Inaaj Bōktok Meram in Gospel eo n̄an Mweo Im̧ō
Jemaron̄ bōktok meram in gospel eo n̄an m̧ōko im̧ōd, jikuuļ ko, im jikin jerbal ko eļan̄n̄e jej pukōte im kwaļo̧k men ko rem̧m̧an kōn ro jet.
N̄an eo̧ron̄ kūr eo an Sister Linda K. Burton ilo Eprōļ kweilo̧k eo eļap,1elōn̄ iami raar bōk ilo ļōmņak im jerbale ilo iakwe n̄an tōpar aikuj ko an rijipo̧kwe ro ilo ijo jikimi. Jān menin, ami jipan̄ ilo jukjukinpād, eaar waļo̧k itok wōt jān iakwe. Ilo ami kar leļo̧k iien ko ami, kapāāl ko im kein jipan̄ ko, ami—n̄an rijipo̧kwe ro’—bōro ko raar meraļo̧k. Kōjatdikdik im tōmak eaar ļapļo̧k im aaet iakwe kōtaan ro rej leļo̧k im ro rej bōk eaar ļapļo̧k ilo juon tōprak in iakwe em̧ool.
Rikanaan Moronai eaar jiron̄ kōj bwe iakwe em̧ool ej juon m̧wil eo eaorōk n̄an ro renaaj mour ippān Jemedwōj Ilan̄ ilo Aelōn̄ eo Eutiej tata. Eaar je, “Eļan̄n̄e ejjeļo̧k ami iakwe em̧ool kom̧ ilo ejjeļo̧k jabdewōt wāween maron̄ mour ilo aelōn̄ in Anij.”2
Aaet, Jisōs Kraist ej riwaanjon̄ok eo ewāppen kōn iakwe em̧ool. Menin letok eo an ilo mour eo m̧okta bwe en ad Rilo̧mo̧o̧r, kadkad eo An ilo mour in, menin letok eo An ekwojarjar kōn Pinmuur eo, im An jibadbad bwe jen ro̧o̧l ļo̧k n̄an ippān Jemedwōj Ilan̄ rej waļo̧k tok jen iakwe em̧ool. Ej jerbal kōn juon jibadbad: An iakwe n̄an Jemen eaar waļo̧k kōn An iakwe kōj kajjojo. Ke kar kajjitōkin kōn kien eo eļaptata, Jisōs eaar uwaak:
“Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“En̄in ej kien eo eļap im m̧oktata.
“Im eo kein ka ruo āinwōt in, Kwōn yokwe ri turum̧ im āinwōt kwe.”3
Juon iaan wāween ko raorōk ilo ad kōļapļo̧k im kwaļo̧k iakwe n̄an ro riturur ej ilo waween ad ļōmņak im ilo naan ko ad. Jet iiō remootļo̧k, juon m̧ōtta eaar jeiki naan kein, “jekjek in iakwe em̧ool ej n̄e jejjab ņa ruon ro jet.”4 Menin ej m̧ool wōt n̄an rainin.
Jem̧aanļo̧k, ke Alyssa eo jilu an iiō eaar alooj pija ippān ro jein im jatin, mejān eaar kōraat, “Mam̧a, enana bao en!”
Jinen eaar reilo̧k n̄an tipi eo im uwaak kōn etōn̄dikdik, “Nejū, peacock men en.”
Āinwōt leddik in jilu an iiō me ejaje, jet iien jej kalimjek ro jet kōn juon meļeļe eo ejalikar ak ebōd. Jemaron̄ lo oktak ko im kile bōd ko an ro ipeļaakid ijjelo̧kin Jemedwōj Ilan̄ ej kalimjek ro Nejin, kar kōm̧anm̧an wōt ilo nememein eo An indeeo, kōn em̧m̧an im aiboojoj eo eaorōk.
Būreejtōn James E. Faust eaar ba, “Toon wōt aō rūtto ļo̧k, ņa ruwōn ro jet ej dik ļo̧k.”5 Menin ekakeememej eō kōn Rijilōk Paul:
“Ke iar ajri, iar kōnono āinwōt ajri, iar jeḷā āinwōt ajri, iar ḷōmṇak āinwōt ajri; a kiiō bwe I [rūtto] em̧ōj aō utūk men ko an ajri.
“Bwe kiiō jej lo ilo glass im e tab; a ilo iien eo jelṃae doon; kiiō I jeḷā jimattan, a iien eo inaaj kanooj jeļā āinwōt rej bar kanooj jeļā n̄a.”6
N̄e jej lukkuun lo bōd ko ad make, innām edik ļo̧k ad lo ro jet ilo juon “ kūlaaj, emarok.” Jej kōnaan kwaļo̧k meram in gospel eo n̄an kalimjek ro jet āinwōt an Rilo̧mo̧o̧r eo kalimjek er—kōn tiriam̧o̧, kōjatdikdik, im iakwe em̧ool. Raan eo enaaj itok n̄e jenaaj lukkuun meļeļe kōn būruwōn ro jet im naaj m̧ōņōņō kōn tiriam̧o̧ eo aetok kitien n̄an kōj—ilo ad leļo̧k iakwe em̧ool ilo kōm̧m̧an im ilo naan n̄an ro jet ilo mour in.
Jet iiō rem̧ootļo̧k, iaar uwe ilo juon kōrkōr ippān juon kurup in leddik. Aiboojoj eo an lo̧jet itōrerein toļ ko raar lukkuun em̧m̧an. Aiboojoj eo an lo̧jet eaar lukkuun em̧m̧an ke komij aņōņ, im al eaar rome tok ijo komij aņōņ ie.
Ijoke, em̧ōkaj an kilmeej lan̄ im eaar jino kajoor kōto eo. Bwe kōm̧in wōnm̧aanļo̧k, kōm̧ eaar buuļ aņōņ, ilo ejjeļo̧k bōjrak. Ālkin jidik iien m̧adm̧ad, kōm̧ eaar jeer ļo̧k n̄an ļwe eo im kar lo am̧ m̧ōņōņō im laudin̄din̄ bwe kōto eaar uk ļo̧k kōm̧ n̄an ijo kōm̧ eaar kōņaan.
Em̧ōkaj, kōm̧ eaar bōk menin letok in. Kōm̧ eaar kwaļo̧k tok juon kabba, lukwoje kein aņōņ ko ruo ilo kona ko im kona ko jet ilo neen ļeo ippa, me enaaj iuni nam̧ōjļo̧k jen tōrerein kōrkōr eo. Im kōto eaar uk wujlā eo, im kōm̧ eaar jerak!
Ke leddik ro jet ilo kōrkōr eo juon rej lo am wāween am kar ettōr ioon dān ilo aenōm̧m̧an, raar m̧ōkajin kotak wujlā ko aer make. Būruwōm̧ eaar m̧ōņōņō, kam̧m̧oolol kōn apan̄ ko an raan eo.
Kōto in emaron̄ in juon m̧ōttad, m̧ōņōņō eo an juon jinen ak jemen, ennaan jen ro jein ak jatin, ak kōn juon ettōn̄dikdik jen juon rijerbal ak classmate, aolep rej jipan̄ n̄an “uk wujlā ko ad” ilo ad aņōņ ilo apan̄ ko an mour in! Būreejtōn Thomas S. Monson ej likūt ilo wāween in: “Jemaron̄ jab kōjebwebweik kōto eo, ak jemaron̄ kōm̧anm̧an ļo̧k iaļ in wa eo. N̄an kōļapļo̧k m̧ōņōņō, aenōm̧m̧an, im laudin̄din̄, kōm̧m̧an bwe jen kālet m̧wil em̧m̧an.”7
Naan ewōr kajoor ie, jim̧or ilo em̧m̧an im nana. Jemaron̄ aolep keememej naan ko renana me raar kōm̧m̧an ad inepata im naan in rōjan̄ ko ilo iakwe me rekōm̧m̧an bwe jetōb eo ad en m̧ōņōņō. Kālet n̄an ba ta eo em̧m̧an—n̄an—ļōn̄aj ro jet im kōkajoorļo̧k ro ipeļaakid im jipan̄ ro jet ļoor iaļ eo an Rilo̧mo̧o̧r.
Āinwōt juon leddik edik ilo Būraimere, iaar lukkuun jerbal n̄an kiiji juon m̧ōttan n̄an je naan kein, “Inaaj bōktok meram in gospel eo n̄an m̧weo im̧ō.” Juon rālep, ke kōm̧ij leddik ro kwaļo̧ki tok nittōļ ko im kemooni ilo m̧ōttan eo, rūkaki eo am̧ eaar kwaļo̧k tok juon bwebwenato kōn juon leddik eo eaar jokwe ilo juon toļ ilo jikin eo juon. Kajjojo rālep, ej lo m̧weo juon ilo turājet in toļ eo, kōn wūntō ko rerabōļbōļ. Mweo m̧ōn eaar dik im ettoonon, im leddik in eaar kōņaan jokwe ilo m̧weiin eaiboojoj im erabōļōļ.
Juon raan leddik in eaar bōk mālim n̄an an baajkōļ ļo̧k n̄an jikin eo. Eaar kijōrjōr in baajkōl ļo̧k n̄an m̧weo erabōļbōļ wūntō ko ie me eto an antoone. Im ke ej to jen baajkōl eo waan, eaar lo bwe m̧weo eaar jorrāān im m̧ōr, kōn an marmare im wūntō ko raar ettonoon. Kōn būrom̧ōj, leddik in eaar oktakļo̧k n̄an m̧weo im̧ōn. Kōn bwilōn̄ eo an, eaar lo juon em̧ eaiboojoj, wūntō ko ie ioon toļ eo raar erabōļbōļ, im eaar m̧ōkaj an jeļā ke m̧weo im̧ōn eo!8
Jet iien, āinwōt leddik in, jemaron̄ in reilo̧k kōn ta eo ro jet ewōr ippaer im n̄an en̄jake ad jaaorōk. Jej jino mije an̄jiwiwi ko an mour in ak m̧ad ilo jikin jikuuļ ak jikin jerbal ko ad. Ijoke, n̄e jenaaj bōk jidik iien n̄an “bwini menin jouj ko [ad],”9 je lo kōn juon jibadbad eo em̧ool im kile em̧m̧an eo an Anij n̄an aolep ro Nejin.
Jekdo̧o̧n 8 ak 108 ad iiō, jemaron̄ bōktok meran in gospel eo n̄an jukjukinpād eo ad make, ilo abaatmen ko reutiej ilo Manhattan, m̧oko rej ekkal ioon alal ilo Malaysia, ak ilo Mongolia. Jemaron̄ reilo̧k im lo em̧m̧an eo an ro jet im ilo jekjek ko ipeļaakid. Kōrā ro reddik im rerūtto ijoko jabdewōt remaron̄ kōmeļeļeik iakwe em̧ool ilo aer kālet n̄an kōjerbal naan ko n̄an kwaļo̧k lōke im tōmak ilo ro jet.
Elder Jeffrey R. Holland eaar kwaļo̧k kōn juon ļaddik eo kar kōm̧m̧an kōjak kake jān ro m̧ōttan ilo iiō in jikuuļ ko an. Jet iiō tokālik, eaar em̧m̧akūt, kar pād ilo tariņae, bōk jeļāļo̧kjeņ, im jino niknik ilo Kabun̄ in. Tōrein mour in an eaar obrak kōn en̄jake ak imenene ko rem̧m̧an.
Ālkin jet iiō, eaar jepļaakļo̧k n̄an kapijuknen eo an. Ijoke, armej ro raar m̧akoko in kile eddōk im em̧m̧an ļo̧k eo an. N̄an er, ejjan̄in “oktak,” im raar kōm̧m̧an rot in n̄an e. Ilo m̧ool, em̧m̧aan in em̧m̧an eaar jerwane em̧m̧anļo̧k eo an ilo an jab kar kōjerbal tōļan ko an n̄an kōjeraam̧m̧an ro raar bar kajirere im kowaan e.10 Menin eaar kaburom̧ōjm̧ōj, jim̧or n̄an e im jukjukinpād eo!
Rijilōk Paul eaar ba, “Im eḷap jān men otemjej, kom̧win kanooj yokwe doon, bwe yokwe ej kalbubu elōn̄ jero̧wiwi.” 11 Lukkuun iakwe em̧ool, meļeļein “ikdeleel,” ej kwaļo̧k n̄an meļo̧kļo̧k likjab ko im bōd ko an ro jet ijelo̧kin ad dāpiji wōt ilo kōj bōd an ro jet m̧oktaļo̧k.
Jibadbad im jerbal eo ad ej n̄an kōm̧m̧an em̧m̧an ippān aolep ilo ad kajjieon̄ in erom̧ āinwōt ad Rilo̧mo̧o̧r, Jisōs Kraist. Ej menin m̧ōņōņō n̄an lo meram ilo mejān ro me rej meļeļe kōn Pinmuur eo an Jisōs Kraist im ej kōm̧m̧an m̧ool in oktak ilo mour eo an! Mijinede ro me raar en̄jake m̧ōņōņō in n̄an lo juon rioktak itok n̄an dānin peptaij innām deļo̧n̄e kōjem ko an tampeļ eo rej kam̧ool kōn kōjeram̧m̧an ko repād—n̄an rojan̄—ro jet n̄an oktak. Membōr ro me rej karuwaineneik rioktak ro me rejjab kain armej ro rej koba tok ilo kabun̄ rej lo eļap em̧m̧anļo̧k ilo jipan̄ er en̄jake iakwe eo an Irooj. Em̧m̧an eo eļap an gospel eo an Jisōs Kraist ej kōn eddōkļo̧k eo em̧ool—ejjab n̄an ukōt kōj n̄an em̧m̧an ļo̧k ak n̄an rōjan̄, im aaetkean̄, im wōnm̧aanļo̧k n̄an pukot em̧m̧an ļo̧k im, aaet, wānōk.
Būreejtōn Thomas S. Monson ekar kōmeļeļeik: “Ilo bukwi wāweein ko reddik, kom̧ij kōnak iakwe em̧ool. … Ijelo̧kin ņa ruwōn ak jum̧ae doon, kōm̧m̧an bwe en wōr ippād iakwe eo em̧ool an Kraist n̄an ro m̧ōttad ilo mour in. Kōm̧m̧an bwe jen kile bwe kōj kajjojo jej kōm̧m̧ane ijo em̧m̧antata ilo apan̄ ko me rej waļo̧k [tok], im jen kajjieon̄ in kōm̧m̧ane ijo em̧m̧an tata n̄anad jipan̄.”12
Iakwe em̧ool, ilo em̧m̧an eo an, ej kijenmej, jouj, im jubūruwōn. Iakwe em̧ool ej likūt ro m̧oktata, ej ettā, kōjparok, pukot em̧m̧an ilo ro jet, im m̧ōņōņō n̄e armej rej kōm̧m̧an āindein. 13
Āinwōt sister ro (im būratōr ro) ilo Zaion, jenaaj kajjieon̄ “bwe jenaolep jerbal ippān doon … n̄an kōm̧m̧an jabdewōt em̧m̧an im jejjet, n̄an m̧ōņōņō kake im n̄an jeraam̧m̧an ilo etan [Rilo̧mo̧o̧r]”? 14 Jemaron̄ ke, kōn iakwe im eļap kōjatdikdik, pukote im bōk aiboojoj eo ilo ro jet, bōke im kōm̧m̧an em̧m̧anļo̧k? Jemaron̄ ke m̧ōņōņō ilo kōttōbar ko an ro jet ilo ad jerbale wōt em̧m̧anļo̧k eo ad make?
Aaet, jemaron̄ ke bōktok meram in gospel eo n̄an m̧oko im̧ōd, jikuul ko, im jikin jerbal ko eļan̄n̄e jej pukōte im kwaļo̧k men ko rem̧m̧an kōn ro jet im kōtļo̧k bwe en jako nana. Kam̧m̧oolol ko rej kobrak būruwō n̄e ij ļōmņak kōn ukweļo̧k bwe ad Rilo̧mo̧o̧r, Jisōs Kraist, eaar kōm̧m̧an juon iaļ bwe aolep ro ewōr aer jerawiwi ilo ilo laļin en jako!
Ij kwaļo̧k aō kam̧ool bwe ilo ad ļoor waanjon̄ok eo An ewāppen, jemaron̄ bōk menin letok eo an iakwe em̧ool, eo enaaj bōktok n̄an kōj eļap lan̄lōn̄ ilo mour in im kōjeram̧m̧an ko an mour indeeo ippān Jemedwōj Ilan̄. Ilo etan Jisōs Kraist, amen.