Pene 25

’A haere i mua ma te fa’aro’o

« Mai te mea tē vai nei te hō’ē mea e ti’a ia ’outou e vau nei ’ia fāri’i… ’o te huru fa’aro’o ïa ’o te tūra’i ia tātou ’ia tūturi i raro ’e ’ia ani i te Atua i te arata’ira’a, ’e i muri iho, ma te ti’aturi hanahana, ’ia ti’a i ni’a ’e ’ia haere e rave i te ’ohipa nō te fa’atupu i te mau ’ohipa i hina’arohia ra. »

Nō roto mai i te orara’a o Gordon B. Hinckley

Tē ha’amana’o nei te peresideni Gordon B. Hinckley ē, « i tō’u haerera’a i te misiōni [’ei taure’are’a], ’ua hōro’a mai tō’u metua tāne maita’i i te hō’ē tāreta ’e ’ua pāpa’ihia e [hitu] ta’o i ni’a iho. E mau parau ïa a te Fatu i te tāvana o te sunago tei fāri’i i te parau ’āpī nō te pohera’a o tāna tamāhine : ‘’Eiaha e mata’u, e fa’aro’o noa mai.’ (Mareko 5:36.) »¹ ’A tāvini ai te ’orometua ’āpī ’o Elder Hinckley i Peretāne, ’ua fa’aruru ’oia e rave rahi mau fifi ’o tei tītau iāna ’ia ha’amana’o i taua nā ta’o e [hitu] ra. I muri a’e ’ua tātara mai ’oia i te hō’ē ’itera’a :

« I te hō’ē mahana e toru ’e ’aore rā, e maha ve’a tei ha’apuroro i te tahi mau parau nō ni’a i te nene’ira’a o te hō’ē buka tahito, e mea fa’a’ino ’e te au ’ore, ma te parau ē, teie buka, e ’ā’amu ïa nō te mau Momoni. ’Ua parau mai ra te peresideni Merrill [tō’u peresideni misiōni] iā’u, ‘tē hina’aro nei au ’ia haere ’oe e fārerei i te ta’ata nene’i nō te pāto’i i teie mau parau.’ ’Ua hi’o atu ra vau iāna ’e ’ua fātata roa vau i te parau ē, ’eiaha vau.’ Terā rā ’ua parau atu vau ma te ha’eha’a, ’nā reira.’

« ’Aita vau e fē’a’a i te parau ē ’ua ri’ari’a roa vau. ’Ua haere au i roto i tō’u piha ’e ’ua tupu te hō’ē mea i roto iā’u, ’e ’o tā’u e feruri nei ē, ’ua tupu ato’a i roto ia Mose i te taime ’a ani ai te Fatu iāna ’ia haere e hi’o ia Pharao. ’Ua pure au. ’Ua tāviriviri noa tō’u ’ōpu ’a haere ai au i te vāhi tāpe’ara’a pereo’o auahi nō te ta’uma i ni’a i te pereo’o auahi nō te haere i Fleet Street. ’Ua ’itehia iā’u te piha ’ohipara’a a te peresideni ’e ’ua fa’a’ite atu vau i tā’u tāreta i te ta’ata tīa’i. ’Ua rave ’oia i te tāreta ’e ’ua haere atu ra i roto mai i te piha ’ohipara’a, e ’aita i maoro tē ho’i fa’ahou mai nei ma te parau mai ē, e mea ’ohipa roa te peresideni ’aita tōna e taime nō te fārerei iā’u. ’Ua pāhono atu ra vau, ’ua rātere mai au e pae tauatini maire [8 000 km] te ātea, ’e e tīa’i au. I roto i te roara’a hō’ē hora, e piti ’e ’aore rā, e toru taime tōna haerera’a i roto i te piha tōro’a o te peresideni ; ’e i te pae hope’a, ’ua fa’atomo atu ra ’oia iā’u i roto. E’ita roa e mo’ehia iā’u te mea tā’u i ’ite i tō’u tomora’a i roto. Tē puhipuhi ra ’oia i te hō’ē ’ava’ava roa ma te hi’o huru ’ē mai, mai te huru ē, te nā ’ō mai ra ē, ‘’Eiaha e ha’ape’ape’a mai iā’u.’

Tei roto i tō’u rima te mau ve’a. ’Aita vau e ha’amana’o fa’ahou ra e aha tā’u i parau i muri a’e. Mai te huru ra ē, tē vai ra te tahi atu mana e paraparau ra nā roto atu iā’u. I te ha’amatara’a e mea ’ōtohetohe ri’i ’oia ’e te huru pāto’ito’i ato’a. I muri iho, ’ua ha’amata ’oia i te marū. I te pae hope’a ’ua fafau mai ’oia e ’imi ’oia i te hō’ē rāve’a. Hō’ē hora i muri a’e, ’ua tae te parau i te mau fare ho’o buka ato’a i Peretāne ’ia fa’aho’i mai i te mau buka i te fare nene’ira’a. Ma te ha’amāu’ara’a rahi ’ua nene’i ’e ’ua pāpa’i ’oia i mua i te buka tāta’itahi i te hō’ē fa’ahitira’a parau nō te parau ē, ’eiaha e fa’ariro i teie buka ’ei ’ā’amu, ’ei ’ohipa feruri-mana’o-noa-hia rā, ’e e ’ere te reira ’ei fa’a’inora’a i te mau ta’ata Momoni tura. E rave rahi matahiti i muri mai, ’ua hōro’a fa’ahou ā ’oia i te tahi atu tauturura’a pāpū i te ’Ēkālesia, ’e i te matahiti tāta’itahi ē tae noa atu i tōna pohera’a, ’ua fari’i au i te hō’ē tāreta Noela nō ’ō mai iāna ra ».²

I tōna fari’ira’a i te fa’auera’a ’ia haere e fārerei i te piha ’ohipara’a o te ta’ata nene’i parau, ’ua fa’a’ohipa ’o Elder Hinckley i te mea tei riro mai ’ei hōho’a nō te orara’a tā’āto’a : fāri’i i te tītaura’a ma te fa’aro’o ; tītau i te tauturu a te Fatu ’e i reira, ’a rave i te ’ohipa.

« Te fa’aro’o ra, ’o tō tātou ïa ti’aturira’a mau ’e te vai maoro, ’ia hope te mau mea ato’a i te parauhia ’e i te ravehia ».

Te mau ha’api’ira’a a Gordon B. Hinckley.

E nehenehe te fa’aro’o i te Metua i te Ao ra ’e ia Iesu Mesia e riro mai ’ei tumu nō te orara’a faufa’a.

Mai te mea tē vai ra hō’ē mea e tītauhia e au ’e e ’outou ato’a nō te tauturu ia tātou ’ia ’itehia te manuia ’e te rave-fa’aoti-ra’a i roto i teie orara’a, o te fa’aro’o ïa—taua mea pāutuutu ra, te pūai, te nehenehe, nā roto ho’i i te reira, mai tā Paulo i parau ra, i hāmanihia ai te mau ao (hi’o Hebera 11:3). ’Aita vau e parau nei nō te tahi huru fa’anahora’a iti noa, tē parau nei rā vau nō te hō’ē fa’aro’o pāpū, te fa’aro’o parau mau ’e te fa’aro’o ’ohipa—te huru fa’aro’o e tūra’i ia tātou ’ia tūturi i raro ’e ’ia ani i te Fatu i te arata’ira’a, ’e i muri iho, ma te ti’aturi hanahana, ’ia ti’a i ni’a ’e ’ia haere e rave i te ’ohipa nō te tauturu i te fa’atupura’a i te mau mea e hina’arohia ra. ’Aita e fa’aaura’a te faufa’a o taua huru fa’aro’o ra. I te pae hope’a, taua huru fa’aro’o ra, ’o tō tātou ïa ti’aturira’a mau ’e te vai maoro…

E nehenehe te fa’aro’o e riro mai ’ei tumu nō te orara’a faufa’a. ’Aita e fa’aitoitora’a nō te ’ohipa maita’i hau atu i te pūai i te ’itera’a ē, e mau tamari’i tātou nā te Atua, ’e te tīa’i nei te Atua ’ia rave tātou i te hō’ē ’ohipa nō tō tātou orara’a, ’e e hōro’a mai ’Oia ia tātou i te tauturu mai te mea ē, e ’imihia te reira […]

’Ia paraparau ana’e au i te parau nō te fa’aro’o, ’aita vau e parau ra i te hō’ē mea vaimana’o noa. Tē parau nei rā vau nō te hō’ē pūai ora ’e te faufa’a ’o te tae mai ma te fāri’i i te Atua ’ei Metua nō tātou ’e ia Iesu Mesia ’ei Fa’aora nō tātou […]

Te fa’aro’o i roto i te hō’ē Ta’ata hanahana, i roto i te Manahope, ’o te pūai rahi ïa e nehenehe e taui i tō tātou orara’a.³

Erā ’ē te tau, ’ua rave au i te ’ohipa nō te hō’ē o tā tātou mau pereo’o auahi o te tere nā roto i te mau mou’a. Pinepine au i te tere nā ni’a i te mau pereo’o auahi. Tei te ’anotau ïa o te mau pereo’o fa’aterehia i te auahi. Taua mau tūpāpa’u auauahi ra, e mau tūpāpa’u rarahi mau ’e te tere ’e te ataata ato’a. Pinepine au i te uiui ē, nāhea i ti’a ai i te ra’atira mātini ’ia haere i te terera’a roa i te pō. I muri iho ’ua ’ite a’era vau ē, e ’ere te hō’ē tere roa, e tere poto tāmau rā. E mōrī tūrama pūai tō te mātini o te tūrama i te ’ē’a i te āteara’a e 400 ’e ’aore rā, e 500 metera. Terā noa te āteara’a tā te ra’atira mātini e ’ite, ’e ’ua nava’i te reira, nō te mea, tei mua noa te reira iāna i te pō tā’āto’a ē tae noa atu i te po’ipo’i o te hō’ē mahana ’āpī […]

’E ’oia ato’a tō tātou tere mure ’ore. E rave tātou hō’ē ta’ahira’a i te taime hō’ē. ’Ia nā reira tātou, e tae tātou i te vāhi ’ite-’ore-hia, terā rā, nā te fa’aro’o e tūrama i te ’ē’a. Mai te mea e aupuru māite tātou i te reira fa’aro’o, e ’ore roa tātou e haere nā roto i te ’ite ’ore […]

Te tītaura’a tā te mau melo o te ’Ēkālesia e fārerei nei, ’o te ravera’a ïa i te ta’ahira’a i muri iho, ’oia ho’i, te fāri’ira’a i taua hōpoi’a ra i pi’ihia ’oia, noa atu ē, tē mana’o ra ’oia, e’ita te reira e mara’a iāna, ’e ’aita ho’i tōna e fa’aro’o nō te rave i te reira ma te ti’aturi ē, e tūrama te Fatu i te ’ē’a i mua iāna.⁴

Te fa’aro’o ’o te niu ïa o te ’itera’a pāpū ’e te pūai o te ’ohipa a te Fatu i ni’a i te fenua nei.

Tei roto te faufa’a hō’ē roa a te ’Ēkālesia i te fa’aro’o o tōna mau ta’ata.⁵

E mea fa’ahiahia mau ’e te nehenehe ho’i ’o te rahira’a tauatini ta’ata tei putapū te ’ā’au i te semeio o te Vārua Maita’i, tei ti’aturi ’e tei fāri’i ’e tei riro mai ’ei melo [nō te ’Ēkālesia]. ’Ua bāpetizohia rātou. ’Ua putapū tō rātou orara’a i te maita’i ē a muri noa atu. ’Ua tupu te semeio. ’Ua tae mai te hō’ē huero o te fa’aro’o i roto i tō rātou ’ā’au. ’Ua tupu i te rahi ’a ha’api’i mai ai rātou. ’E ’ua fari’i rātou i te parau tumu i ni’a i te parau tumu, ē tae roa atu ’ua roa’a ia rātou te mau ha’amaita’ira’a fa’ahiahia ato’a ’o te tae mai i te feiā e haere ma te fa’aro’o i roto i Te ’Ēkālesia a Iesu Mesia i te Feiā Mo’a i te mau Mahana hope’a nei…

Teie hōro’a tao’a rahi ’e te fa’ahiahia o te fa’aro’o, teie hōro’a nō ’ō mai i te Atua ra tō tātou Metua Mure ’ore, ’o te pūai ā ïa o teie ’ohipa ’e te pūai hau o tāna parau poro’i. ’O te fa’aro’o te niu o te mau mea ato’a. Nō roto mai te mau mea ato’a i te fa’aro’o. Nō te haere ānei i te misiōni, nō te ha’apa’o ānei i te Parau pa’ari, nō te ’aufau ānei i te tuha’a ’ahuru, hō’ē ā ïa huru. ’O te fa’aro’o i roto ia tātou ’o te fa’a’itehia nei i roto i te mau mea ato’a tā tātou e rave nei…

E’ita te pūai o teie ’ohipa ’e teie bāsileia e ’itehia i roto i tāna mau fa’anahora’a i te pae tino nei, noa atu te fa’ahiahia o te reira. E ’itehia rā te reira i roto i te ’ā’au o tōna mau ta’ata. Nō reira te reira e manuia ai. Nō reira te pūai e tupu ai i te rahi. Nō reira e ti’a ai iāna ’ia rave i te mau ’ohipa nehenehe tāna e rave nei. Nō roto ana’e mai te reira i te hōro’a o te fa’aro’o, tā te Manahope i hōro’a mai i tāna mau tamari’i ’o te ’ore e fē’a’a ’e ’o te ’ore e mata’u, ’o te haere rā i mua […]

Te fa’aro’o, ’o te niu ïa o te ’itera’a pāpū. Te fa’aro’o, ’o te niu ïa o te ha’apa’o i te ’Ēkālesia. Te fa’aro’o, ’o te fa’atusiara’a ïa, te hōro’ara’a ïa ma te ’oa’oa nō te fa’ahaere i te ’ohipa a te Fatu i mua.⁶

E parau ’āpī maita’i te ’evanelia. E parau poro’i ïa nō te upo’oti’ara’a. E ’ohipa ïa ’o te ti’a ’ia fāri’ihia ma te ’ana’anatae rahi […]

’Eiaha tātou e mata’u. ’O Iesu tō tātou arata’i, tō tātou pūai ’e tō tātou ari’i.

E ’anotau mana’o tapitapi teie. E ’ohipa nō te fa’aro’o tā tātou. I tō’u mau taea’e ’e tō’u mau tuahine i te mau vāhi ato’a, tē ani nei au ia ’outou ’ia ha’apāpū fa’ahou i tō ’outou fa’aro’o, ’ia tūra’i i teie ’ohipa i mua nā te ao ato’a nei […]

« E au mau taea’e ē, e ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A haere i mua e ’eiaha rā ia haere i muri. ’A rohi, e a’u mau taea’e ; ’a haere ā, ’a haere ā ē tae noa atu i te taime e upo’oti’a ai ra ! » (PH&PF 128:22). Terā ïa tā te peropheta Iosepha i pāpa’i i roto i te hō’ē salamo o te fa’aro’o.

’Auē te hanahana te ’anotau tahito o teie ’ohipa rahi. ’Ua ’ī ïa i te feiā ’aito, te itoito, te mata’u ’ore ’e te fa’aro’o. E mea nehenehe teie ’anotau ’a haere ai tātou i mua nō te ha’amaita’i i te orara’a o te mau ta’ata i te mau huru vāhi ato’a i te fa’aro’ora’a i te parau poro’i a te mau tāvini o te Fatu. E riro te tau i muri nei ’ei tau nehenehe, ’a tāmau noa ai te Manahope i tāna ’ohipa hanahana, ma te fa’auru i te feiā ato’a e fāri’i ’e e ha’apa’o i tāna ’evanelia, ’e ma te tītau ato’a i te ha’amaita’ira’a mure ’ore o tāna mau tamaiti ’e tāna mau tamāhine o te mau u’i ato’a nā roto i te ’ohipa pipiri ’ore a te feiā ato’a tei ’ī te ’ā’au i te here i te Fa’aora o tō te ao nei […]

Tē ani manihini nei au ia ’outou tāta’itahi, i te mau vāhi ato’a tei reira ’outou ’ei mau melo nō teie ’Ēkālesia, ’ia ti’a i ni’a i tō ’outou ’āvae ’e te hō’ē hīmene i roto i tō ’outou ’ā’au ’ia haere i mua, ’ia ora i te ’evanelia, ’ia here i te Fatu, ’e ’ia patu i te bāsileia. E pe’e tāmau ’e e pe’e ’āmui ana’e tātou i tō tātou haere’a ’e ’ia tāpe’a noa i te fa’aro’o, te Manahope ho’i tō tātou pūai.⁷

Nā roto i te fa’aro’o, e nehenehe tā tātou e upo’oti’a i ni’a i te mata’u ’e i te mau huru fifi ato’a ’e ’aore rā te mau tītaura’a ato’a i roto i tō tātou orara’a.

’O vai i rotopū ia tātou e nehenehe e parau ē, ’aita ’oia i fāri’i i te mata’u ? ’Aita vau i ’ite i te hō’ē ta’ata ’aita ’oia i mata’u noa a’e. ’Oia mau, te tahi pae, ’ua fārerei rātou i te mata’u rahi a’e i tō te tahi atu. E ti’a i te tahi pae ’ia upo’oti’a ’oi’oi noa i ni’a i te reira, ’āre’a te tahi atu rā, e mau roa ïa i roto ’e e huti-roa-hia i raro, ’e e mou roa i te tahi taime. Tē māuiui nei tātou i te mata’u o te ha’ama’aura’a, te mata’u o te manuia ’ore, te mata’u o te vai-’ōtahi-ra’a, te mata’u o te ’ite ’ore. Tē mata’u nei te tahi pae i teie tau, te tahi pae i te tau a muri a’e. Tē ’amo nei te tahi pae i te hōpoi’a o te hara, ’e e hōro’a mau rātou fātata i te mau huru mea ato’a nō te tātara i taua mau hōpoi’a ra i ni’a ia rātou terā rā, te mata’u nei rātou i te taui i tō rātou orara’a. ’Ia ’ite ho’i tātou ē, e ’ere te mata’u i tā te Atua, nō roto mai rā teie ’ohipa au ’ore ’e te ha’amou i te ’enemi o te parau mau ’e te parau ti’a. Te mata’u ra ’o te pāto’i ïa o te fa’aro’o. E ha’amou tāna e fa’atupu, ē tae roa atu i te pohe.⁸

’Ua pāpa’i atu ra ’o Paulo ia Timoteo : « E ’ere ho’i i te ’ā’au taiā tā te Atua i hōro’a mai nō tātou, i te ’ā’au itoito rā, ’e te aroha, ’e te ha’apa’o maita’i.

« ’Eiaha ’oe e ha’amā i te parau o tō tātou Fatu » (2 Timoteo 1:7–8).

Tē hina’aro nei au i te mau melo ato’a o teie ’ēkālesia ’ia pia i teie mau parau i te vāhi e ti’a ia rātou ’ia ’ite atu i te mau po’ipo’i ato’a ’a ha’amata ai rātou i tō rātou mahana. E hōro’a mai rātou i te itoito ia tātou nō te parau, e hōro’a mai rātou i te fa’aro’o ia tātou nō te tāmata, e ha’apūai rātou i tō tātou ’itera’a i te Fatu ia Iesu Mesia. Tē ti’aturi nei au ē, e rahi atu te semeio i te tupu i ni’a i te fenua nei.⁹

« ’Eiaha… e ha’amā i te parau o tō tātou Fatu » (2 Timoteo 1:8).

I te hō’ē mahana ’ua paraparau vau i te hō’ē hoa tei horo ’ē i tōna fenua ’āi’a. Nā roto i te maruara’a te fa’aterera’a o tōna fenua, ’ua haruhia ’oia e ’ua tu’uhia i roto i te fare ’āuri. ’Ua ti’a i tāna vahine ’e tāna mau tamari’i ’ia horo ’ē, terā rā, hau i te toru matahiti ’ua vai noa ’oia ’ei mau ’āuri ma te rāve’a ’ore nō te paraparau i te feiā tei herehia e āna. E mea ’ino roa te mā’a, e mea ’eta’eta te orara’a, ’e ’aita roa hō’ē rāve’a nō te ha’amaita’i i te reira.

« E aha te mea tei tauturu ia ’oe ’ia fa’a’oroma’i i te roara’a o taua mau mahana ’ati ra ? » Tā’u ïa anira’a.

’Ua pāhono mai ’oia ē : « Tō’u fa’aro’o ; tō’u fa’aro’o i te Fatu ia Iesu Mesia. ’Ua fa’auta vau i tā’u mau hōpoi’a i ni’a iho iāna, e mai te huru ra ē, ’ua māmā a’e te reira ».¹⁰

E tupu iho ā te reira. ’Eiaha e ha’ape’ape’a. E parau vau i te reira iā’u iho i te mau po’ipo’i ato’a. E tupu iho ā te reira. Mai te mea e rave maita’i roa ’outou, e tupu iho ā te reira. ’A tu’u i tō ’outou ti’aturira’a i roto i te Atua, ’e ’a haere i mua ma te fa’aro’o ’e te ti’aturi i roto i te tau a muri a’e. E ’ore roa te Fatu e fa’aru’e ia tātou. E ’ore roa ’Oia e fa’aru’e ia tātou.¹¹

E’ita ānei te hō’ē o tātou e nehenehe e parau ē, ’āhiri e fa’aro’o rahi a’e tō tātou i te Atua e nehenehe ïa tā tātou e rave hau atu i te maita’i i tā tātou e rave nei i teie nei ? ’Aita e patu rahi roa, ’aita e tītaura’a fifi roa, mai te mea e fa’aro’o tō tātou. Nā roto i te fa’aro’o e nehenehe tā tātou e upo’oti’a i ni’a i taua mau mea ’ino ra i roto i tō tātou orara’a ’o tē huti tāmau noa nei ia tātou i raro. Nā roto i te tauto’ora’a e nehenehe tā tātou e fa’atupu i te mau ’aravihi nō te ha’avī i te mau mana’o ’o te arata’i atu ia tātou i roto i te mau ’ohipa vi’ivi’i ’e te ’ino. Nā roto i te fa’aro’o e nehenehe tā tātou e ārai i tō tātou mau hia’ai. E nehenehe tā tātou e fa’atoro i te rima i te feiā tei paruparu te mana’o ’e tei pau, ’e e nehenehe tā tātou e tāmāhanahana ia rātou nā roto i te pūai ’e te mana o tō tātou iho fa’aro’o.¹²

Mai te mea e fa’a’ohipa tātou i tō tātou fa’aro’o, e tauturu te Fatu ’ia fa’arahi i te reira.

Mai te mea e fa’a’ohipa ’outou i tō ’outou taime ’e te tārēni i roto i te tāvinira’a, e tupu tō ’outou fa’aro’o i te rahi ’e e morohi atu tō ’outou mau mana’o fē’a’a.¹³

E ani te ’Ēkālesia ia ’outou ’ia rave e rave rahi ’ohipa. E ani ’oia ia ’outou ’ia tāvini i roto i te mau ’aravihi rau. E ’ere tā tātou tāvinira’a i te tāvinira’a tāmoni. E riro ’outou ’ei tāvini nō teie ’Ēkālesia, ’e ’ia pi’i-noa-hia atu ’outou ’ia tāvini, tē hina’aro nei au e fa’aitoito atu ia ’outou ’ia pāhono, e mai te mea e nā reira ’outou, e pūai ’e e rahi atu ïa tō ’outou fa’aro’o. ’Ua riro te fa’aro’o mai te ponapona o tō’u rima. Mai te mea e fa’a’ohipa vau iāna, mai te mea e fa’a’amu vau iāna, e tupu ’oia i te pūai ; e rave ’oia e rave rahi ’ohipa. Mai te mea rā ē, e tu’u vau i te reira i roto i te pata ’e ’a vaiiho noa ai, e tupu ’oia i te ’ino ’e te faufa’a ’ore, mai te reira ato’a ïa ’outou. Mai te mea e fāri’i ’outou i te mau rāve’a atoa, mai te mea e fāri’i ’outou i te mau pi’ira’a ato’a, e tauturu ïa te Fatu ia ’outou i te ravera’a i te reira. E’ita te ’Ēkālesia e ani ia ’outou ’ia rave i te hō’ē mea e’ita e ti’a ia ’outou ’ia rave ma te tauturu a te Fatu.¹⁴

Teie tā’u pure nō tātou pā’āto’a—« E te Fatu, ’a fa’arahi mai i tō mātou fa’aro’o » [hi’o Luka 17:5]. ’A fa’arahi i tō tātou fa’aro’o nō te upo’oti’a i ni’a i te pāpū ’ore ’e te fē’a’a […]

’E te Fatu, ’a fa’arahi mai i tō mātou fa’aro’o nō te upo’oti’a i ni’a i te mau ta’ata hāmani ’ino i tā ’Oe ’ohipa rahi ’e te mo’a. ’A ha’apūai i tō mātou hina’aro. ’A tauturu mai ia mātou ’ia patu ’e ’ia ha’aparare i tō ’Oe bāsileia mai te au i tā ’Oe fa’auera’a, ’ia ti’a ho’i i teie ’evanelia ’ia porohia i te ao ato’a nei ’ei ’ite nō te mau fenua ato’a […]

’A hōro’a mai ia mātou i te fa’aro’o nō te hi’o i’ō atu i te mau fifi o teie taime, i te mau semeio o te tau a muri a’e. ’A hōro’a mai ia mātou i te fa’aro’o nō te ’aufau i tā mātou mau tuha’a ’ahuru ’e te mau ō ’e ’ia tu’u i tō mātou ti’aturira’a i roto ia ’Oe, te Manahope, nō te ’īriti i te mau ha’amāramarama o te ra’i mai tā ’oe i fafau mai ra. ’A hōro’a mai ia mātou i te fa’aro’o nō te rave i mea ti’a, ’e ’a tupu noa atu ai te fa’ahope’ara’a o te reira.

’A hōro’a mai ia mātou i te fa’aro’o ’ia farara ana’e mai te mau vero o te ’ati ’e ’ia tā’ue ia mātou i ni’a i te repo. I roto i te mau taime o te ma’i, ’ia vai pa’ari noa tō mātou ti’aturira’a i roto i te mau mana o te autahu’ara’a. ’Ia pe’e mātou i te a’o a Iakobo :

« Tē pohe ra ānei te hō’ē o ’outou i te ma’i ? E ti’i ’oia i te mau peresibutero o te ’ēkālesia ra, ’e nā rātou e pure iāna, ma te fa’atāhinu iāna i te mono’i i te i’oa o te Fatu ra :

E ora taua ma’i ra i te pure fa’aro’o, ’e nā te Fatu ’oia e fa’ati’a i ni’a » (Iakobo 5:14–15 ; pāpa’ira’a ’opa i ’āpitihia atu) […]

E te Fatu, ’ia hahaere mātou nā te peho o te marū o te pohe, ’a hōro’a mai ia mātou i te fa’aro’o nō te ’ata’ata noa atu tō mātou ’oto, ma te ’ite ē, e tuha’a ana’e te reira nō te hō’ē fa’anahora’a mure ’ore a te hō’ē Metua here, ’e ’ia fa’aru’e mai mātou i teie orara’a e tomo atu mātou i roto i te hō’ē orara’a hanahana a’e, ’e nā roto ho’i i te tāra’ehara a te Tamaiti a te Atua, e ti’a mai te mau ta’ata ato’a mai te pohe mai, ’e e haere atu tei ha’apa’o maita’i i te fa’ateiteira’a ra.

’A hōro’a mai ia mātou i te fa’aro’o nō te rave tāmau noa i te ’ohipa fa’aorara’a o te feiā pohe, ’ia tupu ho’i tā ’Oe mau ’ōpuara’a mure ’ore ’ei maita’i nō tā ’Oe mau tamaiti ’e tā ’Oe mau tamāhine nō te mau u’i ato’a ra.

E te Metua, ’a hōro’a mai ia mātou i te fa’aro’o nō te ha’apa’o i te parau a’o i roto i te mau mea ha’iha’i ’o te nehenehe e riro ’ei mau mea rarahi […]

E te Fatu, ’a fa’arahi i tō mātou fa’aro’o i te tahi ’e te tahi, ’e i roto ia mātou iho, ’e i roto i tō mātou ’aravihi ’ia rave i te mau mea maita’i ’e te rahi […]

E te Metua, ’a fa’arahi mai i tō mātou fa’aro’o. Tē feruri nei au, te hina’aro rahi a’e o tō mātou mau hina’aro ato’a, ’o te hō’ē ïa fa’arahira’a o te fa’aro’o. E nō reira, e te Metua here ē, ’a fa’arahi mai i tō mātou fa’aro’o ia ’Oe, ’e i tā ’Oe Tamaiti Here, i tā ’Oe ’ohipa rahi mure ’ore, ia mātou iho ’ei mau tamari’i na ’Oe, ’e i tō mātou ’aravihi ’ia haere ’e ’ia rave mai te au i tō ’Oe hina’aro, ’e tā ’Oe mau ture, ’o tā’u ïa pure ha’eha’a nā roto i te i’oa o Iesu Mesia ra, ’āmene.¹⁵

Te mau mana’o tauturu nō te tuatāpapara’a ’e te ha’api’ira’a

Mau uira’a

’Ua ha’api’i mai te peresideni Hinckley ē, te fa’aro’o i roto i te Atua, « ’o te pūai rahi ïa e nehenehe e taui i tō tātou orara’a » (tuha’a 1). E aha te mau ’ohipa i tupu tei tauturu ia ’outou ’ia ha’api’i mai nō ni’a i te pūai o te fa’aro’o ? E mea nāhea tō ’outou ’itera’a ē, ’ia « tae ana’e tātou i te vāhi ’ite-’ore-hia… nā te fa’aro’o e tūrama i te ’ē’a ?
E aha te ti’a ia tātou ’ia ’apo mai nā roto mai i te tuha’a 2 nō ni’a i te tumu o te pūai o te ’Ēkālesia ? E mea nāhea te fa’aro’o ’e te tusia i te tū’ati te tahi i te tahi ? ’A feruri e nāhea e ti’a ai ia ’outou ’ia ha’apa’o i te pi’ira’a a te peresideni Hinckley « ’ia tūra’i i teie ’ohipa i mua nā te ao ato’a nei ».
I tō ’outou mana’ora’a nō te aha e mana tō te fa’aro’o nō te tauturu ia tātou i roto i te mau taime tāmatara’a ? (Hi’o te tuha’a 3). I nāfea te fa’aro’o i tauturu ai ia ’outou ’ia upo’oti’a i ni’a i te mata’u ? I nāfea te fa’aro’o i tauturu ai ia ’outou ’ia upo’oti’a i ni’a i te tahi atu mau fifi ?
’A hi’o fa’ahou i te pure a te peresideni Hinckley i roto i te tuha’a 4. E aha te mau parau i roto i teie pure e aura’a ta’a ’ē tō rātou nō ’outou ? Nāhea e ti’a ai i te fa’aro’o ’ia tauturu ia tātou ’ia upo’oti’a i ni’a i te pāpū ’ore ’e te fē’a’a ? Nāhea e ti’a ai i te fa’aro’o ’ia tauturu ia tātou ’ia hi’o i’ō atu i te mau fifi nō te ’ite i te mau semeio ?

Te mau pāpa’ira’a mo’a

Ioane 14:12–14 ; Roma 5:1–5 ; 2 Nephi 26:12–13 ; Moroni 7:33–38 ; PH&PF 27:16–18

Tauturu ha’api’ira’a

« ’Ia tuatāpapa tāmau ana’e tātou i te mau pāpa’ira’a mo’a ma te itoito, ma te ’imi itoito i te arata’ira’a a te Vārua, e fāri’i ïa tātou i te māramarama nō te fa’aineine i te mau ha’api’ira’a. E ineine ato’a ïa tātou nō te fāri’i ’e nō te pe’e i te fa’aurura’a a te Vārua i te taime ’a ha’api’i ai tātou » (Te Ha’api’ira’a : ’Aore e Pi’ira’a Teitei a’e [1999], 14).