« 6–12 nō Māti. Mataio 9–10 ; Mareko 5 ; Luka 9 : ‘’O taua Tino ’Ahuru ma Piti nei tā Iesu i fa’atono’ », Mai, pe’e mai—nō te Paraimere : Faufa’a ’Āpī 2023 (2022)
« 6–12 nō Māti. Mataio 16–17 ; Mareko 9 ; Luka 9 ». Mai, pe’e mai—nō te Paraimere : 2023
6–12 nō Māti
Mataio 9–10°; Mareko 5°; Luka 9
« ’O taua Tino ’Ahuru ma Piti nei tā Iesu i fa’atono »
’Ia tai’o ’oe i te Mataio 9–10 ; Mareko°5 ; ’e te Luka °9, e fāri’i ’oe i te mau muhumuhu a te Vārua Maita’i. E tauturu teie mau muhumuhu, ’āpitihia i te Mai, pe’e mai—nō te ta’ata hō’ē ’e te ’utuāfare, ’e teie fa’anahora’a ia ’oe ’ia fa’aineine nō te ha’api’i.
Tītau i te mana’o
E ani i te mau tamari’i ’ia fa’a’ite mai i te tahi mea tā rātou i rave nō te tauturu i te hō’ē ta’ata i teie hepetoma. E aha tā te Fa’aora i rave nō te tauturu ia vetahi ’ē ?
Ha’api’i i te ha’api’ira’a tumu : Te mau tamari’i ’āpī
Mataio 9:18–30°; Mareko 5:22–43
E mana tō Iesu nō te fa’aora iā’u.
’Ua fa’a’ite onoono te Fa’aora i tōna mana nō te fa’aora i te feiā e fa’aro’o tō rātou iāna. E nehenehe ’oe e tauturu i te mau tamari’i tā ’oe e ha’api’i ra ’ia patu i tō rātou fa’aro’o i roto i tōna mana fa’aora.
Te mau ’ātivite e au
-
’A fa’ati’a i te mau tamari’i i te ’ā’amu nō te tamāhine a Iaeiro (hi’o Mareko 5:22–23, 35–43). ’Ia tae i te vāhi tano i roto i te ’ā’amu, ’a tai’o i te mau parau a Iesu « ’a ti’a i ni’a, tē fa’aue atu nei au ia ’oe » (’īrava 41), ’e ’a ani i te mau tamari’i ’ia ti’a i ni’a. ’A tauturu i te mau tamari’i ia hāro’aro’a ē, e mana tō Iesu nō te fa’aora i te ta’ata ’e nō te hōro’a mai ’ia tātou te ora mure ’ore.
-
’A fa’a’ite i te hō’ē hōho’a nō te ā’amu i roto te Mataio 9:20–22 ’a tai’o ai ’oe i teie mau ’īrava. E tauturu i te mau tamari’i ’ia tāmau ’ā’au i te pereota « ’ua ora ’oe i tō ’oe fa’aro’o » (’īrava 22). Nō te rave i te reira, ’ia fa’ata’a ’oe nā te tamari’i tāta’itahi hō’ē ta’o, ’e i muri iho e ani i te mau tamari’i ’ia parau i tā rātou ta’o nā te ana’ira’a ti’a e rave rahi taime. Nāhea te vahine i te fa’a’itera’a ē, e fa’aro’o nō Iesu Mesia tōna ? E aha tā tātou e rave nō te fa’a’ite ē, e fa’aro’o tō tātou nō te Mesia ?
-
E ani i te mau tamari’i ’ia tāpō i tō rātou mata ’e ’ia fa’aro’o ’a tai’o ai ’oe i te Mataio 9:27–30. ’Ia tai’o ana’e ’oe i te parau nō Iesu i te fa’aorara’a i te ta’ata matapō, ’a ani i te mau tamari’i ’ia ’ara’ara i tō rātou mata. E ani i te mau tamari’i ’ia parau mai e aha tā rātou e putapū ’āhani ’ua fa’aora Iesu ia rātou.
-
’A fa’a’ohipa i te ’api ’ātivite nō teie hepetoma nō te tauturu i te mau tamari’i ’ia ha’api’i mai i te ā’amu o te Fa’aora i te fa’ati’ara’a mai i te tamāhine a Iaeiro mai te pohe mai.
’A ti’aturi i te Fatu, nā Liz Lemon Swindle
’Ua pi’i Iesu ’Ahuru ma Piti ’āpōsetolo ’e ’ua hōro’a ia rātou i te mana nō te rave i tāna ’ohipa.
’Ua ’ite ānei te mau tamari’i tā ’oe e ha’api’i ra ē, tē vai nei ’Ahuru ma Piti ’āpōsetolo i teie mahana ? Nāhea ’oe i te fa’a’ohipa i teie mau ’īrava nō te ha’api’i ia rātou nō ni’a i te faufa’a rahi o te mau ’āpōsetolo i teie tau ’āpī, ’e e aha tei pi’ihia ia rātou ’ia rave ?
Te mau ’ātivite e au
-
’A tātara poto noa i te Mataio 10:1–10 nā roto i te mau parau ’ōhie. E fa’ata’a ē, ’ua pi’i Iesu i te mau ’āpōsetolo nō te tauturu iāna ’ia patu i tāna ’Ēkālesia. ’A fa’aue i te mau tamari’i ’ia tai’o i te mau ’āpōsetolo i roto i te hōho’a Te Mesia e fa’atōro’a ra i te mau ’āpōsetolo (Buka hōho’a ’Evanelia, N°38) ’e i roto i te hō’ē hōho’a o te Pupu nō te Tino ’Ahuru ma Piti ʼāpōsetolo i teie mahana (hi’o ChurchofJesusChrist.org ’aore rā, te Liahona) nō te hō’ē ’āmuira’a rahi. E fa’ata’a ē, tē vai nei tā tātou ’Ahuru ma Piti ʼāpōsetolo i teie mahana, mai te ’anotau o Iesu. ’A fa’a’ite i tō oe ’itera’a pāpū nō te mau ’āpōsetolo a te Fatu ’e hō’ē mea tā rātou i ha’api’i ’aita i maoro a’enei.
-
’A huna i te mau hōho’a o te mau ’āpōsetolo o teie tau ’āpī nā roto i te piha (nō te mau hōho’a, ’a hi’o i te Liahona) nō te ’āmuira’a rahi i ma’iri a’e nei. E ani i te mau tamari’i ’ia ’imi mai i te mau hōho’a, ’e ’ia paraparau ri’i nō ni’a i te ’āpōsetolo tāta’itahi (hi’o « Fārerei i te mau Peropheta ’e te mau ’Āpōsetolo nō teie mau mahana » i ni’a ChurchofJesusChrist.org).
-
E ani i te hō’ē tamari’i ’ia tāpe’a i te hō’ē hōho’a o te Peresidenira’a Mātāmua ’e hō’ē hōho’a o te Pupu nō te Tino ’Ahuru ma Piti ʼāpōsetolo. ’A ani i te tamari’i ’ia arata’i i te tahi atu mau tamari’i nā roto i te piha e tae atu i te hōho’a o Iesu. ’A fa’a’ite pāpū ē, e arata’i te mau peropheta ’e te mau ’āpōsetolo ia tātou ia Iesu Mesia ra.
Ha’api’i i te ha’api’ira’a tumu : Te mau tamari’i pa’ari a’e
Mataio 9:18–30°; Mareko 5:22–43
E mana tō Iesu nō te fa’aora iā’u.
E tauturu te tai’ora’a i te mau ’ā’amu o te Fa’aora i te fa’aorara’a i te ta’ata, i te mau tamari’i tā ’oe e ha’api’i ra ’ia patu i tō rātou fa’aro’o iāna. E tauturu ato’a teie mau ’ā’amu ia rātou ’ia ’ite i tōna aumihi ’e tōna here.
Te mau ’ātivite e au
-
E tai’o ’āmui i te mau ’ā’amu o Iesu i te fa’aorara’a i te mau ta’ata e ’itehia i roto i te Mataio 9:20–22, 27–30 ’e Mareko 5:22–23, 35–43 (’aore rā, e fa’a’ite i te mau video « Jesus Heals a Woman of Faith [’Ua fa’aora Iesu i te hō’ē vahine fa’aro’o] » ’e « Jesus Raises the Daughter of Jairus [’Ua fa’ati’a mai Iesu i te tamāhine a Iaeiro’ » i ni’a ChurchofJesusChrist.org). Nāhea te mau ta’ata i roto i teie mau ’ā’amu i te fa’a’itera’a i tō rātou fa’aro’o ia Iesu Mesia ? E aha tā tātou e ha’api’i mai nō ni’a i te Fa’aora nā roto mai i teie mau ’ā’amu ?
-
E ani i te mau tamari’i ’ia fa’a’ite mai i te mau ’itera’a, i te taime ’a fāri’i ai rātou iho ’aore rā te hō’ē ta’ata tā rātou mātau i te hō’ē ha’amaita’ira’a autahu’ara’a nō te fa’aorara’a i te ma’i. Nāhea rātou i te fa’aorara’ahia ’aore rā i te ha’amaita’ira’ahia°? E fa’ata’a ē, i te tahi taime e ’ere te fa’aorara’a temeio i te hina’aro o te Fatu, e nehenehe rā tātou e ha’amaita’ihia i tōna here ’e tāna tāmāhanahanara’a.
E ha’api’i nā ʼāpōsetolo ’Ahuru ma Piti iā’u nō ni’a ia Iesu.
Nāhea te ha’api’ira’a mai nō ni’a i nā ʼāpōsetolo ’Ahuru ma Piti i te ’anotau o te Mesia i te tauturu i te mau tamari’i ’ia hāro’aro’a maita’i a’e i te ’ohipa tā te mau ’āpōsetolo ’Ahuru ma Piti e rave nei i teie mahana ?
Te mau ’ātivite e au
-
’A fa’a’ite i te mau hōho’a o te mau ’āpōsetolo i te ’anotau o Iesu ’e i tō tātou nei ’anotau (hi’o Te Mesia e fa’atōro’a ra i te mau ’āpōsetolo [Buka hōho’a ’Evanelia, N°38] ’e te Liahona) nō ni’a i te ’āmuira’a rahi i ma’iri a’e nei). E ani i te mau tamari’i ’ia tai’o te Mataio 10:7 nō te ’ite mai e aha tā te mau ’āpōsetolo e rave nei (hi’o ato’a Luka 9:1–2, 6 ; Te Ha’api’ira’a Tumu ’e te mau Fafaura’a 107:23).
-
E ani i te mau tamari’i ’ia pāpa’i i ni’a i te tāpura ’ere’ere i te i’oa o te mau āpōsetolo mātāmua e rave rahi, ’o tā rātou e nehenehe e ha’amana’o. I muri iho e ani ia rātou ’ia tāpura e rave rahi mau ’āpōsetolo ora ’o tā rātou e nehenehe e ha’amana’o. E vaiiho ia rātou ’ia hi’o i tā rātou tāpura ’e te Mataio10:2–4 ’e te ’āmuira’a i ma’iri a’e nei i roto i te Liahona. E nehenehe ato’a e ha’uti i te hō’ē ha’uti fa’atū’atira’a i reira te mau tamari’i e fa’atū’ati ai i te i’oa o te ’āpōsetolo ora tāta’itahi ’e tōna hōho’a. E ’itehia te mau hōho’a i ni’a ChurchofJesusChrist.org.
-
E rave rahi mahana hou te ha’api’ira’a, e ani i te tahi mau tamari’i ’ia haere ineine mai nō te fa’a’ite mai i te hō’ē ’ā’amu tei fa’ati’ahia e te hō’ē o te mau ’āpōsetolo ora (hi’o i te mau a’ora’a i roto i te Liahona nō te mau mana’o). Nāhea teie ’āpōsetolo i te fa’a’ohipara’a i te ’ā’amu nō te fa’auru ia tātou ’ia riro hau atu mai te Fa’aora te huru ?
-
’A fa’a’ite i te mau tamari’i e rave rahi hi’ora’a o te ’itera’a pāpū o te mau ’āpōsetolo o teie tau ’āpī nō ni’a i te Mesia (hi’o i te mau a’ora’a o te ’āmuira’a i ma’iri a’e nei ’aore rā « Te Mesia ora : Te ’Itera’a Pāpū o te mau ’Āpōsetolo » [ChurchofJesusChrist.org]).
-
Tauturu i te mau tamari’i ’ia tāmau ’ā’au ’e ’ia hāro’aro’a i te Hīro’a Fa’aro’o 1:6.
E tītau te pe’era’a ia Iesu Mesia i te fa’atusiara’a.
Nāhea ’oe i te tauturu i te mau tamari’i ’ia hāro’aro’a e aha te aura’a ’ia « ’ere » i tō rātou ora ’a pe’e ai i te Fa’aora ?
Te mau ’ātivite e au
-
E parau i te mau tamari’i nō ni’a i te hō’ē taime ’a fa’aru’e ai ’oe i te hō’ē mea nō te fāri’i i te tahi mea maita’i a’e. E ani i te mau tamari’i ’ia fa’a’ite mai i tō rātou iho mau ’itera’a. I muri iho e tai’o ’āmui i te Luka 9:23–25. ’A fa’ata’a ē, tē hina’aro nei Iesu ’ia fa’aru’e hua tātou i te mau mea ato’a nō te pe’e iāna. E’ita paha ’oia e ani ia tātou ’ia fa’aru’e hua i tō tātou orara’a, e aha tāna e ani nei ia tātou ’ia hōro’a ? (hi’o ’Īritira’a a Iosepha Semita, Mataio 16:26 [i roto Mataio 16:24, nota i raro i te ’api°e]).
-
Pāpa’i e rave rahi maita’i huru Mesia i ni’a i te mau ’api parau ’e te pāto’ira’a o te reira mau maita’i i ni’a i te tahi atu mau ’api parau (mai te here ’e te pipiri, te ha’eha’a ’e te te’ote’o, ’e tē vai atu ra). E pāpa’i i te mau ta’o fa’aora ’e ’ere ’ei upo’o parau i ni’a i te tāpura ’ere’ere, ’e e ani i te mau tamari’i ’ia fa’atano i te mau maita’i i raro a’e i te mau upo’o parau e tano. E hōro’a i te mau tamari’i i te taime nō te feruri hōhonu i te mau maita’i huru Mesia i ni’a i te tāpura ’ere’ere ’e ’ia mā’iti hō’ē nō te fa’ananea hope atu ā.
Fa’aitoito i te ha’api’ira’a i te fare
’A ani i te mau tamari’i ’ia fa’a’ohipa i te ’api ’ātivite o teie hepetoma nō te ha’api’i i tō rātou ’utuāfare nō ni’a i te fa’aorara’a Iesu i te tamāhine a Iaeiro.
Ha’amaita’iraʼa i tā tātou ha’api’ira’a
Fa’aitoito i te fa’aturara’a. Tauturu i te mau tamari’i ’ia hāro’aro’a ē, te hō’ē fāito faufa’a roa o te fa’aturara’a, ’oia ho’i te ferurira’a ïa i tō tātou Metua i te ao ra ’e ia Iesu Mesia. E ti’a ia ’outou ’ia fa’aha’amana’o i te mau tamari’i ’ia fa’atura nā roto i te hīmene marūra’a ’aore rā, te muhumuhura’a i te hō’ē hīmene, ’aore rā, te fa’a’itera’a i te hō’ē hōho’a nō Iesu.