M̧aaj 6–12

Matu 9–10; Mark 5; Luk 9

“Rein Jon̄oul im Ruo E ar Jilkinļo̧k”

Ļōmņak ko n̄an ekkatak ilo laajrak in ren n̄an jipan̄ eok kappukot lukkuun meļeļe eo am̧ make ilo eoon ko. Rejjab aikuj, ijoke, bōk jikin revelesōn an juon make kwomaron̄ bōk ta eoon eo n̄an ekkatak im wāween am̧ ekkatak kaki.

Je En̄jake ko Rej Im̧we Eok

Naan ko kōn menin bwilōn̄ ko kōn an Jisōs kōmour armej rekar mōkaj aer ajedeed. Jarlepju in armej ro rekar ļoor E, kōjatdikdik n̄an en̄jake mera jān nan̄inmej ko aer. Ak ke Rilo̧mo̧o̧r ekar kalimjōk jarlepju in armej ro, E kalimjōk er kōn eļapļo̧k jān nan̄inmej ko aer. Obrak kōn tūriam̧o, Ekar lo “sip ko ejjeļo̧k aer seperd” (Matu 9:36). “Eļap jonikōn,” Ekar kalimjoke, “a e iiet ri jerbal” (Matu 9:37). Kōn menin Ekar kūr rijilōk ro jon̄oul ruo, “leļo̧k n̄an er kajoor,” im kar jilkinļo̧k er n̄an katakin im jerbal in karejar “n̄an sip ko re jebwābwe, nukun Israel” (Matu 10:1, 6). Rainin aikuj eo n̄an kalōn̄ļo̧k rijerbal n̄an jipan̄ ajri ro nejin Jemedwōj Ilan̄ elukkun ļap. Ej lōn̄ wōt jon̄oul ruo Rijilōk ro, ak elōn̄ļo̧k rikaļoor ro an Jisōs Kraist jān kar m̧okta—armej ro remaron̄ kwaļo̧k n̄an aolepān laļ in, “Aelōn̄ in lan̄ epaak” (Matu 10:7).

Ļōmņak ko n̄an Ekkatak Jeje Ko Rekwojarjar Ippam̧ Make

Matu 9:18–26; Mark 5:22–43

“Kwōn jab lōļn̄o̧n̄, kwōn tōmak wōt.”

Ke Jairus ekar kajjitōk m̧oktata ippān Jisōs n̄an kōmour leddik eo nejin, eo kar “m̧ōttan jidik en kar mej,” Jairus ekar ekairiir an kōnono ak ekar kōjatdikdik: “Kwōn itōm likūt Peom̧ ņa ioon, bwe en jako an nan̄inmej, … im en mour” (Mark 5:23). Ak ilo aer kar etal wōt, juon ribbōk tok ennaan ekar ba n̄an Jairus bwe erum̧uj: “E mej ledik eo nejim: etke kwoj kam̧ōk wōt Ri Kaki ņe?” (eoon 35). Barāinwōt, emaron̄ kar rumuj n̄an kōrā eo me kar kōmeļeļeiki ilo Mark 5:25–34, eo ekar en̄taan kōn juon nan̄inmej ium̧win 12 iiō ko.

Ilo am̧ riiti bwebwenato kein, kwomaron̄ ļōmņak kōn men kane me rej aikuj kōmour ilo mour eo am̧ ak baam̧le eo am̧—ekoba men ko me remaron̄ “m̧ōttan jidik ren kar mej” ak rumuj n̄an kōmouri. Ta eo ej im̧we eok kōn ta eo bwebwenato in ej kwaļo̧k kōn tōmak? Je barāinwōt ta eo Jisōs ej ba n̄an kōrā eo im n̄an Jairus. Ta eo kwoj en̄jake E ej ba n̄an eok?

Bar lale Luk 8:41–56; Russell M. Nelson, “Drawing the Power of Jesus Christ into Our Lives,” Liaona, Māe 2017, 39–42; Teachings of Presidents of the Church: Gordon B. Hinckley (2016), 333–42.

Lōke ilo Irooj, jān Liz Lemon Swindle

Matu 10; Luk 9:1–6

Irooj ej leļo̧k kajoor n̄an ro rikarejeran n̄an kōm̧m̧ane jerbal eo An.

Kōmeļeļe ko Jisōs ekar leļo̧k ilo Matu 10 n̄an Rijilōk ro An jemaron̄ bar mour kaki, kōnke jej aolep juon m̧ōttan ilo jerbal eo an Irooj. Ta kajoor eo Kraist ekar leļo̧k n̄an Rijilōk ro An n̄an jipan̄ er kakūrm̧ool mijen ko aer? Ewi wāween am̧ bōk im tōpar kajoor eo An ilo jerbal eo me em̧ōj kūr eok n̄an e? (lale 2 Korint 6:1–10; Katak im Bujen Ko 121:34–46).

Ilo am̧ riit katak eo Kraist ekar katakin Rijilōk ro An kake, kwomaron̄ bōk im̧we ko kōn jerbal eo Irooj ej kōņaan bwe kwon kōm̧m̧ane. Juon jaat āinwōt in ej elaajrak emaron̄ jipan̄ kōlaajraki ļōmņak ko am̧:

Matu 10	Im̧we ko Ij bōki
Rilo̧mo̧o̧r ekar leļo̧k kajoor n̄an rikaļoor ro An.	Anij ej letok n̄an eō kajoor Ij aikuji n̄an kōm̧m̧ane jerbal eo aō.

Bar lale Mark 6:7–13; Articles of Faith 1:6; Bible Dictionary, “Apostle”; “Jesus Calls Twelve Apostles to Preach and Bless Others” (video), ChurchofJesusChrist.org.

Matu 10:17–20

N̄e ij pād ilo jerbal eo an Irooj, E enaaj im̧we eō kōn ta eo in ba.

Irooj ekar loe m̧oktaļo̧k bwe rikaļoor ro An renaaj jum̧ae im kab ekajet er kōn tōmak eo aer—juon me ej āinwōt ta eo rikaļoor ro rainin rej ioone. Ak Ekar kallim̧uri rikaļoor ro bwe renaaj jeļā kōn Jetōb ta eo ren ba. Kwonan̄in ke kar en̄jake an kallim̧ur in ekwojarjar kūrm̧ool ilo mour eo am̧, bolen ke kwar kwaļo̧k am̧ naan in kam̧ool, leļo̧k juon kōjeraam̧m̧an, ak bwebwenato ippān juon armej? Ļōmņak in kwaļo̧k juon en̄jake eo am̧ ippān juon eo ejitōnbōro ak rekooti ilo juon jōōņōļ. Ta eo ej im̧we eok n̄an kōm̧m̧ane bwe en maron̄ ekutkut am̧ en̄jake kain en̄jake rot in?

Bar lale Luk 12:11–12; Katak im Bujen Ko 84:85.

Matu 10:34–39

Ta meļeļe an kar Jisōs ba “I ar jab itok bwe In jilkinļo̧k aenōm̧m̧an, a jāje”?

Elder D. Todd Christofferson ekar katakin: “Ij lōke bwe elōn̄ iaami ro jinemi, im jemami, brother im sister ro ami rekar jum̧ae im kejo̧o̧le kom̧ kōnke kom̧ kar bōk gospel eo an Jisōs Kraist im deļo̧n̄e bujen eo An. Ilo bar juon wāween, iakwe eo am̧ eļap n̄an Kraist emenin aikuj kaarmejet jem̧jerā ko me raorōk n̄an eok, im kōtoor elōn̄ dānin kōmjaļaaļ ko. Jekdo̧o̧n iakwe eo am̧ make ejjab dikļo̧k, kwoj likatōttōt wōt ium̧win debwāāl in, kwaļo̧k am̧ jab jook kōn Nejin Anij” (“Finding Your Life,” Ensign, Mar. 2016, 28).

Kōņaan in n̄an luuji jem̧jerā in eaorōk n̄an ļoor Rilo̧mo̧o̧r ej itok ippān tok juon kallim̧ur ke “eo ej joļo̧k an mour kōn N̄a, enaaj lo e” (Matu 10:39).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Mark 5:22–43.Ilo an baam̧le eo am̧ riiti bwebwenato in ippān doon, kwomaron̄ pōjrak jidik n̄an kajjitōk ippān ro uwaan baam̧le eo wāween aer maron̄ en̄jake eļan̄n̄e ne kar er Jairus, kōrā eo, ak armej ro jet ilo bwebwenato in. Kwomaron̄ barāinwōt kwaļo̧k pija in bwebwenato eo, āinwōt ko ilo laajrak in. Ewi wāween an pija kein kwaļo̧k tōmak an armej ro ilo bwebwenato in? (Bar lale bitio ko “Jesus Raises the Daughter of Jairus” im “Jesus Heals a Woman of Faith” ilo ChurchofJesusChrist.org.) Kwomaron̄ barāinwōt ļōmņak kōn jet iaan apan̄ ko me baam̧le eo rej jelm̧aeiki. Ewi wāween ad mour kake naan ko An, “Kwōn jab lōļn̄o̧n̄, kwōn tōmak wōt”? (Mark 5:36).

Matu 10:39; Luk 9:23–26.Ta meļeļein n̄an “joļo̧k” mour ko ad im n̄an “lo” e? (Matu 10:39). Bolen ro uwaan baam̧le ko remaron̄ jeere en̄jake ko aer me ej kwaļo̧k kōn katak ko an Jisōs ilo eoon kein.

Matu 10:40.Ewi wāween am̧ im baam̧le eo am̧ kōm̧m̧an ilo aer bōk im ļoor kapilōk ko an Rijilōk ro raan kein? Ewi wāween an pokake ko ad n̄an kapilōk ko aer maron̄ kepaak kōj n̄an Jisōs Kraist?

Luk 9:61–62.Ta meļeļein n̄an oktaklikļo̧k im likūt peid ioon plau? Etke m̧wil in enaaj kar kōm̧m̧an bwe jen jab maron̄ deļon̄e aelōn̄ in kiin̄ eo an Anij?

N̄an meļeļe ko rem̧m̧anļo̧k n̄an katakin ajri ro, lale laajrak eo an wiik in ilo Itok, Ļoor Eō—N̄an Būraimere.

Al eo kar elmakote: “When Faith Endures,” Hymns, no. 128.

Kōkōm̧anm̧anļo̧k Ekkatak Ippam̧ Make

Ron̄jake Jetōb eo. Ilo am̧ ekkatak, kanooj lale ļōmņak im en̄jake ko am̧ (lale K&B 8:2–3), men̄e rejjab āinļo̧k wōt n̄an ta eo kwoj riiti. Im̧we kein remaron̄ lukkuun men ko Anij ej kōņaan bwe kwon jeļā im kōm̧mane.

Talitha Cumi, jān Eva Koleva Timothy