Kwon Jab Mijak, jān Michael Malm

M̧aaj 13–19

Matu 11–12; Luk 11

“Inaaj Kakkijeik Kom̧”

Ļōmņak in m̧akūtkūt ko ilo laajrak in ewōr tokjāer n̄an im̧we jerbal eo am̧. Kwoj anemkwoj in ukukōti n̄an aikuj ko im maron̄ ko an ajri ro kwoj katakin.

Kajjitōk bwe ren Kwaļo̧k

Rōjan̄ ajri ro n̄an kwaļo̧k ta eo remaron̄ kōm̧m̧ane n̄an kabun̄jar n̄an Irooj ilo raan in Jabōt.

Katakin Katak eo: Ajri ro Reddikļo̧k

Matu 11:28–30

Jisōs enaaj jipan̄ eō n̄e ij itok n̄an E.

Ajri ro remaron̄ en̄jake aenōm̧m̧an ilo aer jeļā bwe Jisōs enaaj jipan̄ er kōn eddodo ko aer n̄e rej itok n̄an E.

M̧akūtkūt ko Maron̄ Kōm̧m̧ani

• Riiti Matu 11:28–30, im kwaļo̧k pija in oxen ko ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko. Kajjitōk ippān ajri ro n̄an jitōn̄ļo̧k oxen im yoke eo. Kōmeļeļeiki bwe oxen ko em̧ōj kobaik er ippān doon remaron̄ ineek eļapļo̧k eddo ippān doon jān n̄e rejenoļo̧k. Kam̧ool bwe n̄e jej en̄jake būrom̧ōj, inepata, ak mijak, jemaron̄ kappukot Jisōs im E enaaj jipan̄ kōj.

• Kajjitōk ippān juon ajri n̄an kotak men eo eddo. N̄e ej pād ilo apan̄, leļo̧k jipan̄. Elmen an Jisōs jipan̄ kōj jerbali men ko reppen? Kwaļo̧k juon waanjon̄ak ke kwaar en̄jake an Jisōs jipan̄ eok jerbali men ko reppen, im kajjitōk ippān ajri ro n̄an kwaļo̧k en̄jake ko aer make.

Matu 12:1–13

Inaaj kōjparok raan in Jabōt im kakwōjarjare.

Ta jet iaan kam̧ōņōņō ko komaron̄ katakin ajri ro kōn raan in Jabōt im etke jej kwōjarjare?

M̧akūtkūt ko Maron̄ Kōm̧m̧ani

• Riiti Matu 12:10–13 ilo eļaaj. Kajjitōk bwe ajri ro ren jutak jijet ilo aolep iien am̧ ba “Jabōt,” im āliji ippāer naan eo “E [mālim] ke kōm̧m̧an em̧m̧an ilo raan in Jabōt” (Matu 12:12). Ta meļeļein ilo aer ļōmņake?

• Kwaļo̧k juon kōļanta n̄an ajri ro, im kōkaļļeiki raan in Jabōt n̄an er. Ta eo jej kōm̧m̧ane ilo raan ko jet ilo juon wiik? Ta eo jemaron̄ kōm̧m̧ane ilo Jabōt n̄an kōm̧m̧an bwe en oktak jān raan ko jet? (lale Aiseia 58:13–14).

• Kajjitōk bwe ajri ro ren jin̄aiki men ko rem̧m̧an remaron̄ kōm̧m̧ane ilo raan in Jabōt (lale peij in m̧akūtkūt eo an wiik in).

• Kajjitōk bwe ajri ro ren ļōmņak kōn action ko n̄an jipan̄ er keememej wāween ko jej pojak kaki n̄an Jabōt ilo aer al al eo “Saturday” (Children’s Songbook, 196).

• Jin̄a mej, lo̧jiln̄i, lo̧n̄i, im pā ko ilo bo̧o̧t eo. Kajjitōk ippān ajri ro n̄an ba n̄an eok ta m̧ōttan kein kajjojo ilo ānbwiniid remaron̄ kōm̧m̧ane n̄an kōjparok raan in Jabōt im kakwōjarjare.

Luk 11:11–13

Jemedwōj Ilan̄ ej letok n̄an kōj menin letok ko rem̧m̧an.

Katak ko an Rilo̧mo̧o̧r ilo Luk 11:11–13 emaron̄ jipan̄ ajri ro kwoj katakin meļeļe bwe Jemedwōj Ilan̄ ej iakwe er im ekōņaan kōjeraam̧m̧an er.

M̧akūtkūt ko Maron̄ Kōm̧m̧ani

• Kōjerbal juon kein katakin n̄an kōmeļeļeik katak ko an Rilo̧mo̧o̧r ilo Luk 11:11–13. N̄an waanjon̄ak, komaron̄ likūt juon dekā ilowaan juon pākij in pilawe ak likūt juon pijain scorpion ilowaan juon bo̧o̧k in lep. Kajjitōk ippān ajri ro n̄an kajidede ba ta eo ilowaan, innām kwaļo̧k n̄an er. Kajjitōk ippāer n̄an bōk jikin dekā eo ak pija eo kōn jidik pilawe ak juon lep. Riiti Luk 11:11–13, im kwaļo̧k naan in kam̧ool eo am̧ bwe Jemedwōj Ilan̄ ej iakwe kōj, ej uwaaki jar ko ad, im letok elōn̄ kōjeraam̧m̧an ko jān Jetōb eo An.

• Al ippān doon juon al eo kōn iakwe eo an Anij, āinwōt “My Heavenly Father Loves Me” (Children’s Songbook, 228–29). Ta jet iaan menin letok ko rem̧m̧an me E ekar letok n̄an kōj? Kajjitōk ippān ajri ro n̄an jin̄aik pijain kōjeraam̧m̧an ko jān Jemedwōj Ilan̄ me rej kam̧m̧oolol kaki.

Katakin Katak eo: Ajri ro Rerūttoļo̧k

Matu 11:28–30

Jisōs enaaj jipan̄ eō n̄e ij itok n̄an E.

Elmen am̧ maron̄ jipan̄ ajri ro meļeļe bwe Rilo̧mo̧o̧r enaaj leļo̧k n̄an er kakkije jān apan̄ ko aer n̄e rej itok n̄an E?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k juon iien ke rekar inepata ak m̧ijak kake. Kajjitōk ippāer n̄an lale Matu 11:28–30 n̄an kapilōk bwe remaron̄ jipan̄ er ilo ejja jekjek kein wōt. Elmen an Rilo̧mo̧o̧r “letok n̄an [kōj] kakkije”? (eoon 28).

• Kajjitōk ippān ajri ro n̄an jin̄aiki pija in men ko rej kōm̧m̧ani n̄an itok n̄an Jisōs im jeļā kōn E.

• Jipan̄ ajri ro kakilōklōke laajrak in tōmak kein kemen. Kōnono n̄an er elmen an pedped ko m̧oktata im kain̄i ko an gospel in jipan̄ kōj bōk kūr eo an Jisōs, “Itok n̄an eō” (Matu 11:28).

Matu 12:1–13

Raan in Jabōt ej juon raan n̄an kōm̧m̧an men ko me rej kepaakļo̧k eō n̄an Anij.

Ajri ro kwoj katakin renaaj kajoorļo̧k ilo am̧ kwaļo̧k jibadbad ko im kōjeraam̧m̧an ko n̄an kōjparok raan in Jabōt im kakkwōjarjare.

M̧akūtkūt ko Maron̄ Kōm̧m̧ani

• Kajjitōk ippān juon ajri n̄an kōtōnn̄e e em̧m̧aan eo me pein kar kōmouri jān Rilo̧mo̧o̧r (lale Matu 12:10–13). Ajri eo juon emaron̄ kajjitōk kajjitōk ko kōn en̄jake eo.

• Riit ippān doon Matu 12:12. Ta men ko rem̧m̧an jemaron̄ kōm̧m̧ani ilo raan in Jabōt? Kōtļo̧k bwe ajri ro ren mije ļōmņak ko aer ilo peij in m̧akūtkūt eo an wiik in, m̧wijiti m̧ōttan ko, im kajjojo ren likūt bajōļ ko ippān doon.

• Ņooj pijain armej ro rej kōm̧m̧ani men ko me ej kwaļo̧k iakwe n̄an Jemedwōj Ilan̄ ilo raan in Jabōt. Kajjitōk ippān ajri ro n̄an lale pija ko im kwaļo̧k elmen kōm̧m̧ani men ko ilo pija kein n̄an kwaļo̧k ad iakwe n̄an Anij.

Rikaloor ro rej Mōn̄a Wheat ilo Raan in Jabōt, jān James Tissot

Luke 11:37–42

Kōm̧m̧an ko aō im buruō raikuj jim̧or erreeo.

Rilo̧mo̧o̧r ekar kwaļo̧k bwe ejabwe ad kwaļo̧k ad mour jim̧we n̄an ro jet. Ļōmņak ko ad, en̄jake ko, im kōm̧m̧an ko ad rettiņo reaikuj bar erreeo.

M̧akūtkūt ko Maron̄ Kōm̧m̧ani

• N̄an kōmeļeļeiki ta eo eoon in ej katakin, kwaļo̧k n̄an ajri ro juon kab ak jet kōntāinōr me erreeo itulikin ak ettoon itulowa. Jipan̄ er ļōmņake ta “tulikin kab” eo emaron̄ jutak kake. Ta eo “tulowaan kab” eo ej jutak kake. Etke eaorōk n̄an karreeoki jim̧or tulik im tulowa?

• Riit ippān doon jet bar eoon me ej kwaļo̧k kōn wānōk jim̧or ilo bōro im kōm̧m̧an ko ad—n̄an waanjon̄ak, Sam Ko 24:3–5; Matu 15:7–8; Moronai 7:6–9. Kōnono etke Rilo̧mo̧o̧r ekōņan bwe būruōd im kōm̧m̧an ko ad rettiņo ren erreeo ilo jetōb.

Kōketak Ekkatak ilo M̧weo

Kajjitōk ippān ajri ro n̄an kwaļo̧k ippān baam̧le eo aer juon men remaron̄ kōm̧m̧ane n̄an kōjparok im kōkwojarjar raan in Jabōt.

Kōkm̧anm̧anļo̧k Ad Katakin

Kajjitōk kajjitōk ko. “Juon kajjitōk me ej kōtļo̧k an rikatak ro ba juon pedped in katak eo an gospel ilo naan ko aer make—eļaptata n̄e rej kajjitōk ilo jinoin kūlaaj—emaron̄ jipan̄ eok jeļā jon̄an iien eo kwoj aikuji n̄an ekkatak pedped in katak eo ilo kūlaaj” (Katakin ilo Wāween an Rilo̧mo̧o̧r, 32).