Jisōs ej Katakin Armej ro ilo turin Pārijet, jān James Tissot

Pāpode 20–26

Matu 6–7

“E ar Katakin Er Āinwōt Juōn eo Ewōr an Maroñ”

N̄e jej riiti jeje ko rekwojarjar kōn juon kajjitōk ilo kōļmenļo̧kjeņ im juon ikdelel in bōro n̄an meļeļe ta eo Jemedwōj Ilan̄ ekōņaan bwe jen jeļā, jej karuwaineneik Jetōb Kwojarjar n̄an im̧we kōj. Ilo am̧ riiti Matu 6–7, leļo̧k am̧ n̄an im̧we kein.

Je En̄jake ko Rej Im̧we Eok

Kwaļo̧k eo ioon Toļ eo ej juon iaan unin kōnono ko rebun̄bun̄ ilo mour in Kūrijin. Rilo̧mo̧o̧r ekar katakin kōn elōn̄ waanjon̄ak ko, āinwōt jikin eo ej pād ioon toļ eo, wūt lily ko ilo meļaaj eo, im kidu wolf ko rej ukōt moraer n̄an sip. Ak Kwaļo̧k eo ioon Toļ eo em̧m̧an ļo̧k jān juon kōnono eaiboojoj. Kajoor in katak ko an Rilo̧mo̧o̧r n̄an rikaļoor ro An remaron̄ ukōt mour ko ad, eļaptata n̄e jej mour kaki. Innem naan ko An reļļapļo̧k jān naan wōt, rej erom̧ juon pedped eo epen n̄an mour in, āinwōt m̧weo im̧ōn armej eo emāletlet, emaron̄ jelm̧ae kōto ko im ņo ko an laļ (lale Matu 7:24–25).

Ļōmņak ko n̄an Ekkatak Jeje Ko Rekwojarjar Ippam̧ Make

Matu 6–7

Mour kōn katak ko an Rilo̧mo̧o̧r eo emaron̄ jipan̄ eō erom̧ āinwōt E.

Kwaļo̧k eo an ioon Toļ eo ekitbuuj elōn̄ pedped ko an gospel. Ilo am̧ ekkatak jebta kein, kajjitōk ippān Irooj ta eo Ekōņaan bwe en ekkatak.

Juon pedped in katak emaron̄ lo ej aikuj n̄an kaorōk m̧oktata men ko an Anij ilōn̄ļo̧k men ko an laļ in. Ewi wōt katak kein an Rilo̧mo̧o̧r eo ilo Matu 6–7 ej jipan̄ eok mije men ko an lan̄? Ta ļōmņak im im̧we ko jet kwoj en̄jaki? Ta im̧we eo kwoj en̄jake n̄an kōm̧mane? Ļōmņak in je en̄jake ko am̧. N̄an waanjon̄ok:

Matu 6:1–4	Ikōņaan bwe in kea eļapļo̧k kōn ta eo Anij ej ļōmņake kōn eō ijjeļo̧kin ta eo ro jet rej ļōmņake.

Bar juon pedped in katak ilo Matu 6–7 ej jar. Bōk jidik iien n̄an etale jar eo am̧. Ewi wāween am̧ en̄jake am̧ kōm̧m̧an ilo kijejeto ko am̧ n̄an epaake ļo̧k Anij ilo jar? Ta katak ko ilo Matu 6–7 ej im̧we eok n̄an kōkm̧anm̧anļo̧k wāween am̧ jar? Rekoote im̧we ko am̧ kwoj būki. N̄an waanjon̄ok:

Matu 6:9	N̄e ij jar, ikōņaan bwe in kautiej etan Jemedwōj Ilan̄.
Matu 6:10	N̄e ij jar, imaron̄ kwaļo̧k ikdeleel eo aō bwe ankilaan Irooj en kūrm̧ool.

Kwomaron̄ ļōmņak in riiti bar juon alen Kwaļo̧k eo an ioon Toļ, kappukot bar pedped in katak ko me elōn̄ kōttan aer waļo̧k ak ennaan ko me eļaptata aer jejjet n̄an eok. Rekoote ta eo kwoj kappukot ilo jōņōļ in ekkatak eo am̧, ippān ļo̧k ļōmņak im im̧we ko am̧.

Jemaron̄ epaakeļo̧k Anij ilo jar.

Matu 6:7

Ta meļeļein n̄an kōjerbal “ālij pata” ilo jar?

Armej ekkā aer meļeļe “ālij pata” meļeļein āliji ejja naan ko wōt elōn̄ kōttan. Ijoke, naan eo pata emaron̄ kōmeļeļeiki juon men eo me ejjab aorōk. Kōjerbal “ālij pata” ilo jar emaron̄ meļeļein jar ilo ejjeļo̧k m̧ool in en̄jake ilo bōro (lale Alma 31:12–23).

Matu 7:1–5

Imaron̄ ekajet ilo jim̧we.

Ilo Matu 7:1, Rilo̧mo̧o̧r emaron̄ kar bar jejjab aikuj ekajet, ak ilo bar eoon ko jet (ekoba eoon ko jet ilo jebta in), E ej letok n̄an kōj kōmeļeļe ko kōn wāween ekajet. Eļan̄n̄e menin emeļeļe, Ukok eo an Josep Smith ilo eoon in emaron̄ jipan̄: “Kom̧win jab ekajet, bwe en jab ekajet kom̧; ak ekajet jim̧we” (ilo Matu 7:1, footnote a). Ta eo kwoj loe ilo Matu 7:1–5, ippān ļo̧k aolepān jebta eo, me ej jipan̄ eok jeļā wāween “ekajet jim̧we”?

Bar lale Gospel Topics, “Judging Others,” topics.ChurchofJesusChrist.org; Lynn G. Robbins, “The Righteous Judge,” Liaona, Nob. 2016, 96–98.

Matu 7:21–23

Ijeļā kōn Jisōs Kraist ilo aō kōm̧m̧ane Ankilaan.

Naan in “I ar jaje kom̧” ilo Matu 7:23 ekar oktak ilo Ukook eo an Josep Smith n̄an “Ye never knew me” (Matu 7:23, footnote a). Ekōjkan an menin ukōt eok n̄an kōkm̧anm̧anļo̧k am̧ meļeļe ta eo Irooj ekar katakin eok ilo eoon 21–22 kōn Ankilaan? Ewi jon̄an en̄jake eo am̧ kōn jon̄an am̧ jeļā kōn Irooj? Ta eo kwomaron̄ kōm̧m̧ane n̄an em̧m̧anļo̧k am̧ jeļā kōn E?

Bar lale David A. Bednar, “Koṃ ar jeḷā N̄a”,” Liaona, Nob. 2016, 102–5.

Matu 7:24–27

Pokake katak ko an Rilo̧mo̧o̧r ej ejaake juon pedped epen n̄an mour eo am̧.

Mour kōn gospel eo ejjab joļo̧k apan̄ ko jān mour ko ad. Jim̧or m̧ōko ilo būrabōļ eo an Jisōs ilo Matu 7:24–27 ej depļo̧ke ejja ļan̄ in wōt. Ak juon iaan m̧ōko ekar maron̄ jelm̧aeiki. Ewi wāween an katak ko an Rilo̧mo̧o̧r kar ejaake juon pedped epen n̄an eok? Ta im̧we eo kwoj en̄jake n̄an kōm̧m̧an n̄an wōnm̧aanļo̧k wōt im kalōk “m̧weo im̧ōn ioon bar”? (lale eoon 24).

Bar lale Hilamōn 5:12.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Matu 6–7.Juon wāween n̄an ekkatak jān Matu 6–7 āinwōt juon baam̧le ej n̄an alooje bitio eo “Sermon on the Mount: The Lord’s Prayer” im “Sermon on the Mount: Treasures in Heaven” (ChurchofJesusChrist.org). Ro uwaan baam̧le eo remaron̄ ļoor eoon ko im kabōjrak jidik bitio eo jabdewōt iien rej ron̄ juon men me rekōņaan kōnono kake. Makūtkūt in emaron̄ jon̄an aitokin ej jejjo raan, n̄e emenin aikuj.

Matu 6:5–13.Ta eo jemaron̄ ekkatak kōn jar jān wāween eo Rilo̧mo̧o̧r ekar jar? Ewi wāween ad maron̄ kōjerbal jar eo An āinwōt juon waanjon̄ak n̄an kōkm̧anm̧an jar ko ad make ak an baam̧le? (Bar lale Luk 11:1–13.) Eļan̄n̄e ewōr nejūm ajri jiddik, kwomaron̄ kaminene jar ippān doon.

Matu 6:33.Ta meļeļein n̄an “pukot … m̧okta aelōn̄ in Anij”? Ewi wāween ad kōm̧m̧ane menin āinwōt kōj make im āinwōt juon baam̧le?

Matu 7:1–5.N̄an pijaikļo̧k katak ko ilo eoon kein, baam̧le eo am̧ emaron̄ lo juon m̧ōttan jiddik (juon m̧ōttan aļaļ jidikdik) im juon beam (juon m̧ōttan aļaļ killep). Ilo ad keidi men kein ruo, ta eo ej katakin kōj kōn ekajet ro jet? Eļan̄n̄e kwokōņaan meļeļe eļapļo̧k kōn unin kōnono in, kwomaron̄ kōjerbal jet iaan kein jipan̄ kein ilo “Judging Others” (Gospel Topics, topics.ChurchofJesusChrist.org).

Matu 7:24–27.N̄an jipan̄ baam̧le eo am̧ bwe en em̧m̧anļo̧k aer meļeļe kōn būrabōļ eo an Rilo̧mo̧o̧r kōn em̧m̧aan eo emālōtlōt im em̧m̧aan eo ebwebwe, kwomaron̄ kōtļo̧k bwe ren lutōk dān ioon pok ko im ioon juon dbar. Ewi wāween ad kalōk pedped in jetōb ko ad ioon juon bar?

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “The Wise Man and the Foolish Man,” Children’s Songbook, 281.

Kōkōm̧anm̧anļo̧k Ekkatak eo Am̧ Make

Kwaļo̧k ļōmņak ko. Ekkōnono kōn pedped in katak ko kwoj ekkatak jān am̧ kōm̧m̧ane ekkatak ko am̧ make ejjab wāween eo wōt n̄an katakin doon; ej barāinwōt jipan̄ kōkajoorļo̧k meļeļe eo am̧ make. Kajjieon̄e juon pedped in katak eo kwar ekkatak ilo wiik in ippān juon uwaan baam̧le eo ak ilo kūlaaj ko ilo m̧ōn jar eo.

Ikar Jar kōn E, jān Del Parson