20–26 nō Māti

Mataio 13°; Luka 8°;°13

« E tari’a tōna ’ei fa’aro’ora’a ra, e fa’aro’o ’oia »

E mau ’ā’amu ’ōhie te mau parabole ’o tē fa’a’ana’anatae i te mau tamari’i. E tauturu teie fa’anahora’a ’e te Mai, pe’e mai—nō te ta’ata hō’ē ’e te ’utuāfare ia ’oe ’ia fa’a’ohipa i te mau parabole a te Fa’aora nō te ha’api’i i te mau tamari’i i te mau parau mau faufa’a roa.

Tītau i te mana’o

’Āfa’i mai e rave rahi tao’a nō te tauturu i te mau tamari’i ’ia ha’amana’o i te tahi mau parabole i roto i te Mataio 13, mai te hō’ē huero, hō’ē poe, ’aore rā, hō’ē ’āfata vaira’a pirū. E ani i te mau tamari’i ’ia fa’a’ite mai e aha tā rātou e ha’amana’o ra nō ni’a i te mau parabole.

Ha’api’i i te ha’api’ira’a tumu : Te mau tamari’i ’āpī

Mataio 13:1–23

Tītauhia iā’u ’ia ineine nō te ha’api’i mai i te mau ha’api’ira’a a Iesu.

E’ita paha te mau tamari’i ’āpī e hāro’aro’a i te mau tāpa’o ato’a i roto i te parabole o te ta’ata ueue huero, terā rā, e nehenehe rātou e ha’api’i mai i te mau parau mau ’ōhie o te ’evanelia e ha’api’ihia ra. Nāhea e ti’a ai ia ’oe ’ia tauturu ia rātou ’ia hāro’aro’a maita’i a’e i te tū’atira’a teie parabole i ni’a ia rātou ?

Te mau ’ātivite e au

• ’A fa’a’ite i te mau huru ta’a ’ē o te repo (’aore rā, te mau hōho’a nō te repo) ’a tātara poto noa ai ’oe i te Mataio 13:3–8. ’A hōro’a i te tamari’i tāta’itahi te hō’ē huero, ’e e ani e aha tā rātou e rave nō te tauturu i te mau huero ’ia tupu i te rahi. ’A fa’ata’a ē, e au tō tātou ’itera’a pāpū i te mau huero. Nāhea tātou i te tauturu i tō tātou « mau huero » te ’itera’a pāpū ’ia tupu i te rahi ?

• ’A fa’a’ohipa i te ’api ’ātivite o teie hepetoma nō te tauturu i te mau tamari’i ’ia hāro’aro’a, e aha tā te huru repo tāta’itahi i fa’ata’ahia i roto i te Mataio 13 e ha’api’i nei nō ni’a i tō tātou ’ā’au. E ani i te mau tamari’i e aha te huru ’ā’au tā Iesu e hina’aro nei nō rātou nō te ’apo mai i tāna mau ha’api’ira’a.

• ’A tai’o i te Mataio 13:9,°15, ’e e ani i te mau tamari’i ’ia fa’atoro i te mau tuha’a ta’a ’ē ’o tō rātou tino, ’ia fa’aro’o ana’e rātou ’ia fa’ahitihia te reira. Nāhea e ti’a ai ia tātou ’ia fa’a’ohipa i teie mau tuha’a o te tino nō te ha’api’i mai i te mau ha’api’ira’a a Iesu ?

Mataio 13:24–30, 36–43, 47–48

Tē hina’aro nei te Metua i te ao ra ’ia mā’iti au i te maita’i.

Tē ha’api’i nei te tahi mau parabole a Iesu i te mahana hōpe’a, e fa’ata’a ’ē te Atua i te feiā parauti’a ’ore i te feiā parauti’a. Nāhea ’oe ’ia fa’a’ohipa i te mau parabole nō te fa’auru i te mau tamari’i ’ia mā’iti i te maita’i ?

Te mau ’ātivite e au

• ’A fa’aue i te mau tamari’i ’ia ha’uti i te parabole o te tītona ’e te tītānia (hi’o Mataio 13:24–30). ’A fa’ata’a ē, te tītona ’o te feiā ïa tei rave i te mau mā’itira’a maita’i, ’e te tītānia (te mau huero ’ino) ’o te feiā ïa ’aita i rave i te mā’itira’a maita’i. ’Ia tae i te hō’ē mahana, e ha’aputuputu te Metua i te ao ra i te feiā parauti’a nō te ora i pīha’i iho iāna.

• ’A hōro’a i te mau tamari’i i te tahi mau hi’ora’a nō te mau mā’itira’a maita’i ’e te ’ino. ’Ia parau te mau tamari’i « mā’itira’a tītona » ’ia fa’ata’a ana’e ’oe i te hō’ē mā’itira’a maita’i ’e « mā’itira’a tītānia » ’ia fa’ata’a ana’e ’outou i te mā’itira’a ’ino.

• ’Āfa’i mai te tahi mau hōho’a nō te tumu tītona, ’e ’a fa’aue i te mau tamari’i ’ia pāpa’i hōho’a i ni’a i te mau hōho’a te tahi mau peu e riro ai rātou ’ei mea parauti’a.

Mataio13:44–46

E tao’a faufa’a rahi tō’u ti’ara’a melo i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei

Nāhea ’oe ’ia fa’a’ohipa i te fa’ahōho’ara’a o te tao’a faufa’a rahi ’e te mau poe tao’a rahi nō te tauturu i te mau tamari’i ’ia hāro’aro’a i te faufa’a nō te rirora’a ’ei melo nō te ’Ēkālesia a te Mesia ?

Te mau ’ātivite e au

• ’A huna i te mau hōho’a nō te hō’ē ’āfata tao’a faufa’a rahi ’e te hō’ē poe i roto i te piha ha’api’ira’a, ’e e vaiiho i te mau tamari’i ’ia ’imi mai i te reira. ’A fa’a’ohipa i te mau hōho’a nō te ha’api’i i te mau parabole i roto i te Mataio 13:44–46. ’A parau nō te aha te hō’ē ta’ata e fa’aru’e ai i tāna mau tao’a ato’a nō te hō’ē poe nehenehe aore rā nō te hō’ē tao’a faufa’a i roto i te fa’aapu. ’A fa’ata’a ē, i te tahi taime e fa’aru’e tātou i te hō’ē mea maita’i nō te hō’ē mea maita’i a’e. E parau i te mau tamari’i ē, nō te aha e mea faufa’a rahi te ’evanelia nō ’oe.

• ’A tu’u i roto i te hō’ē ’āfata ’aore rā, i te hō’ē ’āfata pirū e rave rahi tao’a ’aore rā hōho’a, ’ei fa’ahōho’ara’a i « te mau tao’a faufa’a rahi » i roto i Te ’Ēkālesia a Iesu Mesia i te Feiā Mo’a i te mau Mahana Hōpe’a nei, mai te Fa’aora, te mau hiero, ’aore rā, te Buka a Moromona. E ani i te tamari’i tāta’itahi ’ia mā’iti hō’ē tao’a ’aore rā, hō’ē hōho’a, ’e ’ia parau mai, nō te aha e tao’a faufa’a rahi te reira

• Hīmene ’āmui « L’Eglise de Jésus-Christ » (Chants pour les enfants, 48), ’e e ani i te mau tamari’i ’ia parau mai nō ni’a i te mau tumu rātou e māuruuru ai nō te ’Ēkālesia a te Fa’aora. ’A fa’a’ite pāpū nō te mau ha’amaita’ira’a tā ’oe i fāri’i nō te mea e melo ’oe nō te ’Ēkālesia.

Ha’api’i i te ha’api’ira’a tumu : Te mau tamari’i pa’ari a’e

Mataio 13:1–23

Tītauhia iā’u ’ia fa’aineine i tō’u ’ā’au nō te fāri’i i te mau ha’api’ira’a a Iesu.

Nāhea e ti’a ai ia ’oe i te tauturu i te mau tamari’i ’ia ’ite i te faufa’a rahi ’ia fāri’i i te ’ā’au marū ’e te hina’aro mau, ’ia nehenehe Iesu e ha’api’i ia rātou ?

Te mau ’ātivite e au

• ’A fa’aue i te tamari’i tāta’itahi ’ia tai’o hō’ē o nā huru repo e māha i roto i te Mataio 13:4–8. E ani ia rātou ’ia ’imi mai ’e ’ia fa’a’ite mai i te mea tei tupu i ni’a i te huero i roto i te huru repo tā rātou i tāi’o. Nāhea tō tātou ’ā’au e riro ai mai te mau huru repo ta’a ’ē ?(hi’o Mataio 13:19–23).

• Fa’a’ite i te mau tamari’i i te hō’ē hōho’a nō te hō’ē ō. E aha te huru repo e tītauhia ’ia ti’a i te mau rā’au tanu ’ia tupu maita’i ? Fa’a’ite i te hō’ē hōho’a nō te repo ’ōfa’ifa’i ’aore rā te repo mōtu’u. Nō te aha te mau rā’au e fifi ai i te tupu i roto i teie huru repo ? Nāhea tātou i te ha’apāpū ē, e au tō tātou ’ā’au i te repo marū i reira ho’i tātou e fāri’i ai i te mau ha’api’ira’a a te Fa’aora ?

• E ani i te mau tamari’i ’ia tai’o i te Mataio 13:15–17. ’A pāpa’i hōho’a hō’ē mata, hō’ē tari’a ’e hō’ē māfatu i ni’a i te tāpura ’ere’ere. Nāhea tātou ’ia fa’a’ohipa i teie mau tuha’a o te tino nō te ha’api’i mai i te mau ha’api’ira’a a Iesu ?

Mataio 13:24–30, 36–43

E nehenehe au e mā’iti i te maita’i noa atu ’aita te mau ta’ata ’ati a’e iā’u e nā reira nei.

’Ia tai’o ana’e ’oe i teie mau ’īrava ma te feruri i te mau tamari’i, e aha te mau mana’o e tae mai i roto ia oe ?

Te mau ’ātivite e au

• E ani i te mau tamari’i ’ia pāpa’i hōho’a i te mau tupura’a ta’a ’ē nō roto mai i te parabole o te tītona ’e te tītānia, e ’itehia i roto i te Mataio 13:24–30, ’e ’ia fa’a’ite mai tā rātou hōho’a i te piha ha’api’ira’a. ’A ani ia rātou ’ia tāmau i te hō’ē tīteti i ni’a i tā rātou hōho’a pāpa’i ma te fa’a’ohipa i te tātarara’a o te parabole e ’itehia i roto i te Mataio 13:36–43. ’Ia fa’ata’a atu ē te tītānia e aihere ’ino ïa.

• Mai te mea e nehenehe, ’a fa’a’ite atu i te hō’ē hōho’a nō te tītona ’e te tītānia. ’A fa’ata’a ē, e tupu ’āpipiti noa te tītona ’e te tītānia ē tae noa atu i te ’ō’otira’a (te hope’a o te ao nei). Tē ha’api’i mai nei te reira ia tātou ē, tē ora nei tātou ma te ha’atihia i te maita’i ’e te ’ino, ’e e ti’a ia tātou ’ia ha’apa’o i te mā’iti i te maita’i. E ani i te mau tamari’i ’ia fa’a’ite mai e nāhea rātou ’ia parau i te ta’a-’ē-ra’a i rotopū i te maita’i ’e te ’ino.

Mataio 13:44–46

E tao’a faufa’a rahi tō’u ti’ara’a melo i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

Tē ’ite ra ānei te mau tamari’i tā ’oe e ha’api’i ra, i tō rātou ti’ara’a melo i roto i te ’Ēkālesia mai te hō’ē tāo’a faufa’a rahi ? Penei a’e e tauturu te āparaura’a i te mau parabole i roto i te Mataio 13:44–46 ia rātou ’ia fa’a’ite mai i tō rātou mau mana’o nō ni’a i te Ēkālesia a te Fa’aora.

Te mau ’ātivite e au

• E ani i te mau tamari’i ’ia tai’o i te Mataio 13:44–46 nō rātou iho ’e ’ia fa’a’ite mai i te mau parabole ’ia au i tā rātou iho mau parau i te tahi atu melo o te piha.

• ’A tāpūpū e rave rahi menemenera’a ’ei fa’ahōho’ara’a i te moni pa’ari, ’e ’a tu’u i te reira i roto i te hō’ē ’āfata vaira’a pirū. E ani i te mau tamari’i ’ia rave hō’ē moni pa’ari ’e ’ia pāpa’i hōho’a ’aore rā ’ia tāpa’o i ni’a iho, i te hō’ē mea tā rātou i au nō te rirora’a ’ei melo nō te ’Ēkālesia. E ani i te mau tamari’i ’ia fa’a’ite mai e aha tā rātou i tu’u i ni’a i tā rātou moni pa’ari.

• E ani i te hō’ē melo o te pāroita ’ia fa’a’ite mai i tōna ’ā’amu fa’afāriura’a i mua i te mau tamari’i, ’e ’ia parau e aha tāna i fa’atusia nō te tomo mai i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Aore rā e ani i te mau tamari’i ’ia parau mai nō ni’a i te mau tusia tā rātou e rave nei nō te Fatu ’e nō tāna ’Ēkālesia.

Fa’aitoito i te ha’api’ira’a i te fare

E ani i te mau tamari’i ’ia ha’api’i i tō rātou ’utuāfare nō ni’a i te hō’ē o te mau parabole tā rātou i ha’api’i mai i te Paraimere.

Ha’amaita’i i tā tātou ha’api’ira’a

E mea au nā te mau tamari’i ’ia fa’a’ite i te mea tā rātou i ha’api’i mai. Noa atu e tamari’i ’āpī rātou, e nehenehe rā te mau tamari’i e ha’apūai i te mau melo o tō rātou ’utuāfare. E fa’aitoito ia rātou ’ia fa’a’ite i tō rātou ’utuāfare te mau mea tā rātou i ’apo mai i te Paraimere. (Hi’o Ha’api’ira’a mai tā te Fa’aora,°30.)