Pene 18

Te viretu—Hō’ē ’ōfa’i tihi nō te patu atu i tō tātou orara’a

« E mau tamari’i tāta’itahi ’outou nā te hō’ē Metua hanahana i te Ao ra. ’Ua hāmanihia ’outou mai te au i Tāna ōpuara’a ’ia au i te hōho’a o Tei Hāmani ia ’outou. E mea mo’a tō ’outou tino. E hiero te reira nō tō ’outou vārua. ’Eiaha e ha’avi’ivi’i i te reira i te hara ».

Nō roto mai i te orara’a o Gordon B. Hinckley

I roto i tāna a’ora’a i te mau pīahi i te fare ha’api’ira’a teitei nō Brigham Young i te matahiti 2007, ’ua parau te peresideni Gordon B. Hinckley :

« ’Ua hi’opo’a vau i te hō’ē ’ohipa māere i te tahi mahana. I te ’oire nō Roto Miti, i te hō’ē po’ipo’i mahana mā’a, ’ua ha’amaruahia te fare moni Key Bank nā roto i te tahi ha’apa’a’inara’a tūpita tei tu’u-maita’i-hia. ’Ua tupu te reira i roto e toru ’aore rā e maha tetoni, ma te hō’ē ata repo rahi tei pe’e atu i te pae apato’erau tō’o’a o te rā. ’Ua parauhia teie ravera’a hō’ē ha’amaruara’a, e ’ere te hō’ē harurura’a.

’Ua hāmanihia te fare fātata e 30 matahiti i teienei. Tē mana’o nei au e hō’ē matahiti e penei a’e e piti matahiti te hamanira’ahia teie fare. I teienei ’ua mo’e te reira i roto i nā tetoni noa.

« Terā ïa, e tō’u mau hoa, ’o te ’ā’amu ïa nō e rave rahi orara’a. Tē utuutu māite nei tātou i teie orara’a e rave rahi mau matahiti te maoro. ’E tē ite nei tātou ia tātou iho i roto i te mau huru orara’a fifi roa. E ravehia te mau hape. E ha’afifihia te vi’ivi’i ’ore. E tupu mai te ha’amaruara’a, ’e e repo noa ’o te toe mai.

Tē ha’amana’o nei au i te reira i te taime ’a ha’amana’o ai au i te hō’ē taure’are’a tāne ’e te hō’ē taure’are’a vahine tei haere mai i ta’u piha ’ohipara’a. E tamaiti hāviti ’oia ’e e tamāhine nehenehe ’oia. E nā pīahi rāua nō te fare ha’api’ira’a teitei. E mea ’ana’ana ’e e mea nehenehe tō rāua ananahi. ’Ua topa rā rāua i roto i te fa’ahemara’a […]

« ’Ua ’ī tō rāua mata i te roimata ’a paraparau ai rāua iā’u nei. ’Aita rā e horora’a i te ’ohipa ’o tei tupu ’o tā rāua e fa’aruru atu. ’Ua ro’ohia tō rāua orara’a i te hō’ē ha’amaruara’a, ’e ’ua marua tā rāua mau moemoeāra’a.

« ’Eiaha e fa’ati’a i te reira ’ia tupu ia ’outou. ’Eiaha e ha’amarirau i tō ’outou ananahi nā roto i te ’ōfatira’a i tā ’outou fa’aotira’a ’ia ha’apa’o i te ture nō te vi’ivi’i ’ore. E mau tamari’i tāta’itahi ’outou nā te hō’ē Metua hanahana i te Ao ra. ’Ua hāmanihia ’outou mai te au i tāna ’ōpuara’a ’ia au i te hōho’a o Tei Hāmani ia ’outou. E mea mo’a tō ’outou tino. E hiero te reira nō tō ’outou vārua. ’Eiaha e ha’avi’ivi’i i te reira i te hara ».

« Teienei, e ho’i tātou i ni’a i te patu tei marua, tē fa’aha’amana’o nei au ia ’outou ē i taua iho vāhi ra e hāmanihia ïa te hō’ē fare nehenehe ’āpī. ’Oia ato’a, e nehenehe tā te feiā tei hara e fāriu atu i tō rātou Tāra’ehara, tō tātou Fa’aora ’o Iesu Mesia, ’e nā roto i te mana o Tōna Tāra’ehara, ’ia riro fa’ahou mai ’ei mea mā ’e e mea ’āpī ».¹

Peresideni Hinckley i te purupiti — ’Ua a’o te peresideni Gordon B. Hinckley, « ’ia riro te viretu ’ei hō’ē ’ōfa’i tihi nō te patu atu i tō tātou orara’a ».

Te mau ha’api’ira’a a Gordon B. Hinckley

E ’āfa’i mai te orara’a vi’ivi’i ’ore i te mau ha’amaita’ira’a māere ’e te fa’ahiahia.

’Aita roa atu e mea nehenehe i roto i te tā’ātoara’a o teie nei ao mai te viretu. E ’ana’ana te reira ma te vi’ivi’i ’ore. E mea faufa’a rahi ’e te nehenehe. ’Aita tōna e moni ho’o. E’ita te reira e nehenehe e ho’ohia mai ’aore rā e ho’ohia atu. E hotu te reira nō te ha’avīra’a iāna iho…

’Ua hōro’a mai te Fatu i te hō’ē fa’auera’a nehenehe. ’Ua parau Oia, « ’ia fa’a’una’una noa te tai’ata ’ore i tō ’outou mau ferurira’a i te mau taime ato’a » (PH&PF 121:45). ’Ua riro teie ’ei fa’auera’a e ti’a ’ia ha’apa’ohia ma te itoito ’e te ha’avī. ’E tā’atihia atu i ni’a i te reira te fafaura’a ïa nō te mau ha’amaita’ira’a māere ’e te fa’ahiahia. ’Ua parau ’oia i te feiā o te ora ma te vi’ivi’i ’ore :

« ’Ei reira tō ’outou ti’aturira’a e pūai roa ai i mua i te aro o te Atua […]

« E riro te Vārua Maita’i ’ei ’āpiti nō ’outou i te mau taime ato’a, ’e tō ’outou sepeta ’ei sepeta taui ’ore nō te parau ti’a ’e te parau mau ; ’e e riro tō ’outou mana ’ei mana mure ’ore, ’e e tahe mai te reira ia ’outou ma te fa’ahepo ’ore ē a muri ’e a muri noa atu » (PH&PF 121:45–46).

Tē vai ra ānei te hō’ē fafaura’a rahi a’e aore rā hau atu i te nehenehe i teie fafaura’a ?²

Tē vai ra ānei te hō’ē tumu pāpū nō te viretu ? ’O te ’ē’a ana’e nō te ti’amāra’a i te ’oto. Te hau o te mana’o o te tahe mai nō roto mai i te reira o te hau ha’avare ’ore ïa o te ta’ata iho.

’E i ni’a atu i teie mau mea ato’a o te fafaura’a ’āueue ’ore ïa a te Atua i te feiā o te haere nā roto i te viretu. ’Ua parau ’o Iesu nō Nazareta i roto i tāna a’o i ni’a i te mou’a, « e ao tō tei mā te ’ā’au ; e ’ite ho’i rātou i te Atua » (Mataio 5:8). E fafaura’a teie, tei ravehia e Āna tei mau i te mana i te fa’atupura’a i te reira.³

E ti’a ia ’outou ’ia ite, e ti’a roa ia ’outou ’ia ’ite ē tē tītau mai nei te ’ite ’e te pa’ari hanahana i te viretu ’e te māra’a i te pae mōrare ’ei ’ē’a e arata’i i te pūai o te huru ta’ata, te hau i roto i te ’ā’au, ’e te ’oa’oa i roto i te orara’a nei.⁴

’Ia riro te viretu ’ei hō’ē ’ōfa’i tihi nō te patu atu i tō tātou orara’a.⁵

’Ia ti’a ana’e tātou i ni’a atu i te vi’ivi’i ’e i te ’ohipa faufau o te ao nei, e rahi a’e ïa tō tātou ’oa’oa, tō tātou orara’a pāruruhia, ’e te hau o tō tātou ferurira’a.

’Ia hi’o ana’e tātou i tō te ao, e au ra ē ’ua tu’uhia te orara’a mōrare i te hiti. ’Ua riro te ’ōfatira’a i te mau ture tahito ’ei peu mātauhia. Tē fa’a’ite mai nei te mau tuatāpapara’a e rave rahi, ē ’ua fa’aru’ehia te mau ture tei tāmatahia mai te tau ’e te tau. ’Ua ha’amo’ehia te ha’avīra’a iāna iho, ’e ’ua rahi roa atu te fa’ati’ara’a i te tai’atara’a.

Terā rā, e tō’u mau hoa here, e’ita e nehenehe ia tātou ’ia fāri’i i te mea tei fāri’i-noa-hia i roto i te ao nei. ’Ei mau melo nō teie ’Ēkālesia, e ti’ara’a teitei a’e ’e te tītau rahi a’e tō ’outou. Tē parau nei te reira mai te hō’ē reo nō Sinai mai ē e’ita roa ’oe e rave i te reira. E ti’a ia ’oe ’ia ha’avī i tō ’oe mau hina’aro.⁶

’Ua tano te mau parau a Paulo i te feiā mo’a nō Korinetia ia tātou i teie mahana mai te mau ta’ata tāna i pāpa’i atu. ’Ua parau ’oia ē :

« ’Aita ’outou i ’ite ē, ’o te hiero ’outou o te Atua, ’e tē pārahi ra te Vārua o te Atua i roto ia ’outou na ?

« E ’ia ha’avi’ivi’i te hō’ē ta’ata i te hiero o te Atua ra, e pohe ’oia i te Atua, e taua hiero ra ’o ’outou ïa » (1 Korinetia 3:16–17).⁷

Fa’ahou ā te a’o a Paulo ia Timoteo, « ’ia vai maita’i ā ’oe » (1 Timoteo 5:22).

E mau parau ’ōhie taua mau parau ra. E mea faufa’a rahi roa rā. Tē parau nei ’o Paulo, ’oia mau, ’a fa’a’ātea ’ē atu i taua mau mea ra ’o te ha’aparuparu ia ’outou ’ē ’o te ha’amou ia ’outou i te pae vārua. ’A fa’a’ātea ’ē i te mau hōho’a nō te ’āfata teata ’o te arata’i atu i te mau mana’o mā ’ore ’e te parau ’ino. ’A fa’a’ātea ē atu i te mau video o te arata’i atu i te mau mana’o ’ino. E’ita te reira e tauturu ia ’outou. E hāmani ino rā te reira ia ’outou. ’A fa’a’ātea ’ē atu i te mau buka ’e te mau ve’a ’ino ’e te faufau i roto i te mau mea tā rātou e parau nei ’e e fa’ahōho’a nei. ’A tāpe’a mā noa ia ’outou.⁸

e tane ’e te vahine — Te vi’ivi’i ’ore ’o te « ’ē’a ïa nō te ’oa’oa i roto i te orara’a ».

’Ua ha’apa’ohia te fa’aipoipora’a e te Atua, te fa’aipoipora’a i rotopū i te hō’ē tāne ’e te hō’ē vahine. ’O te fa’anahora’a ïa tāna i fa’ata’a e tae mai ai te mau tamari’i i roto i te ao nei. E riro te mau ’āpitira’a i roto i te mau huru ato’a ’ei ’ōfatira’a ture ’e te tū’ati-’ore-ra’a i te mau ha’api’ira’a a te ’evanelia a Iesu Mesia.⁹

Tē ti’aturi nei tātou i roto i te vi’ivi’i ’ore nā mua i te fa’aipoipora’a ’e te tai’ata ’ore i muri a’e i te fa’aipoipora’a. Nā te reira e pū’ohu i tā tātou ture mōrare. Terā ïa te ’ē’a nō te ’oa’oa i roto i te orara’a. Terā ïa te ’ē’a nō te māuruurura’a. E ’āfa’i mai te reira i te hau i te ’ā’au ’e te hau i te ’utuāfare.¹⁰

E’ita e nehenehe i te ’utuafare ’ia fāri’i i te hau, e’ita e nehenehe i te orara’a ’ia fa’aorahia i te mau tāmatara’a fifi maori rā ’ia ha’amauhia taua ’utuāfare ra ’e taua fare ra i ni’a i te mau niu nō te orara’a mōrare, te parau ti’a ’e te fa’aturara’a te tahi i te tahi. E’ita e nehenehe ’ia vai mai te hau i te vāhi ’aore e ti’aturira’a ; e’ita e nehenehe e vai mai te ti’amāra’a i te vāhi ’aore e ’ā’au māhorahora. ’Eita e nehenehe ia ’outou ’ia ’ite i te here mai te mea e rave ’outou i te mau mā’itira’a vi’ivi’i.¹¹

Tē ti’aturi nei au ē e ha’amaita’ira’a te reira i te mau tamari’i ato’a ’o te fānauhia mai i roto i te hō’ē ’utuāfare i reira taua tamari’i ra e fāri’i-poupou-hia mai ai, e atuatuhia ai, e herehia ai ’e e ha’amaita’ihia ai e te mau metua, te hō’ē metua tāne ’e te hō’ē metua vahine, ’o te ora ma te ’ā’au māhorahora nō te tahi ’e te tahi ’e nō tā rāua mau tamari’i… ’A ti’a pūai atu i mua i te mau fa’ahemara’a o te ao nei. Tē hina’aro nei te mau ta’ata tei hāmani i tā tātou mau fa’a’oa’oara’a, te mau ta’ata tei hōro’a mai i te rahira’a o tā tātou mau buka, ’eiaha tātou ’ia ti’aturi i te reira. Tē fa’a’ite māramarama mai nei ’e ma te pāpū, te pa’ari ’āmuihia i te mau tenetere ē, te ’oa’oa rahi a’e, te orara’a maita’i a’e, te hau rahi a’e o te ferurira’a, te mau vaira’a rahi a’e nō te here, ’ua ’itehia ïa e te feiā ana’e tei haere mai te au i te mau ture tei tāmata-maoro-hia nō te viretu hou te fa’aipoipora’a ’e te tai’ata ’ore i roto i te fa’aipoipora’a.¹²

Tē ora nei tātou i roto i te hō’ē ao nō te peu ’ino ’e te vi’ivi’i ’e te ahoaho. ’A ’ape i te reira, ’eiaha e rave i te reira, ’a ’ape i te mau ravera’a a tō te ao nei, ’e ’a rave i te mau mea tā te Fatu e hina’aro ia ’outou ’ia rave.¹³

E mea fa’atītī ’e e mea ha’amou te mau hōho’a faufau, e nehenehe rā tā tātou e ha’avī i te reira.

Tē taiā nei au i te a’o i te hō’ē tumu parau tā’u i a’o a’ena. Tē nā reira nei rā vau mai tā Alama i parau : « ’O teie ïa tō’u ’oa’oara’a, penei a’e ’o te riro vau ’ei mauha’a i te rima o te Atua e arata’ihia ai te hō’ē ta’ata i te tātarahapa » (Alama 29:9)…

Tē parau nei au nō ni’a i te mau hōho’a faufau i roto i te mau huru fa’a’ite’itera’a ato’a… E ’ohipa diabolo. E ’ere roa i te mea tano i te vārua nō te ’evanelia, ’e i te ’itera’a pāpū nō ni’a i te mau mea a te Atua […]

’Ua riro mai te feiā ato’a tei rave i teie ’ohipa ’ei feiā tei ro’ohia i te ’ati. ’Ua fa’a’ohipa-’ino-hia te mau tamari’i ’e ’ua tū’ino-roa-hia tō rātou orara’a. ’Ua ha’avi’ivi’ihia te ferurira’a o te feiā ’āpī i te mau mana’o hape. E arata’i te fa’a’ite’itera’a tāmau i te fa’atītīra’a e ’ore roa e noa’a i te ’ōfati… Nō reira e rave rahi roa… ’o te ’ite nei e’ita e nehenehe ia rātou ’ia fa’aru’e i te reira. ’Ua pau tō rātou pūai ’e tō rātou ’ana’anatae i roto i tā rātou tūtavara’a faufa’a ’ore nō teie ’ohipa faufau ’e te hā’iri’iri.

Te ’ōtohera’a e mea fifi ïa ’ia ’ape i te reira, tei raro a’e noa i tō tātou mau manimani rima e ’aita e horora’a.

’A mana’o nā ē tē pūai nei te hō’ē vero ’e tē hio nei te mau mata’i ’e te tāviriviri nei te hiona nā pīha’i iho ia ’outou. E’ita e noa’a ia ’outou i te tāpe’a i te reira. E ’ahu maita’i rā ’outou ’e e ’imi ’outou i te vāhi pārurura’a, ’e e’ita roa te vero e fa’a’ino mai ia ’outou

’Oia ato’a ïa, e noa atu ’ua ’ī roa te itenati i te mātēria faufau, ’eiaha ’outou e hi’o atu i te reira. E nehenehe tā ’outou e ’ōtohe atu i te vāhi pārurura’a nō te ’evanelia ’e te mau ha’api’ira’a nō ni’a i te māra’a ’e te viretu ’e te vi’ivi’i ’ore o te orara’a.

’Ua ’ite au ’e tē parau ’āfaro ti’a atu nei au ma te pāpū. Tē nā reira nei au nō te mea ’ua rahi roa te mau hōho’a faufau nā roto i te Itenati, ta’a ’ē noa atu i te mea e vai nei i roto i te mau rīpene uira ’e te mau video, ’e i roto i te ’āfata teata ’e te mau vāhi ho’ora’a ve’a. E arata’i te reira i te mau māna’ona’ora’a ’o te ha’amou i te fa’aturara’a iāna iho. E arata’i te reira i te mau aura’a vi’ivi’i, pinepine i te ma’i, ’e i te mau ’ohipa taparahira’a ta’ata.¹⁴

Tē ora nei ’outou i roto i te hō’ē ao ma te mau fa’ahemara’a ri’ari’a. ’Ua riro te hōho’a faufau ’e tōna mau repo hā’iri’iri, mai te hō’ē ’are miti fa’a’ī ri’ari’a i te tāpo’ira’a i te fenua nei. ’Ua riro ’ei rā’au taero. ’Eiaha e māta’ita’i ’e ’aore rā, e tai’o i te reira. E ha’amou ïa te reira ia ’outou ’ia nā reira ’outou. E fa’a’ere te reira ia ’outou i tō ’outou tura. E fa’a’ere te reira i tō ’outou ’ite i te nehenehe o te orara’a. E tāumi roa te reira ia ’outou i raro roa ’e e huti roa ia ’outou i roto i te hō’ē ’āpo’o tei ’ī i te ferurira’a ’ī’ino ’e penei a’e te ’ohipa ’ī’ino. ’A fa’aātea ’ē ia ’outou i te reira. ’A horo ’ē atu mai tā ’outou e nā reira nō te hō’ē ma’i hā’iri’iri, nō te mea, e ma’i pohe te reira. ’Ia mā ’outou i roto i te ferurira’a ’e i roto i te ’ohipa.¹⁵

’Ua rahi roa te repo ’e te vi’ivi’i ’e te hōho’a faufau i roto i teie ao. ’Ei feiā mo’a i te mau mahana hope’a nei e ti’a ia tātou ’ia ’ape i te reira ’e ’ia fa’a’oti ē ’eiaha roa e rave i te reira. E’ita e nehenehe ia ’outou ’ia fa’ati’a ’ia rave i te reira. E’ita e ti’a ia ’outou ’ia fa’ati’a ’ia rave i te reira. E ti’a ia ’outou ’ia tāpe’a i te reira i rāpae’au i tō ’outou ’ā’au. Mai te ’ava’ava, e mea fa’atītī te reira, ’e e ha’amou te reira i te feiā e rave i te reira. « ’Ia fa’a’una’una noa te tai’ata ’ore i tō ’outou mau ferurira’a i te mau taime ato’a » [PH&PF 121:45].¹⁶

Nā roto i te ha’avīra’a ’e te tūtavara’a, e nehenehe tā tātou e ha’avī i tō tātou mau mana’o ’e tā tātou mau ’ohipa.

’Ia mā tō ’outou mau mana’o, i reira ïa ’outou e ha’avī rahi ai i tō ’outou tino. ’Ua parauhia i muta’a ihora, « ’o tā [te ta’ata] mana’o i roto i tōna ’ā’au, ’o ’oia iho ïa » (Maseli 23:7). E arata’i te mau mana’o vi’ivi’i i te mau ’ohipa vi’ivi’i.¹⁷

’Ia fa’ahemahia tātou, e nehenehe tā tātou e mono i te mau mana’o ’ī’ino i te mau mana’o o [tō tātou Fa’aora] ’e Tāna mau ha’api’ira’a. ’Ua parau ’oia : « E mai te mea ’ua rōtahi tō ’outou mata i tō’u hanahana ra e fa’a’īhia tō ’outou mau tino pā’āto’a i te māramarama, ’e e ’ore roa ho’i te pōuri i roto ia ’outou na ; ’e ’o te tino ’o tei fa’a’īhia i te māramarama ra e ’ite ïa i te mau mea ato’a.

« Nō reira, ’a ha’amo’a na ’outou ia ’outou iho ’ia riro tō ’outou mana’o rōtahi i te Atua ra, ’e e tae mai ïa te mahana e ’ite ai ’outou iāna ra ; nō te mea e riro ’oia i te fa’aru’e i te pāruru o tōna mata ia ’outou na » (PH&PF 88:67–68).¹⁸

’Ua hōro’a mai Iesu i te hō’ē fa’auera’a ’ia ha’avī i tō tātou mau mana’o ’e tae noa atu i tā tātou mau ’ohipa. ’Ua parau ’Oia, « ’o te hi’o noa atu i tā vetahi ’ē ra vahine ; ’ei fa’atupu i te hina’aro, ’ua fa’aturi ïa iāna i tōna ihora ’ā’au » (Mataio 5:28) […]

E ti’a i te ha’avīra’a i te mana’o ’ia pūai a’e i te mau hia’ai pae tino ’aore rā te mau hia’ai o te tino. ’Ia tū’ati-maita’i-ana’e-hia te mau mana’o i te parau mau tei heheuhia mai, e riro mai ïa tā tātou mau ’ohipa ’ei mea maita’i… E mana tō tātou tāta’itahi, nā roto i te ha’avīra’a ’e te tūtavara’a, ’ia ha’avī i tō tātou mau mana’o ’e tā tātou mau ’ohipa. E tufa’a teie nō te fa’atupura’a i te pa’ari i te pae vārua, te pae tino ’e te pae ferurira’a […]

Tē ani nei mātou i te mau ta’ata ato’a i te mau vāhi ato’a ’ia ora mai te au i te mau ha’api’ira’a a Tei Hāmani ia tātou ’e ’ia ’ape i te mau fa’atianira’a pae tino ’o te hope pinepine i roto i te mau ’ati ’o te pe’e atu i te mau ’ōfatira’a i te ture mōrare.¹⁹

’O rātou tei rave i te ’ohipa tai’ata e nehenehe tā rātou hara e fa’a’orehia ’e e nehenehe tā rātou e ha’amo’e i te mau mea tahito.

’Aita vau e hina’aro ’ia fa’ataupupū. E ta’ata nātura ’ana’anatae au. I roto rā i taua mau ’ohipa mai teie [hōho’a faufau ’e te tai’ata] e ta’ata ïa vau e ’ite nei i te mau mea e tupu nei. Mai te mea tei roto ’outou i teie huru ’ohipa, teie ïa te taime nō te taui. ’Ia riro teie ’ei hora e rave ai tātou i te hō’ē fa’a’otira’a pāpū ’e te tāuiui ’ore. E taui nā tātou nō te pe’e i te hō’ē ’ē’a maita’i a’e.²⁰

Mai te mea te hahi ’ē atu ra ’outou i raro a’e i te tahi mau huru orara’a, ’a ha’avī ia ’outou iho. ’A fa’aea hou ’a tāere roa ai. E māuruuru ïa ’outou nō te ’ohipa tā ’outou i rave.

’Ia ha’apa’o ’outou ia ’outou iho ’e i te mea maita’i a’e e vai nei i roto ia ’outou.²¹

Tē ha’apāpū atu nei au… ia ’outou ē mai te mea ’ua rave ’outou i te hō’ē hape, mai te mea ’ua rave ’outou i te hō’ē hape mōrare, tē vai noa ra ā te ti’aturira’a. E vai noa mai paha te ha’amana’ora’a nō taua hape ra, e nehenehe rā te hape e fa’a’orehia, ’e e nehenehe tā ’outou e ha’amo’e i te ’ohipa tahito nō te ora i te hō’ē orara’a au maita’i i mua i te Fatu i muri a’e i te tātarahapara’a. ’Ua fafau mai ’Oia ē e fa’a’ore ’Oia i tā ’outou mau hara ’e e ’ore ho’i ’Oia e ha’amana’o fa’ahou i te reira (hi’o PH&PF 58:42)…

E [nehenehe] tā te feiā fa’atere nō te ’Ēkālesia e tauturu ia ’outou i roto i tō ’outou fifi. E nehenehe tā ’outou e vaiiho i muri te mau ’ohipa ’ino ato’a tā ’outou i rave. E nehenehe tā ’outou e haere i mua ma te ti’aturira’a ’āpī ’e te fāri’ira’a i te hō’ē ’ē’a maita’i atu i roto i te orara’a.²²

Te mau mana’o tauturu nō te tuatāpapara’a ’e te ha’api’ira’a

Mau uira’a

’Ua ha’api’i te peresideni Hinckley ē tē vai nei « te hō’ē tumu pāpū nō te viretu » (tufa’a 1). Nāhea tā ’outou e nehenehe e pāhono i te hō’ē ta’ata ’o te mārō mai ē ’aita e tumu pāpū nō te viretu ?
Nō te aha te vi’ivi’i ’ore i riro ai ’ei « ’ē’a nō te ’oa’oa i roto i te orara’a » ? Nō te aha te vi’ivi’i ’ore e ’āfa’i mai ai i « te hau i te ’ā’au ’e i te hau i te ’utuāfare » ? (Hi’o te mau tufa’a 1 ’e te 2).
’Ua parau te peresideni Hinckley, « ’ei feiā mo’a i te mau mahana hope’a nei e ti’a ia tātou ’ia ’ape i te reira ’e ’ia fa’a’oti ē ’eiaha roa e rave i te reira » (tufa’a 3). E aha tā tātou e nehenehe e rave nō te ’ape i te reira ? E aha tā tātou e nehenehe e rave nō te tauturu ia vetahi ’ē ’ia ’ape i te reira ? I tō ’outou mana’o e aha te aura’a ’ia ha’avī i te reira ?
Mai tā ’outou i tai’o i te a’o a te peresideni Hinckley i roto i te tufa’a 4, e aha ïa tā ’outou i ha’api’i mai nō ni’a i te ha’avīra’a i tō ’outou mau mana’o ? E aha te tahi o te mau mea ’ōhie tā tātou e nehenehe e rave nō te tāpe’a mā noa i tō tātou mau mana’o ?

Te mau pāpa’ira’a mo’a

Salamo 24:3–4 ; Mataio 5:27–28 ; Philipi 4:6–8 ; Iakoba 3:2 ; PH&PF 46:31–33 ; 59:6 ; Te mau Hīro’a Fa’aro’o 1:13

Tauturu ha’api’ira’a

’Ia tai’o ana’e ’outou, ’a « rēni ’e ’a tāpa’o i te mau parau ’e aore rā i te mau pereoda, [’ia fa’ata’a maita’i te mau mana’o e vai ra i roto i terā noa iho fa’ahitira’a]… I te hiti, ’a tāpa’o i te mau fa’ahorora’a o te pāpa’ira’a mo’a ’o te ha’amāramarama i te mau ’īrava ’o tā ’oe e tāmau ra » (’Ia Poro Haere i Ta’u nei ’Evanelia [2004], 26).