou ma te mana »

’Ia tai’o tātou i te mau pāpa’ira’a mo’a ma te uira’a i te ferurira’a ’e ma te hia’ai pāpū e māramarama i tā te Metua i te ao ra ’ia ’ite tātou, tē ani ra ïa tātou i te Vārua Maita’i ’ia fa’auru mai ia tātou. ’A tai’o ai ’outou i te Mataio 6–7, ’a hi’o maita’i i teie mau mana’o e tae mai.

Pāpa’i i te mau mana’o e tae mai

’Ua riro te A’ora’a i ni’a i te mou’a hō’ē o te mau a’ora’a mātau-roa-hia i rotopū i te mau keresetiano. ’Ua ha’api’i te Fa’aora nā roto i te mau hōho’a rau, mai te ’oire i ni’a i te ’āivi, te lili o te ’āua ’e te mau luto tei fa’ahōho’a ia rātou mai te māmoe. E hau atu rā te A’ora’a i ni’a i te mou’a i te hō’ē a’ora’a nehenehe. E ti’a i te mana nō te mau ha’api’ira’a a te Fa’aora i tāna mau pipi e taui i tō tātou orara’a, i te taime iho ā ra e ora tātou i te reira. ’Ei reira tāna mau parau e rahi a’e i te parau noa ; e riro mai te reira ’ei niu pāpū nō te orara’a, ’e mai te fare o te ta’ata pa’ari ra, e vai ’āueue ’ore te reira i mua i te mau mata’i ’e te mau vai pu’e o te ao (hi’o Mataio 7:24–25).

Mau mana’o nō tā’u iho tuatāpapara’a pāpa’ira’a mo’a

Mataio 6–7

E nehenehe te orara’a i te mau ha’api’ira’a a te Fa’aora e tauturu iā’u ’ia riro mai iāna te huru.

E rave rahi parau tumu nō te ’evanelia i roto i te A’ora’a i ni’a i te mou’a. ’A tuatāpapa ai ’oe i teie mau pene, ’a ani i te Fatu i te mea tāna i hina’aro ’ia ha’api’i mai ’oe.

Hō’ē paha parau tumu tā ’oe e ’ite mai, ’oia ho’i, tītauhia ’ia tu’u nā mua i te mau mea a te Atua nā ni’a atu i te mau mea a tō te ao nei. E aha te ha’api’ira’a a te Fa’aora i roto i te Mataio 6–7 e tauturu ia ’oe ’ia rōtahi i ni’a i te mau mea o te ra’i ? E aha te tahi atu ā mea i tō ’oe ferurira’a, ’aore rā e aha te tahi atu ā mana’o e tae mai ? E aha tei fa’auruhia ia ’oe ’ia rave ? E tāpa’opa’o i te mau mana’o e tae mai. ’Ei hi’ora’a :

Mataio 6:1–4	Tē hina’aro nei au e ha’apa’o rahi a’e i tā te Atua e mana’o ra iā’u, i tā vetahi ’ē e mana’o ra iā’u.

Te tahi atu parau tumu i roto i te Mataio 6–7, ’o te pure ïa. E rave i te tahi taime nō te feruri i tā ’oe mau pure. ’Ia hi’o ’oe, e aha te huru ’oe i roto i tā ’oe mau tauto’ora’a e ha’afātata atu ā i te Atua nā roto i te pure ? E aha te mau ha’api’ira’a i roto i te Mataio 6–7 e fa’auru nei ia ’oe ’ia ha’amaita’i atu ā i te huru ’oe e pure nei ? Pāpa’i i te mau mana’o tā ’outou e fāri’i. ’Ei hi’ora’a :

Mataio 6:9	’Ia pure au, e hina’aro vau e fa’a’ite i tō’u mana’o tura nō te i’oa o te Metua i te ao ra.
Mataio 6:10	’Ia pure au, e nehenehe tā’u e parau i to’u hia’ai ’ia ravehia te hina’aro o te Fatu.

E nehenehe e tai’o fa’ahou ā i te A’ora’a i ni’a i te mou’a, ma te ’imi i te tahi atu ā tumu parau ’aore rā te tahi atu ā poro’i e ho’i noa mai ’e ’o tē tano ta’a ’ē ia ’oe. E tāpa’opa’o i te mea e ’itehia mai i roto i te hō’ē buka tuatāpapara’a, nā reira ato’a tō ’oe iho mana’o ’e te mau mana’o e tae mai.

E nehenehe e ha’afātata atu ā i te Atua nā roto i te pure.

Mataio 6:7

E aha te aura’a nō te parau ē « rahi te parau ri’i faufa’a ’ore » i roto i te hō’ē pure ?

Pinepine te ta’ata i te parau ē « te parau ri’i faufa’a ’ore » ’o te fa’ahiti-noa-ra’a ïa i te hō’ē ā parau nā ni’a iho noa. Teienei rā, te parau faufa’a ’ore ’o te mea ïa ’aita tōna e faufa’a. Te purera’a ma « te parau ri’i faufa’a ’ore », e nehenehe ïa e parau ē ’o te pure ’aita te mana’o pāpū, ’aita te ’ā’au tae (hi’o Alama 31:12–23).

Mataio 7:1–5

E nehenehe au e ha’avā ma te parauti’a.

I roto i te Mataio 7:1, e au ē tē parau ra te Fa’aora ’eiaha roa atu tātou e ha’avā, ’e i roto i te tahi atu mau ’īrava (mai te tahi ato’a ’īrava i roto i teie pene), tē fa’a’ite mai nei ïa ’oia e nāhea tātou i te ha’avā. Mai te peu e mea huru ta’a ’ore te reira, pēnei a’e ïa e tauturu mai te ’Īritira’a a Iosepha Semita nō teie ’īrava : « ’Eiaha e ha’avā ma te parauti’a ’ore, ’ia ’ore ’outou ’ia ha’avāhia mai ; ’a ha’avā rā i te ha’avāra’a parauti’a».(in Matthew 7:1, footnote a). E aha tā ’oe e ’ite ra i roto i te Mataio 7:1–5, ’e i roto ato’a i te tā’āto’ara’a o te pene, ’o tē tauturu ia ’oe ’ia ’ite e nāhea i te « ha’avā i te ha’avāra’a parauti’a » ?

Hi’o ato’a Gospel Topics, “Judging Others,” topics.ChurchofJesusChrist.org; Lynn G. Robbins, « Te ha’avā parauti’a », Liahona, Nov. 2016, 96–98.

Mataio 7:21–23

E riro vau i te mātau ia Iesu Mesia nā roto i te ravera’a i tōna hina’aro.

Te parau ē « ’Aita roa ā vau i ’ite ia ’outou » i roto i te Mataio 7:23 ’ua tauihia ïa i roto i te ’Īritira’a a Iosepha Semita ’ei « ’Aita roa ā ’outou i ’ite iā’u » (Matthew 7:23, footnote a). E aha tā teie tauira’a e tauturu nei ia ’oe ’ia māramarama maita’i a’e nō ni’a i te ha’api’ira’a a te Fatu i roto i te mau ’īrava 21–22, nō ni’a i te ravera’a i tōna hina’aro ? E aha te huru tō ’oe mātaura’a i te Fatu ? E aha tā ’oe e nehenehe e rave nō te mātau maita’i a’e iāna ?

hi’o ato’a David A. Bednar, « ’Āhiri ’outou i ’ite na iā’u », Liahona, Novema 2016, 102–5.

Mataio 7:24–27

Nā te ha’apa’ora’a i te mau ha’api’ira’a a te Fa’aora e ha’amau i te hō’ē niu pāpū nō tō’u orara’a.

’Aita te orara’a i te ’evanelia e fa’a’ore nei i te ’ati i roto i tō tātou nei orara’a. ’O nā fare e piti ato’a ra i roto i te parabole a te Fa’aora, i roto i te Mataio 7:24–27, tei fa’aruru i terā vero. ’Ua ti’a rā i te hō’ē o nā fare i te vai ’āueue ’ore i mua i te reira. ’Ua nāhea te orara’a i te mau ha’api’ira’a a te Fa’aora i te ha’amaura’a i te hō’ē niu pa’ari nō ’oe ? E aha te fa’aurura’a e tae mai nei nō te mea e rave nō te tāmau noa i te patu i tō ’oe « fare i ni’a i te papa » ? (hi’o ’īrava 24).

Hi’o ato’a Helamana 5:12.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 6–7.Hō’ē rāve’a nō te ’apo mai te ’utuāfare i te ha’api’ira’a i roto i te Mataio 6–7 ’o te māta’ita’ira’a ïa i te mau video « Sermon on the Mount : The Lord’s Prayer [A’ora’a i ni’a i te mou’a : Te pure a te Fatu] » ’e « Sermon on the Mount : Treasures in Heaven [A’ora’a i ni’a i te mou’a : Te mau tao’a i te ra’i ra] » (ChurchofJesusChrist.org). E nehenehe te mau melo o te ’utuāfare e tai’o i roto i tā rātou mau pāpa’ira’a mo’a ’e ’ia tāpe’a i te video ’ia fa’aro’o rātou i te hō’ē mea tā rātou e hina’aro e paraparau atu. E nehenehe e rave i teie ’ohipa i te mau mahana e rave rahi, mai te mea e hina’arohia.

Mataio 6:5–13.E aha te ha’api’ira’a tā tātou e nehenehe e ’apo mai nō ni’a i te pure i roto i te huru te Fa’aora i pure na ? Nāhea tātou e fa’a’ohipa ai i tāna pure ’ei hi’ora’a nō te ha’amaita’i atu ā i tā tātou iho pure ’e te mau pure ’utuāfare ? (Hi’o ato’a Luka 11:1–13.) Mai te peu e mau tamari’i ri’i tā ’outou, e pure nā muri ia rātou nō te ha’api’i.

Mataio 6:33.E aha te aura’a o te parau « e mata na […] i te ’imi i te bāsileia o te Atua » ? E nāhea tātou i te rave i te reira ’o tātou iho nei, ’e ’o tātou te ’utuāfare ?

Mataio 7:1–5.Nō te hi’o mana’o i te mau ha’api’ira’a i roto i teie mau ’īrava, e nehenehe te ’utuāfare e ’imi mai i te hō’ē pāpā’a iti (hō’ē hu’ahu’a rā’au) ’e te hō’ē rā’au rahi. E aha tā te fa’aaura’a i te reira nā mea e piti e ha’api’i nei ia tātou nō ni’a i te ha’avāra’a ia vetahi ’ē ?

Mataio 7:24–27.’Ei tauturura’a i tō ’outou ’utuāfare ’ia māramarama maita’i a’e i te parabole a te Fa’aora nō te ta’ata pa’ari ’e te ta’ata ma’ama’a, e nehenehe e mani’i i te tahi pape i n’ia i te ’one ’e i muri iho, i ni’a i te hō’ē ’ōfa’i. Nāhea tātou e patu ai i tō tātou niu pae vārua i ni’a i te papa ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere

Hīmene tei mana’ohia : « Le sage et le fou », Chants pour les enfants, 132.

Ha’amaita’i i tā’u iho tuatāpapara’a pāpa’ira’a mo’a

Fa’a’ite i te mau hi’ora’a. ’Ua riro te ’āparaura’a i te mau parau tumu tā ’outou i ’apo mai i roto tā ’outou iho tuatāpapara’a ta’ata hō’ē ’ei rāve’a maita’i nō te ha’api’i i te ta’ata, e ’ere noa rā terā, e tauturu ato’a te reira i te ha’apāpū i tō ’outou iho māramaramara’a. E tāmata i te fa’a’ite i te hō’ē parau tumu tā ’outou i ha’api’i i roto i te tai’ora’a nō teie hepetoma, i te hō’ē melo o te ’utuāfare ’aore rā i roto i te piha ha’api’ira’a i te purera’a.

I Have Prayed for Thee [I pure au nō ’oe], nā Del Parson