Ejjeļo̧k Mōņōņō Eļapļo̧k Jān Ad Jeļā Ke Rejeļā
Ijjab jeļā eļan̄n̄e jabdewōt men ioon laļ in emaron̄ boktok eļap kam̧ōņōņo̧ im lan̄lōn̄ jān ad jeā ke bwe ajri ro nejid rejeļā kajjien Rilo̧mo̧o̧r.
Ro jeiū im jatū, ejjab too ij kab kōļmenļo̧kjeņ kōn kajjitōk in: “Eļan̄n̄e aolep men ko ajri ro nejūm̧ rejelā kōn gospel in rej itok jān katak ko am—āinwōt aer kein jipan̄—ewi nej jon̄an aer jeļā?” Kajjitōk in ej jerbal n̄an aolep ro rej iakwe, katakin, im ļōme ro nejier.
Ewōr ke menin letok eo em̧m̧antata im jemaron̄ leļo̧k n̄an ro nejid jān juon ememļo̧kjeņ eo im enaaj un̄ur būruweer n̄an aer jeļā bwe jejeļā bwe ad Rilo̧mo̧o̧r ej mour? Rejeļā ke jejjeļā? Im men eo eļapļo̧k an aorōk, emōj ke aer jeļā ippāer make ke Ej mour?
Ke ikar juon ļaddik wōt, ikar juon ajri eo im elukkun pen an kar m̧am̧a karūttoikļo̧k. Iaar lukkuun emourur. Jinō ekar jiron̄ eō bwe men eo ekar kamijake ej bwe iban kar ped im lo iien kein im irūtto̧. Illukkun kar n̄ak tōt.
Ij keememej ke ikar juon ļaddik jidikdik ikar jijet ilo juon kweilo̧k in kwojkwoj ippān baam̧le eo aō. M̧am̧a ej kab baj bōk jet bok ko rekwojarjar. Bok kein emōj kobaik ippān doon im emōj kallikare ilo juon bok em̧ōj je im ilo io̧ļapļapin ewōr peba ļōļainiin n̄an jikin jeje.
Lukwo̧ļpen wōt kweilo̧k eo, ikar kajjitōk eļan̄n̄e imaron̄ jibwi bok in jeje ko rekwojarjar an. Kōn kōjatdikdik im bwe in tōt wōt, ekar litok n̄an eō. Ilo aō kar riiti bok ko an, ikar lo ke ekar wōr juon an peba em̧ōj an jeiki im likūti kōttōbar eo an ilo jikin jeje eo. N̄an bōktok m̧eļeļe kōn kōttōbar ko an, Ij aikuj ba n̄an kom̧ bwe n̄a eo kein karuo̧ ilubwiljin jilijino̧ ajri im eta in Brett. Jinō ekar jeiki, kalikkar kōn būrōrō, juon an kōttōbar: “Kijenmej ippān Brett!”
N̄an eļapļo̧k kam̧ool n̄an jipan̄ kom̧ meļeļe kōn ta eo jinō im jema rekar ioone ilo aer kar karūttoikļo̧k kōm, in ba n̄an kom̧ kōn an baam̧le eo aō riiti jeje ko rekwojarjar. Kajjojo jibbon̄, jinō enaaj riit tok jān Bok in Mormon ilo iien am̧ m̧ōn̄ā in jibbon̄. Ilo iien in, ļeo jeiū, Dave, im n̄a kom̧ro nej jijōt im ron̄jake im jab kauteej tok ālik. N̄an aō kwaļo̧k m̧ool, kom̧ro eaar jab ron̄jake. Komro kar riiti jeje ko idepin bo̧o̧k in jiriel ko.
Āliktata, juon jibbon̄, ikar jeke ilo buruō ke inaaj jelm̧ae jinō. Ikar ba, “Etke kwojaam̧ kōm̧m̧ane āindein n̄an kōm? Etke kwojaam̧ riiti Bok in Mormon aolep jibbon̄? Ikar kiiō kwaļo̧k jet naan ko im ikar jo̧o̧k in kwaļo̧ki. Ilo m̧ool, ijjab tōmak ikar kajju ba. Ikar ba n̄ane, “Mam̧a, ijjab ron̄jake!”
Uwaak eo an em̧m̧an im kōn iakwe ekar juon iien eo eaorōk ilo mour e aō. Ekar ba, “Nejū, ikar pād ilo juon kweilo̧k eo im Būreejtōn Marion G. Romney ekar kwaļo̧k kōn kōjeram̧m̧an ko itok jān riiti jeje ko rekwojarjar. Ilo kar iien kweilo̧k in, ikar bōk juon kallim̧ur bwe eļan̄n̄e inaaj riiti Bok in Mormon n̄an ajri ro nejū aolep raan, iban luuji er.” Innām ekar reito̧k n̄an meja im, kōn juon bōklōkōt ekajoor, ekar ba “Iban luuji eok!”
Naan ko an rekar kalel eō. Kar jab kōjoole eō kōn aō bōd, ekar lukkuun wōr tokjen kōjparok eō! Ekar katakin eō juon m̧ool eo ejjeļo̧k jem̧ļo̧kin ke ij juon ļaddik eo nejin Jemedwōj Ilan̄. Ikar katak bwe jekdo̧o̧n ta ej itok im̧aan, ak eļap an wōr tokja. Ekar juon iien eo eļap an jejjet n̄an juon ļaddik eo im ekar jab wānōk.
Eban jem̧ļo̧k aō kam̧m̧oolol kōn enjeļ eo jinō im kōn aolep enjeļ ro me rej iakwe ajri ro nejier eļap, jab kejool er kōn aer bōd. Ellukuun ļap aō tōmak bwe aolep sister ro—Inaaj kūr er “enjeļ ro” —kōrā ro jinen Zaion, jekdo̧o̧n n̄e emōj am m̧are ak jab m̧are ak emōj an wōr nejum̧ ilo mour in.
Jet iiō remootļo̧k Būreejtōnji eo Kein Kajuon ekar kwaļo̧k: “Eddo̧ ko an m̧am̧a repaakļo̧k kwojarjar. Ej men eo eutiej, jerbal eo ekwojarjar n̄an an armej kōtmānne. Ej likūt eo ej kautiej e kūr in im jerbal in ekwojarjar epaakeļo̧k enjeļ ran.”1
Elap aō kam̧m̧oolol kōn enjel ro ilo aolepān Kabun̄ in ro reperan im kōn iakwe rej kwaļok mo̧o̧l ko ejjeļok jem̧ļokin n̄an ajri ro nejin Jemedwōj ilan̄.
Eļap aō kam̧m̧oolol kōn menin letok eo kōn Bok in Mormon. Ijeļā bwe em̧ool! Epād ie tarlep in gospel eo an Jisōs Kraist. Ijjab jeļā wōn ro rej tiljek ilo aer riiti Bok in Mormon kajojo raan kōn ikdelel im kōn tōmak ilo Kraist ro emōj aer luuji naan in kam̧ool ko aer im raar wōtļo̧k. Kannaan eo an Moronai ekoba kallim̧ur eo bwe kii eo n̄an jeļā m̧ool ko an aolep men otemjeļo̧k—ekoba maron̄ eo n̄an jeļā oktak ko im anjo̧ jān m̧oņ ko an eo enana. (Lale Moronai 10:4–5.)
Ij barāinwōt kam̧m̧oolol kōn Jemedwōj Ilan̄ eo ej iakwe kōj im kōn nejin, Jisōs Kraist. Rilo̧mo̧o̧r eo ej bōktok waanjon̄ak ko rem̧m̧an n̄an kilen mour ilo juon mour ejjab wānōk im kalijōkļo̧k. Jej yokwe bwe Ear yokwe kōj m̧okta.” (1 Jon 4:19). An iakwe n̄an kōj ejjeļo̧k jon̄an. E ej juon m̧ōttad eo em̧ool. An menokadu “āinwōt eļap pilin̄lin̄ in bōtōktōk e wōtlo̧k” kōn kwe im barāinwōt n̄a (Luk 22:44). Ekar joļo̧k An ro rejaje jeerļok aer bōd. Ekar iakwe ro rejaje iakwe. Ekar kōm̧m̧ani men ko kanniōk ejjab maron̄ kōm̧m̧ane. Ekar bōktok Pinmuur n̄an anjo̧ ioon jerawiwi, metak im nan̄inmej ko an aolep armej.
Kōn Pinmuur eo an Jisōs Kraist, jemaron̄ mour kōn kallim̧ur eo jekdo̧o̧n kain rot apan̄ ko jej iooni, jemaron̄ kōjatdikdik ilo E aolep iien, “Eo ekajoor n̄an lo̧mo̧o̧ren.” (2 Nipai 31:19).. Kōn Pinmuur eo An, jemaron̄ bōk lan̄lōn̄, aenōm̧m̧an, m̧ōņōņō, im mour indeo.
Būreejtōn Boyd K. Packer ekar ba: “Ijjelo̧kin wōt ro im emōj aer kālet bwe ren nana, ejjeļo̧k iminene, an̄ūr, jum̧ae, jerawiwi, wōtlo̧k, mōrō n̄an kar karōlake jān kallim̧ur in n̄an bōk jeorlo̧k bōd eo em̧ool. En̄in ej kallim̧ur eo jān Pinmuur eo an Kraist.”2
Juon iaan iien ko rekabwilōn̄lōn̄ ilo bwebwenato in armej ej kōn an kar Rilo̧mo̧o̧r kar loļo̧k Riamedka ro etto. Kwon pija ki ilo kōlmenļo̧kjeņ ne am elemen n̄e jen kar pād ilo tōre eo. Ilo aō kar kōļmenļo̧kjeņ kōn an iakwe im kea kōn ro Rekwojarjar iturin tampeļ eo, ikar reiliklo̧k im kōļmenļokjeņ kōn ajri ro kajojo ro im ij iakwe er eļapļo̧k jān mour in. Ikar kajjion̄ en̄jake ekōjkan aō naaj en̄jake n̄an rein reddik, n̄an aō kam̧ool an Rilo̧mo̧o̧r kūrtok aolep ajri jidik bwe ren itok n̄an Ippān, n̄an aō kam̧ool an Rilo̧mo̧o̧r eo erlo̧ke pā ko pein, n̄an jutak ippān ajri rein kajojo, juon ļok juon, ej en̄jaake anan̄ in dila ko ilo pein im neen, innām lo an kajjojo iaer jutak im kwaļo̧k ke Ej mour! (Lale 3 Nipai 11:14–17; barāinwōt lale 17:21; 18:25.) N̄an ad kōm̧man bwe ajri rein nejid ren o̧ktak tok im ba, “Mam̧a, Baba, E en!
Ijjab jeļā eļan̄n̄e jabdewōt men ioon laļ in emaro̧n̄ boktok eļap kam̧ōņōņo̧ im lan̄lōn̄ jān ad jeļā ke ajri ro nejid rejeļā kajjien Rilo̧mo̧o̧r, n̄an ad jeļā ke rejelā “ren maron̄ jeļā ia eo rej maron̄ reilo̧k n̄an jeo̧rļo̧k jero̧wiwi ko aer.” En̄in unin, am membōr an kabun̄ in “jej kwaļo̧k kōn Kraist” im jej kam̧ool kōn Kraist (2 Nipai 25:26 ).
-
En̄in ej unin ad jar ippān ajri ro nejid aolep raan.
-
En̄in ej unin ad riiti jeje ko rekwojarjar ippāir aolep raan.
-
En̄in ej unin ad katakin er n̄an jerbal n̄an ro jet, bwe ren maron̄ dāpdep wōt ilo kōjeram̧m̧ōn ko n̄an pukōt er make ilo aer leļo̧k aolepān aer n̄an jipan̄ ro jet. (lale Mark 8:35; Mosaia 2:17).
Ilo ad wūjeļep ļo̧k kōj make n̄an jon̄ak kein an rikaļooraņ, jenaaj kōkajoorļo̧k ajri ro nejid kōn iakwe eo an Rilo̧mo̧o̧r im kōn iaļ eo ejim̧we im kōjparok ilo aer jelm̧ae kapo ko rekauwōtata an rikapo eo.
Gospel in ej lukkuun kōn juon. Ej kōn jiip eo ejōbwabwe(lale Luk 15:3−7 ); ej kōn kōrā in Samaria eo ilo aebōj laļ eo.(lale Jon 4:5−30); ej kōn nejin eo ejerwaan (lale Luk 15:11−32).
Im ej kōn ļaddik eo edik eo emaron̄ ba bwe ejjab ron̄jake.
Ej kōn kōj wōj kajojo—ilo ad jab wanōk im einwōt ad—erōm juon wōt ippān ad Rilo̧mo̧o̧r bwe E ej juon wōt ippān Jemān (lale Jon 17:21).
Ij kamo̧ol bwe ewōr juon Jemedwōj Ilan̄ eo ej iakwe kōj, eo ejeļā etad! Ij kam̧ool bwe Jisōs Kraist ej nejin Anij eo emour. E eo ej make wōt im ad Rijojomar ippān Jemān. Ij kōlapļo̧k aō kam̧ool bwe lo̧mo̧o̧r ej itok im kōn Etan—im ejjeļok bar iaļ.
Ej aō jar bwe jenaaj leļo̧k aolepen būruōd im peid n̄an jipan̄ aolep ro nejin Jemedwōj Ilan̄ n̄an aer jeļā E im n̄an̄ en̄jake iakwe eo An. Ilo ad kōm̧m̧ane men in, Ej kallim̧ur bwe jenaaj bōk lan̄lōn̄ eo ejjeļo̧k jem̧ļo̧kin ilo laļ in im ilo laļ eo ej itok. Ilo etan Jisōs Kraist, amen.