’Ōmuara’a

’Ua fa’anaho te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo i teie mau buka, Te mau Ha’api’ira’a a te mau Peresideni o te ’Ēkālesia nō te tauturu ia ’outou ’ia ha’afātata atu i tō ’outou Metua i te Ao ra, ’e ’ia fa’ahōhonu i tō ’outou ’ite nō te ’evanelia a Iesu Mesia tei fa’aho’i-fa’ahou-hia mai. ’A tu’u noa ai te ’Ēkālesia i te buka ’āpī i roto i teie mau buka e roa’a ïa ia ’outou te hō’ē ha’aputura’a buka ’evanelia nō tō ’outou ’utuāfare. ’Ua ’ōpuahia teie mau buka nō te tuatāpapara’a a te ta’ata hō’ē ’e nō te mau ha’api’ira’a. E tauturu ato’a te reira ia ’outou ’ia fa’aineine i te mau ha’api’ira’a nō te purera’a pō ’utuāfare, fa’aineine i te tahi atu mau ha’api’ira’a ’e ’aore rā mau a’ora’a, ’e ’ia pāhono i te mau uira’a nō ni’a i te ha’api’ira’a tumu a te ’Ēkālesia.

Tē vauvau nei teie buka i te mau ha’api’ira’a a te peresideni Gordon B. Hinckley, tei tāvini ’ei Peresideni nō te ’Ēkālesia a Iesu Mesia i te Feiā Mo’a i te Mau Mahana Hope’a Nei mai te 12 nō mati 1995, ē tae atu i te 27 nō tenuare 2008.

Te tuatāpapara’a a te ta’ata hō’ē

’A tuatāpapa ai ’outou i te mau ha’api’ira’a a te peresideni Gordon B. Hinckley, ’a tītau i te fa’aurura’a a te Vārua Maita’i nā roto i te pure. E tauturu te mau uira’a i te pae hope’a o te pene tāta’itahi ia ’outou ’ia feruri, ’ia māramarama ’e ’ia fa’a’ohipa i te mau ha’api’ira’a a te peresideni Hinckley. E tauturu ato’a teie mau mana’o i muri nei ia ’outou :

’A pāpa’i i te mau mana’o o te ferurira’a ’e o te ’ā’au e tae mai nā roto i te Vārua Maita’i, i roto i tā ’outou tuatāpapara’a.
’A rēni i te mau tuha’a tā ’outou e hina’aro e ha’amana’o. ’A ’ōpua ’ia tāmau ’ā’au i te tahi mau tuha’a ’e ’aore rā ’a tāpa’o i te reira i roto i tā ’outou mau pāpa’ira’a mo’a, i pīha’i iho i te ’īrava tū’ati.
’A tai’o i te hō’ē pene ’e ’aore rā te hō’ē tuha’a hau i te hō’ē taime, ’ia māramarama hōhonu a’e ’outou i te reira.
’A ui ia ’outou iho i te mau uira’a mai teie te huru « nāhea te mau ha’api’ira’a a te peresideni Hinckley e fa’arahi ai i tō’u māramaramara’a i te mau parau tumu o te ’evanelia ? » ’e ’aore rā, « e aha tā te Fatu e hina’aro nei ’ia ha’api’i au mai roto mai i teie mau ha’api’ira’a ? E aha Tāna e hina’aro ’ia rave au ? »
’A ui ia ’outou iho nāhea te mau ha’api’ira’a i roto i teie buka e nehenehe ai e tauturu ia ’outou i roto i tō ’outou mau tāmatara’a ’e te mau māna’ona’ora’a.
’A fa’a’ite i tō ’outou ’utuāfare ’e i te mau hoa i te mau mea tā ’outou i ’apo mai.

Ha’api’ira’a mai roto atu i teie buka

Nā te mau arata’ira’a i raro nei e tauturu ia ’outou ’ia ha’api’i mai roto atu i teie buka, i te fare ānei ’e ’aore rā, i te fare purera’a.

’A fa’aineine nō te ha’api’i

’A tītau i te arata’ira’a a te Vārua Maita’i ’a fa’aineine ai ’outou nō te ha’api’i. ’A tuatāpapa i te pene ’ia ti’a ia ’outou ’ia pāpū maita’i i te mau ha’api’ira’a a te peresideni Hinckley, ’e nā roto i te pure ’a mā’iti i te mau ha’api’ira’a tā ’outou e mana’o ra ē, e riro ’ei tauturura’a rahi.

E hina’aro paha ’outou e fa’aitoito i te feiā tā ’outou e ha’api’i ’ia tuatāpapa rātou iho i te pene ’e ’ia ha’apa’o ta’a ’ē i te tuha’a ra « Te mau mana’o tauturu nō te tuatāpapara’a ’e te ha’api’ira’a » i te pae hope’a o te pene.

’A fa’aitoito i te tau’ara’a parau nō ni’a i te mau ha’api’ira’a a te peresideni Hinckley

’A ha’api’i ai ’outou i teie buka, ’a ani ia vetahi ē ’ia fa’a’ite mai i tō rātou mau mana’o, ’ia ui i te mau uira’a, ’ia fa’a’ite i te ’itera’a pāpū ’e ’ia ha’api’i i te tahi ’e te tahi. Mai te mea e ’āmui mai rātou i roto i te ’āparaura’a, e rahi atu ā tō rātou ineine nō te ’apo mai ’e nō te fāri’i i te heheura’a nō rātou iho.

’A vaiiho i te mau tau’ara’a parau maitata’i ’ia tere noa na, ’eiaha rā e tāmata i te ha’api’i i te tā’āto’ara’a o te mau ha’api’ira’a. ’A arata’i i te mau ’āparaura’a nō te tauturu i te mau ta’ata ’ia tai’o i te mau ha’api’ira’a a te peresideni Hinckley ’e ’ia ’ite i te mau rāve’a nō te fa’a’ohipa i taua mau ha’api’ira’a ra i roto i tō rātou orara’a.

E rāve’a tauturu faufa’a rahi roa te mau uira’a i te pae hope’a o te pene tāta’itahi nō te fa’aitoito i te ’āparaura’a. E nehenehe ato’a tā ’outou e fa’aineine i tā ’outou iho mau uira’a ta’a ’ē nō te feiā tā ’outou e ha’api’i nei. Teie i raro nei te tahi atu mau mana’o nō te fa’aitoito i te ’āparaura’a :

’A ani i te mau pīahi ’ia fa’a’ite mai e aha tā rātou i ha’api’i mai nā roto mai i tā rātou iho tuatāpapara’a i te pene.
’A fa’aue i te tahi mau ta’ata ’e ’aore rā, te tahi mau pupu na’ina’i ’ia tai’o i te tahi o te mau uira’a i mā’itihia i te pae hope’a o te pene. ’A ani i te mau pīahi ’ia ’imi i te mau ha’api’ira’a i roto i te pene ’o te tū’ati i te mau uira’a. I muri iho ’a ani ia rātou ’ia fa’a’ite mai i tō rātou mau mana’o ’e tā rātou mau hi’ora’a.
’A tai’o ’āmui ’outou i te tahi o te mau ha’api’ira’a a te peresideni Hinckley i roto i te pene. ’A ani i te mau pīahi ’ia fa’a’ite mai i te tahi hi’ora’a i roto i te mau pāpa’ira’a mo’a ’e i roto i te mau ’ohipa tā rātou iho i ’ite ’o te tū’ati i taua mau ha’api’ira’a ra.
’A ani i te mau pīahi ’ia ma’iti i te hō’ē tufa’a ’e ’ia tai’o i te reira ma te māmū noa. ’A ani ia rātou ’ia ’āmui ’ei pupu ta’ipiti ’e ’aore rā ta’itoru ta’ata i roto o tei mā’iti i te hō’ē ā tuha’a ’e ’ia ’āparau i te mea tā rātou i ha’api’i mai.

’A fa’aitoito i te fa’a’ohipara’a ’e te fa’a’itera’a

E aura’a ta’a ’ē atu tō te mau ha’api’ira’a a te peresideni Hinckley mai te peu e fa’a’ohipa te mau ta’ata i te reira i roto i tō rātou orara’a, ’e e fa’a’ite ho’i ia vetahi ’ē. E nehenehe tā ’outou e fa’a’ohipa i te hō’ē ’e ’aore rā e rave rahi atu ā mana’o i muri nei :

’A ani i te mau pīahi nāhea rātou e nehenehe ai e fa’a’ohipa i te mau ha’api’ira’a a te peresideni Hinckley i roto i tā rātou mau hōpoi’a i te ’utuāfare, i roto i te ’Ēkālesia ’e i te tahi atu mau vāhi.
’A ani i te mau pīahi ’ia fa’a’ite i te mau ’itera’a tei roa’a ia rātou nā roto i tō rātou ha’apa’ora’a i te parau a’o a te peresideni Hinckley.
’A fa’aitoito i te mau pīahi ’ia fa’a’ite i te tahi o te mau ha’api’ira’a a te peresideni Hinckley i te mau melo nō te ’utuāfare ’e i te mau hoa.

Fa’ahope i te ’āparaura’a

’A pū’ohu poto noa i te ha’api’ira’a ’e ’aore rā ’a ani i te hō’ē ’e ’aore rā e piti pīahi ’ia pū’ohu mai. ’A fa’a’ite i tō ’outou ’itera’a pāpū nō ni’a i te mau ha’api’ira’a tā ’outou i ’āparau, ’e ’a fa’aitoito i te mau pīahi ’ia fa’a’ohipa i te mau mea tā rātou i ’apo mai. E hina’aro ato’a paha ’outou e ani i te tahi pae ’ia fa’a’ite mai i tō rātou ’itera’a pāpū.

Hamāramaramara’a nō ni’a i te mau mātēria tauturu

Te mau ha’api’ira’a i roto i teie buka e mau fa’ahitira’a parau ïa nō roto mai i te mau a’ora’a, te mau pāpa’ira’a ’e te mau uiuira’a a te peresideni Gordon B. Hinckley. Nō te mau fa’ahitira’a parau nō roto mai i te mau parau i piahia, ’ua tāpe’ahia ïa te mau fa’atomara’a, te pāpa’ira’a, te mau reta rahi ’e te mau paratarafa o te mau pāpa’ira’a tumu maori rā ’ua taui te mau reta i te nene’ira’a nō te ha’amaita’i i te tai’ora’a. Nō te reira tumu, e ’ite paha ’outou i te tahi mau tū’ati-’ore-ra’a i roto i te pāpa’ira’a. ’Ei hi’ora’a, te mau ta’o nō te fa’ahiti i te Atuara’a tē vai ra ’ua pāpa’i-na’ina’i-hia ’e tē vai ra ’ua pāpa’i-rarahi-hia.

’Ua fa’a’ohipa pinepine ato’a te peresideni Hinckley i te mau parau mai te mau tāne, te tāne ’e te ta’ata nei nō te parau i te mau ta’ata ato’a te tāne ’e te vahine. ’Ua fa’a’ohipa pinepine ato’a ’oia i te mau ta’o ’ōna, tāna ’e ’oia nō te parau i nā ’āpeni e piti. E mea mātarohia teie mau paraparaura’a i tōna ra ’anotau.