« 24–30 nō ’Ēperēra. Ioane 7–10 : ‘’O vau te tīa’i māmoe maita’i’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2023 (2022)

« 24–30 nō ’Ēperēra. Ioane 7–10 », Mai, pe’e mai—nō te ta’ata hō’ē ’e te ’utuāfare : 2023

Hōho’a

Iesu ’e te vahine tei marua i raro

Neither Do I Condemn Thee, nā Eva Koleva Timothy

24–30 nō ’Ēperēra

Ioane 7–10

« ’O vau te tīa’i māmoe maita’i »

’A tai’o ai ’outou i te Ioane 7–10, e fāri’i mai ’outou i te tahi mau mana’o nō ’ō mai i te Vārua Maita’i nō ni’a i te mau ha’api’ira’a tumu i roto i teie mau pene. E nehenehe te tāpa’opa’ora’a i te mau mana’o e tae mai e tauturu ia ’outou ’ia fa’ata’a i te fa’anahora’a nō te fa’a’ohipa i te reira.

Pāpa’i i te mau mana’o e tae mai

Noa atu ā ’ua haere mai Iesu Mesia « ’ei hau tō teie nei ao, ’e ’ia ’ite-au-hia mai te ta’ata nei » (Luka 2:14), « ’ua tupu [rā] te mārō i taua mau ta’ata ra iāna » (Ioane 7:43). ’Ua ’ite te ta’ata i te hō’ē ā mau ’ohipa i tupu, ’ua ta’a ’ē roa rā te mau mana’o nō ni’a ia Iesu. ’Ua parau te hō’ē pae, « E ta’ata maita’i ’oia », ’ua parau te tahi pae, « Tē ha’avare nei ’oia i te ta’ata » (Ioane 7:12). I te fa’aorara’a ’oia i te hō’ē mata pō i te sābati, ’ua onoono vetahi i te parau ē, « E ’ere teie ta’ata i tō te Atua, ’aore ho’i ’oia i ha’apa’o i te sābati », ’ua ui vetahi, « E aha e ti’a ai i te ta’ata hara ’ia rave i te semeio mai teie nei ? » (Ioane 9:16). Noa atu rā teie rapura’a, ’ua ’ite te feiā tei ’imi i te parau mau i te mana i roto i tāna mau parau, inaha « ’aita roa e ta’ata e au te parau i tā terā a’era ta’ata » (Ioane 7:46). I te anira’a te mau ’āti Iuda ia Iesu ’ia « fa’a’ite hua mai » ē ’o ’ōna ānei te Mesia, ’ua fa’a’ite ’oia i te hō’ē parau tumu e nehenehe e tauturu ia tātou ’ia fa’ata’a i te parau mau ’e te parau hape : « E fa’aro’o mai ta’u ra māmoe i tō’u reo », tē nā ’ō ra ’oia, « ’e ’ua ’ite au ia rātou, ’e e pe’e mai ho’i rātou iā’u » (Ioane 10:24, 27).

Hōho’a

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Ioane 7:14–17

’Ia ora vau i te mau parau mau i ha’api’ihia e Iesu Mesia, e ’ite mai au ē, e parau mau te reira.

’Ua māere roa te mau ’āti Iuda i te ’ite rahi o Iesu inaha ’aita ’oia i ha’api’ihia (hi’o i te ’īrava 15)—’ia au ho’i i tā rātou i mātau. I roto i tāna pāhonora’a, ’ua ha’api’i Iesu i te hō’ē rāve’a ’ē nō te ’ite i te parau mau i matara i te mau ta’ata ato’a, noa atu te fāito ha’api’ira’a ’aore rā te mau mea i orahia. I roto i te Ioane 7:14–17, nāhea ’oe e ’ite ai ē, e parau mau te ha’api’ira’a tumu tā Iesu i ha’api’i ? ’Ua nāhea teie ’ohipa tau maoro i te tauturura’a ia ’oe ’ia fa’arahi i tō ’oe ’itera’a pāpū nō te ’evanelia ?

Ioane 8:2–11

’Ua matara te aroha o te Fa’aora i te mau ta’ata ato’a.

Nō ni’a i te huru ravera’a a te Fa’aora i te vahine tei roa’ahia i roto i te peu fa’aturi, ’ua parau Elder Dale G. Renlund : « Papū maita’i ē, ’aita te Fa’aora i fāri’i i te peu fa’aturi. ’Aita ato’a rā ’oia i fa’autu’a i te vahine. ’Ua fa’aitoito ’oia iāna ’ia taui i tōna orara’a. ’Ua tupu te hina’aro i roto i teie vahine ’ia taui nō te aumihi ’e te tahiti’a o Iesu. Tē ha’apāpū nei te ’īritira’a a Iosepha Semita nō te Bibilia i te ti’ara’a pipi o teie vahine : ‘’E ’ua fa’ahanahana a’era te vahine i te Atua mai taua hora ra, ’e ’ua ti’aturi i tōna i’oa’ [hi’o Ioane 8:11 c] » (« Tō tātou tīa’i māmoe maita’i », Liahona, Mē 2017, 30).

E taime ānei ’ua riro mai ’oe mai teie vahine, i te fāri’ira’a i te tahiti’a a te Fa’aora ’eiaha rā te fa’ahapara’a ? ’Ua tupu ānei te hō’ē taime ’ua riro mai ’oe mai te mau pāpa’i parau ’e te mau pharisea, i te fa’ahapara’a ’e i te ha’avāra’a ia vetahi ’ē, ’e ’aita ho’i ’oe i te mea hara ’ore roa ? (hi’o Ioane 8:7). E aha fa’ahou ā te ha’api’ira’a e nehenehe e ’apo mai i roto i te huru ravera’a a te Fa’aora i te mau pāpa’i parau ’e te mau pharisea ’e te vahine i roa’ahia i roto i te peu fa’aturi ? E aha te ha’api’ira’a tā ’oe e ’apo nei nō ni’a i te fa’aorera’a hara a te Fa’aora, ’ia tai’o ’oe i teie mau ’īrava ?

Hi’o ato’a « Go and Sin No More [’A haere, ’eiaha rā ’ia hara fa’ahou] » (video), ChurchofJesusChrist.org.

Ioane 9

E fa’aro’o tō tātou ra, e ti’a ïa i te Atua ’ia fa’a’ite mai iāna i roto i tō tātou mau ’ati.

E aha tā Ioane 9:1–3 e ha’api’i mai nei nō ni’a i te mau tāmatara’a ’e te mau ’ati o te orara’a nei ? ’A tai’o ai ’oe i te Ioane 9, ’a feruri mai te aha te huru « ’ua ’itea te ’ohipa a te Atua » i roto i te orara’a o te ta’ata fānau matapō. Mai te aha te huru te reira i te ’iteahia i roto i tō ’oe orara’a—i roto ato’a ho’i i tō ’oe mau ’ati ?

Ioane 10:1–30

’O Iesu Mesia te tīa’i māmoe maita’i.

Noa atu ē, ’aita ’oe i mātau i te parau nō te māmoe ’e te tīa’ira’a māmoe, e nehenehe te tai’ora’a i te Ioane 10, i reira te Fa’aora i te paraura’a ē « ’O vau te tīa’i māmoe maita’i », e ha’api’i ia ’oe i te parau mau rahi nō ni’a iāna. Nō te ’ite mai i teie mau parau mau, ’a hi’o i te mau pereota e fa’ata’a nei mai te aha te huru te tīa’i māmoe maita’i ’ei reira e feruri ai e aha te tū’atira’a ’e te Fa’aora. Teie te tahi mau hi’ora’a i raro nei :

’Īrava 3 : « E ta’o atu ā ’oia i tāna iho māmoe ma te fa’ahiti atu i te i’oa, ’e e arata’i ’oia ia rātou ».
’Īrava 11 : « E hōro’a [’oia] i tōna iho ora nō te māmoe ».
’Īrava 16 : « ’Ia hō’ē a’e nana, ’e hō’ē ho’i tīa’i ».

Teie te tahi atu ā mau uira’a e tauturu ia ’oe ’ia feruri hōhonu i ni’a i teie pene : Mai te aha te huru ’o Iesu te ’ūputa ? (hi’o ’īrava 7–9). ’Ua nāhea ’oia i te hōro’ara’a ia ’oe i te « ora, ’e ’ia rahi atu ā te ora » ? (’īrava 10). Ināfea tō ’oe ’itera’a ē, ’ua ’ite roa ’oia ia ’oe ? (hi’o ’īrava 14). E nāhea ’oe i te ’ite ē ’o te reo nō te Tīa’i māmoe maita’i ? (hi’o ’īrava 27).

Hi’o ato’a Salamo 23 ; Ezekiela 34 ; Alama 5:37–39 ; 3 Nephi 15:21–16:5 ; Gerrit W. Gong, « Te tīa’i māmoe maita’i, te ’Ārenio a te Atua », Liahona, Mē 2019, 97–101.

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Ioane 7:24.Nō te tauturu i tō ’outou ’utuāfare ’ia māramarama i te ha’api’ira’a a Iesu i roto i te Ioane 7:24, e nehenehe e fa’a’ite ia rātou i te hō’ē mea e mea ’ē te hōho’a ’o rāpae, e mea ’ē te hōho’a ’o roto. ’Aore rā e nehenehe te mau melo o te ’utuāfare e fa’a’ite mai i te tahi ’ohipa i tupu ē, ’ua ha’api’i mai rātou ’eiaha e ha’avā i te ta’ata i te hōho’a rāpae. E nehenehe ato’a ’outou e pāpa’i i e fanu pae maita’i nō te melo tāta’itahi o te ’utuāfare, e mau pae maita’i ’aita e ’ite-mata-hia ra (hi’o ato’a 1 Samuela 16:7 ; Thomas S. Monson, « Hi’o ia vetahi ’ē ’ei ta’ata tā rātou e nehenehe e riro mai », Liahona, Nov. 2012, 68–71).

Ioane 8:31–36.E aha te hō’ē « tāvini […] nō te ’ino » (hi’o ato’a Moroni 7:11). E aha te mau parau mau tā Iesu i ha’api’i ’o tē nehenehe e fa’aora ia tātou i te reira ?

Jesus Healing the Blind [Tē fa’aora ra Iesu i te matapō], nā Carl Heinrich Bloch

Ioane 9.Nāhea ’outou e tauturu ai i tō ’outou ’utuāfare ’ia hi’o mana’o i te fa’ati’ara’a nō ni’a i te fa’aorara’a Iesu i te matapō i roto i te Ioane 9 ? E nehenehe tā ’outou e ha’uti ta’ata ora i te reira ’ā’amu, ’aore rā e māta’ita’i i te video ra « Jesus Heals a Man Born Blind [Tē fa’aora ra Iesu i te matapō] » (ChurchofJesusChrist.org). ’A tāpe’a i te tahi taime nō te tai’o te mau melo o te ’utuāfare i te mau ’īrava tū’ati i roto i te Ioane 9. E ani ia rātou ’ia tāpa’o i te mau ha’api’ira’a ato’a e ’apo mai rātou i roto i te ’ā’amu, mai te aura’a nō te fa’afāriura’a i te ’evanelia a Iesu Mesia.

Ioane 10:1–18, 27–29.Nō te fa’aō mai i te mau melo o te ’utuāfare i roto i te tuatāpapara’a o te parabole nō te tīa’i māmoe maita’i, ’a ani ia rātou tāta’itahi ’ia pāpa’i i te hōho’a nō te hō’ē o te mau mea i muri nei : te ta’ata ’eiā, te ’ūputa, te tīa’i māmoe, te ta’ata tārahuhia (e rave ’ohipa tei tihepuhia), te luto ’e te māmoe. E ani ia rātou ’ia tai’o i te Ioane 10:1–18, 27–29, ’ei reira te ’utuāfare e ’āparau ai nō ni’a i te mea tā te Fa’aora i ha’api’i nō ni’a i te mau mea tā rātou i pāpa’i i te hōho’a.

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Iehova tō’u tīa’i », Te mau hīmene, N°54.

Ha’amaita’i i tā’u iho tuatāpapara’a pāpa’ira’a mo’a

’Imi i te mau ta’o ’e te mau pereoda fa’auru. ’Ia tai’o ’oe, e nehenehe te Vārua e fa’aharu i tō ’oe mata i ni’a i te tahi mau parau ’aore rā te tahi mau pereoda e fa’auru ’e e fa’aitoito ia ’oe, ’aore rā ’o te au ē, ’ua pāpa’i-ta’a-’ē-hia nō ’oe. E nehenehe e tāpa’o i te mau parau ’aore rā te mau pereota i roto i te Ioane 7–10e fa’auru ia ’oe .