27 nō Fepuare–5 nō Māti

Mataio 8 ; Mareko 2–4 ; Luka 7

« ’Ua ora ’oe i tō ’oe fa’aro’o »

E hi’o maita’i ē ’eiaha e rū noa i tā ’outou tuatāpapara’a pāpa’ira’a mo’a. ’A rave i te taime nō te feruri nā roto i te pure, noa atu ē, e’ita e taimehia nō te tai’o i te tā’āto’ara’a o te mau ’īrava. E mea pinepine teie mau taime ferurira’a i te fa’ahope’a i ni’a i te fāri’ira’a i tāna iho heheura’a.

Pāpa’i i te mau mana’o e tae mai

Hō’ē o te mau poro’i pāpū maita’i i roto i te Faufa’a ’Āpī, ’oia ho’i ïa, e fa’aora māuiui ’o Iesu Mesia. E rave rahi fa’ati’ara’a nō te fa’aorara’a te Fa’aora i tei ma’ihia ’e tei roto i te ’ati—mai te vahine fīva ē haere roa i te tamaiti a te vahine ’ivi tei pohe. Nō te aha teie mau fa’aorara’a pae tino ? E aha ra ïa te mau poro’i nō tātou i roto i teie mau semeio ? Pāpū roa ïa te hō’ē poro’i, ’oia ho’i, e Tamaiti nā te Atua ’o Iesu Mesia, e mana tōna i ni’a i te mau mea ato’a, ’e tae noa atu i tō tātou mau māuiui pae tino ’e te mau hapehape pae tino. Tē vai nei rā te tahi fa’ahou aura’a e ’itehia i roto i tāna mau parau i te mau pāpa’i parau ti’aturi ’ore : « ’Ia ’ite […] ’outou ē e mana tō te Tamaiti a te ta’ata i te ao nei ’ia fa’a’ore i te hara » (Mareko 2:10). Nō reira ’ia tai’o ’outou nō ni’a i te ta’ata mata pō ’aore rā te lēpera i ora mai, e feruri ïa i te fa’aorara’a—pae vārua ’e pae tino—tā ’outou e nehenehe e fāri’i nō ’ō mai i te Fa’aora ’a fa’aro’o ai iāna i te nā-’ō-ra’a mai ē : « ’Ua ora ’oe i tō fa’aro’o » (Luka 7:50).

Mau mana’o nō tā’u iho tuatāpapara’a pāpa’ira’a mo’a

Mataio 8 ; Mareko 2–3 ; Luka 7

E ti’a i te Fa’aora ’ia fa’aora i te mau paruparu ’e te mau ma’i.

E ’itehia i roto i teie nau pene e rave rahi hi’ora’a nō te mau fa’aorara’a semeio i ravehia e te Fa’aora. ’A tuatāpapa ai ’oe i teie mau ’ohipa fa’aorara’a, ’a hi’o i te mau poro’i e tano ia ’oe. E nehenehe e ui ia ’oe iho ē : E aha tā teie fa’ati’ara’a e ha’api’i nei nō ni’a i te fa’aro’o ia Iesu Mesia ? E aha tā teie fa’ati’ara’a e ha’api’i nei nō ni’a i te Fa’aora ? E aha te ha’api’ira’a tā te Atua e hina’aro nei iā’u ’ia ’apo mai i roto i teie semeio ? Teie te tahi mau hi’ora’a, e rave rahi atu ā rā :

• Te lēpera (Mataio 8:1–4)

• Te tāvini a te hō’ē Hō’ē tāvini a te keniturio (Mataio 8:5–13 ; Luka 7:1–10)

• Te metua ho’ovai vahine o Petero (Mataio 8:14–15)

• Te ta’ata huma (Mareko 2:1–12)

• Te ta’ata rima marō (Mareko 3:1–5)

• Te tamaiti a te vahine ’ivi nō Naina (Luka 7:11–16)

Hi’o ato’a Neil L. Andersen, « Puta », Liahona, Nov. 2018, 83–86.

Mareko 2:15–17 ; Luke 7:36–50

’Aita Iesu Mesia i haere mai nō te fa’ahapa i te ta’ata hara, nō te fa’aora rā ia rātou.

’Ia tai’o ’oe i teie mau ’īrava nō ni’a i tā Iesu mau fārereira’a ’e te mau pāpa’i parau ’e te mau pharisea, e nehenehe ’oe e hi’o ē, tē vai ra ānei te tahi mau fa’ati’ara’a tei tū’ati ia ’oe. ’Ei hi’ora’a, ’ua riro a’ena ānei tō ’oe mau mana’o ’e tā ’oe mau ’ohipa mai tā Simona te pharisea ra ? ’Ia hi’o ’oe, e aha te ta’a-’ē-ra’a i roto ia Iesu ’e te pharisea mai ia Simona te huru, nō ni’a i te hi’ora’a i te ta’ata hara ? E feruri na i te mana’o o te ta’ata tei teimaha te ’ā’au i te hara, i te ti’ara’a i pīha’i iho i te Fa’aora. E aha tō rātou mana’o ’ia ti’a mai rātou i pīha’i iho ia ’oe ?

E nehenehe ato’a ’oe e feruri i terā vahine i roto i te Luka 7:36–50, e aha te mau mea mai terā ato’a ho’i ’oe. E aha te taime ’a ite ai ’oe i te marū ’e te aroha tā te Fa’aora i fa’a’ite i teie vahine ? E aha te ha’api’ira’a tā ’oe e ’apo nei i roto i tōna huru fa’aro’o ’e te here ’e te ha’eha’a ?

Hi’o ato’a Ioane 3:17 ; Luka 9:51–56 ; Dieter F. Uchtdorf, « Te hōro’a o te aroha mau », Liahona, Mē 2015, 107–10.

Mataio 8:18–22 ; Mareko 3:31–35

Te rirora’a ’ei pipi nā Iesu Mesia, te aura’a ra, e tu’u vau iāna i mua roa i roto i tō’u orara’a.

I roto i teie mau ’īrava, ’ua ha’api’i Iesu ē, e tītau te rirora’a ’ei pipi nāna i te tu’ura’a iāna i mua roa i roto i tō tātou orara’a, noa atu i te tahi taime e ti’a roa ’ia fa’atusia i te tahi atu mau mea faufa’a nā tātou. ’A tuatāpapa ai ’oe i teie mau ’īrava, ’a feruri i tō ’oe iho ti’ara’a pipi. Nō te aha e mea ti’a roa i te mau pipi ’ia tu’u i te Fa’aora i mua roa ? E aha tē ti’a ia ’oe ’ia fa’aru’e nō te tu’u ia Iesu i mua roa ? (Hi’o ato’a Luka 9:57–62.)

Mataio 8:23–27 ; Mareko 4:35–41

E mana tō Iesu Mesia nō te fa’atae mai i te hau i roto i te mau vero o te orara’a.

’Ua tae a’ena mai ānei tō ’oe mana’o mai tō te mau pipi a Iesu i ni’a i te moana i roto i te vero—i te hi’ora’a i te mau ’are miti tē fa’a’ī ra i te poti ’a pi’i ai : « E te Fatu, fa’aora ia tātou, ’ua pohe tātou ! »

I roto i te Mareko 4:35–41, e ’ite ’oe e maha uira’a. E ’āpapa i te mau uira’a ato’a ’e e feruri i te mea tā te reira e ha’api’i ra nō ni’a i te fa’arurura’a i te mau tāmatara’a o te orara’a ma te fa’aro’o ia Iesu Mesia. E nāhea te Fa’aora i te fa’atae mai i te hau i roto i te mau vero o tō ’oe orara’a ?

Hi’o ato’a Lisa L. Harkness, « ’A fa’aea, ’a mania », Liahona, Nov. 2020, 80–82.

From Fear to Faith [Mai te mata’u i te fa’aro’o], nā Howard Lyon

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 8 ; Mareko 2–4 ; Luka 7.E nehenehe e tāpura i te mau semeio tei fa’ati’ahia i roto i teie mau pene. E tāmata i te hi’o mai, ’aore rā i te pāpa’i mai i te hōho’a nō te tahi semeio (hi’o Buka hōho’a nō te ’evanelia ’aore rā ChurchofJesusChrist.org). E nehenehe te melo tāta’itahi o te ’utuāfare e fa’a’ohipa i te mau hōho’a nō te fa’ati’a mai i te hō’ē semeio ma te fa’a’ite mai e aha te ha’api’ira’a tāna i ’apo mai. E nehenehe ’outou e fa’a’ite i te tahi mau semeio tā ’outou i ’ite ’aore rā tā ’outou i tai’o i te ’ā’amu, i tō tātou nei tau.

Hi’o ato’a i te mau video « Widow of Nain [Te vahine ’ivi nō Naina] » ’e « Calming the Tempest [Tāmarū i te vero] » (ChurchofJesusChrist.org).

Mataio 8:5–13 ; Luka 7:1–10.E aha te mea i roto i te fa’aro’o o te keniturio tā Iesu i fa’ahiahia roa ? E nāhea tātou i te fa’a’ite i te fa’aro’o ia Iesu Mesia mai te reira te huru ?

Mareko 2:1–12.E nehenehe te « pene 23 : Te ta’ata ’aore e ti’a ’ia haere » (i roto Te mau ’ā’amu nō te Faufa’a ’Āpī, 57–58, ’aore rā te video nō te reira i ni’a ia ChurchofJesusChrist.org) e tauturu i te ’utuāfare ’ia ’āparau maita’i nō ni’a i te Mareko 2:1–12. (Hi’o ato’a te video « Jesus Forgives Sins and Heals a Man Stricken with Palsy [’Ua fa’a’ore Iesu i te hara ’e ’ua fa’aora i te ma’i o te hō’ē huma] » i ni’a ia ChurchofJesusChrist.org.) Nāhea tātou e riro ai mai te mau hoa o terā ta’ata e’ita e nehenehe e haere ? ’O vai te hoa i nā reira ia tātou ?

Mareko 4:35–41.E nehenehe ānei teie ’ā’amu e tauturu i te mau melo o te ’utuāfare i te taime e ri’ari’a rātou ? E nehenehe paha rātou e tai’o i te ’īrava 39 ’a fa’a’ite mai ai i te ’ohipa i tupu nō rātou i te tauturura’a te Fa’aora ’ia vai noa te mana’o hau i roto ia rātou.

E au paha te mau tamari’i ’ia fa’ahua ha’uti ē tei roto rātou i te hō’ē poti i ni’a i te miti, ’e tei roto i te vero, ’a tai’o noa ai te hō’ē ta’ata i te Mareko 4:35–38. I muri iho, ’ia tai’o te ta’ata i te ’īrava 39, e nehenehe rātou e fa’ahua ha’uti ē, tei roto rātou i te poti i ni’a i te miti manino. E nehenehe ato’a ’outou e hīmene ’āmui i te hō’ē hīmene nō ni’a i te ’imira’a i te hau i roto i te Fa’aora, mai te hīmene « E mea pūai te vero » (Te mau hīmene, N°52). E aha te mau pereota i roto i te hīmene e ha’api’i nei ia tātou nō ni’a i te hau tā Iesu e pūpū nei ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « E mea pūai te vero », Te mau hīmene, N°52.

Ha’amaita’i i tā tātou ha’api’ira’a

’Ia vai vata noa ’e ’ia vai matara noa. E ha’amata te tahi o te mau taime maita’i roa a’e nō te ha’api’i nā roto i te mau uira’a ’aore rā te mau māna’ona’ora’a e vai ra i roto i te ’ā’au o te mau melo o te ’utuāfare. ’Ia ’ite te mau melo o te ’utuāfare nā roto i tā ’outou iho mau parau ’e mau ’ohipa ē, e hina’aro rahi tō ’outou ’ia fa’aro’o ia rātou. (Hiʼo Ha’api’ira’a mai tā te Fa’aora, 16.)

Christ and the Palsied Man [Te Mesia ’e te ta’ata huma], nā J. Kirk Richards