’Eiaha e mata’u, nā Michael Malm

13–19 nō Māti

Mataio 11–12°; Luka 11

« E na’u ’outou e fa’aora »

’Ua fa’ata’ahia te mau mana’o nō te ha’api’ira’a i roto i teie fa’anahora’a nō te tauturu ’ia fa’auru i tō ’oe iho ferurira’a ’e te hāmanira’a i te mau ’ohipa. ’Eiaha e taiā i te fa’atano i te reira nō te pāhono i te mau hina’aro o te mau tamari’i tā ’oe e ha’api’i ra.

Tītau i te mana’o

E fa’aitoito i te mau tamari’i ’ia fa’a’ite mai e aha tā rātou e nehenehe e rave nō te ha’amori i te Fatu i te mahana sābati.

Ha’api’i i te ha’api’ira’a tumu : Te mau tamari’i ’āpī

Mataio 11:28–30

E tauturu mai Iesu iā’u mai ’a haere ai au iāna ra.

E fāri’i te mau tamari’i i te tāmāhanahana ma te ’itera’a ē, e tauturu Iesu ia rātou i roto i tā rātou mau hōpoi’a, ’ia haere ana’e mai rātou iāna ra.

Te mau ’ātivite e au

• ’A tai’o te Mataio 11:28–30, ’e ’a fa’a’ite i te hōho’a o te mau pua’atoro i tā’amuhia i raro a’e i te zugo i roto i te fa’anahora’a nō teie hepetoma i roto Mai, pe’e mai—nō te ta’ata hō’ē ’e te ’utuāfare. E ani i te mau tamari’i ’ia tohu i te pua’atoro ’e i te zugo. ’A fa’ata’a ē, te mau pua’atoro i tā’amuhia i raro a’e i te zugo, e huti ’āmui rātou e rave rahi fāito teiaha i tā rātou e huti tāta’ihō’ē. ’A fa’a’ite pāpū ē, ’ia tupu ana’e mai te ’oto, te pe’ape’a ’aore rā, te mata’u i roto ia tātou, e nehenehe tātou e ’imi ia Iesu ’e e tauturu mai ’oia ia tātou.

• E ani i te hō’ē tamari’i ’ia amo i te hō’ē tao’a teiaha. Mai te mea e mea teiaha roa, ’a pūpū atu i te tauturu. Nāhea Iesu i te tauturu ia tātou ’ia rave i te mau ’ohipa pa’ari ? ’A fa’a’ite i te hō’ē ’itera’a ’a fāri’i ai ’oe te tauturu Iesu i te ravera’a i te hō’ē ohipa pa’ari, ’e e ani i te mau tamari’i ’ia fa’a’ite mai i tō rātou iho mau ’itera’a.

Mataio 12:1–13

E nehenehe au e ha’amo’a i te mahana sābati.

E aha te tahi mau rāve’a ’ārearea e ti’a ia ’oe ’ia ha’api’i i te mau tamari’i nō ni’a i te mahana sābati, ’e nō te aha tātou e ha’amo’a ai i te reira ?

Te mau ’ātivite e au

• ’A tai’o pūai te Mataio 12:10–13. E ani i te mau tamari’i ’ia ti’a i ni’a ’e ’ia pārahi i raro i te mau taime ato’a e fa’ahiti ai ’oe te « sābati », ’e ’a fa’ahiti fa’ahou ’e rātou i te pereota « e [au] maori i te ture ’ia hāmani maita’i i te sābati » (Mataio 12:12). E aha te aura’a o te reira i tō rātou mana’o ?

• ’A fa’a’ite i te hō’ē tārena i te mau tamari’i ’e ’a peni i te mahana sābati nō rātou. E aha tā tātou e rave i te tahi atu mau mahana o te hepetoma ? E aha tā tātou e nehenehe e rave i te sābati nō te fa’ariro ’ei mahana ta’a ’ē i te tahi atu mau mahana ? (hi’o Isaïa 58:13–14).

• E ani i te mau tamari’i ’ia pāpa’i hōho’a i te mau mea maita’i tā rātou e nehenehe e rave i te mahana sābati (hi’o te ’api ’ātivite o teie hepetoma).

• E ani i te mau tamari’i ’ia hōro’a mai i te mau ’ohipa nō te tauturu ia rātou ’ia ha’amana’o i te mau rāve’a e ti’a ia tātou ’ia fa’aineine i te mahana sābati, ’a hīmene ai rātou « Samedi » (Chants pour les enfants,°105).

• ’A pāpa’i hōho’a nā mata, nā tari’a, te vaha ’e nā rima i ni’a i te tāpura ’ere’ere. E ani i te mau tamari’i ’ia parau mai ia ’oe e aha tā te tuha’a tāta’itahi o tō tātou tino, e rave nō te ha’amo’a i te mahana sābati.

Luka 11:11–13

E hōro’a mai te Metua i te ao ra ia tātou te mau hōro’a maita’i.

E tauturu te ha’api’ira’a a te Fa’aora i roto i te Luka 11:11–13 i te mau tamari’i tā ’oe e ha’api’i ra ’ia hāro’aro’a ē, tē here nei te Metua i te ao ra ia rātou ’e tē hina’aro nei e ha’amaita’i ia rātou.

Te mau ’ātivite e au

• Fa’a’ohipa i te hō’ē tao’a nō te fa’ahōho’a i te mau ha’api’ira’a a te Fa’aora i roto i te Luka 11:11–13. ’Ei hi’ora’a, e tu’u ’oe i te hō’ē ’ōfa’i i roto i te hō’ē pūtē faraoa, ’aore rā e tu’u i te hōho’a nō te hō’ē pata i roto i te hō’ē vaira’a huero moa. E ani i te mau tamari’i ’ia ’imi mai e aha tō roto, ’e i muri iho ’ia fa’a’ite mai i te reira. E ani ia rātou ’ia mono i te ’ōfa’i ’aore rā i te hōho’a i te hō’ē tāpū faraoa ’aore rā i te hō’ē huero moa. Tai’o i te Luka 11:11–13, ’e ’a fa’a’ite i tō ’oe ’itera’a pāpū ē, ’ua here te Metua i te ao ra ia tātou, e pāhono i tā tātou mau pure ’e e hōro’a mai nō tātou e rave rahi mau ha’amaita’ira’a nā roto i tōna Vārua.

• E hīmene ’āmui i te hīmene nō ni’a i te here o te Atua, mai te « Mon Père Celeste m’aime » (Chants pour les enfants,16–17). E aha te tahi o te mau hōro’a maita’i tāna e hōro’a mai ia tātou°? E ani i te mau tamari’i ’ia pāpa’i hōho’a i te mau ha’amaita’ira’a nō ’ō mai i te Metua i te ao ra, ’o tā rātou e māuruuru nei.

Ha’api’i i te ha’api’ira’a tumu : Te mau tamari’i pa’ari a’e

Mataio 11:28–30

E tauturu mai Iesu iā’u mai ’a haere ai au iāna ra.

Nāhea ’oe i te tauturu i te mau tamari’i ’ia hāro’aro’a ē, e hō mai te Fa’aora nō rātou te fa’aorara’a i tō rātou mau fifi, ’a haere ai rātou iāna ra ?

Te mau ’ātivite e au

• E ani i te mau tamari’i ’ia fa’a’ite mai i te hō’ē taime ’a pe’ape’a ai rātou ’aore rā, ’a fea’a ai rātou nō ni’a i te tahi mea. E ani ia rātou ’ia ’imi mai i te a’o i roto i te Mataio 11:28–30, ’o te tauturu ia rātou i roto i te mau fifi mai te reira te huru. Nāhea te Fa’aora i te hō mai i te « fa’aora ia [tātou] » ?(‘īrava 28).

• ’A ani i te mau tamari’i ’ia pāpa’i hōho’a i te mau mea tā rātou e rave nō te haere ia Iesu ra ’e ’ia ha’api’i mai nō ni’a iāna.

• Tauturu i te mau tamari’i ’ia tāmau ’ā’au i te Hīro’a Fa’aro’o toru. ’A parau ia rātou e nāhea te mau parau tumu mātāmua tāta’itahi ’e te mau ’ōro’a mātāmua o te ’evanelia, i te tauturu ia tātou ’ia fāri’i i te anira’a a Iesu, « e haere mai ’outou iā’u nei » (Mataio 11:28).

Mataio 12:1–13

’Ua riro te sābati ’ei mahana ravera’a i te mau ’ohipa maita’i ’o tē ha’afātata atu iā’u i te Atua.

E ha’apūaihia te mau tamari’i tā ’oe e ha’api’i ra ’a ha’apāpū ai ’oe, i te mau ’ōpuara’a ’e i te mau ha’amaita’ira’a nō te ha’amo’ara’a i te mahana sābati.

Te mau ’ātivite e au

• ’A ani i te hō’ē tamari’i ’ia ha’uti mai i te ti’ara’a o te ta’ata tā te Fa’aora i fa’aora te rima (hi’o Mataio 12:10–13). E nehenehe te tahi atu tamari’i e uiui iāna nō ni’a i te ’ohipa i tupu.

• ’A tai’o ’āmui te Mataio 12:12. E aha te tahi mau ’ohipa maita’i e au ’ia rave i te sābati ? ’A vaiiho i te mau tamari’i ’ia pāpa’i hōho’a i tō rātou mau mana’o i ni’a i te ’api ’ātivite o teie hepetoma, ’ia tāpūpū i te mau tuha’a o te hōho’a, ’e ’ia fa’atū’ati’ati atu i te puzzle a vētahi ’ē.

• ’A huna e rave rahi hōho’a o te mau ta’ata ’o tei rave i te mau ’ohipa e fa’a’ite ra, i te here nō te Metua i te ao ra i te mahana sābati. E ani i te mau tamari’i ’ia ’imi mai i te mau hōho’a ’e ’ia parau mai, e nāhea te ravera’a i te mau ’ohipa i roto i te mau hōho’a e fa’a’ite ai i tō tātou here i te Atua.

Tē ’amu nei te mau pipi i te tītona i te sābati, nā James Tissot

Luka 11:37–42

’Ia ateate tā’u mau ’ohipa ’e tō’u ’ā’au e ti’a ai.

’Ua ha’api’i te Fa’aora ē, e’ita e nava’i te huru parauti’a i rāpae i mua ia vetahi ’ē. E ti’a ato’a rā i tō tātou mau ferurira’a, tō tātou mau mana’o, ’e tā tātou mau ’ohipa ’ōmo’e ’ia ateate e ti’a ai.

Te mau ’ātivite e au

• Nō te fa’ahōho’a i tā teie mau ’īrava e ha’api’i nei, ’a fa’a’ite i te mau tamari’i i te hō’ē hāpaina ’aore rā i te tahi atu fa’ari’i e mea mā i rāpae, e mea repo rā i roto. E tauturu ia rātou ’ia feruri e aha tā rātou e nehenehe e fa’ahōho’a i « te rāpae o te ’āu’a ». E aha te fa’ahōho’ara’a o te « tuha’a i roto » ? Nō te aha e mea faufa’a ’ia tāmā i te rāpaera’a ’e te rotora’a°?

• ’A tai’o ’āmui i te tahi atu mau pāpa’ira’a mo’a ’o tē ha’apāpū ra i te parauti’a i roto i tō tātou ’ā’au ’e tā tātou mau ’ohipa—’ei hi’ora’a, Salamo 24:3–5 ; Mataio 15:7–8 ; Moroni 7:6–9. ’A āparau nō te aha te Fa’aora e hina’aro ai i tō tātou ā’au ’e i tā tātou mau ’ohipa ’ōmo’e ’ia riro ’ei mea ateate i te pae vārua.

Fa’aitoito i te ha’api’ira’a i te fare

’A tītau i te mau tamari’i ’ia fa’a’ite i tō rātou ’utuāfare te mau mana’o nō te ha’amo’a i te mahana sābati.

Ha’amaita’i i tā tātou ha’api’ira’a

Ui i te mau uira’a. « E ani te uira’a i te mau pīahi ’ia fa’a’ite mai i te hō’ē parau tumu nō te ’evanelia ’ia au i tā rātou iho mau parau—mai te mea iho ā rā e anihia te reira i te ha’amatara’a o te ha’api’ira’a—e nehenehe te reira e tauturu ia ’outou ’ia tuatāpapa e aha te maorora’a ’outou i ni’a i taua parau tumu ra i roto i te piha ha’api’ira » (Te ha’api’ira’a mai tā te Fa’aora, 32).