Jisōs ej kapit Piter

M̧aaj 6–12

Matu 9–10; Mark 5; Luk 9

“Rein Jon̄oul Ruo im Jisōs e ar Jilkinļo̧k”

Ilo am riiti Matu 9–10; Mark 5; im Luk 9, komaron̄ bōk im̧we ko jān Jetōb Kwojarjar. Im̧we kein, ippān ļo̧k Itok, Ļoor Eō—N̄an Kajjojo Armej im Baam̧le Ko im laajrak in, emaron̄ jipan̄ eok pojak n̄an katakin.

jet ro rej maron̄ kwaļo̧k ļōmņak im en̄jake ko aer

Karuwaineneik er n̄an Kwaļo̧k

Kajjitōk ippān ajri ro n̄an kwaļo̧k juon men eo raar kōm̧m̧ane n̄an jipan̄ juon ilo wiik in. Ta eo Rilo̧mo̧o̧r eaar kōm̧m̧ane n̄an jipan̄ ro jet?

juon eo ej katakin

Katakin Katak eo: Ajri ro Reddikļo̧k

Matu 9:18–30; Mark 5:22–43

Ewōr an Jisōs kajoor n̄an kōmour eō.

Rilo̧mo̧o̧r ekar kwaļo̧k kajoor eo An n̄an kōmour ro ewōr aer tōmak ilo E. Komaron̄ jipan̄ ajri ro kwoj katakin n̄an kalōk aer tōmak ilo kajoor in kōmour eo An.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro bwebwenato in leddik eo nejin Jairus (lale Mark 5:22–23, 35–43). N̄e ekkar ilo bwebwenato in, riiti naan ko an Jisōs kar je “Ij ba n̄an eok, kwōn jerkak” (eoon 41), im kajjitōk ippān ajri ro n̄an jutak. Jipan̄ ajri ro meļeļe bwe Jisōs ewōr an kajoor n̄an kōmour armej ro im letok n̄an kōj mour indeeo.

• Kwaļo̧k juon pija in bwebwenato in ilo Matu 9:20–22 ilo am̧ riiti eoon kein. Jipan̄ ajri ro kakkilōklōke naan in “Am̧ tōmak ear kemour eok” (eoon 22). N̄an kōm̧m̧an āindein, komaron̄ leļo̧k n̄an kajjojo ajri juon naan, innām kōm̧m̧an bwe ajri ro ren ba naan ko ilo karōkier. Elmen an kōrā in kwaļo̧k ke elōn̄ an tōmak ilo Jisōs Kraist? Ta eo jemaron̄ kōm̧m̧ane n̄an kwaļo̧k ke ewōr ad tōmak ilo Kraist?

• Kajjitōk ippān ajri ro n̄an kiil mejeer im ron̄jake am̧ riit jān Matu 9:27–30. Ilo am̧ riit kōn an Jisōs kōmour em̧m̧aan ro repilo, kajjitōk ippān ajri ro n̄an kōpeļļo̧k mejeer. Kajjitōk ippān ajri ro n̄an kōnono elmen aer en̄jake n̄e Jisōs en kar kōmour er.

• Kōjerbal peij in m̧akūtkūt eo an wiik in n̄an jipan̄ ajri ro jeļā kōn bwebwenato in an Rilo̧mo̧o̧r kōjerkak leddik eo nejin Jairus jān mej.

an kōrā eo jibwe nuknuk eo an Jisōs

Lōke ilo Irooj, jān Liz Lemon Swindle

Matu 10:1–10

Jisōs ekar kūr Jon̄oulruo Rijilōk ro im leļo̧k n̄an er kajoor n̄an kōm̧m̧ane jerbal eo An.

Ajri ro kwoj katakin rejeļā ke ewōr ad jon̄oulruo Rijilōk ro rainin? Elmen am̧ maron̄ kōjerbal eoon kein n̄an katakin er kōn aorōk eo an Rijilōk ro ranin im ta eo kar kūr er n̄an kōm̧m̧ane?

M̧akūtkūt ko Maron̄ Kōm̧m̧ani

• Kōmeļeļeiki Matu 10:1–10 ilo tukaduin. Kōmeļeļeik bwe Jisōs ekar kūr Rijilōk ro n̄an jipan̄ E kalōk Kabun̄ eo An. Kōtļo̧k an ajri ro bwine Rijilōk ro ilo pija eo Christ Ej Kapit Rijilōk Ro (Gospel Art Book, no. 38) im pija in Doulul eo an Jon̄oulruo Rijilōk ro kiiō (lale ChurchofJesusChrist.org ak pija ko rekāāl ilo kweilo̧k eo eļap ilo Liaona). Kōmeļeļeik bwe ewōr ad jon̄oulruo Rijilōk ro rainin, āinwōt tōre ko an Jisōs. Kwaļo̧k naan in kam̧ool eo am̧ kōn Rijilōk ro an Irooj im jet men ko kiiō rekar kwaļo̧ki.

• Ņooj pijain Rijilōk ro kiiō ipeļaakin ruum̧ eo (n̄an pija ko, lale kweilo̧k eo eļap kiiō ilo Liaona). Kajjitōk ippān ajri ro n̄an pukote pija ko, im kwaļo̧k jidik kōn kajjojo Rijilōk (lale “Jeļā Kajeen Rikanaan im Rijilōk ro Rainin” ilo ChurchofJesusChrist.org).

• Kajjitōk ippān juon ajri n̄an kotak pijain Būreejtōņji eo Kein Kajuōn im juon pijain Doulul eo an Jon̄oulruo Rijilōk ro. Kajjitōk ippān ajri eo n̄an tōl ajri ro jet ipeļaakin ruum̧ eo n̄an pijain Jisōs Kraist. Kam̧ool bwe rikanaan ro im rijilōk ro rej tōlļo̧k kōj n̄an Jisōs Kraist.

eo ej katakin

Katakin Katak eo: Ajri ro Rerūttoļo̧k

Matu 9:18–30; Mark 5:22–43

Ewōr an Jisōs kajoor n̄an kōmour eō.

Riiti bwebwenato in an Rilo̧mo̧o̧r kōmour armej ro emaron̄ jipan̄ ajri ro kwoj katakin kōļapļo̧k aer tōmak ilo E. Bwebwenato kein remaron̄ bar jipan̄ er en̄jake An tiriam̧o im iakwe.

M̧akūtkūt ko Maron̄ Kōm̧m̧ani

• Riit ippān doon bwebwenato in an Jisōs kōmour armej ro loi ilo Matu 9:20–22, 27–30 im Mark 5:22–23, 35–43 (ak kwaļo̧k bittio ko “Jisōs Ej Kemour Juōn Kōra in Tamak” im“Jisōs Ej Kejerkak Ledrik eo Nejin Jairus” ilo ChurchofJesusChrist.org). Elmen an kar armej rein ilo bwebwenato kein kwaļo̧k aer tōmak ilo Jesus Christ? Ta eo jej ekkatak kōn Rilo̧mo̧o̧r jān bwebwenato kein?

• Kajjitōk ippān ajri ro n̄an kwaļo̧k en̄jake ko n̄e er ak juon eo rejeļā kajjien ekar bōk juon kōjeraam̧m̧an an priesthood n̄an kemour jān nan̄inmej. Elmen aer kar mour ak jeraam̧m̧an? Kōmeļeļeiki bwe jet iien menin bwilōn̄ an kōmour ejjab anikilan Irooj, ak jemaron̄ in wōt jeraam̧m̧an kōn iakwe im aenōm̧m̧an eo An.

Matu 10:1–10

Rijilōk ro jon̄oulruo remaron̄ katakin eō kōn Jisōs.

Elmen ad jeļā kōn rijilōk ro jon̄ouruo ilo tōre ko an Kraist maron̄ jipan̄ ajri ro meļeļeļo̧k ta eo Rijilōk ro jon̄oulruo rej kōm̧m̧ane rainin?

M̧akūtkūt ko Maron̄ Kōm̧m̧ani

• Kwaļo̧k pijain Rijilōk ro ilo tōre ko an Jisōs im ilo tōre in ad (lale Christ Ej Kapit Rijilōk Ro [Gospel Bok in Pija , no. 38] im kweilo̧k eo kiiō ilo Liaona). Kajjitōk ippān ajri ro n̄an riiti Matu 10:7 n̄an lale ta eo Rijilōk ro rej kōm̧m̧ane (bar lale Luk 9:1–2, 6; Katak im Bujen Ko 107:23).

• Kajjitōk ippān ajri ro n̄an je ioon bo̧o̧t eo etan aolep Rijilōk ro n̄e remaron̄ kememeje. Innām kajjitōk ippān n̄an kōllaajrake aolepen Rijilōk ro remour n̄e rej keememeje. Kōtļo̧k bwe ren lale laajrak eo aer ilo Matu 10:2–4 im kweilo̧k eo kiiō ilo Liaona. Komaron̄ bar ikkure in kōmājeej me ajri ro rej kōmājeeje kajjojo etan Rijilōk ro remour n̄an pija eo an. Maron̄ loi pija ko ilo ChurchofJesusChrist.org.

• Jet raan m̧okta jān kūlaaj, kūrtok jejjo̧ ajri bwe ren pojaktok n̄an kwaļo̧k jidik bwebwenato jān juon iaan Rijilōk ro remour (lale enaan ko ilo Liaona n̄an lōmņak ko). Elmen an kar Rijilōk eo kōjerbal bwebwenato in n̄an im̧we kōj n̄an eddōkļo̧k āinwōt Rilo̧mo̧o̧r?

• Kwaļo̧k jet waanjon̄ak in jet naan in kam̧ool ko an Rijilōk ro raan kein kōn Kraist n̄an ajri ro (lale ennaan in kweilo̧k eo eļap kiiō ak “Kraist eo Emour: Naan in Kam̧ool eo an Rijilōk ro” [ChurchofJesusChrist.org]).

• Jipan̄ ajri ro kakkilōklōke im meļeļe Laajrak in Tōmak ko 1:6.

Luk 9:23–25

Ļoor Jisōs ebōk kaarmejete.

Elmen am̧ naaj jipan̄ ajri ro meļeļe ta meļeļein menin “joļo̧k” an mour n̄an ļoor Rilo̧mo̧o̧r?

M̧akūtkūt ko Maron̄ Kōm̧m̧ani

• Ba n̄an ajri ro kōn juon iien eo kwaar juļo̧k men ko jet n̄an kōm̧m̧an em̧m̧anļo̧k. Kajjitōk ippān ajri ro n̄an kwaļo̧k waanjon̄ak ko aer make. Riit ippān doon Luk23–25. Kōmeļeļeik bwe Jisōs ekōņaan bwe jān juļo̧k men otemjeļo̧k im ļoor E. Ilo An jab lukkuun kajjitōk ippād n̄an kejekedoon mour ko ad, ta eo Ej kajjitōk ippād n̄an joļo̧k? (lale Josep Smith Ukook, Matu 16:26 [in Matu 16:24, footnote e]).

• Je jet iaan m̧wiļ ko Āinwōt Kraist ioon jidik peba im jet ko rej ein juon jān m̧wiļ kein ioon bar juon peba (āinwōt iakwe im ļōmņak kōn kōj make, ettā im utiej bōro, im ko jet) Je naan ko lo̧mo̧o̧r im joļo̧k ilōn̄in bo̧o̧t eo, im kajjitōk ippān ajri ro n̄an kalikar m̧wiļ ko rekkar ilo naan ko. Leļo̧k n̄an ajri ro iien n̄an kōļmenļo̧kjeņ kōn m̧wiļ ko āinwōt Kraist ioon bo̧o̧t eo im kāālet juon n̄an lukkuun mour kake.

juon jikin ekkatak

Kōketak Ekkatak ilo M̧weo

Kajjitōk ippān ajri ro n̄an kōjerbal peij in m̧akūtkūt eo an wiik in n̄an katakin baam̧le ko aer kōn Jisōs Kraist an kōmour leddik eo nejin Jairus.

Kōkm̧anm̧anļo̧k Ad Katakin

Rōjan̄ n̄an kautiej. Jipan̄ ajri ro meļeļe bwe wāween eo eaorōk kōn wewein kwaļok kautiej ej ilo ad ļōmņak kōn Jemedwōj Ilan̄ im Jisōs Kraist. Komaron̄ kakeememej er n̄an kwaļo̧k aer kautiej ilo aer al mera ak in̄ūrn̄ūri juon al ak kwaļo̧k juon pija in Jisōs.

peij in m̧akūtkūt: Jisōs ewōr an kajoor n̄an kōm̧m̧ani menin bwilōn̄ ko me rej kōjeraam̧m̧an eō