27 nō Māti–2 nō ’Ēperēra

Mataio 14 ; Mareko 6 ; Ioane 5–6

« ’Eiaha e mata’u »

’Ia tai’o ’outou i te Mataio 14 ; te Mareko 6 ’e te Ioane 5–6, e hi’o i te mau parau mau e aura’a ta’a ’ē nō ’outou. E nehenehe e ui ia ’outou iho i te mau uira’a mai teie : « E nāhea te mau ’ā’amu i roto i teie mau pene i te tū’ati i ni’a iā’u ? » « E aha te mau poro’i tā’u e ’ite ra nō tō’u orara’a ? » ’aore rā « E aha ra tā’u e fa’a’ite i tō’u ’utuāfare ’e i te ta’ata ? »

Pāpa’i i te mau mana’o e tae mai

E aha ra te mea i fa’auru ia Petero ’ia fa’aru’e i te pāpūra’a o tōna poti i ni’a i te roto nō Galilea tei tā’irihia e te vero rahi ? Nō te aha ’oia i ti’aturi ai ē, tē haere ra Iesu nā ni’a i te pape ra, e ti’a ato’a ïa iāna ’ia nā reira ? ’Aita i pāpū maita’i nō te aha ra, terā rā, penei a’e ’ua māramarama Petero ē, ’aita te Tamaiti a te Atua i haere noa mai nō te rave i te mau mea fa’ahiahia nō te ta’ata, nō te fa’ati’a ato’a rā i te ta’ata mai ia Petero, ’ia rave ato’a i te mau mea fa’ahiahia. Teie ho’i te pi’ira’a a Iesu, ’oia ho’i, « ’A haere mai, ’a pe’e mai iā’u » (Luka 18:22). ’Ua fāri’i Petero i teie anira’a hō’ē taime, ’e ’ua ineine ’oia nō te fāri’i fa’ahou ā i te reira, noa atu ā e fa’aruru atu ’oia i tōna mau mata’u ’e e rave ’oia i te hō’ē ’ohipa e’ita e nehenehe e rave ’ia hi’ohia. Pēnei a’e e’ita te Fatu e ani mai ia tātou ’ia ’ōu’a mai i rāpae i te poti i te taime vero ’aore rā ’ia fa’atāmā’a i nā tauasini ta’ata i tā ’outou ma’a faraoa iti, e ani mai rā ’oia ia tātou ’ia fāri’i i te mau arata’ira’a, noa atu ā ’aita tātou e māramarama hope roa ra i te reira. Ta’a ’ē noa atu tāna mau anira’a ia tātou, i te tahi taime, e hitimahuta tātou ’aore rā e ri’ari’a tātou. E mau semeio rā e tupu mai te mea e tu’u tātou i tō tātou mata’u i te hiti, te fē’a’a ’e te ta’a ’ore, mai ia Petero te huru, ’e e pe’e tātou iāna ma te fa’aro’o.

Mau mana’o nō tā’u iho tuatāpapara’a pāpa’ira’a mo’a

Ioane 5:16–47

’Ua fa’atura Iesu Mesia i tōna Metua.

Te tā’amura’a i rotopū i te Metua i te ao ra ’e tāna mau tamari’i tāta’itahi, e tā’amura’a mo’a ïa tei mana’ohia. I roto i teie mau ’īrava, ’ua hōro’a mai Iesu Mesia i te hō’ē hōho’a fa’auru nō te pe’e i roto i tō tātou tā’amura’a ’e te Metua i te ao ra. E tai’o i te Ioane 5:16–47, ’e tāpa’o ’aore rā e pāpa’i i te mau taime tāta’itahi e ’itehia te ta’o Metua. E nāhea te Tamaiti i te fa’atura i te Metua, ’e nāhea ’oe e pe’e ai i tōna hi’ora’a ? E aha te ha’api’ira’a tā ’oe e ’apo nei nō ni’a i te mana’o o te Metua i ni’a i te Tamaiti ? E aha tā ’oe e rave nei nō te ha’amaita’i i tō ’oe tā’amura’a i tō ’oe Metua i te ao ra ?

Hi’o ato’a Ioane 17 ; Jeffrey R. Holland, « Te hanahana rahi o te Atua », Liahona, Nov. 2003, 70–73.

Nā roto i te temeio ’ua fa’a’amu Iesu e pae tauatini ta’ata i nā faraoa e pae ’e nā i’a e piti.

Mataio 14:15–21 ; Mareko 6:33–44 ; Ioane 6:5–14

E ti’a i te Fa’aora ’ia fa’arahi i tā’u mau pūpūra’a ha’eha’a iti nō te fa’atupu i tāna mau ’ōpuara’a.

’Ua tae mai a’enei ānei te mana’o ma’ua i mua i te mau tītaura’a ato’a i ni’a ia ’oe—i te fare, i roto i te mau aura’a ’e te ta’ata ’aore rā i roto i te sōtaiete ? ’Ua tae ato’a mai paha te mana’o ma’ua i roto i te mau pipi a Iesu i te anira’a ’oia ia rātou ’ia fa’atāmā’a hau i te pae tauasini ta’ata po’ia, e pae noa ho’i faraoa iti ’e e piti i’a. ’A tai’o ai ’oe i te semeio i tupu i muri iho, ’a feruri nāhea te Atua e fa’a’ohipa ai i tā ’oe pūpūra’a ha’eha’a iti tāvinira’a nō te ha’amaita’i i te feiā ’ati a’e ia ’oe. ’Ua nāhea ’oia i te fa’arahira’a i tā ’oe mau tauto’ora’a tāvinira’a iāna ? E feruri i teie fa’ahitira’a parau a te tuahine Michelle D. Craig : « E nehenehe […] ’outou ’e ’o vau e hōro’a i tā tātou e vai nei i te Mesia, ’e nāna e fa’arahi i tā tātou mau tauto’ora’a. Te mea tā ’outou e hōro’a, ’ua hau ïa i te rava’i—noa atu ā tō ’outou mau fati ’e te mau paruparu—mai te mea e tūru’i ’outou i ni’a i te Atua » (« Māha ’ore Atua », Liahona, Nov. 2018, 54).

Mataio 14:22-33 ; Mareko 6:45–52 ; Ioane 6:15–21

Tē ani nei Iesu Mesia iā’u ’ia tu’u i te hiti i tō’u mata’u ’e te fē’a’a ’e ’ia fa’a’ohipa i te fa’aro’o iāna.

’A hi’o mana’o i roto i tō ’oe ferurira’a i te mau ’ohipa i tupu i roto i te Mataio 14:22–33 ; te Mareko 6:45–52 ; ’e te Ioane 6:15–21. E feruri na i te mana’o o Petero ’e o te tahi mau pipi. E aha te ha’api’ira’a tā ’oe e ’apo nei nō ni’a i te ti’ara’a pipi i roto i te mau parau ’e te mau ’ohipa a te Fa’aora, i roto i teie mau ’īrava ? E aha te ha’api’ira’a tā ’oe e ha’api’i nei i roto i te mau parau ’e te mau ’ohipa a Petero ? (Hi’o ato’a 1 Nephi 3:7.) E aha tā te Fatu e ani ra ia ’oe mai te au i te ’ōu’ara’a i rāpae i te poti ? E aha tā ’oe e ’ite ra i roto i teie mau ’īrava e fa’aitoito ra ia ’oe ’ia fa’a’ohipa i te fa’aro’o ia Iesu Mesia ?

Ioane 6:22–71

’Ei pipi nā Iesu Mesia, e mea ti’a iā’u ’ia ineine nō te ti’aturi ’e nō te fāri’i i te parau mau, noa atu ā e mea pa’ari ’ia nā reira.

’Ia parau Iesu ē, ’o te « pane ora » ’oia (Ioane 6:48), e rave rahi tei mana’o ē « e parau ri’ari’a teie (Ioane 6:60). Nāhea te mau parau a Petero i roto i te Ioane 6:68–69 e tauturu ai ia ’oe i te mau taime e au ē, e mea pa’ari ’ia fāri’i i te ha’api’ira’a tumu a te Fa’aora ’e ’ia ore i te reira ? E aha tā ’oe e tāpe’a ra i roto i te ’itera’a pāpū o Petero ? E aha te tahi « parau o te ora mure ’ore ra » (Ioane 6:68) e tauturu nei ia ’oe ’ia fafau noa ia ’oe ’ia pe’e i te Fa’aora ?

Hi’o ato’a M. Russell Ballard, « E haere ti’a mātou ia vai ra ? », Liahona, Nov. 2016, 90–92.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 14:15–21.E feruri e nāhea ’outou i te tauturu i tō ’outou ’utuāfare ’ia feruri i te rahira’a faraoa ’e te i’a e tītauhia nō te fa’a’amu e pae tauatini ta’ata. E aha tā te semeio i roto i te Mataio 14:15–21 e ha’api’i nei ia tātou nō ni’a i te Fa’aora ? E nehenehe e fa’a’ite i te hō’ē ’ohipa i tupu ’e ’ua mana’o ’outou ē ’aita tā ’outou pūpūra’a i nava’i ’e nā te Fa’aora i fa’arahi i tā ’outou mau tauto’ora’a.

Mataio 14:22–33.E au paha tō ’outou ’utuāfare ’ia ha’uti ta’ata ora i te ’ā’amu i roto i teie mau ’īrava. Nō te aha te mau pipi i ri’ari’a ai ? Nō te aha i noa’a ai ia Petero ’ia upo’oti’a i ni’a i tōna ri’ari’a ’e ’ia haere i rāpae i te poti ? ’Ua nāhea ’oia i te fa’a’itera’a i tōna fa’aro’o i te ha’amatara’a ’oia i te pāremo ? Mai ia Petero ānei tātou i te tahi taime ?

Ioane 5:1–16.E ani i te mau melo o te ’utuāfare ’ia tāpa’o i te mau taime e tai’ohia te parau « ora » i roto i teie mau ’īrava. E aha te ora tā Iesu Mesia e nehenehe e hōro’a i te ta’ata ? I te hea taime ’e ’ua nāhea ’oia i te hōro’ara’a ia tātou i te ora ?

Ioane 6:28–58.E hōro’a i te melo tāta’itahi o te ’utuāfare i te hō’ē tāpū faraoa e ’amu, i reira e paraparau ai i te mau maita’i nō roto mai i te faraoa ’e te tahi atu mā’a maita’i. I muri iho e mā’imi ’āmui i roto i teie mau ’īrava i te tumu Iesu Mesia i parau ai ’o ’oia « te pāne ora » (Ioane 6:35). E aha ra ïa te aura’a e « ’amu » i te pāne ora ? (hi’o D. Todd Christofferson, « Te pāne ora ’o tei pou mai mai te ra’i », Liahona, Nov. 2017, 36–39).

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « ’Auē te pa’ari ’e te aroha », Te mau hīmene, N°109.

Ha’amaita’i i tā’u iho tuatāpapara’a pāpa’ira’a mo’a

’Imi i te mea tā ’oe iho e nehenehe e ’apo mai i te pae vārua. I roto i tā ’outou tuatāpapara’a ta’ata hō’ē ’e ’utuāfare, ’eiaha e tā’ōti’a noa ia ’outou i teie mau ’īrava i roto i teie arata’i ha’api’ira’a. E mea pāpū ē e mau poro’i tā te Fatu nō ’outou i roto i teie mau pene tei ’ore i paraparauhia i’ō nei. E ’imi i te reira nā roto i te pure.

Against the Wind [Fa’aruru i te mata’i], nā Liz Lemon Swindle