« 13–19 nō Māti. Mataio 11–12 ; Luka 11 : ‘Nā’u ’outou e fa’aora’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)

« 13–19 nō Māti. Mataio 11–12 ; Luka 11 », Mai, pe’e mai—nō te ta’ata hō’ē ’e te ’utuāfare : 2023

Hōho’a

Tē ti’a ra Iesu i rotopū i te mau ata

Be Not Afraid [’Eiaha e mata’u], nā Michael Malm

13–19 nō Māti

Mataio 11–12 ; Luka 11

« Nā’u ’outou e fa’aora »

’Ua ha’api’i te peresideni DallinH. Oaks ē : « E’ita te mau pāpa’ira’a mo’a, te mau heheura’a nō tahito ra, e nehenehe e māramaramahia ’aita ana’e tātou e matara i te mau heheura’a nō teienei… Maoti te tuatāpapara’a i te mau pāpa’ira’a mo’a e ti’a ai i te tāne ’e te vahine ’ia fāri’i i te mau heheura’a » (« Scripture Reading and Revelation », Ensign, Tēnuare 1995, 7).

Pāpa’i i te mau mana’o e tae mai

E rave rahi hi’ora’a tō te mau pharisea ’e te mau pāpa’i parau fa’arirora’a i te ha’amorira’a ia Iehova ’ei ’ohipa teimaha. Pinepine rātou i te tūra’i i te parau nō te mau ture ’eta’eta nā ni’a atu i te mau parau mau mure ’ore. I riro ai te mau ture nō te mahana sābati, tei ’ōpuahia ’ei mahana fa’afa’aeara’a, ’ei mea teimaha roa ’ino.

Ē tae mai nei Iehova iho i rotopū i tōna mau ta’ata. ’Ua ha’api’i ’oia ia rātou ē, e ’ere te fā mau nō te ha’apa’ora’a fa’aro’o i te fa’ateimaha i te hōpoi’a, ’o te ha’amāmāra’a rā i te reira. ’Ua ha’api’i ’oia ē, tē hōro’a mai nei te Atua i te mau fa’auera’a, mai te fa’aturara’a i te Sābati, e ’ere nō te nē’ira’a ia tātou, nō te ha’amaita’i rā. ’Oia mau ïa, e mea tītī’aifaro ’e te piriha’o te ’ē’a a te Atua, ’ua haere mai rā te Fatu nō te fa’aara ia tātou ē, ’aita i tītauhia ia tātou ’ia haere ’ōtahi noa nā ni’a i te reira. « Mai, pe’e mai », tāna i tāparu mai. Tāna anira’a i te feiā ato’a tei « teiaha i te hōpoi’a », noa atu ā te tumu, ’o te ti’ara’a mai ïa i pīha’i iho iāna, ’o te tā’amura’a ia tātou iāna ra ’e ’o te vaiihora’a iāna ’ia amo ato’a mai i tā tātou hōpoi’a. Teie tāna parau fafau, ’oia ho’i, « e noa’a ho’i te ora i tō ’outou [vairua] ». ’Ia fa’aauhia i te tahi atu mau rāve’a—te tāmatara’a i te amo tātou ana’e iho i te reira ’aore rā te tūru’ira’a i ni’a i te mau rāve’a tāhuti nei—« tē marū nei ho’i [tāna zugo] ’e tē māmā nei [tāna hōpoi’a]. » (Mataio 11:28–30.)

Hōho’a

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 11:28-30

E hōro’a mai Iesu Mesia i te fa’afa’aeara’a ’ia tūru’i au i ni’a iāna.

E mau hōpoi’a tā tātou pā’āto’a e amo nei—tē vai ra nō tā tātou iho mau hara ’e mau ’ohipa hapehape, tē vai ato’a ra nō te mau mā’itira’a a vetahi ’ē ’e tē vai ato’a ra e ’ere te ta’ata te tumu, e tuha’a noa rā nō te orara’a i ni’a i te fenua nei. Noa atu ā te tumu o tā tātou mau tāfifira’a, tē tāparu nei Iesu ia tātou ’ia haere mai iāna, ’ia ti’a iāna ’ia tauturu mai i te amo i tā tātou mau hōpoi’a, ’ia māmā te reira (hi’o ato’a Mosia 24). ’Ua ha’api’i Elder David A. Bednar : « ’Ia rave ’e ’ia ha’apa’o tātou i te mau fafaura’a mo’a, nā te reira e tā’amu ia tātou i ni’a i te Fatu ia Iesu Mesia » (« Fa’a’oroma’i i te mau ’ati ma te paruparu ’ore », Liahona, Mē 2014, 88). E tāpe’a noa i te reira i te ferurira’a ’e e feruri i te mau uira’a mai teie i muri nei nō te māramarama maita’i a’e i te mau parau a te Fa’aora i roto i teie mau ’īrava : Tē nāhea ra tā’u mau fafaura’a i te tā’amu iā’u i te Fa’aora ’e i pīha’i iho i te Fa’aora ? E aha tē tītauhia iā’u ’ia rave nō te haere mai i te Mesia ra ? E mea nāhea te zugo marū ’e te hōpoi’a māmā a te Fa’aora ?

E aha te tahi atu ā mau uira’a e tae mai i te ferurira’a ’a tai’o noa ai ’oe ? E pāpa’ipa’i i te reira ’e e ’imi i te mau pāhonora’a i teie hepetoma i roto i te mau pāpa’ira’a mo’a ’e te mau parau a te mau peropheta. E ’ite ato’a paha ’outou i te tahi pāhonora’a i tā ’outou mau uira’a i roto i te a’ora’a a Elder David A. Bednar i fa’ahitihia i ni’a atu.

Hi’o ato’a John A. McCune, « Haere mai i te Mesia—e ora mai te Feiā Mo’a i te mau Mahana Hope’a nei », Liahona, Mē 2020, 36–38; Lawrence E. Corbridge, « Te ’ē’a », Liahona, Nov. 2008, 34–36.

Hōho’a

e mau ta’ata e hi’o ra i te mau pipi tē haere ra nā roto i te fa’a’apu tītona

The Disciples Eat Wheat on the Sabbath [Tē ’amu nei te mau pipi i te mā’a tītona i te Sābati], nā James Tissot

Mataio 12:1–13

« Hāmani maita’i i te sābati ».

E mea ta’a ’ē te mau ha’api’ira’a a te mau pharisea i tā te Fa’aora, e rave rahi roa hi’ora’a nō te reira, nō ni’a iho ā rā i te fa’aturara’a i te sābati. ’Ia tai’o ’oe i te Mataio 12:1–13, e nehenehe e hi’o e aha ra te huru te tū’atira’a tō ’oe huru ’e tā ’oe mau ’ohipa i ni’a i te mau ha’api’ira’a a te Fa’aora. Nō te rave i te reira, e nehenehe e feruri i te mau fa’ahitira’a mai teie :

« ’O te aroha tā’u i hina’aro ’eiaha te tusia » (’īrava 7 ; hi’o Hosea 6:6).
« ’O te Tamaiti a te ta’ata nei ho’i te Fatu o te sābati » (’īrava 8).
« E au maori i te ture ’ia hāmani maita’i i te sābati » (’īrava 12).

Mea nāhea te fa’aurura’a a teie mau ha’api’ira’a i te huru ’oe e hi’o i te Sābati ?

Hi’o ato’a Mareko 2:23–3:5.

Mataio 12:34–37 ; Luka 11:33–44

Tē fa’a’ite nei tā’u mau parau ’e tā’u mau ’ohipa i te mea i tō’u ’ā’au.

Hō’ē fa’ahapara’a rahi a te Fa’aora i te mau pharisea, ’oia ho’i ïa, e tāmata rātou i te fa’ahi’o i te parauti’a, tō rātou rā mau hina’aro, e ’ere ïa i te mea ateate. ’A tuatāpapa ai ’oe i te mau fa’aarara’a a te Fa’aora i te mau pharisea, i roto i te Mataio 12:34–37 ’e te Luka 11:33–44, ’a feruri i te tū’atira’a tō tātou ’ā’au i tā tātou mau ’ohipa. E aha te auraa ia ’oe te « pu’era’a maita’i o te ’ā’au » ? (Mataio 12:35). Mai te aha te huru tātou e ti’ahia ai ’e e fa’ahapahia ai i tā tātou mau parau ? (hi’o Mataio 12:37). E aha te aura’a nō tō ’oe mata e « maita’i ra » ? (Luka 11:34). ’A feruri nāhea ’oe e « ’ati pā’āto’a [ai] i te māramarama » (Luka 11:36) nā roto i te mana o te Fa’aora.

Hi’o ato’a Alama 12:12–14 ; Te Ha’api’ira’a Tumu ’e te mau Fafaura’a 88:67–68.

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 11:28–30.E nehenehe ’outou e tauturu i tō ’outou ’utuāfare ’ia hi’o mana’o i te mau ha’api’ira’a a te Fa’aora i roto i teie mau ’īrava nā roto i te fa’ahutira’a ia rātou, te hō’ē i muri i te tahi, i te hō’ē mea toiaha, ’o rātou noa iho nā mua, ’e i muri iho, ma te tauturuhia e te tahi ta’ata. E aha te tahi hōpoi’a tā tātou e amo nei ? E aha te aura’a nō te ravera’a i te zugo a te Mesia i ni’a ia tātou ? E nehenehe te hōho’a i te hope’a o teie arata’i ha’api’ira’a e tauturu ia ’outou ’ia fa’ata’a e aha te zugo.

Mataio 12:10–13.’A tai’o ai ’outou nō ni’a i te fa’aorara’a Iesu i te ta’ata i te Sābati, e nehenehe tō ’outou ’utuāfare e paraparau i te huru tātou e « ora roa » ai maoti te Fa’aora. Nāhea te sābati e riro ai ’ei mahana fa’aorara’a nō tātou ?

I te hi’ora’a o te Fa’aora i roto i teie mau ’īrava, e nehenehe tō ’outou ’utuāfare e tāpura i te mau rāve’a « e hāmani maita’i i te sābati » (’īrava 12). ’Eiaha e mo’e i te tu’u i te mau rāve’a tāvinira’a ia vetahi ’ē. E mea maita’i ’ia tāpe’a noa i tā ’outou tāpura nō te hi’o fa’ahou i te reira i te mau sābati e haere mai nei.

Luka 11:33–36.E feruri e nāhea ’outou i te ha’api’i i te ’utuāfare i te aura’a nō te parau ē « ’ati pā’āto’a […] i te māramarama » (mau ’īrava 34, 36). E mea tano ānei te hō’ē ha’api’ira’a tao’a nō te reira ? E nehenehe ato’a ’outou e paraparau nō ni’a i te mau rāve’a nō te fa’atae mai i te māramarama o te Fa’aora i roto i tō tātou orara’a, tō tātou ’utuāfare ’e te ao ato’a nei. Nō te tahi mau mana’o, māta’ita’i i te video « The Light That Shineth in Darkness [Te māramarama e ’ana’ana ra i roto i te pōiri] », ChurchofJesusChrist.org.

Luka 11:37–44.Pēnei a’e e nehenehe tō ’outou ’utuāfare e ’āparau i teie mau ’īrava ’a hōroi ’āmui ai i te mau ’āu’a. E nehenehe ’outou e paraparau nō ni’a i te mana’o hape e horoi noa ’o rāpae i te mau ’āu’a. ’Ei reira ’outou e fa’aau ai i te tītaura’a e vai parauti’a, ’eiaha i roto noa i te mau ’ohipa ’o rāpae, i roto ato’a rā i te mau mana’o ’o roto i te ferurira’a ’e i te ’ā’au.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’Auē te aroha rahi », Te mau hīmene, N°63.

Ha’amaita’i i tā’u iho tuatāpapara’a pāpa’ira’a mo’a

Rave tāmau noa. Tē vai ra paha te mau mahana e mea huru fifi a’e ’ia tuatāpapa i te mau pāpa’ira’a mo’a ’aore rā ’aita tātou i putapū-roa-hia mai tei tīa’ihia ra. ’Eiaha e faʼaru’e. ’Ua ha’api’i Elder David A. Bednar : « Tō tātou vai-’āueue-’ore-noa-ra’a i te mau mea ha’iha’i, e arata’i te reira ia tātou i ni’a i te mau mea pae vārua faufa’a rahi » (« Fa’aitoito ia rātou ’ia ha’apa’o maita’i i roto i te ’utuāfare », Liahona, Nov. 2009, 20).