Te fa’ahuru-’ē-ra’a-hia te Mesia

The Transfiguration [Te fa’ahuru-’ē-ra’a], nā Carl Heinrich Bloch

10–16 nō ’Ēperēra

Mataio 15–17 ; Mareko 7–9

« ’O te Mesia ’oe »

Nā te tai’ora’a i te mau pāpa’ira’a mo’a e fa’ahaere mai i te Vārua Maita’i i roto i tō ’outou orara’a. Hō’ē o te mau misiōni faufa’a rahi a te Vārua Maita’i, ’o te fa’a’ite-pāpū-ra’a ïa nō Iesu Mesia. ’A tai’o ai ’outou i te mau pāpa’ira’a mo’a i teie hepetoma, ’a ha’apa’o maita’i i te mau mana’o pae vārua ’o tē ha’apūai i tō ’outou ’itera’a pāpū nō te Fa’aora.

Pāpa’i i te mau mana’o e tae mai

E ’ere ānei i te mea māere tō te mau pharisea ’e tō te mau sadukea anira’a ia Iesu ’ia fa’a’ite mai i « te hō’ē tāpa’o nō ni’a i te ra’i » ? ’Aita ānei ïa i nava’i tāna mau semeio tei ’atutu roa ? E tāna ïa mau ha’api’ira’a mana rahi ’aore rā te huru rau ’oia i fa’atupu ai i te mau tohura’a tahito ? E ’ere tā rātou anira’a nō te ’erera’a te mau tāpa’o, nō tō rātou rā ineine-’ore-ra’a ’ia « ’ite i te mau tāpa’o o teie nei ’anotau » ’e e fāri’i i te reira. (Hi’o Mataio 16:1–4.)

’Ua ’ite Petero, mai te mau pharisea ato’a ’e te mau sadukea, i te mau semeio a te Fa’aora ’e ’ua fa’aro’o ’oia i tāna mau ha’api’ira’a. ’Aita rā te ’itera’a pāpū hope’a o Petero, ’oia ho’i, « ’O te Mesia ’oe, te Tamaiti a te Atua ora », i tae mai nā roto i te rāve’a o te tino nei—’oia ho’i te « ’i’o ’e te toto ». ’Ua heheuhia mai rā tōna ’itera’a pāpū iāna e tō tātou « Metua i te ao ra ». ’O teheheura’a te papa i ni’a i te reira te Fa’aora i te patura’a i tāna ’Ēkālesia, i terā ra tau ’e i teienei—e heheura’a nō te ra’i mai i tāna ra mau tāvini. ’E ’o teie te papa i ni’a i te reira tātou e nehenehe ai e patu i tō tātou ti’ara’a pipi—’o te heheura’a ïa ē, ’o Iesu te Mesia ’e tei tāna mau tāvini ra « te mau tāviri nō te bāsileia ». ’Ia patuhia tātou i ni’a i tōna niu, « e ’ore ïa te mau ’ūputa o hade e rē i ni’a ia [tātou] » (Mataio 16:15–19).

ītona tuatāpapara’a a te ta’ata hō’ē

Mau mana’o nō tā’u iho tuatāpapara’a pāpa’ira’a mo’a

Mataio 16:13–17

E tae mai te hō’ē ’itera’a pāpū nō Iesu Mesia nā roto i te heheura’a.

Mai te mea e ui Iesu Mesia i te ta’ata i teie mahana : « ’O vai au nei te Tamaiti a te ta’ata nei i tā te ta’ata nei paraura’a ? » e aha ïa tā rātou e parau atu ? E aha tā ’oe e pāhono atu ’āhani Iesu e ui mai ia ’oe : « ’O vai rā vau nei i tā [’oe] na paraura’a ? » (Hi’o Mataio 16:13–15.)

E feruri i tō ’oe ’itera’a pāpū nō te Fa’aora ’e te huru ’oe i fāri’i ai i te reira. E aha te ha’api’ira’a tā ’oe e ’apo nei i roto i te Mataio 16:15–17 ’o tē nehenehe e ha’apūai ia ’oe ? Mai te mea ’ua hina’aro ’oe i te ha’api’i rahi atu ā nō ni’a i te ’itera’a pāpū ’e te heheura’a i te hō’ē ta’ata, ’a hi’o i teie mau ’īrava : Ioane 15:26 ; 2 Nephi 31:17–18 ; Alama 5:45–48 ; ’e Te Ha’api’ira’a Tumu ’e te mau Fafaura’a 8:2–3.

Hi’o ato’a « President Nelson: Hear Him—Personal Revelation [Peresideni Nelson : Fa’aro’o iāna—Heheura’a nō te ta’ata iho] » (video), ChurchofJesusChrist.org.

Mataio 16:13–19 ; 17:1–9 ; Mareko 9:2–9

Tei ni’a i te fenua nei « te mau tāviri o te bāsileia o te ao ra » i teie mahana.

Te mau « tāviri o te bāsileia o te ao ra » tā te Fa’aora i parau e hōro’a ’oia ia Petero, ’o te mau tāviri nō te autahu’ara’a ïa (Mataio 16:19). E aha te mau tāviri nō te autahu’ara’a ? Nō te aha e mea tītauhia te reira nō tātou ? E feruri i teie mau uira’a ’a tai’o ai nō ni’a i te parau fafau a te Fa’aora i roto i te Mataio 16:13–19 nā reira ato’a te tupura’a te reira i roto i te Mataio 17:1–9 ; Mareko 9:2–9 (hi’o ato’a ’Īritira’a a Iosepha Semita, Mareko 9:3).

I roto i te tahi atu mau mātēria e tauturu ia ’oe ’ia ha’api’i nō ni’a i te mau tāviri nō te autahu’ara’a, tē vai nei ïa Te Ha’api’ira’a Tumu ’e te mau Fafaura’a 65:2 ; 107:18–20 ; 110:11–16 ; 128:9–11 ; « Tāviri nō te Autahu’ara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org) ; ’e te a’ora’a a Elder Gary E. Stevenson « Tei hea te mau tāviri ’e te mana nō te autahu’ara’a ? », (Liahona, Mē 2016, 29–32). ’A tuatāpapa ai i teie mau mātēria, e nehenehe e fa’ati’a i te hō’ē tāpura nō te mea tā ’oe e ’apo mai nō ni’a i te mau tāviri nō te autahu’ara’a ’e te mau ha’amaita’ira’a nō roto mai i te reira. I tō ’oe mana’o, nō te aha e hōho’a maita’i te tāviri nō te ti’ara’a mana ’ia arata’i i te tāvinira’a autahu’ara’a ?

Hi’o ato’a Dallin H. Oaks, « Te autahu’ara’a a Melehizedeka ’e te mau tāviri », Liahona, Mē 2020, 69–72 ; Arata’i nō te mau pāpa’ira’a mo’a, « Fa’ahuru-’ē-ra’a. »

ti’i nō Petero e tāpe’a ra i te mau tāviri

Te mau tāviri nō te autahu’ara’a o te ha’amanara’a ïa nō te fa’atere i te fa’a’ohipara’a o te autahu’ara’a.

Mataio 17:14–21 ; Mareko 9:14–29

Nō te tītaura’a i te fa’aro’o rahi atu ā, e nehenehe au e ha’amata ma te fa’aro’o e vai ra i roto iā’u.

E nehenehe iho ā te metua tāne tei fa’ahitihia i roto i te Mataio 17 ’e te Mareko 9 e fa’atupu i tōna mana’o fē’a’a ē, e’ita paha e haere ia Iesu e fa’aora i tāna tamaiti. I ani ho’i ’oia i te mau pipi a Iesu ’ia fa’aora i tāna tamaiti, ’aita rā i haere ia rātou. I tōna rā anira’a i te Fa’aora i te temeio, ’ua mā’iti ïa ’oia e fa’a’ite i tōna fa’aro’o. « E te Fatu, ’ua fa’aro’o vau », tāna i parau. ’Ei reira, nō te fā’ira’a i te paruparu o tōna fa’aro’o, ’ua nā ’ō ’oia : « E turu mai ’oe i ta’u fa’aro’o paruparu nei. »

E aha tā te Vārua e ha’api’i nei ia ’oe ’a tai’o ai nō ni’a i te reira semeio ? ’Ua nāhea te Metua i te ao ra i te tauturura’a ia ’oe ’ia fa’arahi i tō ’oe fa’aro’o ? E aha tā ’oe e nehenehe e rave nō te patu i ni’a iho i te fa’aro’o tei noa’a a’ena ia ’oe ? Pēnei a’e e nehenehe tā ’oe e tāpura i te mau ’īrava, te mau a’ora’a i te ’āmuira’a rahi ’aore rā te mau ’ohipa i tupu tei ha’apūai i tō ’oe fa’aro’o.

Hi’o ato’a Jeffrey R. Holland, « E te Fatu, ’ua fa’aro’o vau », Liahona, Mē 2013, 93–95.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Mataio 15:7–9 ; Mareko 7:6–7.E aha te ta’a-’ē-ra’a i roto i te fa’aturara’a i te Atua ma tō tātou ’utu, ’aore rā tā tātou mau parau, ’e te fa’aturara’a iāna ma tō tātou ’ā’au ?

Mataio 15:17–20 ; Mareko 7:18–23.Nō te aha tātou e hi’o maita’i nei i te mea tā tātou e tu’u i roto i te vaha ? ’Ia au i te mea tā Iesu i ha’api’i i roto i teie mau ’īrava, nō te aha e mea tītauhia ia tātou ’ia ha’apa’o rahi atu ā i te mau mea mai roto atu i tō tātou vaha—’e mai roto atu i tō tātou ’ā’au ? Nāhea tātou e vai ateatea noa ai tō tātou ’ā’au ?

Mataio 16:15–17.Tē nāhea ra te Atua i te heheu ia tātou ē, ’o Iesu « te Mesia […] te Tamaiti a te Atua ora ra » ? (’īrava 16). Nāhea tātou e fa’aineine ai ia tātou iho nō te fāri’i i teie heheura’a mai roto mai iāna ra ?

Mataio 16:13–19 ; 17:1–9.Nō te ha’api’i i te tamari’i nō ni’a i te mau tāviri nō te autahu’ara’a, e nehenehe tā ’outou e fa’ati’a i te ā’amu o Elder Gary E. Stevenson nō ni’a i te pōnaora’a iāna i rāpae i tōna pere’o’o (hi’o i te video « Where Are the Keys ? [Tei hea te mau tāviri ?] » i ni’a ia ChurchofJesusChrist.org). E nehenehe e vaiiho i tā ’outou mau tamari’i ’ia fa’a’ohipa i te tāviri nō te fare, nō te pere’o’o ’aore rā nō te tahi ’ohipa tei pōnaohia. E nehenehe e fa’a’ite i te hōho’a nō te Peresideni o te ’Ēkālesia ma te parau pāpū ē, tē mau nei ’oia i te mau tāviri nō te autahu’ara’a, mai ia Petero te huru.

Mataio 17:20.E mau peropheta e fa’aro’o tō rātou ia Iesu Mesia tei fa’anu’u roa i te mau mou’a (hi’o Iakoba 4:6 ; Mose 7:13). I te rahira’a rā o te taime, e ’ere te reira te temeio tei tītauhia nō tātou. ’Ua ha’api’i te peresideni M. Russell Ballard : « ’Āhiri e fa’aro’o tō tātou mai te hō’ē huero sinapi, e nehenehe ïa te Fatu e tauturu ia tātou ’ia ’īriti i te mau mou’a o te mana’o paruparu ’e te fē’a’a i roto i te mau ’ohipa i mua ia tātou ’a tāvini ai tātou i te mau tamari’i a te Atua, te mau melo o te ’utuāfare, te mau melo o te ’Ēkālesia, ’e te feiā ’aita ā i riro ’ei melo nō te ’Ēkālesia » (« E mau hōro’a faufa’a rahi nō ’ō mai i te Atua ra », Liahona, Mē 2018, 10). E aha te tahi mou’a i roto i tō tātou orara’a tei tītauhia ’ia fa’anu’u atu ? Nāhea tātou e fa’a’ite ai i tō tātou fa’aro’o i te mana o te Atua nō te fa’a’ore i teie mau mou’a ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Tiʼaturi au i te Mesia », Te mau hīmene, N°66.

Ha’amaita’i i tā tātou ha’api’ira’a

Putuputu ’e ’āmui pinepine. ’Ua ha’api’i te peresideni Henry B. Eyring : « ’Eiaha roa atu e ha’amāu’a i te ha’amaita’ira’a ’ia ha’aputuputu i te mau tamari’i nō te ha’api’i i te ha’api’ira’a tumu a Iesu Mesia. E mea varavara roa ho’i taua mau taime ra ’ia fa’aauhia i te tūtavara’a a te ’enemi » (« The Power of Teaching Doctrine », Ensign, Mē 1999, 74).

e ta’ata ’e tāna tamaiti tei ma’ihia, i mua ia Iesu

Master, I Have Brought unto Thee My Son [E Rabi, i arata’i mai nei au i ta’u tamaiti ia ’oe nei], nā Walter Rane