Faufa’a ’Āpī 2023
20–26 nō Māti. Mataio 13 ; Luka 8 ; 13 : « E tari’a tōna ’ei fa’aro’ora’a ra, e fa’aro’o ’oia »

« 20–26 nō Māti. Mataio 13 ; Luka 8 ; 13 : ‘E tari’a tōna ’ei fa’aro’ora’a ra, e fa’aro’o ’oia’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)

« 20–26 nō Māti. Mataio 13 ; Luka 8 ; 13 », Mai, pe’e mai—nō te ta’ata hō’ē ’e te ’utuāfare : 2023

Hōho’a
sitōna tei ineine ’ia ’ō’otihia

20–26 nō Māti

Mataio13 ; Luka 8 ; 13

« E tari’a tōna ’ei fa’aro’ora’a ra, e fa’aro’o ’oia »

’A tai’o ai ’outou i te Mataio 13 ’e te Luka 8 ;13, ’a feruri e nāhea ’outou ’ia fa’aineine ia ’outou nō te « fa’aro’o » ’e nō te au mai i te mau ha’api’ira’a a te Fa’aora i roto i teie mau parabole. E aha tā ’outou e rave nō te fa’a’ohipa i teie mau ha’api’ira’a i roto i tō ’outou orara’a ?

Pāpa’i i te mau mana’o e tae mai

Te tahi o te mau ha’api’ira’a a te Fa’aora e’ita roa e mo’e, ’o terā ïa tei hōro’ahia nā roto i te mau ’ā’amu tei parauhia te mau parabole. ’Ua hau atu te reira i te ’ā’amu iti ’ana’anatae noa nō ni’a i te tahi tao’a ’aore rā te tahi ’ohipa i tupu. E mau parau mau hōhonu i roto nō ni’a i te bāsileia o te Atua, nō te feiā tei fa’aineine ia rātou i te pae vārua. Tē ani nei hō’ē o te mau parabole mātāmua i roto i te Faufa’a ’Āpī—te parabole nō te ueue huero (hi’o Mataio 13:3–23)—’ia hi’opo’a tātou i tō tātou ineinera’a e fāri’i i te parau a te Atua. ’Ua parau Iesu : « Inaha te ta’ata ato’a e fāri’i, e hōro’ahia atu ā tāna, ’e ’ia rahi » (’Īritira’a a Iosepha Semita, Mataio 13:10). Nō reira, ’a fa’aineine ai tātou nō te tuatāpapa i te mau parabole a te Fa’aora—’aore rā te tahi noa atu o tāna mau ha’api’ira’a—te vāhi maita’i e ha’amata, ’o te hi’opo’ara’a ïa i tō tātou ’ā’au nō te hi’o ē, e hōro’a ānei tātou i te parau a te Atua « te vāhi repo maita’i » (Mataio 13:8) ’ia tupu te reira, ’ia ’ūa’a, ’ia ’una’una ’e ’ia hotu mai te mā’a e ha’amaita’i ia tātou ’e i tō tātou ’utuāfare, ’e ’ia rahi.

Hōho’a
ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 13:3–23 ; Luka 8:4–15 ; 13:6–9

’Ia fa’aineinehia tō’u ’ā’au nō te fāri’i i te parau a te Atua e ti’a ai.

Nō te aha i te tahi taime e fāri’i tō tātou ’ā’au i te parau mau, ’e i te tahi atu taime e fa’ahemahia tātou ’ia pāto’i i te reira ? I te tai’ora’a i te parabole nō te ueue huero ’oe e fāna’o ai i te taime nō te feruri i ni’a i te huru ’oe e fāri’i nei i te parau mau nō ’ō mai i te Fatu. E mea tano ’ia fa’atū’ati i te mau ’īrava 3–8 nō te Mataio 13 i tō te reira mau tātarara’a i te mau ’īrava 18–23. E aha tā ’oe e nehenehe e rave nō te aupuru noa i « te vāhi repo maita’i » i roto ia ’oe ? E aha te tahi mau « ’aihere » e ha’afifi nei ia ’oe ’ia fa’aro’o maita’i ’e ’ia pe’e maita’i i te parau a te Atua ? Nāhea ’oe e upo’oti’a ai i teie mau « ’aihere » ?

E nehenehe te tuatāpapara’a i teie parabole e tauturu i tā ’oe tai’ora’a i te parabole i roto i te Luka 13:6–9. E aha te « hotu » tā te Fatu e tītau nei mai roto mai ia tātou ? E nāhea tātou i te fa’a’amu i tō tātou repo ’ia « hotu mai » tātou ?

Hi’o ato’a Mosia 2:9 ; Alama 12:10–11 ; 32:28–43 ; Dallin H. Oaks, « Te parabole nō te ueue huero », Liahona, Mē 2015, 32–35.

Mataio 13:24–35, 44–52 ; Luka 13:18–21

Tē tauturu nei te mau parabole a Iesu iā’u ’ia māramarama i te tupura’a ’e te hope’ara’a o tāna ’Ēkālesia.

Tē ha’api’i nei te peropheta Iosepha Semita ē, e fa’a’itera’a te mau parabole i roto i te Mataio 13 nō te tupura’a ’e te hope’ara’a o te ’Ēkālesia i te mau mahana hope’a nei. E nehenehe e tai’o i te mau parau a te peropheta i roto i Te Mau Ha’api’ira’a a te Mau Peresideni o te ’Ēkālesia : Iosepha Semita (2007), 335–346, ’a feruri ai i te mea tā te mau parabole i muri nei e ha’api’i ra nō ni’a i te ’Ēkālesia a te Fatu :

I muri mai i te feruri-maita’i-ra’a i ni’a i teie mau parabole, e aha tei fa’auruhia ia ’oe ’ia rave nō te ’āmui hope atu ā i roto i te ’ohipa a te ’Ēkālesia a te Mesia i teie mau mahana hope’a nei ?

Hi’o ato’a Guide to the Scriptures, « Bāsileia o te Atua ’e ’aore rā Bāsileia o te ao ra », « Parabole », scriptures. ChurchofJesusChrist.org.

Hōho’a
e poe

E « poe [tao’a rahi] » te ’evanelia a Iesu Mesia (Mataio 13:46).

Mataio 13:24–30, 36–43

’Ia tupu te feiā parauti’a i rotopū i te feiā parauti’a ’ore e ti’a ai ē tae noa atu i te hope’a o te ao nei.

Hō’e rāve’a nō te tāta’a (analyser) i teie parabole, ’o te pāpa’ira’a ïa i te hōho’a nō te reira ma te ’āpiti i te mau parau fa’ata’ara’a e vai ra i roto i te Mataio 13:36–43 ’e Te Ha’api’ira’a Tumu ’e te mau Fafaura’a 86:1–7. Te zīzānia, e « ’aihere ta’ero tei hō’ē ā te hōho’a i te sītona. E’ita e nehenehe e fa’ata’a-’ē-hia i te sītona ē tae roa atu ’ua riro mai ’ei rā’au rahi » (Arata’i nō te mau pāpa’ira’a mo’a, « Zīzania »). E aha te mau parau mau i roto i teie parabole e fa’auru nei ia ’oe ’ia vai ha’apa’o maita’i noa noa atu ā te ’ohipa parauti’a ’ore i roto i te ao nei ?

Luka 8:1–3

E aha tā te « to’ofanu vahine » i rave nō te tāvini i te Fa’aora ?

« E mau pipi vahine tei tere nā muri ia Iesu ’e te Tino ’Ahuru Ma Piti, ma te ha’api’i i te mau mea pae varua [ia Iesu] ra, ’e ma te tāvini iāna i te pae tino. … Ta’a ’ē noa atu i te fāri’ira’a i te utuutura’a a Iesu, te parau ’oa’oa nō tāna ’evanelia ’e te mau ha’amaita’ira’a nō tōna mana fa’aora, ’ua utuutu teie mau vahine iāna, ma te hōro’a atu i tā rātou tao’a ’e tō rātou fa’aro’o » (E Mau Tamāhine i roto i Tō’u Bāsileia [2017], 4). ’Ua hōro’a ato’a taua mau vāhine ra i pe’e i te Fa’aora i te ’itera’a pāpū pūai nōna (hi’o Linda K. Burton, « Te mau vahine pāpū », Ensign ’aore rā Liahona, Mē 2017, 12–15).

Hōho’a
ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 13.’A tai’o noa ai te mau melo o te ’utuāfare i te mau parabole a te Fa’aora, pēnei a’e e au mai rātou ’ia feruri i tā rātou iho mau parabole e ha’api’i i teie mau parau mau nō ni’a i te bāsileia o te ao (te ’Ēkālesia), ma te fa’a’ohipa i te tahi mau tao’a ’aore rā mau hi’ora’a ’ua mātau maita’i rātou.

Mataio 13:3–23 ; Luka 8:4–15.I muri a’e i te tai’o-’āmui-ra’a i te parabole nō te ueue huero, e nehenehe tō ‘outou ’utuāfare e tāu’aparau i te mau uira’a mai teie : E aha te mea e nehenehe e fa’ariro i tō tātou « vāhi repo » (tō tātou ’ā’au) ’ei « vāhi ’ōfa’i » ’aore rā e aha te mea e « hō’ene » ai te parau ? Nāhea tātou e ha’apāpū ai e mea maita’i tō tātou repo ’e e mea hotu ?

Mai te peu e tamari’i ri’i i roto i te ’utuāfare, e mea ’ārearea paha ïa ’ia ani i te mau melo o te ’utuāfare ’ia ha’uti ta’ata ora i te tahi mau rāve’a nō te fa’aineine i tō tātou ’ā’au ’ia fa’aro’o i te parau a te Atua ’e nā te tahi atu mau melo o te ’utuāfare e feruri e aha tē fa’a’itehia ra.

Mataio 13:13–16.Nāhea ’outou e tauturu ai i te mau melo o tō ’outou ’utuāfare ’ia māramarama i te faufa’a rahi nō te fāri’i ma te ’ā’au tae i te parau a te Mesia ? Nō te fa’ahi’o i te parau ra « ’ua turi [te] tari’a », e nehenehe e tāpo’i i te tari’a o te hō’ē melo nō te ’utuāfare ’a tai’o marū noa ai ’outou i te Mataio 13:13–16. E aha te mau mea tā teie melo o te ’utuāfare i māramarama nō ni’a i te mau ’īrava ? E aha te tahi rāve’a nō tātou nō te fa’a’ara’ara i tō tātou mata, fa’afatafata i tō tātou tari’a ’e fa’amāhorahora i tō tātou ’ā’au i te parau a te Atua ?

Mataio 13:44–46.E aha te tū’atira’a i roto i nā ta’ata e piti o teie mau parabole ? Tē vai ra ānei te tahi mau mea tē rave, ’ei ta’ata hō’ē ’e ’ei ’utuāfare, nō te tu’u i te bāsileia o te Atua i mua roa i roto i tō tātou orara’a ?

Luka 13:11–17.’Ua tupu a’ena ānei te tahi ’ohipa ē ’ua tae mai te mana’o ē « e ’ore roa e maita’i ’ia ti’a[rātou iho] i ni’a » ? E ta’ata ’ē ānei tā tātou i mātau ’o tei tupu terā mana’o ? Nāhea tātou e nehenehe ai e tauturu atu ? E nāhea te Fa’aora e « ora » ai tātou i tō tātou ma’i ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Tē ueue noa nei tātou », Te mau hīmene, N°129.

Ha’amaita’i i tā tātou ha’api’ira’a

Tāmau ’ā’au i te hō’ē ’īrava. E mā’iti i te hō’ē tuha’a ’īrava faufa’a ta’a ’ē nō te ’utuāfare, ’e e ani i te mau melo o te ’utuāfare ’ia tāmau ’ā’au i te reira. ’Ua ha’api’i Elder Richard G. Scott : « E riro mai te hō’ē pāpa’ira’a mo’a tāmau-’ā’au-hia ’ei hoa tāmau ’aore e mōrohi i roto i te roara’a o te tau » (« Te mana o te pāpa’ira’a mo’a », Liahona, Novema 2011, 6).

Hōho’a
e tane e ueue ra i te huero

Parable of the Sower [Parabole nō te ta’ata ueue], nā George Soper

Nene’i