Jab Mijak, jān Michael Malm

M̧aaj 13–19

Matu 11–12; Luk 11

“Inaaj Kakkijeik Kom̧”

Būreejtōn Dallin H. Oaks ekar katakin: “Jeje ko rekwojarjar, ko me rej revelesōn in etto, jejjab maron̄ meļeļe kaki n̄e ejjab kōn revelesōn kein ilo raan kein. … Juon ekkatak kōn jeje ko rekwojarjar ej kōmaron̄ em̧m̧aan im kōrā ro n̄an bōk revelesōn ko” (“Scripture Reading and Revelation,” Ensign, Jan. 1995, 7).

Je En̄jake ko Rej Im̧we Eok

Ilo elōn̄ wāween ko, riParisi im riSkraib ro rekar kōm̧m̧an bwe kabun̄jar n̄an Irooj en pen kōm̧m̧ane. Ekkā aer kwaļo̧k aorōkin kakien ko reppen ilōn̄ļo̧k m̧ool ko indeeo. Kakien eo ikkijeen raan in Jabōt, eo me kar n̄an juon raan in kakkije, ippāer make juon men eļap an eddo im pen.

Innem, Irooj make ekar itok ilubwiljin armej ro An. Ekar katakin er bwe m̧ool in jibadbad eo n̄an kabun̄ ejjab n̄an kōļapļo̧k eddo ko ak n̄an kōmerāiki ļo̧k. Ekar katakin bwe Anij ej letok n̄an kōj kien ko, ekoba juon iaer n̄an kautiej raan in Jabōt, ejjab n̄an idajon̄jon̄ e kōj ak n̄an kōjeraam̧m̧an kōj. Aaet, iaļ eo n̄an Anij eranin̄ im eaidik, ak Irooj ekar itok n̄an kōjjeļļāiki kōj bwe jeban make iaad ilo iaļ in. “Itok n̄an Ippa,” E ekar akweļap. Kūr eo An, n̄an aolep ro rej en̄jake aer “ban” kōn jabdewōt un ko, ej n̄an jutak Turin, n̄an atartar Ippān, im kōtļo̧k bwe en jipan̄ kōmerāik eddo ko ad. Kallim̧ur eo An ej “Kom̧ naaj lo an ami kakkije.” Keidi n̄an jokālet ko jet—kajjieon̄ ineek e make iaam̧ ak pedped ioon jipan̄ ko ilo mour in—An “ine ej em̧m̧an, im men eo [Ej] ineke e mera.” (Matu 11:28–30.)

Ļōmņak ko n̄an Ekkatak Jeje Ko Rekwojarjar Ippam̧ Make

Matu 11:28–30

Jisōs Kraist enaaj letok n̄an eō kakkije ilo aō atartar wōt Ippān.

Jej aolep ineek eddo ko—jet iien ej waļo̧k jān jerawiwi ko ad make im bōd ko ad, jet iien ej waļo̧k jān jokālet an ro jet, im jet iien ejjab an juon bōd ak rej m̧ōttan ļo̧k mour in. Jekdo̧o̧n un ko kōn apan̄ ko ad, Jisōs ekar akweļap n̄an kōj n̄an itok n̄an E bwe En maron̄ jipan̄ kōj ineek eddo ko ad im lo merā (bar lale Mosaia 24). Elder David A. Bednar ekar katakin, “Kom̧m̧ane im kōjparok bujen ko rekwojarjar kōmeraik kōj n̄an im ippān Irooj Jisōs Kraist” (“Bear Up Their Burdens with Ease,” Liaona, Māe 2014, 88). Kōn menin ilo kōļmenļo̧kjeņ in, kejokļo̧kjeņ kōn kajjitōk ko āinwōt kein rej ellaajrak n̄an kōkm̧anm̧anļo̧k ad meļeļe kōn naan ko an Rilo̧mo̧o̧r ilo eoon kein: Ewi wāween an bujen ko aō katartar eō n̄an im ippān Rilo̧mo̧o̧r? Ta eo ij aikuj kōm̧m̧ane n̄an itok n̄an Kraist? Ilo wāween ta ine eo an Rilo̧mo̧o̧r ej em̧m̧an im An eddo emera?

Ta jet iaan kajjitōk ko rej itok n̄an kōļmenļo̧kjeņ eo am̧ ilo am̧ riiti? Rekooti, im kappukot uwaak ko ilo wiik in ilo jeje ko rekwojarjar im naan ko an rikanaan ro. Kwomaron̄ ke kappukot uwaak ko n̄an jet iaan kajjitōk ko ilo ennaan eo an Elder David A. Bednar me ej kwaļo̧k itulōn̄.

Bar lale Jon A. McCune, “Itok n̄an Kraist—Mour āinwōt Armej ro Rekwojarjar ilo Raan ko Āliktata,” Liaona, Māe 2020, 36–38; Lawrence E. Corbridge, “The Way,” Liaona, Nob. 2008, 34–36.

Rikaļoor ro rej Mōn̄a Wheat ilo Raan in Jabōt, jān James Tissot

Matu 12:1–13

“Kōm̧m̧an em̧m̧an ilo raan in Jabōt.”

Katak ko an riParisi ro roktak jān Rilo̧mo̧o̧r ilo elōn̄ wāween ko, ak eļaptata wāween ko n̄an kautiej raan in Jabōt. Ilo am̧ riiti Matu 12:1–13, kwomaron̄ ļōmņak kōn jon̄an m̧wil im kōm̧m̧an ko am̧ n̄an raan in Jabōt me rej ekkeijel wōt ilo katak ko an Rilo̧mo̧o̧r. N̄an kōm̧m̧ane menin, kwomaron̄ kejokļo̧kjeņ kōn naan kein:

• “Ikōņaan tūriam̧o, im jab katok” (eoon 7; lale Hoseia 6:6).

• “Nejin armej Ej Irooj in Jabōt” (eoon 8).

• “E mālim kōm̧m̧an em̧m̧an ilo raan in Jabōt” (eoon 12).

Ewi wāween an katak kein im̧we wāween am̧ kōjparok raan in Jabōt?

Bar lale Mark 2:23–3:5; Gospel Topics, “Sabbath Day,” topics.ChurchofJesusChrist.org.

Matu 12:34–37; Luk 11:33–44

Naan im kōm̧m̧an ko aō rej kwaļo̧k ta eo ilo būruō.

Juon iaan unleplep in jum̧ae ko an riParisi ro ņae Rilo̧mo̧o̧r ej bwe rekar kajjieon̄ bwe ren mour jim̧we ilo tulik ak lukkuun jibadbad ko aer rejjab m̧ool. Ilo am̧ ekkatak kōn kakkōļ eo an Rilo̧mo̧o̧r n̄an riParisi ro ilo Matu 12:34–37 im Luk 11:33–44, kejokļo̧kjeņ kōn koneekjen eo ikōtaan būruōd im kōm̧m̧an ko ad. Ta meļeļein naan in “m̧weiuk em̧m̧an [jān bōro]” n̄an eok? (Matu 12:35). Ewi wāween an naan ko ad kajim̧we ak kaje kōj? (lale Matu 12:37). Ta meļeļein bwe mej ko mejam̧ ren “erreļo̧k eo wōt”? (Luk 11:34). Kejokļo̧kjeņ kōn wāween am̧ maron̄ erom̧ “e obrak kōn meram” (Luk 11:36) kōn kajoor eo an Rilo̧mo̧o̧r.

Bar lale Alma 12:12–14; Katak im Bujen Ko 88:67–68.

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Matu 11:28–30.Kwomaron̄ jipan̄ baam̧le eo am̧ lali ilo pija, katak ko an Rilo̧mo̧o̧r ilo eoon kein ilo aer kajjojo bōk koņaer kanōk tok juon men eddo, m̧oktata er make im innem kōn jipan̄ ālkin tok. Ta jet iaan eddo ko jej ineeki? Ta meļeļein n̄an bōk ine em̧m̧an an Kraist iood make? Pija eo ilo jem̧ļo̧kin in laajrak in katak in emaron̄ jipan̄ eok kōmeļeļeiki ta in ine em̧m̧an.

Matu 12:10–13.Ilo am̧ riit kōn Jisōs ej kōmour juon em̧m̧aan ilo raan in Jabōt, baam̧le eo am̧ emaron̄ kōnono kōn wāween ad bōk “kōmour” kōn Rilo̧mo̧o̧r. Ewi wāween an raan in Jabōt erom̧ juon raan in kōmour n̄an kōj?

Im̧we jān waanjon̄ak eo an Rilo̧mo̧o̧r ilo eoon kein, baam̧le eo am̧ emaron̄ kōm̧m̧ane juon laajrak in wāween eo kwomaron̄ “kōm̧m̧an em̧m̧an ilo raan in Jabōt” (eoon 12). Lukkuun lale bwe kwon kobaiki iien ko rem̧m̧an n̄an jipan̄ ro jet. Emaron̄ lukkuun jipan̄ n̄an kōjparok laajrak eo am̧ im kōnono kake ilo Jabōt kane tok m̧aan.

Luk 11:33–36.Kejokļo̧kjeņ kōn wāween am̧ maron̄ katakin baam̧le eo am̧ ta meļeļein “e obrak kōn meram” (eoon ko 34, 36). Juon katak eo ej kōjerbal mweiek ko naaj jipan̄ kōj? Kwomaron̄ bar kōnono kōn wāween ko n̄an bōktok meram eo an Rilo̧mo̧o̧r ilo mour ko ad, m̧ōko m̧ōd, im laļ in. N̄an ļōmņak ko, lale pija in alooj eo “The Light That Shineth in Darkness,” ChurchofJesusChrist.org.

Luk 11:37–44.Bōlen baam̧le eo am̧ remaron̄ kōnono kōn eoon kein ilo ae kwaļi kōnno̧ kein ippān doon. Kwomaron̄ kōnono kōn etke enaaj juon ļōmņak enana n̄an kwaļ aolep men ko itulik ak peļaakid āinwōt kōnno̧ in m̧ōn̄ā ko im kap ko. Innem kwomaron̄ iookļo̧k menin n̄an aikuj eo n̄an mour jim̧we ejjab jerbal ko wōt ad ralikkar ak ļōm̧nak im en̄jake ko ad rettino.

N̄an ļōmņak ko reļļapļo̧k ikkijeen katakin ajri ro unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “How Gentle God’s Commands,” Hymns, no. 125.

Kōkm̧anm̧anļo̧k Am̧ Make Ekkatak

Jokkin wōt Juon. Emaron̄ wōr jejjo am̧ raan n̄an ekkatak jeje ko rekwojajar emaron̄ pen ak edik an im̧we eō jān jon̄an eo ikar kōjatdikdik kake. Jab Ebweer. Elder David A. Bednar ekar katakin, “Ad jejjet ilo kōm̧m̧ani men ko reddik remaron̄ tōl kōj n̄an tōprak ko raorōk ilo jetōb” (“More Diligent and Concerned at Home,” Liaona, Nob. 2009, 20).

“Kom̧win bōk Aō ine im likūte i aerami, im katak Ippa, bwe Ij ineem̧m̧an im ettā būruō, im kom̧ naaj lo ami kakkije” (Matu 11:28–29 Pija © iStockphoto.com/Amphotora