Jisōs ej kōjerkak em̧m̧aan eo jān kinien

Pāpode 27–Maaj 5

Matu 8; Mark 2–4; Luk 7

“Am̧ Tōmak Ear Lo̧mo̧o̧ren Eok”

Kōkm̧anm̧an im jab ekairiir am̧ ekkatak jān jeje ko rekwojarjar. Bōk am̧ iien n̄an jar im kejokļo̧kjeņ, men̄e ej meļeļein ejjeļo̧k am̧ iien n̄an riiti aolep eoon ko. Iien kein n̄an kejokļo̧kjeņ ekkā an tōl ļo̧k n̄an revelesōn ko an juon make.

Je En̄jake ko Rej Im̧we Eok

Juon iaan ennaan ko ralikkar ilo Kalim̧m̧ur Ekāāl ej bwe Jisōs Kraist ej juon rikōmour. Bwebwenato ko rellōn̄ kōn an Rilo̧mo̧o̧r me ej kōmour ro renan̄inmej im rej en̄taan—jān juon kōrā eo ekar biba n̄an juon ļaddik ekar mej nejin juon kōrā e jako pāleen. Etke eaorōk kōnono kōn kōmour ilo ānbwin? Ta ennaan eo ej n̄an kōj ilo menin bwilōn̄ kein? Ealikkar juon enaan ej bwe Jisōs Kraist ej Nejin Anij, ippān kajoor ko ilōn̄ aolep men ko, ekoba metak ko ilo ānbwinnid im ad jab wānōk. Ak meļeļe eo bar juon pād ilo naan ko An n̄an riSkraib ro me epen būruōer im ļap pere ippāer: “Bwe kom̧win jeļā bwe Nejin armej E maron̄ in jeorļo̧k jero̧wiwi ko ioon laļ” (Mark 2:10). Kōn menin, n̄e kwoj riit kōn juon armej ro ebilo ak juon eo e lōba kar kōmouri im emour, kwomaron̄ ļōmņak kōn kōmour—jim̧or jetōb im ānbwin—me kwomaron̄ bōke jān Rilo̧mo̧o̧r im ron̄jake An ba n̄an eok, “Am̧ tōmak ear lo̧mo̧o̧ren eok” (Luk 7:50).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Matu 8; Mark 2–3; Luk 7

Rilo̧mo̧o̧r emaron̄ kōmour kaen̄tanaan ko im nan̄inmej ko.

Jebta jejjo kein rej rekoote elōn̄ waanjon̄ak ko kōn kōmour ko re menin bwilōn̄ jān Rilo̧mo̧o̧r. Ilo am̧ ekkatak kōmour kein, kappukot ennaan ko rekkar n̄an eok. Kwomaron̄ ke kajjitōkin eok make: Ta eo bwebwenato in ej katakin kōn tōmak ilo Jisōs Kraist? Ta eo bwebwenato in ej katakin kōn Rilo̧mo̧o̧r? Ta eo Anij ekōņaan bwe in ekkatak jān menin bwilōn̄ in? Erkein rej jet iaan waanjon̄ak ko, ak ej lōn̄ wōt:

• Juon rilōba (Matu 8:1–4)

• Juon karijeran senturiōn (Matu 8:5–13; Luk 7:1–10)

• Kōrā eo jinen lio pāleen Pita (Matu 8:14–15)

• Juon em̧m̧aan enan̄inmej kōn akā (Mark 2:1–12)

• Juon em̧m̧aan em̧ōrā pein (Mark 3:1–5)

• Ļaddik nejin juon kōrā me e jako pāleen etan Nein (Luk 7:11–16)

Bar lale David A. Bednar, “Accepting the Lord’s Will and Timing,” Liaona, Aug. 2016, 17–23; Neil L. Andersen, “Ikkinejnej,” Liaona, Nob. 2018, 83–86.

Mark 2:15–17; Luk 7:36–50

Jisōs Kraist ekar itok ejjab n̄an kaje rijerawiwi ro ak n̄an kōmour er.

Ilo am̧ riiti eoon kein kōn jem̧do̧o̧n eo an Jisōs ippān riSkraib ro im riParisi ro, kwomaron̄ ļōmņak n̄e kwoj lo eok make ilo bwebwenato kein. N̄an waanjon̄ak, ļōmņak ko am̧ im jerbal ko am̧ rej ke āinwōt an Saimōn riParisi eo? Ewi wāween am̧ kōmeļeļeik oktak in ikōtaan wāween an Jisōs kar kalimjōk rijerawiwi ro im an riParisi ro āinwōt Saimōn kalimjōk er? Ļōmņak kōn wāween ro jet kar kaddodoik eok kōn jerawiwi emaron̄ kōm̧m̧an am̧ en̄jake ke rekar pād ippān Rilo̧mo̧o̧r. Ewi wāween aer en̄jake ke rekar pād ippam̧?

Kwomaron̄ bar kejokļo̧kjeņ kōn wāween am̧ āinwōt kōrā eo kar kōmeļeļeiki ilo Luk 7:36–50. N̄āāt eo kwaar en̄jake jouj im tūriam̧o me Rilo̧mo̧o̧r ekar kwaļo̧k n̄an e? Ta eo kwoj ekkatak jān waajon̄ak eo an kōn tōmak, iakwe, im ettā?

Bar lale Jon 3:17; Luk 9:51–56; Dieter F. Uchtdorf, “The Gift of Grace,” Liaona, Māe 2015, 107–10.

Matu 8:18–22; Mark 3:31–35

Erom̧ juon rikaļoor an Jisōs Kraist ej meļeļein bwe Ij likūt e m̧oktata ilo mour eo aō.

Ilo eoon kein, Jisōs ekar katakin bwe erom̧ rikaļoor ro An emenin aikuj n̄an likūt E m̧okta ilo mour ko ad, men̄e jet iien ej meļeļe jej aikuj kaarmejet men ko jet me jej kaorōki. Ilo am̧ ekkatak eoon kein, kejokļo̧kjeņ kōn mour in rikaļoor eo am̧ make. Etke rikaļoor ro rej aikuj ikdeleel n̄an likūt Rilo̧mo̧o̧r m̧oktata? Ta eo kwomaron̄ aikuji n̄an kaarmejete n̄an likūt Irooj m̧oktata? (Bar lale Luk 9:57–62.)

Matu 8:23–27; Mark 4:35–41

Jisōs Kraist ewōr an kajoor n̄an bōktok aenōm̧m̧an ilubwiljin ļan̄ ko an mour in.

Em̧ōj ke am̧ kar en̄jake wāween an rikaļoor ro an Jisōs en̄jake ļan̄ ko ilo lo̧jet—alooje ņo ko ilo̧jet ettein̄ ilo wa eo im kajjitōk, “Ri Kaki, Kwō jab ļōmņak kōn am jako ke?”

Ilo Mark 4:35–41, kwomaron̄ loe emān kajjitōk ko. Je kajjojo iaer, im kejokļo̧kjeņ kōn ta eo ej katakin eok kōn jelm̧ae apan̄ ko an mour in kōn tōmak ilo Jisōs Kraist. Ewi wāween an Rilo̧mo̧o̧r bōktok aenōm̧m̧an n̄an ļan̄ ko ilo mour ko ami?

Bar lale Lisa L. Harkness, “Aenōm̧m̧an, Jab M̧akūtkūt,” Liaona, Nob. 2020, 80–82.

Jisōs ioon ļoon eo ej kalur ļan̄ eo

Jān Mijak n̄an Tōmak, jān Howard Lyon

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Matu 8; Mark 2–4; Luk 7.Ļōmņak n̄an ejaake juon laajrak in menin bwilōn̄ ko me kar kōmeļeļeiki lo jebta kein. Kajjieon̄ kappukot ak jin̄aiki pija in jet iaer (lale Gospel Art Book ak ChurchofJesusChrist.org). Kajjojo uwaan baam̧le eo remaron̄ kōjerbal pija ko n̄an kwaļo̧k kōn juon iaan menin bwilōn̄ ko im kwaļo̧k ta eo rej ekkatak jān e. Kwomaron̄ kwaļo̧k jet iaan waanjon̄ak ko kōn menin bwilōn̄ ko kwoj loi im riiti ilo raan kein.

Bar lale pija ko “Widow of Nain” im “Calming the Tempest” (ChurchofJesusChrist.org).

Matu 8:5–13; Luk 7:1–10.Ta eo me kōn tōmak eo an Senturiōn me ekar kabwilōn̄ Jisōs? Ewi wāween ad kwaļo̧k kain tōmak in ilo Jisōs Kraist?

Mark 2:1–12.“Chapter 23: The Man Who Could Not Walk” (ilo New Testament Bwebwenato ko, 57–58, ak pija eo me eiookļo̧k ilo ChurchofJesusChrist.org) emaron̄ jipan̄ baam̧le eo am̧ kōmeļeļe kōn Mark 2:1–12. (Bar lale pija eo “Jesus Forgives Sins and Heals a Man Stricken with Palsy” on ChurchofJesusChrist.org.) Ewi wāween ad āinwōt ro m̧ōttan em̧m̧aan eo ekar jab maron̄ etetal? Wōn eo eto an m̧ōttā rōt in n̄an kōj?

Mark 4:35–41.Bwebwenato in emaron̄ ke jipan̄ ro uwaan baam̧le n̄e rej en̄jake mijak? Bōlen remaron̄ riiti eoon 39 im kwaļo̧k en̄jake ko ke Rilo̧mo̧o̧r ekar jipan̄ er en̄jake aenōm̧m̧an.

Ajri ro remaron̄ m̧ōņōņō ilo aer kōtōnn̄e rej pād ilo juon lo̧jet eļap ļan̄ in ilo an juon armej riiti Mark 4:35–38. Innem, n̄e juon armej ej riiti eoon 39, remaron̄ kōtōnn̄e rej pād ilo juon ļoon ilo juon lo̧jet elur. Kwomaron̄ al ippān doon juon al kōn kappukot aenōm̧m̧an ilo Rilo̧mo̧o̧r, āinwōt “Master, the Tempest Is Raging” (Hymns, no. 105). Ta ennaan ko ilo al eo me ej katakin kōn aenōm̧m̧an eo me Jisōs ej letok?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Master, the Tempest Is Raging,” Hymns, no. 105.

Kōkōm̧anm̧anļo̧k Ad Ekkatak

Kwōn pād im pidodo tōpare. Jet iaan iien katakin ko rem̧m̧an tata rej ijjino āinwōt kajjitōk ko ak n̄ūrbōktak ko ilo bōro ko an ro uwaan baam̧le eo. Kōm̧m̧an bwe ro uwaan baam̧le eo ren jeļā kōn naan ko am̧ im kōm̧m̧an ko bwe kwoj kijooror in ron̄ jān er. (Lale Teaching in the Savior’s Way, 16.)

Jisōs ippān em̧m̧aan eo enan̄inmej ioon peet eo rej kōwanlaļtak jān boro̧waj in m̧weo

Kraist im Ri Akā eo, jān J. Kirk Richards