Riekajet eo Ewānōk
En̄in ej wāween eo de in n̄an ekajet ekajet eo ejim̧we, āinwōt kar Jisōs Kraist, im en̄in ej aikuj in āinwōt E.
Ilo mour eo An ioon ilaļ in, Jisōs Kraist ekar juon riekajet eo eļap an iakwe im eļaptata mālōtlōt im kijenmej. Ņa etan ilo jeje ko rekwojarjar āinwōt “riekajet eo ewānōk” (2 Timote 4:8; Moses 6:57), im kōkakpilōklōk eo An n̄an kōj ej barāinwōt “ekajet ekajet jim̧we” (lale Josep Smith Translation, Matu 7:1–2 [ilo Matu 7:1, footnote a]) im n̄an “likūt am lōke ilo Jetōb eo ej tōlļo̧k n̄an kōm̧m̧an em̧m̧an … [im] n̄an ekajet jim̧we” (K&B 11:12).
Kakpilōklōk in n̄an RiNipai ro Jon̄oulruo enaaj jipan̄ kōj ekajet āinwōt An ekajet: “Kom̧in jeļā bwe kom̧ naaj riekajet ro an armej rein, ekkar n̄an ekajet eo inaaj lewōj n̄an kom̧, eo enaaj jim̧we. Kōn menin, armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij” (3 Nipai 27:27; eoon eo eaorōk). Jet iien jej meļo̧kļo̧k menin ke Ekar letok kapilōk in erom āinwōt E, Ekar kōnono kōn wāween ekajet jim̧we.
Ekajet ko Rejjab Jim̧we
Juon waanjon̄ak ekajjokook kōn ekajet ko rejjab jim̧we rej itok jān būrabōļ in jiip eo ejābwābwe ke Parisi im skraib ro ekar bōd aer ekajet e jim̧or Rilo̧mo̧o̧r eo im ro rekar jijet im kōjota Ippān, ba, “Armej in ej bōk rijero̧wiwi im m̧ōn̄ā ippāer” (Luk 15:2)—rekar jab ļōmņak bwe bar er rej jerawiwi. Būruweer rekōņaan liaakeļo̧k armej kōn men ko rebōd, skraib im Parisi rej jāmin jeļā lan̄lōn̄ in lo̧mo̧o̧r jiib ko rejabwābwe.
Ekar barāinwōt “skraib ro im Parisi ro” ro rekar bōktok “juon kōrā ar jibwe ilo lōn̄” (Jon 8:3) n̄an Rilo̧mo̧o̧r eo n̄an lale eļan̄n̄e Enaaj kar ekajet e ekkar n̄an kien Moses (lale eoon 5). Kom̧ jeļā aolepān bwebwenato in, wāween an kōttāik er kōn aer ekajet bōd im wāween aer kar “kar liaakeļo̧k bōd eo aer make” im kar ilo̧k “juon ilo̧k juon” (eoon 9; eoon eo eaorōk kar kobaiktok). Innām Ekar ba n̄an kōrā eo, “Im N̄a I jab liaakeļo̧k eok; kwōn ilo̧k im jab bar jero̧wiwi. Im kōrā eo ekar kaiboojoj Anij jān awa eo, im tōmak ilo Etan” (Joseph Smith Translation, John 8:11 [ilo Jon 8:11, footnote c]).
Armej ilo biktokid ilo kōj kajjojo ewōr aer ikdeleel n̄an liaakeļo̧k ro jet im ekajet bōd, ak kajim̧weik er make. Menin ekar waļo̧k n̄an Jemes im Jon, ruo iaan Rijilōk ro an Rilo̧mo̧o̧r eo. Rekar lukkuun illu ke armej ro ilo juon bukwōn an RiSameria ro rekar jab kautiej Rilo̧mo̧o̧r eo (lale Luk 9:51–54):
“A rejro lo men in, re ba, Irooj, kwō kōņaan bwe kōmin jiron̄ bwe kijeek en itok jān lan̄ im tile er ke, aaet āinwōt Iliaj ekar kōm̧m̧ane?
“A Ej oktakļok im kauwe er, im ba, Kom̧ jab jeļā kain jetōb rot kom̧ij aikuj in.
“Bwe Nejin armej ejjab itok n̄an kakkure mour, ak E ej itok n̄an lo̧mo̧o̧ren er” (eoon 54–56).
Riekajet eo [ro] em̧ool” rainin (K&B 107:74), ej aikuj kōjerbal kain kōņaan rot in n̄an liaakeļo̧k, āinwōt Jemes im Jon rekar kōm̧m̧ane ilo iien in. Juon riekajet ejim̧we enaaj uwaak im kwaļo̧k bōro ko kōn tūriam̧o̧ im meļeļe. Juon jodikdik eo ekar kōm̧m̧ane juon bōd, aikuj en̄jake iakwe an Rilo̧mo̧o̧r eo n̄e enaaj em̧m̧akūt jān opiij eo an bisop eo kōn bisop eo im obrak ilo lan̄lōn̄ im kajoor in kōmour eo an Pinmuur eo—jāmin jook ak dāpij ilo liaakeļo̧k. Ijjelo̧kin, bisop eo aikuj jab iten kōm̧m̧an bwe jodikdik eo en wōnm̧aanļo̧k im jōbwābwe (lale Luk 15:4).
Kauwe
Ijoke, tūriam̧o̧ ejjab bōkļo̧k aikuj in kauwe eo. Naan in kauwe ej itok jān naan in Latin eo discere, “n̄an ekkatak,” ak discipulus, “rikkatak,” kōm̧m̧an bwe juon rikaļoor juon rijikuuļ im rikaļoor.1 N̄an kauwe ilo wāween eo an Irooj ej katakin ilo iakwe im kijenmej. Ilo jeje ko rekwojarjar Irooj ekkā an kōjerbal naan in kakkōļ n̄e Ej kōnono kōn kauwe (lale, n̄an waanjon̄ak, Mosaia 23:21; K&B 95:1). Naan in kakkōļ ej itok jān latin castus, meļeļein “wānōk ak erreo,” im kakkōļ meļeļein “n̄an kareeoki.”2
Ilo laļ, liaakeļo̧k juon em̧m̧aan im ļake ilo kalbuuji ej ekajet an laļ. Ilo keidi, Bok in Mormon ej katakin kōj bwe n̄e jekar tōn wōt jerawiwi, jej erom aer “riekajet make” (Alma 41:7) im liaakeļo̧k kōj make n̄an kaļbuuj ilo jetōb. Ilo bar juon wāween, riekajet eo em̧ool ilo jekjek in ej kabwijer kii ko me ej kōppeļļo̧k kōjem̧ ko an kaļbuuj; “bwe kōn kauwe in In kōpooje juon iaļ n̄an lo̧mo̧o̧r eo aer ilo aolep men ko jān kapo” (K&B 95:1; eoon eo eaorōk kar kobaik). Jerbal ko an juon riekajet eo ejim̧we ej tūriam̧o̧, iakwe, im lo̧mo̧o̧r, jab liaakeļo̧k.
Ke Josep Smith ekar dik kar kauweik kōn emān iiō n̄an etale e m̧okta jān an bōk pileej gold ko, “kōnke kwaar jab kōjparok kien ko an Irooj.”3 Tokālik, ke Josep ekar luuji 116 peij ko, kar bar kauweiki bar juon alen. Men̄e ekar lukkuun būrom̧ōj, Irooj ekar wōnm̧aanļo̧k wōt im bōk mālim eo jān e ium̧win jidik iien, kōnke “kom̧ ro Ij iakwe er Ij barāinwōt kauweik er” (K&B 95:1).
Josep ekar ba, “Enjeļ eo ekar m̧ōņōņō ke ekar bar kōro̧o̧ltok Urim im Thumim eo im kar ba bwe Anij ekar m̧ōņōņō kōn tiljek eo aō im ettā eo aō, im kar iakwe eō kōn būrom̧ōj im ukweļo̧k eo aō im tiljek ilo jar.”4 Kōnke Irooj ekar kōņaan katakin Josep juon katak an juon bōro ej oktak, Ekar aikuj kaarmejet eo ekōmmetak jān e—juon kaarmejet eo eaorōk ej m̧ōttan wōt kauwe eo.
Katok
“Ilo raan ko etto, kauwe meļeļein kōm̧m̧an bwe juon men ak juon armej kwojarjar,”5 en ekkejel ippān, ilo juon wāween ej kōjenolo̧k e, n̄an meļeļe eo an naan in kauwe—“n̄an kokwojarjar e.” Āinļo̧k wōt, ilo Israel etto, jeorļo̧k bōd ej itok jān kōm̧m̧ane juon menin leļo̧k kōn jerawiwi, ak katok.6 Katok eo ejjab wōt “[kar] jitōnļo̧k katok eo eļap” (Alma 34:14) ak barāinwōt kar jipan̄ ejaake juon en̄jake em̧wilaļ in kam̧m̧oolol kōn Pinmuur eo an Rilo̧mo̧o̧r eo. Makoko in katok ej m̧ōttan wōt ad nana ak jab kautiej katok eo An eļap kōn ejja jerawiwi eo wōt im kajejtokjen en̄taan eo An—juon kōkkaļļe in juon en̄jake ejjab kam̧m̧oolol.
Ilo bar juon wāween, jān kain katok in, jej lukkuun bōk juon men eo eban jako aorōkin—An tūriam̧o̧ im jeorļo̧k bōd im eļaptata “aolep men ko [an] Jema” (K&B 84:38). Āinwōt m̧ōttan wōt jerbal in ukwelo̧k in, katok ej barāinwōt m̧akūtkūt ko āinwōt juon uno n̄an kōmour n̄an jipan̄ bōk jikin “būrom̧ōj in bōklōkōt” (Alma 42:18) ippān “aenōm̧m̧an in bōklōkōt” (Mosaia 4:3). Ilo an ejjeļo̧k katok, juon armej emaron̄ loe an pen an jeorļo̧k aer make bōd, kōnke juon bōklōkōt etto an pād kōn juon men kar makoko kake.7
Ro Jemān im Jinen āinwōt juon Riekajet Ejim̧we
Jet iien, jet iaad naaj kūr er n̄an erom rikajet ro rem̧ool, pedped in katak in kōn ekajet eo ejim̧we ej jerbal n̄an kōj aolep, eļaptata n̄an ro jinen im jemān ro ewōr aer iien aolep iien n̄an kōjerbale pedped in katak kein ippān ajri ro nejier. N̄an wājapdik katakin juon ajri ej dilepin kōkaajriri eo em̧m̧an, im n̄an iakwe ilo kauwe ej dilepin juon riekajet ejim̧we.
Būreejtōn Joseph F. Smith ekar katakin, “Eļan̄n̄e ajri ro rej makoko im bōd im pen n̄an kōmakūtkūt er, kom̧win kijenmej ippāer m̧ae iien kom̧ij kwaļo̧k iakwe kom̧ naaj anjo, … innām kom̧ maron̄ [ļōm̧e] m̧wilier āinwōt am̧ kōņaan.”8
Ej mālōtlōt bwe ilo ami katak wāween kauwe, rikanaan ro āinwōt aolep iien rej kōnono kōn inmen ko an Kraist. Katak im Bujen ko rej letok n̄an kōj kapilōk in em̧m̧an kōn kauwe:
“Ejjeļo̧k kajoor ak jelōt emaron̄ ak aikuj in dāpiji jān wōt priesthood eo, en jān wōt jeļā ņae, jān meanwōd, jān meoeo im ettā bōro, im jān iakwe jab ankilaan riab;
“Jān jouj, im lukkuun jeļāļo̧kjeņ, eo enaaj kanooj kōļapļo̧k jetōb eo ilo ejjeļo̧k m̧oņ, im ilo ejjeļo̧k etao—
“Kauwe ilo iien ko rejim̧we ilo jejjet, n̄e kōm̧akūt ioon jān Jetōb Kwōjarjar; innām kwaļo̧k ālikin wōt ļapļo̧k in iakwe” (K&B 121:41–43).
Jeje ko rekwojarjar rej katakin kōj n̄an kōkōm̧anm̧anļo̧k “n̄e kōm̧akūt ioon jān Jetōb Kwōjarjar,” eban n̄e em̧m̧akūt kōn illu. Jetōb Kwojarjar eo im illu rejjab ippān doon, kōnke “Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj būruōn armej n̄an aitwerōk kōn illu, ippān doon” (3 Nipai 11:29). Būreejtōn George Albert Smith ekar katakin bwe “men ko rejjab jouj rejjab maron̄ kōnono kōn im̧we an Irooj. Jitōbōn Irooj ej juon jetōb in jouj; ej juon jetōb in kijenmej; ej juon jetōb in iakwe em̧ool im iakwe im meanwōd im kijejeto. …
“… Ak n̄e elōn̄ ippād jetōb in kappukōt ruwōn … ilo juon wāween enana, menin ejjamin itok āinwōt juon waļo̧k in jem̧jerā ippān Jetōb eo an Jemed ilo Lan̄ im ej aolep iien kōmetak.
“… Jouj ej kajoor eo Anij ekar letok n̄an kōj bwe jen kōmerāik bōro im jetōb ko rebōd.”9
Ajri ro Nejid Lukkuun Wōn Er
Ke Rilo̧mo̧o̧r eo ekar loļo̧k RiNipai ro, Ekar kōm̧m̧ane juon men ekanooj kabwilōn̄lōn̄ ippān ajri ro nejier:
Im ālikin men kein Eaar katakin im jerbal n̄an ro nejin jarlepju eo … , im Eaar kōtļo̧k loer, im raar kōnono n̄an jemāer men ko reļļap im kabwilōn̄lōn̄. …
“… Raar jim̧or lo im ron̄ rein nejier; aaet, em̧ool nin̄nin̄ ro raar kōpeļļo̧k lo̧n̄ier im kōnono men ko rekabwilōn̄lōn̄” (3 Nipai 26:14, 16).
Bōlen eļapļo̧k jān kōppeļļo̧k lo̧n̄iin ajri ro, Irooj ekar kōppeļļo̧k mej ko im lo̧jin̄iin jineer im jemāer ro rekar ļo̧kjān aer. Rein jinen im jemān rekar bōk menin letok in kanooj kabwilōn̄lōn̄ juon ļōmņak eaorōk im eban jako im loe lukkuun wōn er im kadkad eo m̧okta an ajri ro nejier. Menin enaaj ke ba ukōt wāween eo ro jinen im jemān rekar loe im kōm̧m̧ane n̄an ajri ro nejier? Em̧m̧an wāween oktak in Johann Wolfgan ekar ba “Wāween eo kwoj lo [juon ajri] ej wāween eo kwoj kōm̧m̧an n̄an er, im wāween am̧ kōm̧anm̧an n̄an er ej wāween eo renaaj erom āinwōt.”10 N̄an keememej lukkuun wōn ej juon ajri ej juon menin letok im̧aan mejān ej im̧we visōn an juon riekajet ejim̧we.
Kajjemļo̧k
Būreejtōn Thomas S. Monson ekar katakin kōj, “Jab kōjekdo̧o̧n juon jorrāān n̄an ņamejļan ej erom aorōkļo̧k jān juon armej n̄an iakwe e.”11 Ewi jon̄an an lukkuun aorōk pedped in katak in ej ilo an riekajet ro rejim̧we erom, eļaptata ippān ajri ro nejid make.
En̄in ej wāween eo de in n̄an ekajet ekajet eo ejim̧we, āinwōt kar Jisōs Kraist, im en̄in ej aikuj in āinwōt E. Kōn menin, “em̧m̧aan rot [im kōrā] kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij” (3 Nipai 27:27). Ilo etan Jisōs Kraist, amen.