Pene 8
Tē hi’o nei tātou i ni’a i te Mesia
« Tē ti’aturi nei tātou i te Mesia. Tē ha’api’i nei tātou nō ni’a i te Mesia. Tē hi’o nei tātou i ni’a i te Mesia. ’O ’Oia tō tātou Tāra’ehara, tō tātou Fatu, ’e tō tātou Fa’aora »
Nō roto mai i te orara’a o Gordon B. Hinckley
I te ’āmuira’a rahi nō te ’āva’e ’ēperēra 1975, ’ua fa’a’ite mai Elder Gordon B. Hinckley, e melo i taua taime ra nō te pupu nō te Tino ’Ahuru ma Piti ’āpōsetolo, i teie nei ’ā’amu :
« ’Ua fa’atupu iho nei mātou i te hō’ē ’ōro’a ’ōpani ’īriti i te hiero nō [Mesa] Arizona. I muri a’e i te hō’ē fa’a’āpīra’a rahi nō taua fare ra, fāfata e 250 000 ta’ata tei ’ite i te nehenehe i roto i teie fare. I te mahana mātāmua nō te matarara’a, ’ua ani-manihini-hia te feiā fa’atere nō te tahi ’ē atu mau fa’aro’o ’ei mau manihini ta’a ’ē, ’e e rave rahi hānere o rātou tei pāhono mai. E ha’amaita’ira’a nō’u i te paraparau atu ia rātou ’e nō te pāhono atu i tā rātou mau uira’a i te hope’ara’a o te tere māta’ita’i. ’Ua parau atu vau ia rātou ē e ’oa’oa ïa mātou i te pāhono i tā rātou mau uira’a ato’a. E rave rahi te mau uira’a. I roto i teie mau uira’a ’o te hō’ē ïa nā te hō’ē ’orometua porotetani.
« ’Ua parau mai ’oia ē : ’Ua haere au nā roto i te tā’āto’ara’a o teie fare, teie hiero tei mau i ni’a i te papa’i i mua te i’oa o Iesu Mesia, ’aita rā vau i ’ite i te hō’ē noa a’e vāhi te hōho’a nō te satauro, te tāpa’o nō te ao keresetiano. ’Ua ’ite au i tā ’outou mau fare i te tahi atu mau vāhi ’e ’aita ato’a e satauro. Nō te aha ho’i te reira ’a parau ai ’outou ē tē ti’aturi nei ’outou ia Iesu Mesia ?
« ’Ua pāhono atu vau : ’Aita vau e hina’aro i te fa’a’ino’ino i te hō’ē o tō’u mau taea’e keresetiano ’o tei fa’a’ohipa nei i te satauro i ni’a i te mau fare oe nō tā rātou mau tatetara ’e te mau fata nō tā rātou mau fare purera’a, ’o te ’ō’omo nei i te reira i ni’a i tō rātou ra mau ’ahu, ’e te nene’i i ni’a i tā rātou mau buka ’e te tahi atu mau pāpa’ira’a. Nō mātou nei rā, ’ua riro ïa te satauro ’ei tāpa’o nō te Mesia pohe, ’e tā mātou parau poro’i ’o te hō’ē ïa fa’a’itera’a nō te Mesia ora.’
« ’Ua nā ’ō mai ’oia i muri iho : ’Mai te mea e’ita ’outou e fa’a’ohipa i te satauro, e aha ïa te tāpa’o nō tā ’outou ha’apa’ora’a ?’
« ’Ua pāhono atu vau ē, e ti’a i te orara’a o tō mātou nūna’a ’ia riro ’ei fa’a’itera’a pāpū hō’ē roa nō tō mātou fa’aro’o ’e, ’oia mau, nō reira, te tāpa’o nō tā mātou ha’amorira’a […]
« ’Aore e tāpa’o, ’aore e ’ohipa pēni, ’aore e fa’ahōho’ara’a e tano nō te fa’a’ite i te hanahana ’e te māere o te Mesia Ora. ’Ua parau mai ’Oia ia tātou e aha ïa taua tāpa’o ra e ti’a ai, ’ua hina’aro ’outou iā’u ra, e ha’apa’o i tā’u parau.’ (Ioane 14:15).
« ’Ei mau pipi Nāna, e’ita e nehenehe ia tātou ’ia rave i te hō’ē mea ’ino ’aore rā ti’a ’ore ’aore rā maita’i ’ore ma te ’ore e ha’avi’ivi’i i tōna ra hōho’a. E ’ore ato’a e nehenehe ia tātou ’ia rave i te hō’ē ’ohipa maita’i ’e te nehenehe ’e te aroha ma te ’ore e fa’a’ana’ana atu ā i te tāpa’o o te ta’ata nōna ho’i te i’oa tā tātou i rave i ni’a iho ia tātou.
« E nō reira e ti’a i tō tātou orara’a ’ia riro ’ei fa’a’itera’a faufa’a rahi, te tāpa’o nō tō tātou fa’a’itera’a i tō tātou ’itera’a pāpū nō te Mesia Ora, te Tamaiti Mure ’Ore a te Atua Ora.
« E mea ’ōhie roa, e tō’u mau taea’e ’e mau tuahine, ’e te hōhonu ’e e ti’a ia tātou ’eiaha roa atu e ha’amo’e i te reira ».1
« ’Ei niu nō tō tātou fa’aro’o, ’o tō tātou ïa ’itera’a pāpū nō ni’a ia Iesu Mesia ’ei Tamaiti nā te Atua… ’O ’Oia te ’ōfa’i tihi nō te ’ēkālesia tei mau i Tōna ra i’oa ».
Te mau ha’api’ira’a a Gordon B. Hinckley
1
’ O Iesu Mesia te Tamaiti Ora a te Atua Ora.
« ’Ei niu nō tō tātou fa’aro’o, ’o tō tātou ïa ’itera’a pāpū nō ni’a ia Iesu Mesia ’ei Tamaiti na te Atua… ’O ’Oia te ’ōfa’i tihi nō te ’ēkālesia tei mau i Tōna ra i’oa ».2
Tē ti’aturi nei tātou i te Mesia. Tē ha’api’i nei tātou nō ni’a i te Mesia. Tē hi’o nei tātou i ni’a i te Mesia. ’O ’Oia tō tātou Tāra’ehara, tō tātou Fatu, ’e tō tātou Fa’aora.3
Tāvinira’a i ni’a i te fenua nei
’Oia tei riro ’ei Tamaiti nā te Atua, te Tamaiti Fānau Tahi, ’ua fa’aru’e ’Oia i te aora’i tiretiera o Tōna ra Metua nō te rave i te tāhuti nei. I Tōna fānaura’a, ’ua hīmene te mau melahi ’e ’ua haere mai te feiā pa’ari nō te pūpū i te mau tao’a aroha. ’Ua pa’ari ’Oia mai te tahi atu mau tamāroa i Nazareta nō Galilea. « Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a » (Luke 2:52).
Nā muri ia Maria ’e Iosepha, ’ua tere ’Oia i Ierusalema i te 12ra’a o Tōna matahiti. I tō rātou rā tere ho’i mai i te fare, ’ua mo’ehia ’Oia ia rāua. ’Ua ho’i mai rāua i Ierusalema ’e ’ua ’ite atu Iāna i roto i te hiero e ’āparau ra i te mau taote ’āivāna’a. I tō Maria tama’ira’a Iāna nō te ’orera’a e ho’i nā muri ia rāua, ’ua pāhono atu ’Oia, « ’Aita ’ōrua i ’ite ē ’ia ha’apa’o vau i tā ta’u Metua e ti a ai ? » (Luka 2:49). ’Ua riro Tāna mau parau ’ei tāpa’o fa’a’ite ātea nō Tāna tāvinira’a i muri mai.
’Ua ha’amata taua tāvinira’a ra i Tōna bāpetizora’a i roto i te ’ānāvai pape nō Ioridana i raro a’e i te rima a Tōna taea’e tāne ’o Ioane. I Tōna ti’ara’a mai mai raro mai i te pape, ’ua pou mai ra te Vārua Maita’i i ni’a iho iāna mai te ’ū’upa ra, ’e ’ua fa’aro’ohia te reo o Tōna ra Metua, i te nā-’ō-ra’a ē, « Ta’u Tamaiti here teie, ’ua māuruuru roa vau Iāna » (Mataio 3:17). ’Ua riro taua parau ra ’ei ha’apāpūra’a i Tōna ti’ara’a Atua.
’Ua ha’apae ’Oia i te mā’a e 40 mahana ’e ’ua fa’ahemahia ’e te diabolo, tei ’imi i te fa’aātea ’ē atu Iāna i Tāna misiōni tei fa’ata’ahia mai e te ra’i. I te anira’a a te ’enemi, ’ua pāhono atu ’Oia ē, « ’eiaha ’oe e ’a’a i tō Atua ra ia Iehova » (Mataio 4:7), ma te parau fa’ahou i Tōna ti’ara’a e tamaiti nā te Atua.
’Ua haere ’Oia nā ni’a i te mau purumu repo nō Paretetina. ’Aita Tōna e fare ’ua nehenehe Iāna e parau Nōna iho, ’aore e vāhi nō te tu’u i Tōna ra upo’o. Tāna parau poro’i ’o te ’evanelia ïa nō te hau. Tāna mau ha’api’ira’a nō ni’a ïa i te ’ā’au hōro’a ’e te aroha. « E ’ia ha’avā mai te hō’ē ta’ata ia ’oe i te ture ’e rave i tō ’ahu ’ō’omo ra, e tu’u ato’a atu i tō pereue » (Mataio 5:40).
’Ua ha’api’i ’Oia nā roto i te mau parabole. ’Ua rave ’Oia i te mau semeio ’o tei ’ore roa atu i ravehia nā mua atu ’aore rā mai taua taime atu. ’Ua fa’aora ’Oia i te mau ta’ata e ma’i maoro tō rātou. ’Ua hi’o te matapō, ’ua fa’aro’o te turi, ’ua haere te piri’o’i. ’Ua fa’ati’a mai ’Oia i tei pohe, ’e ’ua ora fa’ahou mai rātou nō te fa’ateniteni Iāna. E mea pāpū roa ’aita e ta’ata i rave i taua mau huru mea ra na mua atu.
’Aita re’a tei pe’e atu Iāna, ’ua au ’ore rā te rahira’a Iāna. ’Ua fa’ariro ’Oia i te mau pāpa’i parau ’e te mau Pharisea ’ei feiā ha’avare, mai te mau vaira’a tūpāpa’u i fa’ateateahia. ’Ua rave rātou i te mau ’ōpuara’a huna nō te ha’apohe Iāna. ’Ua ti’avaru atu ’Oia i te feiā taui moni i rāpae’au i te fare o te Fatu. E mea pāpū roa ē ’ua ’āmui atu rātou i te feiā tei ’ōpua i te tāparahi pohe Iāna. ’Aita rā ’Oia i taui i Tāna mau ravera’a. ’Ua « hāmani maita’i haere ’Oia » (Te mau ’Ohipa 10:38).
’Aita ānei teie mau mea pā’āto’a i nava’i ’e ’ia ha’amana’o tātou Iāna ē a muri noa atu ? ’Aita ānei i nava’i nō te tu’u atu i Tōna ra i’oa i rotopū, ’e i ni’a atu, i taua mau ta’ata tuiro’o ra tei ora i ni’a i te fenua nei ’e tei ha’amana’ohia nō te mea tā rātou i parau ’aore rā i rave ? E mea pāpū roa e tu’uhia ’Oia i rotopū i te mau peropheta rahi nō te mau tau ato’a.
’Aita rā teie mau mea ato’a i nava’i nō te Tamaiti a te Atua Mana Hope. E tāpa’o noa rā te reira nō te mau mea rarahi ’o te tae mai. ’Ua tae mai te reira mau mea nā roto i te hō’ē rāve’a huru ’ē ’e te ri’ari’a.4
Tāpe’ara’a, fa’asataurora’a, ’e pohera’a
’Ua ha’avarehia ’Oia, ’ua tāpe’ahia, ’ua ha’avāhia ’ia pohe, ’ia pohe nā roto i te mamae rahi o te fa’asataurora’a. ’Ua pātitihia tōna tino ora i ni’a i te hō’ē satauro rā’au. I roto i te māuiui e’ita e nehenehe e parau, ’ua hope marū noa Tōna ora. ’A huti noa ai ’oia i te aho, ’ua tuō ’Oia « E ta’u Metua, e fa’aore mai i tā rātou hara, ’aore ho’i rātou i ’ite i tā rātou e rave nei » (Luka 23:34).
’Ua ’āueue te fenua ’a fa’aru’e mai ai Tōna ra vārua. Ma te hanahana ’ua parau a’era te ra’atira hānere tei ’ite i te mau mea ato’a tei tupu,« ’o te Tamaiti mau ā teie nā te Atua » (Mataio 27:54).
’Ua tātara a’era te feiā tei here iāna i Tōna tino mai ni’a mai i te satauro. ’Ua fa’aineine ’e ’ua tu’u ihora i te reira i roto i te hō’ē mēnema ’āpī […]
’Ua heva Tōna mau hoa. ’Ua heva te mau ’āpōsetolo Tāna i here ’e Tāna ho’i i pi’i ’ei mau ’ite nō Tōna atuara’a. ’Ua heva te mau vahine tei here iāna. ’Aore roa e ta’ata i ta’a i te mea Tāna i parau nō ni’a i te ti’ara’a mai i te toru o te mahana. Nāhea ho’i e nehenehe ai ia rātou ’ia hāro’aro’a ? ’Aita roa atu teie mea i tupu nā mua atu’? ’Aore roa e mea mai teie te huru i tupu noa a’e. E’ita e nehenehe e ti’aturihia, nō rātou ato’a.
’Ua tupu mai paha te mana’o hepohepo ’e te ti’aturi ’ore ’e te ’ati ’a feruri ai rātou nō tō rātou Fatu tei ravehia atu i roto i te pohe.5
Ti’afa’ahoura’a
E ’ere rā te reira te hope’ara’a. I te po’ipo’i o te toru o te mahana, ’ua ho’i atu ’o Maria Magadala ’e te tahi atu Maria i te mēnema. I tō rāua māere rahi, ’ua tūra’ihia te ’ōfa’i i te hiti ’e ’ua matara te mēnema. ’Ua hi’o atu rāua i roto. Tē pārahi ra nā ta’ata e piti i roto i te ’ahu ’uo’uo i nā hope’a e piti nō te vāhi hunara’a. ’Ua fā mai ra te hō’ē melahi ia rāua ma te parau ē : « E aha ’outou i ’imi ai i tei ora i te vaira’a o te pohe ?
« ’Aore ’Oia i’ō nei, ’ua ti’a ïa i ni’a : ’A ha’amana’o i tāna i parau mai ia ’outou iāna i pārahi i Galilea ra,
« I te nā-’ō-ra’a mai : « E tu’uhia te Tamaiti a te ta’ata nei i te rima o te feiā rave hara, ’e e fa’asataurohia, ’e e ti’afa’ahou ’ia tae i te ru’i toru ra » (Luka 24:5–7).
’Ua riro teie nā parau ’ōhie—« ’Aore ’Oia i’ō nei, ’ua ti’a ïa i ni’a »—’ei mau parau hōhonu roa a’e i roto i te mau pāpa’ira’a ato’a. E mau parau te reira nō te hō’ē mēnema ta’ata ’ore. E tupura’a ïa te reira nō te mau mea ato’a Tāna i parau nō ni’a i te ti’afa’ahoura’a. E pāhonora’a hanahana ïa te reira i te uira’a e fa’aruruhia e te mau tāne, te mau vahine ’e te mau tamari’i ato’a ’o te fānauhia i te fenua nei.
« Tāna parau poro’i ’o te ’evanelia ïa nō te hau. Tāna mau ha’api’ira’a nō ni’a ïa i te ’ā’au hōro’a ’e te aroha ».
’Ua paraparau te Fatu tei ti’afa’ahou ia Maria, ’e ’ua pāhono ’Oia. E ’ere ’Oia i te hō’ē noa fāra’a. E ’ere teie e māna’ona’ora’a noa. E mea mau ’Oia, mai Tōna huru mau i roto i te orara’a tāhuti ra. ’Aita ’Oia i fa’ati’a iāna (Maria) ’ia tāpe’a mai Iāna. ’Aita ā ’Oia i haere atu ra i Tōna ra Metua i te Ao ra. E’ita e maoro e tupu ïa te reira. ’Auē ïa fārereira’a, ’ia tauahihia e te Metua, tei here Iāna ’e tei heva ato’a Nōna i roto i Tōna mau hora ’ati.
E fā mai ïa ’Oia i nā ta’ata e piti nā ni’a i te purūmu nō Emausa. ’E e paraparau ’Oia ia rāua ’e e tāmā’a ’Oia ’e rāua. E fārerei ’Oia i Tāna mau ’āpōsetolo ’o rātou ana’e ’e ’ua ha’api’i atu ia rātou. ’Aita ’o Toma i reira i te taime mātāmua. I te piti o te taime, ’ua ani te Fatu iāna ’ia fāfā i Tōna nā rima ’e Tōna ra ’ao’ao. Ma te māere rahi, nā ’ō atu ra ’oia, « E ta’u Fatu, e ta’u Atua » (Ioane 20:28. ’Ua paraparau ’Oia i nā 500 ta’ata i [te tahi atu] taime […]
’E tē vai nei te tahi atu ’ite. Tē fa’a’ite pāpū nei te hoa bībīlia, te Buka a Moromona ē, ’ua fā atu ’Oia ’eiaha noa i te mau ta’ata i te ao Tahito, i te feiā ato’a rā nō te ao ’Āpī. Nō te mea ’aita ānei ’Oia i parau i te hō’ē taime, « e māmoe ’ē atu ā ta’u, e ’ere i tō teie nei ’āua, e arata’i ato’a mai au ia rātou e ti’a ai, e fa’aro’o mai ho’i rātou i tō’u reo, ’ia hō’ē a’e nānā e hō’ē ho’i tīa’i » ? (Ioane 10:16).
’Ua fā atu ’Oia i te mau ta’ata nō teie ’āfara’a o te fenua i muri mai i Tōna Ti’afa’ahoura’a. I tōna poura’a mai nā roto i te mau ’ata o te ra’i, ’ua fa’aro’o-fa’ahou-hia te reo o te Atua te Metua Mure ’Ore ma te parau hanahana : « Inaha, ’o tau Tamaiti here, ’ua māuruuru roa vau Iāna, ’ua ha’amaita’i ho’i au i tō’u i’oa Iāna ; ’a fa’aro’o mai iāna » (3 Nephi 11:7) […]
E mai te mea e’ita teie mau mea ato’a e nava’i, tē vai nei ïa te ’itera’a, pāpū maita’i ’e te pūai ’e te māramarama, nō te peropheta rahi nō teie tau tu’ura’a ’evanelia, ’o Iosepha Semita. ’Ei hō’ē tamāroa ’āpī, ’ua haere atu ’oia i roto i te uru rā’au nō te pure nō te tūtavara’a i te māramarama ’e te ’ite. ’E i reira ’ua fā mai ra e piti ta’ata i mua iāna, ’e tō rāua teatea ’e te hanahana ’a ti’a noa ai rāua i ni’a a’e iā’u i roto i te reva ra, e ’ore roa ïa e ti’a ’ia fa’aauhia i te hō’ē noa atu mea. ’Ua parau mai ra te hō’ē o rāua iāna, ma te fa’atoro atu i tōna rima i ni’a i te tahi, ’e ma te fa’ahiti i tōna « i’oa, i te nā-’ō-ra’a mai ē—’O Ta’u Tamaiti Here Teie. ’A fa’aro’o Iāna !» (Iosepha Semita—’Ā’amu 1:17)
’Ua parau mai taua iho Iosepha ra i te hō’ē taime i muri mai : « ’E ’ua ’ite mata atu ra māua i te hanahana nō te Tamaiti, i te pae ’atau nō te Metua, ’e ’ua fāri’i ho’i i tā tōna ’īra’a…
« ’E i teienei, i muri mai i te mau parau fa’a’ite e rave rahi ’o tei hōro’ahia nōna ra, ’o teie ho’i te parau fa’a’itera’a hope’a roa ra, ’o tā māua e fa’a’ite atu nei nōna ra : ’Oia ho’i te ora nei ’oia ! (PH&PF 76:20, 22).6
I te feiā ato’a e fē’a’a ra, tē parau fa’ahou nei au i te mau parau tei hōro’ahia atu ia Toma ’a fāfā ai ’oia i te mau rima pēpē o te Fatu : « ’Eiaha e fa’aro’o tai’atā, e fa’aro’o rā » [Ioane 20:27]. ’A ti’aturi ia Iesu Mesia, te Tamaiti a te Atua, te ta’ata rahi roa a’e nō te taime ē a muri noa atu. ’A ti’aturi ē e ’itehia tōna orara’a fāito ’ore i muta’a roa hou te ao i hāmanihia ai. ’A ti’aturi ē ’o ’Oia tei hāmani i te fenua tā tātou e ora nei. ’A ti’aturi ē ’o ’Oia ’o Iehova nō te Faufa’a Tahito, ’e ’o ’Oia te Mesia nā te Faufa’a ’Āpī, ’e ’ua pohe ’e ’ua ti’afa’ahou mai Oia, ’e ’ua tere atu i te mau fenua i te tō’o’a o te rā ’e ’ua ha’api’i i te mau ta’ata i reira, ’e ’ua ha’amata i teie tau tu’ura’a hope’a nō te ’evanelia, ’e tē ora nei ’Oia, te Tamaiti ora a te Atua ora, tō tātou Fa’aora ’e tō tātou Tāra’ehara.7
2
E nehenehe tā tātou tāta’itahi e ’ite ē ’o Iesu Mesia te Tamaiti a te Atua ’e te Tāra’ehara o te ao, tei ti’afa’ahou mai te mēnema mai.
Tē vai nei te… hō’ē tama’i e ’arohia nei nō te fa’aro’o o te ta’ata nei, ’aita rā te mau rēni i… ha’apāpū-maita’i-hia, nō te mea tē vai ra i roto i te mau nu’u keresetiano te mau ta’ata e ha’amou nei i te ti’ara’a atua o te Mesia ’e tē a’o nei ho’i rātou nā ni’a i taua i’oa ra. E nehenehe rātou e tāu’a-’ore-hia ’āhani e ’ere tō rātou reo i te mea au-roa-hia, ’āhani e’ita tō rātou mana e haere na te mau vāhi ato’a, ’āhani e’ita tō rātou tumu i te mea nehenehe…
E naho’a ta’ata ïa ’o te ha’aputuputu mai i ni’a i te tauasini mau ’āivi nō te fāri’ira’a i te ’ā’ahiata o te mahana Pāsa ’e nō te fa’aha’amana’o ia rātou iho i te ’ā’amu nō te Mesia, ’o tā rātou ho’i e fa’ahanahana ra te ti’afa’ahoura’a. Nā roto i te reo nehenehe ’e te ’ī i te ti’aturira’a, e fa’ati’a fa’ahou ïa te feiā a’o nō te mau fa’aro’o e rave rahi i te ’ā’amu nō te mēnema ta’ata ’ore. Ia rātou—’e ia ’outou—tē ani nei au i teie uira’a : « Tē ti’aturi mau ra ānei ’outou i te reira ? »
Tē ti’aturi mau ra ānei ’outou ē ’o Iesu te Tamaiti a te Atua, te tamari’i mau a te Metua ?
Tē ti’aturi ra ’ānei ’outou ē ’ua fa’aro’o-mau-hia te reo o te Atua, te Metua Mure ’Ore, i ni’a a’e i te mau pape nō Ioridana, i te paraura’a e, « Ta’u Tamaiti here teie, ’ua māuruuru roa vau iāna » ? (Mataio 3:17.)
Tē ti’aturi ra ānei ’outou ē ’o teie iho Iesu te ta’ata tei fa’atupu i te mau semeio, tei fa’aora i te ma’i, tei fa’ati’a mai i te piri’o’i, ’e tei hōro’a i te ora i tei pohe ?
Tē ti’aturi ra ānei ’outou ē, i muri a’e i tōna pohera’a i ni’a i te ’āivi nō Kalavari ’e tōna hunara’ahia i roto i te mēnema o Iosepha, ’ua ti’a ora mai ’oia i te toru o te mahana ?
Tē ti’aturi mau ra ānei ’outou ē tē ora noa ra ’Oia—e mea mau, e mea oraora, ’e te ha’apa’o i te ta’ata—’e e ho’i fa’ahou mai ’Oia mai tei fafauhia e te mau melahi i tōna ma’uera’a ?
Tē ti’aturi mau ra ānei ’outou i teie mau mea ? Mai te mea e ti’aturi ’outou, ’ua riro ïa ’outou ’ei tuha’a nō te hō’ē pupu ta’ata ’o te iti noa ra ’o te ti’aturi mau i tei pāpa’ihia i roto i te Bībīlia ’e ’o te ’ata-rahi-hia nei e te mau ’āivāna’a, ’e ’o te fa’ao’ō’ohia ra e te tahi mau ’orometua ha’api’i ’e ’o te fa’arirohia ra ’ei feiā « tei rāpae’au mai » e te hō’ē pupu ’orometua nō te ha’apa’ora’a ’e te mau ’āivāna’a nō te fa’aro’o ’o te rahi noa atu ra…
I te mata o teie mau ’āivāna’a, e mau ’ā’ai ana’e ïa teie nō te tau tahito ra—te fānaura’a o Iesu ’ei Tamaiti nā te Atua tā te mau melahi ho’i i hīmene atu i te mau ’āfa’a nō Iudea, te ta’ata semeio tei fa’aora i te ma’i ’e tei fa’ati’a i tei pohe, te Mesia tei ti’afa’ahou mai te mēnema mai, te ma’uera’a ’e tei fafauhia te ho’ira’a mai.
Tē fa’a’ere nei teie mau ’āivāna’a ’ihi atua nō teie tau iāna i tōna ti’ara’a atua ’e tē ui nei rātou nō te aha te ta’ata e ’ore ai e ha’amori iāna.
Tē haere ra te Fa’aora tei ti’afa’ahou mai ’e nā ta’ata e piti nā ni’a i te purūmu nō Emausa.
’Ua rave ’ē atu teie mau ’āivāna’a māramarama i te ti’ara’a atua o Iesu ’e ’ua vaiiho mai iāna mai te hō’ē noa ta’ata. ’Ua tāmata rātou i te fa’aau iāna mai tō rātou iho ferurira’a piriha’o. ’Ua fa’a’ere rātou iāna i tōna ti’ara’a tamaiti atua ’e ’ua ’īriti ’ē atu i te Ari’i mau o tō te ao […]
Tē hōro’a atu nei au i tō’u itera’a hanahana ē ’aita te Atua i pohe, maori rā e fa’arirohia ’oia mai te hō’ē fa’ahōho’ara’a ora ’ore […]
Tē hina’arohia nei te tahi mea hau atu i te hō’ē ti’aturira’a maita’i noa. Tē hina’arohia nei te hō’ē ’itera’a nō ni’a i tōna ti’ara’a hō’ē roa ’e te ’aifāito ’ore ’ei Tāra’ehara hanahana ’e te hō’ē ’ana’anataera’a nōna ’e tāna poro’i ’ei Tamaiti nā te Atua.
E noa’a taua ’itera’a ra ’e taua ’ana’anataera’a ra i te feiā ato’a ’o te tūtava mau. E’ita te reira e tū’ati atu i te ha’api’ira’a teitei, e’ita te reira e tae mai nā roto noa i te tai’ora’a i te mana’o ta’ata. ’Aita, e tae mai te reira nā roto i te hō’ē ravera’a ’ōhie a’e. E ’itehia te mau mea a te Atua nā roto ana’e i te Vārua o te Atua. (1 Korinetia 2:11.) ’O te parau ïa a te heheura’a.
Te noa’ara’a te ’ite ’e te ’ana’anatae nō te Fatu, e tae mai ïa nā roto i te pe’era’a i te mau ture ’ōhie i muri nei… Tē hina’aro nei au e hōro’a atu e toru ture, e mea ’ōhie roa i roto i tō rātou ha’amaura’a, fātata i te fa’a’ohipa-rahi-hia i roto i tō rātou tāpiti-noa-ra’a-hia, e mea faufa’a rahi rā i roto i tō rātou fa’a’ohipara’a ’e te hotu i te hope’ara’a […]
Te mātāmua ’o te tai’o ïa—te tai’ora’a i te parau a te Fatu… ’Ei hi’ora’a, ’a tai’o i te ’Evanelia a Ioane mai te ha’amatara’a ē tae atu i te hope’ara’a. ’A vaiiho i te Fatu ’ia parau nōna iho ia ’outou, ’e e tae mai ïa tāna mau parau ma te hō’ē ha’apāpūra’a hau ’o te ha’afaufa’a ’ore i te mau parau a te feiā e fa’ahapa nei iāna. ’A tai’o ato’a i te faufa’a nō te ao ’Āpī, te Buka a Moromona, tei fa’ati’ahia mai ’ei ’ite « ē ’o Iesu, ’o te Mesia ïa, te Atua Mure ’Ore, ’o tei fa’a’ite iāna iho i te mau fenua ato’a » (Te ’api upo’o parau o te Buka a Moromona.)
I muri mai ’o te tāvini ïa—te tāvinira’a i roto i te ’ohipa a te Fatu… ’Aita te ’ohipa a te Mesia e hina’aro i tō ’outou mau fē’a’ara’a ; tē hina’arohia ra tō ’outou pūai ’e tō ’outou taime ē tō ’outou mau tālēni ; ’e ’a fa’a’ohipa ai ’outou i te reira i roto i te tāvinira’a, e tupu ïa tō ’outou fa’aro’o i te rahi ’e e ’ore atu ïa tō ’outou mau fē’a’ara’a […]
Te toru, ’ia pure ïa. ’A paraparau i tō ’outou Metua i te Ao ra i te i’oa o Tāna Tamaiti Here. Tē nā ’ō ra ’Oia ē, « inaha, tē ti’a noa nei au i te ’ūputa, tē pātoto atu nei : ’ia fa’aro’o mai te hō’ē ta’ata i ta’u reo, ’e ’ua ’īriti i te ’ōpani ra, e haere atu vau i roto iāna ra ». (Apokalupo 3:20).
Teie tāna anira’a, e mea pāpū te fafaura’a. E’ita paha ’outou e fa’aro’o i te mau reo nō te ra’i mai, e tae mai ra te hō’ē ha’apāpūra’a hau nō te ra’i mai […]
E tae mai ïa ma te ’ana’ana nā roto i te ahoaho o te ferurira’a ta’ata, te fa’ahapara’a teitei mai tei parauhia, ’e te ha’api’ira’a hape, te ’itera’a o te Vārua Mo’a ’e ’ua riro mai Iesu te Tamaiti a te Atua, tei fānauhia i roto i te tino nei, te Tāra’ehara o te ao, tei ti’afa’ahou mai te mēnema mai, te Fatu ’o te haere mai e fa’atere ’ei Ari’i o te mau Ari’i. Tei ia ’outou ra te rāve’a nō te ’ite i te reira. E hōpoi’a nā ’outou ’ia ’imi.8
3
E ti’a ia tātou ’ia tāmau noa i te ui ia tātou iho, « e aha ho’i tātou ia Iesu i tei parauhia, ’o te Mesia nei ? »
Tē ani fa’ahou nei au i te uira’a tei hōro’ahia mai e Pilato e piti tauasini matahiti i teienei, « e aha ho’i iā’u ia Iesu i tei parauhia, ’o te Mesia nei ? » (Mataio 27:22.) ’Oia mau, e ti’a ia tātou ’ia ui tāmau noa ia tātou iho, e aha ho’i tātou ia Iesu i tei parauhia, ’o te Mesia nei ? E aha tā tātou e rave i tāna mau ha’api’ira’a, ’e nāhea tātou e fa’ariro i te reira ’ei tuha’a pāpū nō tō tātou orara’a ? […]
« ’A hi’o na i te ’Ārenio a te Atua, ’o tei hōpoi ’ē atu i te hara o te ao ». Ioane 1:29. ’Auē ïa te veve tō tātou mau orara’a ’āhani ’aita tāna mau ha’apira’a ’e tōna hi’ora’a fāito ’ore. Te mau ha’api’ira’a nō te huri-’ē-ra’a atu i te tahi pāpāri’a, te ravera’a i te piti o te maile, te ho’ira’a mai o te tamaiti tei haere i te fenua roa, te tahi atu mau ha’api’ira’a e rave rahi ’ua nīni’i mai ïa te reira nā roto i te mau tau nō te riro ’ei tumu nō te ’āfa’i mai i te hāmani maita’i ’e te aroha i roto i te huru ’ino o te ta’ata i tōna ta’ata tupu.
E fa’atere te taehaera’a i te vāhi ’ua ti’avaruhia te Mesia. E fa’atere te hāmani maita’i ’e te fa’a’oroma’i i te vāhi ’ua ’itehia te Mesia ’e ’ua pe’ehia tāna mau ha’api’ira’a.
E aha ïa tātou ia Iesu i tei parauhia, ’o te Mesia nei ? « ’Ua fa’a’ite mai ’Oia ia ’oe, e te ta’ata na, i te mea maita’i ; ’e e aha tā Iehova hina’aro ia ’oe ra maori rā ’o te rave i te parau ti’a, ’e ’ia hina’aro ho’i i te aroha, ’e te haere ma te ha’eha’a i te aro o tō Atua ? » (Mika 6:8.)
« Nō reira, tē parau atu nei au ia ’outou ē, e mea ti’a roa ia ’outou ’ia fa’a’ore ’outou te tahi i tā te tahi ra hapa ; nō te mea ’o ’oia ’o tei ’ore i fa’a’ore i te hapa a tōna ra taea’e ’ua vai fa’ahapahia ’oia i mua i te Fatu ; nō te mea tei roto noa iāna te hara rahi a’e » (PH&PF 64:9) […]
E aha ïa tātou ia Iesu i tei parauhia, ’o te Mesia nei ? « I po’ia na ho’i au, ’e ’ua hōro’a mai ’outou i te mā’a nā’u : I po’ihā na vau ’e ’ua fa’ainu mai ’outou iā’u : E ta’ata ’ē au, ’e ’ua ’ite mai ’outou iā’u, i veve na vau, ’e ’ua fa’a’ahu mai ’outou iā’u : I pohe na vau i te ma’i, ’e ’ua utuutu mai ’outou iā’u ; I roto vau i te tāpe’ara’a, ’e ’ua haere mai ’outou iā’u ra : (Mataio 25:35–36) …
E aha ïa tātou ia Iesu i tei parauhia, ’o te Mesia nei ?
’A ha’api’i mai nō ni’a Iā’u. ’A ’imi i te mau pāpa’ira’a mo’a nō te mea tē fa’a’ite nei rātou nōna. ’A feruri hōhonu i te semeio nō tōna orara’a ’e tāna misiōni. ’A tāmata itoito ri’i i te pe’e i tōna hi’ora’a ’e i te ha’apa’o i tāna mau ha’api’ira’a.9
4
Tē hi’o nei tātou ia Iesu Mesia mai te ’ōfa’i nō tō tātou ora, tō tātou pūai, tō tātou orara’a maita’i, ’e te ha’apūra’a nō tō tātou fa’aro’o.
’Aita tātou e ’ite i te mea e vai nei i mua ia tātou. ’Aita tātou e ’ite e aha tā te mau mahana i mua nei e ’āfa’i mai. Tē ora nei tātou i roto i te hō’ē ao ahoaho. Nō te tahi, tē vai nei ïa te ’ohipa rahi ’o te tupu mai. Nō te tahi, e ’otora’a ïa. Nō te tahi, e ’oa’oara’a rahi ’e te poupou, te ea maita’i, ’e te orara’a maita’i. Nō vetahi, e ma’i paha ’e te tahi fāito ’oto. ’Aita tātou i ’ite. Hō’ē rā mea tā tātou i ’ite. Mai te feti’a i te ra’i, noa atu e aha tā te ananahi e ’āfa’i mai, tē ti’a mai ra te Tāra’ehara o te ao, te Tamaiti a te Atua, pāpū maita’i mai te tūtau nō tō tātou orara’a mure ’ore. Tē hi’o nei tātou ia Iesu Mesia mai te ’ōfa’i nō tō tātou ora, tō tātou pūai, tō tātou orara’a maita’i, ’e te ha’apūra’a nō tō tātou fa’aro’o.
I te taime maita’i ’e te taime ’ino e hi’o tātou iāna, tei reira ’Oia nō te ha’apāpū ’e nō te ’ata i ni’a ia tātou.10
’Ua ’ite au tē ora nei tō’u Tāra’ehara,
To’u fa’aora rahi, te Tamaiti a te Atua,.
’Ua upo’oti’a ’Oia i te pohe ’e te mamae,
Tō’u Ari’i, tō’u Arata’i, ’e tō’u Fatu.
Tē ora nei ’Oia, tō’u niu pāpū nō te fa’aro’o,
Te ti’aturira’a māramarama o te ta’ata i ni’a i te fenua nei,
Te ’ē’a maita’i roa a’e,
Te māramarama i’ō atu i te pāruru o te pohe.
’A hōro’a mai na i tō ’Oe Vārua hau,
Te hau nō ’ō mai ia ’Oe na,
Te fa’aro’o nō te haere nā ni’a i te ’ē’a mo’emo’e
E tae atu ai ia ’Oe na.11
Te mau mana’o tauturu nō te tuatāpapara’a ’e te ha’api’ira’a
Mau uira’a
-
’A tai’o fa’ahou i te ’itera’a pāpū o te peresideni Hinckley i roto i te tuha’a 1 ’e ’a rave i te taime nō te feruri hōhonu i ni’a i tō ’outou iho ’itera’a pāpū nō ni’a ia Iesu Mesia. Nō te aha tātou e māuruuru ai nō te tāvinira’a ’e te Tāra’ehara a te Fa’aora ? E aha te mau ’ā’amu ’e te mau ha’api’ira’a nō roto mai i te orara’a o te Fa’aora tei riro ’ei aura’a ta’a ’ē nō ’outou ?
-
’A ui ia ’outou iho i te mau uira’a ato’a i roto i te tuha’a 2. Nāhea tā ’outou mau pāhonora’a e ha’amaita’i ai i tō ’outou orara’a i te mau mahana ato’a ? I roto i taua iho tuha’a ra, ’a tai’o fa’ahou i « nā ture ’ōhie » e toru nō te noa’ara’a i te hō’ē ’itera’a nō te mau « mea a te Atua ». Nāhea teie mau ture i tauturu ai ia ’outou ’ia fa’ahōhonu atu i tō ’outou ’itera’a vārua ?
-
’Ua ani tāmau te peresideni Hinckley ē « e aha ho’i tātou ia Iesu i tei parauhia, ’o te Mesia nei ? » (tuha’a 3). E aha tā tātou e nehenehe e ’apo mai nā roto mai i tāna mau pāhonora’a ? ’A feruri e nāhea ra ’outou i te pāhono i teie uira’a. Nāhea tō ’outou orara’a e ta’a ’ē ai mai te mea ’aita ’outou i ’ite i te mau ha’api’ira’a ’e te hi’ora’a o te Fa’aora ?
-
’Ua ha’apūai mai te peresideni Hinckley i te parau ē ’o Iesu Mesia tō tātou tūtau i roto i te hō’ē ao ahoaho (hi’o te tuha’a 4). E aha te taime i ’ite ai ’outou i te pūai ’e te tāmāhanahanara’a a te Fa’aora i te hō’ē taime fifi ? ’A feruri hōhonu i te mau rēni ato’a nō te hīmene a te peresideni Hinckley i roto i te tuha’a 4. Nāhea te Mesia e riro ai ’ei « hō’ē ti’aturira’a ’ana’ana » ? Nāhea ’Oia e riro ai ’ei « mōrī nō tātou nō te arata’i i te hō’ē ’ē’a maita’i a’e » ?
Te mau pāpa’ira’a mo’a
Luka 24:36–39 ; Ioane 1:1–14 ; Te mau ’Ohipa 4:10–12 ; 2 Nephi 2:8 ; 25:26 ; Alama 5:48 ; PH&PF110:3–4
Tauturu ha’api’ira’a
« ’A fa’anaho i te mau ’ohipa ha’api’ira’a ’o te patu i tō ’outou fa’aro’o i roto i te Fa’aora » (’Ia Poro Haere i Ta’u nei ’Evanelia [2004], 22) ’Ei hi’ora’a, ’a tuatāpapa ai ’outou, e nehenehe tā ’outou e ui ia ’outou iho i te mau uira’a mai teie i muri nei : Nāhea teie mau ha’api’ira’a e tauturu ai iā’u ’ia fa’arahi i tō’u ’itera’a nō ni’a i te Tāra’ehara a Iesu Mesia ? Nāhea teie mau ha’api’ira’a e nehenehe ai e tauturu iā’u ’ia riro rahi a’e mai te Fa’aora te huru ? »