Iesu e fa’atōro’a ra ia Petero

6–12 nō Māti

Mataio 9–10 ; Mareko 5 ; Luka 9

« ’O taua Tino ’Ahuru ma Piti nei tā Iesu i fa’atono »

Te mau mana’o tuatāpapara’a i roto i teie arata’i ha’api’ira’a, nō te tauturura’a ïa ia ’outou ’ia ’ite mai i te aura’a ta’a ’ē nō ’outou i roto i te mau pāpa’ira’a mo’a. ’Eiaha rā te reira ’ia mono i te heheura’a tā ’outou iho e fāri’i nō ni’a i te mau ’īrava e tuatāpapa ’aore rā nō ni’a i te huru e tuatāpapa i te reira.

Pāpa’i i te mau mana’o e tae mai

Tē parare ’oi’oi ra te parau nō te mau semeio fa’aorara’a a Iesu. E naho’a ta’ata tei ’āpe’e iāna, ma te tīa’i e fa’aorahia rātou i tō rātou mau ma’i. I te hi’ora’a rā te Fa’aora i te naho’a rahi, ’ua hau atu te mea tāna i ’ite, i tō rātou noa mau fifi tino. Ma te ’ī i te aroha, ’ua hi’o ’oia ia rātou « mai te māmoe tīa’i ’ore ra » (Mataio 9:36). « Tē rahi mau nei te ’auhune », ’ua parau ’oia, « tē iti nei rā te feiā e rave » (Mataio 9:37). Nō reira ’ua pi’i ’oia ’ahuru ma piti ’āpōsetolo, « ’ua tu’u atu ra i te mana nō rātou » ’e ’ua tono atu ra ia rātou nō te ha’api’i ’e nō te tāvini « i te mau māmoe i mo’e i te ’utuāfare ra o ’Īserā’ela » (Mataio 10:1, 6). I teie nei mahana, tē tāmau noa nei te hina’aro ’ia rahi atu ā te feiā rave, nō te tāvini i te mau tamari’i a te Metua i te ao ra. ’Ahuru ma piti noa ā ’āpōsetolo, ’ua rahi a’e rā te mau pipi nā Iesu Mesia i nā mua a’enei—e mau ta’ata e nehenehe e fa’a’ite i tō te ao ato’a nei ē : « Tē fātata mai nei te bāsileia o te ao » (Mataio 10:7).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 9:18–26 ; Mareko 5:22–43

« ’Eiaha e mata’u, e fa’aro’o noa mai. »

I te anira’a Iaeiro ia Iesu ’ia fa’aora i tāna tamāhine, inaha ho’i « ’ua fātata […] i te pohe », ’ua parau ’oia i tōna mana’o rū, ’ua fa’a’ite ato’a rā i tōna tīa’ira’a : « E haere mai ’oe e tu’u i tō rima i ni’a iho iāna […] e ora ïa ’oia i reira » (Mareko 5:23). I tō rātou rā haerera’a atu, tē parau mai nei te hō’ē ve’a ia Iaeiro ē, ’ua tāere roa : « ’Ua pohe roa tō tamāhine, e aha ’oe i ha’ape’ape’a atu ai ā i te ’orometua ? » (’īrava 35). Mai te reira ato’a paha ïa nō te vahine tei parauhia i roto i te Mareko 5:25–34, tei ro’ohia i te tapahi 12 matahiti te maoro, ’ua taere roa.

’Ia tai’o ’oe i teie mau fa’ati’ara’a, e ti’a ia feruri i te māuiui tei tītauhia ’ia fa’aora i roto i tō ’oe orara’a ’aore rā i roto i tō ’oe ’utuāfare—te mau mea ato’a ho’i e au ē « ’ua fātata i te pohe » ’aore rā ’ua tāere roa, e’ita e ora mai. E aha tā ’oe e fa’ahiahia nei nō ni’a i te fa’aro’o tei fa’aitehia i roto i teie mau fa’ati’ara’a ? ’A hi’o ato’a i te mea tā Iesu i parau i te vahine ’e ia Iaeiro. I tō ’oe mana’o, e aha tāna e parau ra ia ’oe ?

Hi’o ato’a Luka 8:41–56 ; Russell M. Nelson, « Faʼahaere mai te mana o Iesu Mesia i roto i tō tātou oraraʼa », Liahona, Mē 2017, 39–42 ; Te Mau Ha’api’ira’a a te Mau Peresideni o te ’Ēkālesia : Gordon B. Hinckley (2016), 375–85.

vahine e tāpe’a ra i te ’ahu o Iesu

Trust in the Lord [Ti’aturi i te Fatu], nā Liz Lemon Swindle

Mataio 10 ; Luka 9:1–6

E hōro’a te Fatu i tāna mau tāvini i te mana nō te rave i tāna ’ohipa.

E ti’a i te mau arata’ira’a tā Iesu i hōro’a i roto i te Mataio 10 i tāna mau ’āpōsetolo ’ia fa’a’ohipa-ato’a-hia nō tātou, inaha ho’i e tuha’a tā tātou pā’āto’a i roto i te ’ohipa a te Fatu. E aha te mana tā te Mesia i hōro’a i tāna mau ’āpōsetolo nō te tauturura’a ia rātou ’ia rave fa’aoti i tā rātou misiōni ? E nāhea ’oe e matara mai ai tōna mana i roto i te ’ohipa tei pi’ihia ’oe ’ia rave ? (hi’o 2 Korinetia 6:1–10 ; Te Ha’api’ira’a Tumu ’e te mau Fafaura’a 121:34–46).

’A tai’o ai ’oe i te fa’auera’a tā te Mesia i hōro’a i tāna mau ’āpōsetolo, e fāri’i mai paha ’oe i te mau mana’o nō ni’a i te ’ohipa ta te Fatu e hina’aro ’ia rave ’oe. E nehenehe te hō’ē tāpura mai teie i muri nei e tauturu ia ’oe ’ia fa’anaho i tō ’oe mau mana’o :

Mataio 10	Te mau mana’o i tae mai
’Ua hōro’a te Fa’aora i te mana i tāna mau pipi.	E hōro’a mai te Atua iā’u i te mana i tītauhia nō te rave i tā’u ’ohipa.

Hi’o ato’a Mareko 6:7–13 ; Hīro’a fa’aro’o 1:6 ; Arata’i nō te mau pāpa’ira’a mo’a, « ’Āpōsetolo » ; « Jesus Calls Twelve Apostles to Preach and Bless Others [Tē pi’i ra Iesu e ’ahuru ma piti ’āpōsetolo nō te poro ’e nō te ha’amaita’i i te ta’ata] » (video), ChurchofJesusChrist.org.

Mataio 10:17–20

’Ia ō atu vau i roto i te tāvinira’a a te Fatu, nāna e fa’auru mai i te mea e parau atu.

’Ua ’ite ātea te Fatu ē e hāmani-’ino-hia tāna mau pipi ’e e ’aimārōhia tō rātou fa’aro’o—’ua tū’ati te reira i te mea tā te mau pipi e fa’aruru nei i teie nei mahana. ’Ua parau fafau rā ’oia i te mau pipi ē, e ’ite ’iho ā rātou nā roto i te Vārua i te mea e parau atu. ’Ua tupu a’ena ānei teie parau hanahana i roto i tō ’oe orara’a, pēnei a’e i te fa’a’itera’a atu ’oe i tō ’oe ’itera’a pāpū, i te hōrō’ara’a atu ’oe i te hō’ē ha’amaita’ira’a ’aore rā i te paraparaura’a atu ’oe i te hō’ē ta’ata ? E nehenehe ’oe e fa’a’ite i te ’ohipa i tupu nō ’oe i te hō’ē ta’ata tā ’oe i here ’aore rā e pāpa’ipa’i i te reira i roto i te hō’ē buka ’ā’amu. E aha te fa’aurura’a e tae mai nei nō te mea e rave, ’ia tupu pinepine atu ā te reira ?

Hi’o ato’a Luka 12:11–12 ; Te Ha’api’ira’a Tumu ’e te mau Fafaura’a 84:85.

Mataio 10:34–39

E aha te aura’a te parau a Iesu « ’Aore au i hōpoi mai i te hau, i te ’o’e rā » ?

’Ua ha’api’i Elder D. Todd Christofferson ē : « ’Ua pāpū iā’u ē, e rave rahi o ’outou tei fa’aru’ehia ’e tei tati-’ē-hia e te metua tāne ’e te metua vahine, e te taea’e ’e te tuahine i te fāri’ira’a ’outou i te ’evanelia a Iesu Mesia ’e i te ravera’a ’outou i tāna fafaura’a. ’Ātīrā ïa, ’ua nā ni’a atu tō ’outou i te Mesia ’e ’ua tītau i te fa’atusiara’a i teie mau tā’amura’a iti, ’e ua tahe tō ’outou roimata nō te reira. Noa atu rā te reira, ’aita tō ’outou iho here i iti noa a’e, ’e tē tāpe’a māite ra ’outou i raro a’e i teie sātauro, ma te ha’amā ’ore i te Tamaiti a te Atua » (« Finding Your Life », Ensign, Māti 2016, 28).

Te ineinera’a ’ia ’ere i teie mau aura’a iti nō te pe’e i te Fa’aora, e ’āpe’ehia ïa e te parau fafau ē : « [’O] tē tu’u noa i tōna ora nō’u nei, e ora ïa tōna » (Mataio 10:39).

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mareko 5:22–43.’A tai’o ’āmui ai tō ’outou ’utuāfare i teie ’ā’amu, e nehenehe e tāpe’a nō te ui i te mau melo nō te ’utuāfare e aha tō rātou mana’o ’āhani ’o rātou Iaeiro, ’aore rā terā vahine, ’aore rā te tahi atu ta’ata i roto i te ’ā’amu. E nehenehe ato’a ’outou e fa’a’ite i te mau hōho’a nō ni’a i terā ’ā’amu, mai te mau hōho’a i roto i teie arata’i ha’api’ira’a. Tē nāhea ra teie mau hōho’a i te fa’a’ite i te fa’aro’o o te mau ta’ata i roto i te mau ’ā’amu ? (Hi’o ato’a i te mau video « Jesus Raises the Daughter of Jairus [Tē fa’ati’a ra Iesu i te tamāhine a Iaeiro] » ’e « Jesus Heals a Woman of Faith [Tē fa’aora ra Iesu i te hō’ē vahine fa’aro’o] » i ni’a ia ChurchofJesusChrist.org.) E nehenehe ato’a ’outou e feruri i te mau tāmatara’a tā tō ’outou te ’utuāfare e fa’aruru nei. Nāhea tātou e fa’a’ohipa ai i teie mau parau : « ’Eiaha e mata’u, e fa’aro’o noa mai » ? (Mareko 5:36).

Mataio 10:39 ; Luka 9:23–26.E aha te aura’a ’ia « ’ere i te ora » ’e e « tāpe’a » i te reira ? (Mataio 10:39). E nehenehe paha te mau melo o te ’utuāfare e fa’a’ite i te tahi ’ohipa i tupu nō te fa’ahōho’a i te mau ha’api’ira’a a Iesu i roto i teie mau īrava.

Mataio 10:40.E aha te huru ’outou ’e tō ’outou ’utuāfare nō ni’a i te fāri’ira’a ’e te pe’era’a i te parau a’o a te mau ’āpōsetolo nō teie nei ’anotau ? E nāhea tā tātou ha’apa’ora’a i tā rātou parau a’o i te ha’afātata ia tātou ia Iesu Mesia ?

Luka 9:61–62.E aha te aura’a te tu’ura’a i te rima i ni’a i te arote ’a hi’o ai i muri ? Nō te aha e’ita tātou e tano nō te bāsileia o te Atua i teie peu ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’O te Fatu ra tō’u māramarama », Te mau hīmene, N°43.

Ha’amaita’i i tā’u iho tuatāpapara’a pāpa’ira’a mo’a

Faʼaroʼo i te Vārua. ’Ia rave ’outou i te tuatāpapara’a, e ha’apa’o maita’i i te mau mana’o i tō ’outou ferurira’a ’e i tō ’outou ’ā’au (hi’o Te Ha’api’ira’a Tumu ’e te mau Fafaura’a 8:2–3), noa atu ā e au ē ’aita e tū’atira’a i te mau mea tā ’outou e tai’o ra. Pēnei a’e ’o te reira mau mana’o te mea mau tā te Atua e hina’aro ra ia ’outou ’ia ’ite ’e ’ia rave.

Iesu e fa’ati’a ra i te tamāhine i ni’a i tōna ro’i

Talitha Cumi, nā Eva Koleva Timothy