O Ewi Jon̄an an Ļap Karōk eo an ad Anij!
Emōj jepooļ kōj kōn eļap im̧we kōn meram im m̧ool me ij baj ļōmņak eļan̄n̄e jej lukkuun m̧ōņōņō kōn ta ko ewōr ippād.
Ewi jon̄an jeraam̧m̧an in ad bwe jemaron̄ bar koba ippān doon ilo kweilo̧k in ipeļaakin laļ in ium̧win kappe im tōl an rikanaan eo ad ejitōn bōro Būreejtōn, Thomas S. Monson, kōm ej iakwe eok im rejtake eok kōn aolepān buruōd!
Ilo tōre in jerbal ko aō āinwōt juon pilot, ekkā aō pedped wōt ioon lukkun jejjōtin im kōjatdikdik wōt kōn kamputōr ko ak elukkun jeja aō jeļā kōn kamputōr eo aō make. Ilo opiij in jerbal eo aō āinwōt juon rijeje eutiej, ewōr aō rijipan̄ im rijeje ro rejouj in jipan̄ n̄a kōn jerbal ko aō.
Aolep men kein raar oktak ilo 1994, ke iaar bōk kūr eo āinwōt juon Riutiej an Kabun̄ in. Kūr in aō eaar obrak kōn elōn̄ iien ko rem̧m̧an n̄an kwaļo̧k naan ak ej barāinwōt kitbuuj jerbal ko rellōn̄ ilo opiij eo an Kabun̄ in—eļapļo̧k jān jon̄an eo ikar ļōmņake.
Iaar bwilōn̄ ke, wāween eo em̧m̧antata bwe in kōtōprak jerbal ko aō ilo opiij eo aō ekar kilen aō kōjerbal kamputōr eo aō make.
Ej kab juon kōttan ilo mour eo aō, iaikuj kar iminene kōn kamputōr eo aō im jino kōjerbale, eo me iaar jakapāāl ilo kilen kōjerbale.1
Kar jinoin, kamputōr eo im n̄a kar āinwōt juon kōm̧m̧an kōjak.
Ritijem̧lo̧k kōn technology ro raar kajieon̄ katakin eō kilen kōjerbal kamputōr. Rej lukkun jutak likū, im maltok ilōn̄ū, im likūt peier ilo keyboard eo im lukkun irjet aer taip.
“Lale?” rej ba ilo aer makade. “En̄ ņe ej wāween am kōm̧m̧ane.”
Iaar jab loe. Ekar juon ekkatak eo epen.
Eaar lukkun juon tōre eo epen ilo aō ekkatak kilen kōjerbal kamputōr eo aō.
Ekar bōk juon tōre eo eaitok, ālijinmen, kijenmej, eļap kōjatdikdik im tōmak, eļap kaeņōm̧m̧an jān kōrā eo pāleō, im bwijin diet cola ko me ijjab maron̄ kwaļo̧k etaier.
Kiiō, 22 iiō tokālik, ikar obrak kōn jerbal in kamputōr. Ewōr aō email atōreej, Twitter akkaun, im Facebook. Ewōr aō smart phone, juon tablet, juon laptop, im juon camera. Im, ilo an jab lukkun ļap im em̧m̧an jeļā e aō kōn technology jān juon ajri eo jiljilimjuon an iiō, n̄an juon eo me jiljilimjuonn̄oul jima an iiō, ebwe aō jeļā kōn technology.
Ak Iaar lo juon men ekōjak. Ilo an ļapļo̧k aō jeļa kōn technology, eļapļo̧k aō kar kajejtokjen.
Ilo bwebwenatoon armej, iaļan bōk meļeļe ej bōk jikin makaj in wōt an horse kaiim̧. Ijjilkinļo̧k enaan im ebbōk uwaak emaron̄ kar bōk raan im jon̄an emaron̄ allōn̄. Rainin enaan ko ad rej etal taujin maeļ ko imejatoto ak taujin mita ko n̄an laļtata iumin lojet n̄an tōpar juon eo ej pād ilo laļ ko jet, im eļan̄n̄e erumuj jejjo wōt jekōn, jellu im jaje kijenmej.
Ilo kalim̧jōkļo̧k ilo mour an armej: ilo ad jeļāļo̧k juon men, aeet emaron̄ juon men eo ekabwilōn̄lōn̄ im ekōketak kōj, jej meļo̧kļo̧k jon̄an em̧m̧an in im likūt āinwōt juon men eo jeminene kake.
Jej ke Kajejtokjen Mool ko an Jetōb?
Ilo ad kajejtokjen technology ko an raan kein im iien ko rem̧m̧an jemaron̄ watōki jet men ko reddik. Ak, buromōj eo, jet iien ejja m̧wil rōt in wōt jej kōm̧m̧an ilo ad kalimjōkļo̧k mour indeeo im katak ko an gospel eo an Jisōs Kraist ko rejipan̄ mour in jetōb ko ad. Ilo Kabun̄ in an Jisōs Kraist, emōj letok n̄an kōj eļap. Emōj jepooļ kōj kōn eļap im̧we kōn meram im m̧ool me ij baj ļōmņak eļan̄n̄e jej lukkuun m̧ōņōņō kōn ta ko ewōr ippād.
Ļōmņak kōn rikaļoor ro etto ro raar etetal im kōnono ippān Rilo̧mo̧o̧r ke ej kwaļo̧k naan ioon laļ in. Ļōmņak mōk kōn kam̧m̧oolol im kautiej ko me eaar obrak buruweer kaki im kar kobrak ļōmņak ko aer ke rej lo an Jerbkakbeje jān lūb eo, ke rej un̄uri kinej ko ilo pe ko Pein im katin. Mour ko aer raar oktak im rejamin bar rool n̄an mokta!
Ļōmņak kōn Rikwojarjar ro etto ilo epepen in ro raar jeļā kajjien Rikanaan Josep Smith im ron̄ an kwaļo̧k kōn jepļaaktok eo an gospel in. Antoone mōk ewi jon̄an en̄jake ko aer ilo aer jeļā ke ran̄ōl eo ikōtaan lan̄ im laļ in emōj an bar jepļaaktok, ilo an waļo̧k m̧ool im jeļāļo̧kjen ioon laļ in jān ijo jikid ilan̄ ilo celestial.
Ak elaptata an aorōk, ļōmņak ewi wāween am en̄jake ilo tōre eo jinointata ke kwoj tōmak im meļeļe ke kwoj lukkuun nejin Anij; bwe Jisōs Kraist eaar mōņōņō in en̄taan kōn jerawiwi ko am bwe kwon maron̄ bar erreo; bwe kajoor eo an priesthood em̧ool im emaron̄ liāpe eok im ro rejitōnbōro ilo mour in im n̄an mour indeeo; bwe ewōr juon rikanaan emour ioon laļ in rainin. Ej ke juon men eo eaiboojoj im kabwilōn̄lōn̄?
Kakobaik aolep men kein, ewi wāween an kar em̧m̧an im jejjōt bwe kōj aolep armej jen kar jab itok limoōd ilo ad pād ilo mōnjar ko ad im kabun̄-jar? Ak mōk in riiti jeje ko rekwojarjar? Ij lōmņak menin enkar bōk jikin eļan̄n̄e buruōd rekar eļļā jān en̄jake n̄an kam̧m̧oolol im kautiej kōn menin letok ko rekwojarjar im reaiboojoj an Anij me emōj an letok n̄an kōj. Epidodo im mōkaj ad ukōt mour ko ad n̄an m̧ool, ak jet iien jejjab lukkun kōmaat ad ilo iaļ in an rūkaļoor. Ekkā ad kōtļo̧k bwe jen elļo̧k n̄an bōd ko an membōr ro ijjeļo̧kin ad ļoor waanjon̄ak eo an Maajta eo ad. Jej mour kōn juon mour eo me eobrak kōn iien ko rem̧m̧an ak ekkā ad likjab n̄an kile men ko raorōk.
Juon enaan eo Jejeļā kake
Ke Iaar juon likao, ro m̧ōtta rekajoor kajjitōkin eō kōn kabun̄ in. Ekkā aō jino ilo aō kōm̧eļeļeik er katak ko jejeņoļo̧k kaki, āinwōt Naan in Mālōtlōt. Iien ko jet Ij bar kwaļo̧k kōn katak ko eierļo̧k wōt juon ippān kabun̄ ko jet. Ejjeļo̧k iaan katak kein rekaitoklimoier.Ak n̄e ij kōnono kōn karōk eo ekamōņōņō an Jemādwōj Ilan̄ n̄an kōj ro Nejin, eitoklimoier kake.
Ij kememej aō kajeon̄ pijaik karōk in lo̧mo̧r ioon boot eo ilo juon classroom ilo chapel eo ilo Frankfurt, Germany. Iaar jin̄aik jet douluul ko me rej bōk jikin mour eo mokta, mour in, im jepļaakļo̧k eo n̄an ippān ro jined im jemād ilan̄ ālkin mour in.
Āinwōt juon jodikdik, eļap an kar em̧m̧an ippa kwaļo̧k kōn enaan in ekaitoktoklimo. N̄e ij kōmeļeļe kōn katak kein ilo naan ko aō make me repidodo, buruō ekar obrak kōn kam̧m̧oolol n̄an juon Anij eo ej iakwe ro Nejin, im ad Rilo̧mo̧o̧r eo eaar pinmuur kōn kōj aolep n̄an anjo̧ jān mej im hell. Eļap an kar utiej buruō kōn enaan in kōn iakwe, lan̄lōn̄, im kōjatdikdik.
Jet iaan ro m̧ōtta rej ba bwe rej en̄jake āinwōt enaan in emōj aer ron̄ kake mokta, men̄e jet iaan men kein rejjan̄in kar katakin er ilo aer rūttotak ilo kabun̄ ko aer. Āinwōt n̄e raar jeļā wōt kōn men kein ke rem̧ool, āinwōt n̄e rej kakememej er kōn ta ko raar lukkun jeļā kaki moktaļo̧k.
Kabun̄ in Ewōr An Uwaak!
Ij tōmak aolep armej ewōr ippāier jet kain kajjitōk ko reaorōk ikkijen mour in. Ij itok jān ia? Etke ij pād ijin? Ta eo enaaj waļo̧k ālkin mour in?
Kajjitōk kein emōj an armej kajjitōk kaki jān jinoin. Rimālōtlōt ro, riettale ro, ritijem̧ļo̧k ro raar joļo̧k eļap iien ilo mour ko aer im kappukōte uwaak ko.
Eļap aō kam̧m̧oolol bwe gospel eo an Jisōs Kraist me emōj an jepļaaktok epād uwaak ko n̄an kajjitōk ko reppen ilo mour in. Uwaak kein rej katakin kaki ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Relukkun em̧m̧an im mālij, im pidodo aer meļeļe. Rej n̄an im̧we, im jej katakin ajri ro me jilu aer iiō ilo class eo an Sunbeam.
Ro jeiū im jatū, jej armej in indeeo, eo ejjeļo̧k jinoin ak jem̧ļo̧kin. Jekar baj ejaak wōt jān etto.1 Kōj jej lukkun jetōb ro Nejin Jined im Jemād Ilan̄ ro rekwojarjar, rejjab wabanban, im rekajoor pōtata!
Jej itok jān jikin eo ilan̄ jikin Irooj ad Anij. Jej itok jān m̧weo eutiej mōn Elohim, Anij Eutiejtata. Jaar etetal ippān ilo mour eo mokta. Jaar ron̄ ainikien, kar kam̧ool kōn An kajoor, kar ekkatak kōn iaļ ko An.
Kwe im N̄a jaar bōk koņaad ilo Mour eo Mokta ijo Jemādwōj Ilan̄ eaar kwaļo̧k karōk eo An n̄an kōj—bwe jen itok n̄an laļ in, bōk ānbwin, ekkatak n̄an kālet ikōtaan em̧m̧an im nana, im eddōkļo̧k ilo wāween eo me jej kōtmāne.
Ke jaar ellā jān ran̄ōl eo im delan̄e tok mour in, jaar jeļā ke jejamin kememej mour eo mokta. Ewōr jum̧ae ilo men otemjej im jorrāān im kapo. Ak jaar barāinwōt jeļā ke bōk ānbwin eaar lukkun ļap an aorōk n̄an kōj. O, ewi ad kōjatdikdik ke enaaj mōkaj ad ekkatak n̄an kōm̧m̧ani kālet ko rem̧m̧an, ellā jān kapo ko an Setan, im āliktata jepļaak n̄an ippān Jemād im Jined ro rejitōnbōro ilo lan̄.
Jaar jeļā bwe jen kar kōm̧m̧an bōd—bolen bōd ko reļļap. Ak jaar barāinwōt jeļā ke ad Rilo̧mo̧o̧r, Jisōs Kraist, eaar kalim̧ur bwe en kar itok n̄an laļ in, mour wānōk, im ajeļo̧k mour eo an āinwōt juon katok n̄an indeeo. Jaar jeļā ke eļan̄n̄e jej leļo̧k buruōd n̄an E, lōke E, im kajieon̄ kōn aolep kajoor in buruōd n̄an etetal ilo iaļ in an rūkaļoor, jen kar erreo im bar juon alen delan̄e ļo̧k ijo jikin Jemādwōj Ilan̄.
Kōn menin, kōn tōmak ilo Pinmuur eo an Jisōs Kraist, kwe im n̄a jaar errā kōn karōk eo an Jemādwōj Ilan̄ itok jān anemkwoj in kālet.
En̄in ej unin ad pād ijin ilo juon laļ eo aiboojoj—kōnke Anij eaar letok n̄an kōj ad iien, im jaar kālet n̄an errā kake. Mour in, ijoke, ej jidik wōt iien im enaaj jem̧lo̧k n̄e mej ilo kanniōk ej bōk jikin. Ak jetōb in kwe im n̄a rejamin kakkure. Jetōb ko ad renaaj wōnm̧aanļo̧k im mour im kōttar iien Jerkakbeje eo—juon menin letok n̄an kōj aolep jān Jemādwōj Ilan̄ eo eļap an iakwe kōj im eo Nejin, Jisōs Kraist.2 Ilo Jerkakbeje eo, jetōb ko ad im ānbwinid renaaj bar koba ippān doon, ilo an ejjeļo̧k metak im likjab ko ad ilo mour in kanniōk.
Ālkin Jerkakpeje eo, enaaj wōr juon Raan in Ekajet. Aolep renaaj āliktata bōk lo̧mo̧o̧r im jolet e aiboojoj in aelōn̄ in kiin̄ eo, ro me rej lōke Anij im pukōt n̄an lo̧o̧r kien ko An im kain̄i ko renaaj jolet e mour in im mour indeeo me jejjab maron̄ kōmeļeļeiki an aiboojoj im obrak kōn en̄jake kōn an kajoor.
Raan in Ekajet eo enaaj juon raan in tūriamo̧ im iakwe—juon raan in un̄ur bōro ko rerub, n̄e dān in kōmjalaal kōn buromōj rej oktak im erom dān in kōmjalaal kōn kam̧m̧oolol n̄e aolep men renaaj emman.3
Aaet, enaaj ļap buromōj kōn bōd ko ad. Aaet, jenaaj ajļo̧k im bwilōn̄ kōn bōd ko ad make, ad jajeļo̧kjeņ, ad ineļap ekōm̧m̧an bwe jen likjab ilo iien ko rem̧m̧an n̄an em̧m̧anļo̧k eo an jeklaj.
Ak ewōr aō lōke ke jeban mōņōņō wōt kōn ekajet eo an Anij; jenaaj bwilōn̄ im obrak kōn jouj, tūriamo̧, im iakwe eo ejjeļo̧k jem̧ļo̧kin n̄an kōj, ro Nejin. Eļan̄n̄e ad ikdeelel im jerbal rem̧m̧an, eļan̄n̄e ewōr ad tōmak ilo Anij eo emour, innem jemaron̄ reim̧aanļo̧k n̄an ta eo Moronai eaar ņae etan “jikin ekajet ejouj an Jeova Eļap.”4
Pro Tanto Quid Retribuamus
Ro jeiū im jatū jitōbōro, ro mōtta, ekobrak ke buruōd im ad lōmņāk kōn bwilōn̄ im kautiej n̄an ļōmņak kōn karōk eo ekamōņōņō im eļap an Jemādwōj Ilan̄ me emōj an kōpooj e n̄an kōj? Kom obrak ke kōn lan̄lōn̄ eo koban kōmeļeļeiki n̄an jeļā aiboojoj in raan ko im̧aan me emōj an bojak n̄an ro rej kōttar Irooj?
Eļan̄n̄e kojan̄in kar en̄jake aiboojoj in im lan̄lōn̄, Ij karuwainene kom n̄an kappukōte, ekkatak, im lukkun ļōmņak kōn m̧ool kein remālij im relukkun aorōk ilo jepļaaktok eo an gospel. “Im kejakļo̧kjeņ ko rem̧wilaļ an indeeo ren pād ilo ļōmņak ko ami.”5 Kōtļo̧k bwe ren kwaļo̧k aer naan in kam̧ool n̄an kom kōn karōk in lo̧mo̧o̧r eo ekwojarjar.
Eļan̄n̄e kwon kar en̄jake men kein mokta, Ij kajjitōkin kom rainin, “kom̧ maron̄ ke en̄jake kiiō?”6
Ejjab to eaar wōr aō iien em̧m̧an n̄an etal n̄an Belfast, Tueon̄ in Ireland. Iaar kile ke Kōkaļļe eo an Belfast, ekitbuuj mato in “Pro tanto quid retribuamus,” ak “Ta eo inaaj leļo̧k n̄an Anij kōn men ko otemjej Ear letok n̄an eō?”7
Ij karuwaineneik kōj kajjojo n̄an ļōmņak kōn kajjitōk in. Ta eo jenaaj ukōtļo̧k kake kōn an letok jeļāļo̧kjeņ in kōn meram im m̧ool eo me Anij eaar lutōkleplep iood?
Jemādwōj Ilan̄ ej kajjitōkin kōj bwe jen mour kōn m̧ool ko emōj ad jeļā kake, bwe jen ļoor iaļ eo emōj an kōpooj n̄an kōj. Kōn menin, jen peran im lōke ilo tōl eo an Jetōb eo. Ilo naan im ilo jerbal ko ad jen kwaļo̧k n̄an ro m̧ōttad ennaan in ekabwilōn̄lōn̄ an karōk eo ekam̧ōņōņō an Anij. Tōmak bwe ad kōm̧m̧an en kōn iakwe eo ad n̄an Anij im n̄an ajri ro Nejin, bwe er rej ļaddik im leddik ro jeid im jatid. En̄in ej jinoin ta eo me jemaron̄ kōm̧m̧ane n̄an ukōtļo̧k kōn eļapļo̧k.
Juon raan “bukwie otemjej naaj bukwelōlō, im aolep lo naaj kwaļo̧k bōro” bwe wāween ko an Anij rejim̧we im An karōk rejjejet.8 N̄an kwe im n̄a, jen kōm̧m̧an bwe raan eo en āinwōt rainin. Jen kwaļo̧k, ippān Jekab eo eto, “O ewi jon̄an an ļap karōk eo an ad Anij!”9
Kōn menin Ij kam̧ool kōn kam̧m̧olool n̄an Jemādwōj Ilan̄, ij likūt aō kōjeram̧m̧an, ilo etan Jisōs Kraist, amen.