Bwe En Maron̄ Kajoor Barāinwōt
Ij jar bwe jenaaj kakūrm̧ool kūr eo ad n̄an ļōn̄aj ro jet n̄an kōpooj er n̄an jerbal eo aer aorōk.
Ij en̄jake jeram̧m̧an n̄an pād ilo kweilo̧k in ippān ro me rej kabwijer priesthood eo an Anij. Kijejeto eo, tōmak eo, im jerbal in jipan̄ eo ejjab ļōmņak kōn e make kōm̧m̧an jān em̧m̧aan im ļaddik rein rej menin bwilōn̄ an tōre in. Ij kōnono joten in n̄an rikabwijer ro an priesthood, rūtto im dik, ajel ilo jab kōm̧tālik ilo jerbal eo an Irooj Jisōs Kraist.
Irooj ej letok An kajoor n̄an ro ilo aolep opiij ko an priesthood eo me rej jerbali eddo ko an priesthood eo aer.
Wilford Woodruff, āinwōt juon Būreejtōn an Kabun̄ in, kar kōmeļeļeik en̄jake eo an ilo opiij ko an priesthood eo:
“Iaar ron̄ kwaļo̧k eo m̧oktata ijjan̄in kar ron̄ ilo Kabun̄ in. Raan eo tok juon, iaar peptaij … Iaar ekkapit n̄an Rūkaki. Mijen eo aō eaar kajju ijjino. … Iaar dibuk aolepān mijen eo āinwōt juon Rūkaki. .… Ilo kweilo̧k eo iaar ekkapit juon Pris. … Ālkin iaar ekkapit juon Pris kar jilkinļo̧k eō … ilo juon mijen n̄an bukōn ko iturōk in Amedka. Eaar ilo fall in 1834 eo. Ewōr juon m̧ōtta ippā, im kōm kar jino ilo an ejjeļo̧k iieb im bok. Iaar etal make iaaō ium̧in elōn̄ m̧aiļ ko im kwaļo̧k Gospel eo, im iaar peptaiji elōn̄ armej ro me iaar jab maron̄ kapen er ilo Kabun̄ in, kōnke iaar Pris wōt. … Iaar ito itak jet iien kwaļo̧k Gospel eo m̧okta jān aō kar ekkapit juon Elder. …
“[Kiiō] Em̧ōj de an wōr aō lemn̄oul-emen jim̧a iiō ko juon uwaan Jon̄oulruo Rijilōk ro. Em̧ōj aō itok itak ippān im ro jet uwaan doulul ko kiiō ium̧win jijnon̄oul iiō ko, im ikōņaan ba n̄an jarlepju in bwe iaar rejtak ejja ilo wāween in wōt kōn kajoor an Anij ilo kabwijer opiij eo an Rūkaki, im eļap tata ilo aō jerbal ilo kabun̄ eo āinwōt juon Pris, āinwōt ke iaar juon Rijilōk. Ejjeļo̧k oktak ilo menin toon wōt ad kōm̧m̧ane eddo eo ad.”1
Maron̄ eo ilo jetōb eaiboojoj an ejjeļok oktak kar kwaļo̧k ilo kōmeļeļe eo an Irooj kōn Aaronic Priestthood āinwōt juon “ekkejel” an Melkisedek Priesthood eo.2 Naan eo ekkejel ej meļeļe in ko ruo rej koba. Koba in ej aorōk n̄an an priesthood eo erom kajoor im kōjeram̧m̧an eo emaron̄, ilo laļ in im indeeo, bwe ej “ejjeļo̧k jinoin raan ko im jem̧ļo̧kin iiō ko an.”3
Koba in ej juon eo eļam waan. Aaronic Priesthood eo ej kōpooj likao ro n̄an em̧ool juon lōke eļapļo̧k an ekwojarjar.
“Kajoor eo im maron̄ eo an eo eutiejļo̧k, ak Melkizedek Priesthood eo, ej n̄an kabwijer ki ko an aolep kōjeram̧m̧an ko an jetōb ilo kabun̄ in—
“N̄an an wōr ippān utiej in n̄an bōki mennin ittino ko an aelōn̄ in lan̄, n̄an an wōr maron̄ in kōpeļļo̧k lan̄ ko n̄an er, n̄an em̧m̧ao ippān jarlepju ko im kabun̄ eo an M̧aanje eo, im n̄an ioon jem̧doon eo im baaktok eo an Anij Jemān, im Jisōs rijojomar eo an bujen eo ekāāl.”4
Priesthood ki kein rej kōjerbali ilo dipio jān juon wōt em̧m̧aan ilo juon iien, Būreejtōn eo im pris eo eutiej ej tōl an Kabun̄ eo an Irooj. Innām, kōn kappe an Būreejtōn eo, aolep em̧m̧aan me rej kabwijer Melkizedek Priesthood eo maron̄ leļo̧k mālim eo im jim̧we eo ilo kōnono im jerbal ilo etan eo Ekajoor Bōtata. Ejjeļo̧k jem̧ļo̧k in n̄an kajoor jab in. Ej ļon̄tak kōn mour im mej, kōn baam̧le im Kabun̄ in, kōn paotok eo eļap an Anij Make im jerbal indeeo eo An.
Irooj ej kōpooj rikabwijer an Aaronic Priesthood eo n̄an erom juon elder jerbal kōn tōmak, kajoor, im kam̧m̧oolol ilo Melkizedek Priesthood eo eaiboojoj.
N̄an elder ro, m̧wilal in kam̧m̧oolol in enaaj menin aorōk n̄an kakūrm̧ool eddo eo am̧ ilo jerbal an priesthood edipio. Kwonaaj kememej raan ko am̧ āinwōt juon tikōn, rūkaki, ak pris n̄e ro rej kabwijer priesthood eo eutiej rej oktak lik n̄an kotak im kōketak eok ilo em̧m̧akūt in priesthood eo am̧.
Aolep rikabwijer Melkizedek Priesthood eo ewōr aer kain ememļo̧kjeņ kein, bōtaab lo̧ļe an kam̧m̧olol emaron̄ in kar dikļo̧k ilo an iien eļļāļo̧k. Aō kōjatdikdik ej n̄an bar kōkāāl en̄jake eo im ippān ļo̧k juon kije n̄an wujlepļo̧k ijo komaron̄ ejja kain jipan̄ eo kwar bōke juon kar iien.
Ij kememej juon bisop eo ekar kōm̧m̧an n̄an n̄a āinwōt eļan̄n̄e em̧ōj aō kar erom ta kōjatdikdik eo aō ilo kajoor an priesthood eo. Eaar kūr ļo̧k eō juon Jabōt ke iaar juon pris. Ekar ba eaar aikuji eō n̄an juon m̧ōttan n̄an loļo̧k jet ro uwaan an ward eo am. Ekar kōm̧m̧āne āinwōt eļan̄n̄e kar n̄a wōt an kōjatdikdik im ewejepedik. Eaar jab aikuji eō. Ekar wōr an rikakpilōklōk ro rem̧m̧an ilo bisoprik eo an.
Kōmro kar loļo̧k juon kōrā eo emej ļeo pāleen ejjab ļap an jāān ak kijen m̧ōn̄ā. Ekar kōņaan bwe in jipan̄ e kareel buruōn, idajon̄jon̄e liin n̄an kōm̧m̧an im kōjerbal juon bajet, im kallim̧uri liin bwe emaron̄ walōn̄tak n̄an juon jekjek me eban lale wōt e make ak barāinwōt jipan̄ ro jet.
Tok ālik kōm kar ilo̧k im kaenōm̧m̧an ruo leddik jiddik ilo juon jekjek epen. Ke kōm kar ilo̧k jān m̧weo im̧wer, bisop eo eaar unoojdikdik n̄an eō, “Ajri rein rejjamin meļo̧kļo̧k ke jekar itok n̄an ippāer.”
Ilo m̧weo tok juon, iaar lo ekōjkan aō karuwaineneik juon em̧m̧aan eo ejeniknik n̄an bar jepļaktok n̄an Irooj kōn kareel e bwe ro uwaan ward eo raar aikuji.
Bisop in eaar juon rikabwijer Melkizedek Priesthood eo im eaar jipan̄ eō kōpeļļo̧k kōļmenļo̧kjeņ eo aō im kar im̧we eō kōn waanjon̄ak. Ekar katakin eō n̄an bōk kajoor eo im peran eo n̄an ilo̧k jabdewōt jikin ilo jerbal in an Irooj. Em̧ōj an mo̧o̧tļo̧k im bōk jinekjej eo an, ak ij kememej wōt e kōnke ekar oktak tok n̄an ļōn̄aj lōn̄ tak eō ke iaar juon rikabwijer Aaronic Priesthood eo ejjab ļap jeļā ippān. Ikar jeļā tok ālik ke ekar lo eō ioon iaļ eo an priesthood kōn eddo ko reļļap tok ālik eo aō, jān aō kar maron̄ loe.
Jema ekar kōm̧m̧ane ejja menin wōt n̄an eō. Ekar juon eo etijem̧ļo̧k im rikabwijer Melkizedek Priesthood eo emeletlet. Kar kajjitōk ippān juon iien jān juon Rijilōk n̄an je jidik ennaan ekadu kōn kein kam̧ool an scientist kōn ewi jon̄an rūtto̧o̧n laļ in. Ekar lukkun kōkm̧anm̧an ilo an kar je, jeļā bwe jet remaron̄ in riiti im wōr aer en̄jake ke laļ in ekanooj dik ļo̧k jān an kein kam̧ool ko an scientist raņ rekar kwaļo̧k.
Ij kememej wōt an jema letok n̄an eō ta eo ekar je im ba n̄an eō, “Hal, ewōr ippam̧ meletlet ilo jetōb n̄an jeļā eļan̄n̄e ij aikuj jilkinļo̧k menin n̄an rijilōk ro im rikanaan ro.” Ijjab maron̄ kememej eļap kōn ta eo peba eo ekar ba, ak inaaj bōk ippa n̄an indeeo kam̧m̧oolol eo iaar en̄jake kōn juon rikabwijer Melkizedek Priesthood eo me ekar lo ilo n̄a meletlet in jetōb eo me iaar jab maron̄ loe.
Juon bon̄, jet iiō remo̧o̧tļo̧k, ālkin aō kar ekkapit āinwōt juon Rijilōk, rikanaan eo an Anij ekar kūr eō im kajjitōk ippa n̄an riiti juon men me kar jeje kōn katak an Kabun̄ in. Ekar joļo̧k bōn̄ōn eo n̄an riiti jepta ko an juon bok. Eaar ba ilo an ettōn̄, “Ijjab maron̄ riiti aolepān menin. Kwojjab aikuj in kakkije ilo aō jerbal.” Innām ekar kōjerbali enan̄in ejja naan ko wōt an jema iiō ko im̧aan: “Hal, kwe eo kwoj aikuj riiti menin. Kwonaaj jeļā eļan̄n̄e em̧m̧an n̄an an waļo̧k.”
Ejja jon̄ak eo wōt an juon rikabwijer Melkizedek Priesthood eo kōpeļļo̧k kōļmenļo̧kjen ko im letok lōke kar itok juon bon̄ ilo juon jipiij kar kōm̧m̧ane jān Kabun̄ in. Ke iaar 17 aō iiō, kar kajjitōk ippa n̄an kōnono n̄an kar juon jarlepju eļap. Ejjeļo̧k aō kar jeļā ta eo kar kōtmene jān n̄a. Kar jab letok juon unin kōnono, im kōn menin iaar kōpooj juon kōnono me eaar ļap jān ta eo iaar jeļā kōn gospel eo. Ke iaar kōnono, iaar kile ke ikar kōm̧m̧an bōd. Ij kememej wōt bwe ālkin aō kar kōnono, eaar wōr juo n aō en̄jake eo kōn aō kar likjab.
Rikōnono eo tok juon im āliktata ekar Elder Matthew Cowley jān Doulul eo an Jon̄oulruo Rijilōk ro. Ekar juon rikōnono eo em̧m̧an—jitōnbōro ilo aolepān Kabun̄ in. Ij kememej wōt aō reilōn̄ļo̧k n̄an e jān jea eo turin jikin kōnono eo.
Ekar ijjino ilo juon ainikien ekajoor. Eaar ba bwe jipiij eo aō ekar kōm̧m̧an bwe en en̄jake bwe ekar pād ilo juon kweilo̧k em̧m̧an. Ekar ettōn̄ dikdik ke eaar ba. En̄jake in likjab ko aō raar jako im kar itok kōn lōke bwe in kar maron̄ lo juon raan erom ta eo ekar ļōmņak epād ippa kadede.
Ememļo̧kjeņ eo an bon̄ōn eo eaar tōl wōt eō n̄an kanooj ron̄jake n̄e juon rikabwier Aaronic Priethood eo ej kōnono. Kōnke kōn ta eo Elder Cowley eaar kōm̧m̧ane n̄an eō, ij kōtmene iien otemjej bwe inaj ron̄jake naan ko an Anij. Ejemakijkij aō inepata im emakijkij aō bwilōn̄, im ikar jab maron̄ dāpiji ak ettōn̄ dikdik āinwōt kar Elder Cowley.
Elōn̄ men ko remaron̄ jipan̄ kōkajoorļo̧k ļaddik ro jatid ilo ad jipan̄ ilo priesthood eo, ak ejjeļo̧k men enaaj ļapļo̧k an kajoo ļo̧k jān jipan̄ er kōļapļo̧k tōmak eo im lōke eo me remaron̄ pedped ioon kajoor an Anij ilo jerbal in priesthood eo aer.
Tōmak im lōke in reban pād wōt ippāer jān juon wōt en̄jake in kaketak jān em̧ool rikabwijer Melkizedek Priesthood eo emeletlet. Maron̄ eo n̄an pedped ioon kajoor ko raikuj ejaak jān elōn̄ kwaļo̧k lōke ko an ro me eļap aer tijem̧ļo̧k ilo priesthood eo.
Rikabwijer ro an Aaronic Priesthood eo renaaj barāinwōt aikuj raan otemjej im em̧ool awa ko n̄an kōperan im kajim̧m̧we eo jān Irooj jān Jetōb Kwojarjar eo. Bwe enaaj pād n̄an er ilo aer kālet n̄an pād wōt ilo erreo n̄an menin. Enaaj pedped ioon kālet ko renaaj kōm̧m̧ani.
En̄in ej unin ad aikuj katakin kōn waanjon̄ak im kōn naan in kam̧ool bwe naan ko an Melkizedek Priesthood ritōl eo Kiin̄ Benjamin rem̧ool.5 Rej naan in iakwe ilo etan Irooj eo ej an priesthood in. Kiin̄ Benjamin ej katakin kōn ta ko remenin aikuj n̄an kōj n̄an ad pād wōt ilo erreo n̄an bōk kōketak im kajim̧we eo an Irooj:
“Im āliktata, ij jab maron̄ ba n̄an kom̧ aolep men ko kom̧ maron̄ jero̧wiwi ie; bwe ewōr iaļ ko im wāween ko, em̧ool āindein elōn̄ bwe ij jab maron̄ bwini.
“A jon̄an in imaron̄ ba n̄an kom̧, bwe eļan̄n̄e kom̧ij jab lale kom̧ make, im ļōmņak ko ami, im naan ko ami, im kōm̧m̧an ko ami, im pokake kein ko an Anij, im wōnm̧aanļo̧k ilo tōmak kōn ta kom̧ ar ron̄ kōn itok eo an Irooj, em̧ool n̄an jem̧ļo̧kin mour ko ami, kom̧ aikuj mej. Im kiiō, O armej, keememej, im jab mej.”6
Jej aolep ekkōl kōn m̧ade kijeek ko an rikejdāt eo an jim̧we kōn an itok āinwōt juon kōto nana ņae rikabwijer priesthood ro reddik ro eļap ad iakwe er. N̄an kōj, rej āinwōt ritariņae ro rem̧m̧an ded, ro kar ņa etaer make ļōm̧aro nejin Hilamōn. Remaron̄ mour, āinwōt ritariņae ro reddik rekar, eļan̄n̄e rej kōjparok er make ilo ineem̧m̧an, āinwōt an Kiin̄ Benjamin kapilōk er n̄an kōm̧m̧an.
Ļōma ro nejin Hilamōn raar jab pere. Raar peran ilo ire im anjo̧ kōnke raar tōmak naan ko an ro jinier.7 Jej meļeļe kajoor eo an tōmak an juon jinen eo ej iakwe. Ro jined rej letok rejtak jab in eļap n̄an ro nejier rainin. Kōj rikabwijer ro an priesthood eo maron̄ im aikuj kobaik rejtak jab in kōn kijejeto eo ad n̄an kakūrm̧ool eddo eo bwe āinwōt ad mool in oktak, jej aikuj leļo̧k peid n̄an kōkajoor ļo̧k ro jeid im jatid.8
Ej aō jar bwe aolep rikabwijer Melkizedek Priesthood eo renaaj bōk iien eo em̧m̧an kar letok jān Irooj:
“Im eļan̄n̄e jabdewōt armej ilubwiljimi ekajoor ilo Jetōb eo, kōtļo̧k bwe en bōk ippān e eo em̧ōjņo̧, bwe en maron̄ kōketake ilo aolep ettā, bwe en maron̄ kajoor barāinwōt.
“Kōn menin, bōk ippāmi ro im em̧ōj kapti er n̄an priesthood eo edikļo̧k, im jilkinļo̧k er im̧aami n̄an kom̧m̧an iien iioon doon ko, im n̄an kōpooje iaļ eo, im n̄an etal n̄an iien iioon doon ko kom̧ make kom̧ij jab maron̄ etal n̄an i.
“Lo, en̄in ej wāween eo rijjilōk ro Aō, ilo raan ko etto, rekar kalōkļo̧k kabun̄ eo Aō n̄an Eō.”9
Kom̧ ritōl ro an priesthood im ro jemen rikabwijer ro an Aaronic Priesthood eo remaron̄ jerbali kabwilōn̄lōn̄ ko. Kom̧ maron̄ jipan̄ Irooj deļo̧n̄ ilubwiljin elder ro retiljek ippān likao ro me rej bōk kūr eo n̄an kwaļo̧k gospel eo im n̄an kōm̧m̧ane ilo lōke. Kom̧ naaj lo elōn̄ ro kom̧ kar ļōn̄aj lōn̄ tak im kōketak er n̄an tiljek wōt, m̧are erreo ilo tampeļ eo, im ilo ukōtļo̧k, kōkajoor im kōpooj ro jet.
Ejjamin bōk m̧akūtkūt in būrookraam̧ ko rekāāl, Em̧m̧anļo̧k in kein katakin ko, ak social media ko rem̧m̧anļo̧k. Ejjamin naaj aikuj jabdewōt kūr eļapļo̧k jān ta eo ewōr ippam̧ kiiō. Kallim̧ur im bujen ko an priesthood eo ej lewaj kajoor, maron̄, im tōl. Ij jar bwe kom̧ naaj ro̧o̧l n̄an m̧weo im lukkuun ekkatak kallim̧ur im bujen ko an priesthood eo, loi ilo Katak im Bujen ko jākjōn 84.
Kōj wōj aolep jej kōjatdikdik bwe elōn̄ļo̧k likao ro renaaj en̄jake āinwōt Wilford Woodruff ekar, eo āinwōt juon rikabwijer an Aaronic Priesthood eo kar katakin gospel eo an Jisōs Kraist kōn kajoor in ukōt.
Ij jar bwe jenaaj kakūrm̧ool kūr eo ad n̄an ļōn̄aj ro jet n̄an kōpooj er n̄an jerbal eo aer aorōk. Ij kam̧m̧oolol jān aolepān būruwō kōn armej ro rem̧m̧an me raar kotak eō im kwaļo̧k n̄an eō ekōjkan iakwe im kotak ro jet.
Ij kam̧ool bwe Būreejtōn Thomas S. Monson ej kabwijer aolep kii ko an priesthood eo ioon laļ in ilo tōre in. Ij kwaļo̧k aō kam̧ool bwe e, ilo aolepān mour in jerbal eo an, eaar juon waanjon̄ak n̄an kōj aolep kōn pukōt ļo̧k n̄an kotak ro jet āinwōt juon rikabwijer an Melkizedek Priesthood eo. N̄a make ij kam̧m̧oolol kōn wāween eo eaar kotak eō im kwaļo̧k n̄an eō ekōjkan kotak ro jet.
Anij Jemen emour. Jisōs ej Kraist eo. En̄in ej Kabun̄ eo An im aelōn̄ in kiin̄ eo. En̄in ej priesthood eo An. N̄a make ijeļā menin kōn kajoor eo an Jetōb Kwojarjar. Ilo etan Irooj Jisōs Kraist, amen.