M̧aajta Rikemour eo
Kwoj jab aikuj en̄jake būrom̧ōj kōn wōt jerawiwi, metak ej waļo̧k jān m̧akūtkūt ko an ro jet, ak men ko rekōm̧m̧etak an mour in—make iaam̧.
Juon iaan iien ko rem̧m̧an rekam̧ōņōņō ej ilo ito itak—n̄an katak jān sister ro aō aolepān laļ in. Ejjeļo̧k āinwōt jibwe pein doon, jelm̧ae doon, im kōm̧m̧an en̄jake ņae doon ippāmi.
Ilo juon iaan iien rōt in, juon ritōl an Doulul eo an Kōrā ekar kajjitōk, “Ewōr ke jabdewōt eļāp tata kōrā ro rej aikuj m̧ōdjake?”
Iaar uwaak, “Aaet!” āinwōt kōnono eo an Būreejtōn Russell M. Nelson “Juon Kajjitōk n̄an Sister ro Aō” jiktok ilo ļōmņak eo aō. Būreejtōn Nelson eaar katakin, “Jeaikuj kōrā ro remaron̄ dim ilo meļeļe kōn katak ko an Kraist.”1
Nipai eaar kōmeļeļeik katak eo an Kraist ilo wāween in:
“Bwe kōjām eo kom̧ij aikuj deļo̧n̄ ie ej ukweļo̧k im peptaij innām ej itok jeorļo̧k in jero̧wiwi ko ami kōn kijeek im kōn Jetōb Kwojarjar. …
“Im kiiō … ikōņaan kajjitōk aolep ededeļo̧k ke? Lo, ij ba n̄an kom̧, Jab; bwe kom̧ ar jab tōprak tok ijin ijello̧kun wōt n̄e jān naan an Kraist kōn tōmak edim ilo E, atartar wōt ioon tōllo̧ke ko an Eo ekajoor n̄an lo̧mo̧o̧ren. Lo, ij ba n̄an kom̧, Jab; bwe kom̧ ar jab tōprak tok ijin ijello̧kun wōt n̄e jān naan an Kraist kōn tōmak edim ilo E, atartar wōt ioon tōllo̧ke ko an Eo ekajoor n̄an lo̧mo̧o̧ren.
“Kōn menin, kom̧ aikuj bun̄ m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin, lo, āindein Jemān ej ba: Kom̧ naaj bōk mour indeeo.
“… Iaļ eo in; im ejjeļo̧k bar juon iaļ ak āt letok ium̧win lan̄ bwe armej ren maron̄ mour ilo aelōn̄ in Anij. Im kiiō, lo, en̄in ej katak an Kraist.”2 Im kiiō, lo, n̄in ej katak an Kraist.”2
Etke jej aikuji juon meļeļe edim kōn pedped kein?
Emakijkij aō ioon kōrā in Armej ro Rekwojarjar ilo Raan-ko Āliktata me rej kanooj aikuj jipan̄, aaet rejjab oktakļo̧k n̄an eo Juon me emaron̄ leļo̧k jipan̄ ejjeļo̧k jem̧ļo̧kin. Ekanooj emakijkij aer pukōt n̄an meļeļe jān kappukōt “m̧weo ekilep im ļap.”3
Ilo ad kōļapļo̧k meļeļe eo ad kōn katak eo an Kraist, em̧ōkaj ad lo bwe jej kaddōkļo̧k juon meļeļe em̧wilaļ kōn “karōk in m̧ōņōņō eļap.”4 barāinwōt kile bwe ad Rilo̧mo̧o̧r, Jisōs Kraist, ej pād ilo lukkuun dilepān karōk eo.
N̄e jej katak ekōjkan kōjerbal katak eo an Kraist n̄an kajjojo jekjek ko ad, ad iakwe n̄an ad Rilo̧mo̧o̧r eddōk. Im jej kile “Mekerta joñan oktakin ad kalimjōke, kōj aolep jej aikuji ejja Pinmuur eo wōt eļap.”5 Jej kile bwe E ej ad pedped—“ejm̧aan in ad Rilo̧mo̧o̧r, … eo ej pedped em̧ool … pedped eo eļan̄n̄e [jej] ekkal [jej] jamin bun̄.”6
Ekōjkan an katakin in kōjeraam̧m̧an kōj ilo ad pukōt aenōm̧m̧an im meļeļe im kajjieon̄ kijenmej ilo ito itak kein ad ilo mour in?
Imaron̄ ba ke jān jino, āinwōt an Nipai ba “kōn tōmak edim ilo [Kraist], atartar wōt ioon tōllo̧ke ko an Eo ekajoor n̄an lo̧mo̧o̧ren.”7 Tōmak eo ad ilo Jisōs Kraist ej kōmaron̄ jelm̧ae jabdewōt apan̄.
Kōj, ilo m̧ool, emakijkij ad loe an tōmak eo ad m̧wilaļļo̧k im jem̧jerā ko ad ippān Jemedwōj Ilan̄ im Nejin em̧m̧anļo̧k ilo apan̄. In kwaļo̧k ippām̧i jilu waanjon̄ak ko.
Juon, Rilo̧mo̧o̧r eo, Maajta Rikemour eo, ewōr An kajoor n̄an ukōt būruwōd im letok n̄an kōj ājmour eo jān būrom̧ōj jān jerawiwi eo ad make. Ke Rilo̧mo̧o̧r eo ekar katakin kōrā in Samaria eo ilo aibōj laļ eo, Ekar jeļā kōn jerawiwi ko an reļļap. Ijoke, “Irooj ej lale būruon,”8 im Eaar jeļā liin eaar pidodo katakin.
Ke kōrā eo eaar itok n̄an aibōj laļ eo, Jisōs—ej jutak kōn dān in mour—eaar ba, “Letok n̄an eō bwe in idaak.” Ad Rilo̧mo̧o̧r enaaj āinwōt kōnono n̄an kōj ilo juon ainikien jej kile n̄e jej itok n̄an E—bwe Ejeļā kajied. Ej jerbal ippād ilo jekjek ko ad kiiō. Im kōnke kōn wōn E im ta eo Eaar kōm̧m̧ane n̄an kōj, Emeļeļe. Kōnke Eaar en̄jake metak eo ad, Emaron̄ letok n̄an kōj dān in mour n̄e jej kappukōte. Eaar katakin menin n̄an kōrā in Samaria eo ke Eaar ba, “Eļan̄n̄e kwaar jeļā men eo Anij ej letok im Eo ej ba n̄an eok, kwōn letok n̄an Eō bwe In idaak; kwō naaj kar kajjitōk Ippān, im Enaaj kar lewōj n̄an eok dān in mour.” Āliktata ilo meļeļe, kōrā eo eaar uwaak ilo tōmak im kajjitōk, Irooj, kwōn letok dān in n̄an eō, bwe in jab maro.”
Ālkin an kōrā in Samaria eo bōk jeļā ippān Rilo̧mo̧o̧r eo, liin “eaar likūt kein itōk eo an, im ej ilo̧k n̄an jikin kweilo̧k eo, im ba n̄an armej raņ,
“Itok, im lo armej eo ear kwaļo̧k n̄an eō men otemjej iar kōm̧m̧ani: e in ri Kraist ke?”
Liin eaar bōk kam̧ool—liin eaar jino bōk m̧ōttan dān in mour eo im liin eaar ikdeelel n̄an kam̧ool kōn An kwojarjar n̄an ro jet.9
N̄e jej itok n̄an E kōn bōro ettā im pidodo katakin—em̧ool eļan̄n̄e būruwōd ej eddo kōn bōd ko, jerawiwi ko, im jab pokake ko—Emaron̄ ukōt kōj, “bwe e ekajoor n̄an lo̧mo̧o̧ren.”10 Im kōn bōro ko roktak, jemaron̄, āinwōt kōrā in Samaria eo, ilo̧k n̄an jikin kweilo̧k ko ad make—m̧ōko im̧ōd make, jikuuļ ko, im jikin jerbal ko—n̄an kam̧ool kōn E.
Kein karuo, M̧aajta in Rikemour eo emaron̄ kaenōm̧m̧an im kōkajoorļo̧k kōj n̄e jej en̄jake metak kōnke m̧akūtkūt jab wenōk ko an ro jet. Elōn̄ iien bwebwenato ko aō ippān kōrā ro raar kakkōt ium̧win eddo ko reddo. Kōjparok wōt bujen ko aer ilo tampeļ em̧ōj aer erom juon iaļ epen an kemour. Raar en̄taan jān bujen ko rerup, bōro ko rerup, im jako lōke. Elōn̄ rej rijorrāān jān kakkure an ļōn̄ im kōnono, m̧ōm̧ an kanniōk, im en̄jake, emakijkij an āinwōt tōprak in an̄urlep an armej ro jet.
En̄jake kein, men̄e rejjab tōprak eo aer make, kar kwaļo̧k elōn̄ en̄jake in bōd im jook. Jab meļeļe ekōjkan kōjbwebweik en̄jake ko rekajoor rej en̄jaki, elōn̄ rej kajjieon̄ kowani, kajjieon̄ meļo̧kļo̧ki.
Kōjatdikdik im kemour rejjab loi ilo ņooji ak ilo meram im iakwe an ad Rilo̧mo̧o̧r, Jisōs Kraist.11 Elder Richard G. Scott eaar kapilōk: “Eļan̄n̄e kwoj deeor [jān] jerawiwi eļap kwe make, jab en̄taan ilo ejjeļo̧k kaje ko an jerawiwi ko an ro jet, … Komaron̄ en̄jake meanwōd. … Aaet kwoj aikuj jab bōk ioom̧ make en̄ajke in eddo eo. … N̄e em̧ōj am̧ kar kōm̧m̧ane ta eo em̧m̧an n̄an jipan̄ juon eo kwoj iakwe, likūt eddo eo ilo neen Rilo̧mo̧o̧r eo. … Eļan̄n̄e kwoj kōm̧m̧an āindein, ejjab kwe wōt kwonaaj lo aenōm̧m̧an ak naaj kwaļo̧k am̧ tōmak ilo kajoor an Rilo̧mo̧o̧r eo n̄an kotak eddo eo an jerawiwi jān eo kwoj iakwe kōn an ukweļo̧k im pokake.”
Eaar wōnm̧aanļo̧k wōt: “Kemour eo edipio enaaj itok kōn am̧ tōmak ilo Jisōs Kraist im An kajoor im maron̄, kōn An Pinmuur, n̄an kamo jeno̧k ko an ta eo ejjab jim̧we im ejjab em̧m̧an.”12
Eļan̄n̄e kwoj lo eok make ilo jekjek in, kemour emaron̄ erom juon jerbal eaitok. Enaaj aikuj am̧ lukkuun kappukōt tōl im jipan̄ eo ekkar, ekoba kapilōk ippān rikabwijer ro an priesthood rekkar kar kapit er. Ilo am katak n̄an ekōnono ilo ejjeļo̧k ņojak, kōm̧m̧ani jon̄ak ko rekkar im bōlen kapukōt kapilōk an eo etijōm̧ļo̧k. Dāpij wōt ājmour ilo jetōb eo ilo aolepān jekjek eo ekanooj aorōk! Keememej kadkad eo am̧ ekwojarjar. Kwoj juon leddik eo eaorōk nejin Jemedwōj Ilan̄ im Jinedwōj Ilan̄. Lōke karōk eo indeeo an Jemam̧ n̄an eok. Wōnm̧aanļo̧k raan otemjej n̄an kōļapļo̧k meļeļe eo am̧ kōn katak eo an Jisōs Kraist. Kōjerbal tōmak kajjojo raan n̄an lukkuun idaak jān aibōj laļ eo an Rilo̧mo̧o̧r eo. Pedped wōt ioon kajoor in endowment eo ekōm̧m̧an bwen pojak n̄an kōj jān kain̄in ko im bujen ko. Kōtļo̧k bwe kajoor in kōmour eo an Rilo̧mo̧o̧r eo im Pinmuur eo An en deļo̧n̄ ilo mour eo am̧.
Kein kajilu, M̧aajta Rikemour eo emaron̄ kaenōm̧m̧an im rie kōj ilo ad en̄jake metak “m̧ool ko an mour wabanban,”13 ko āinwōt jorrāān ļapļap, nan̄inmej in kōmālij, nan̄inmej, metak aitok kitien, im mej. Ejjab etto iaar jino jeļā kajien juon jiron̄ ejej uwaan etan in Josie me eaar en̄taan jān bipolar disorder. En̄in ej jidik in iaļ eo an n̄an kemour ilo an kar kwaļo̧ke ippa:
“Iien eo enana tata ej waļo̧k me baam̧le eo aō im n̄a kar ņa etan ‘raan in aō babu wōt laļ.’ Ej ijjino kōn en̄jake etōr jān jon̄an aō maron̄ im kanooj meļeļe im jab kōņaan jabdewōt ainikien, ejjōb, ak meram. Ej letok juon en̄taan in kōļmenļo̧kjeņ. Ewōr juon raan ejeno̧lo̧k me ijjamin naaj meļo̧kļo̧ke.
“Eaar ilo jino in em̧m̧akūt eo, kōm̧m̧an an en̄jake eo eļap tata kamijak. Imaron̄ kememej aō m̧ōtato, kōmejaļaaļ to̧o̧r laļļo̧k ilo meja ke iaar kappok menowa. Ak jekdo̧o̧n jon̄an en̄taan eo eļap eaar jab jon̄an wōt en̄taan eaar waļo̧k ālkin kamijak eo iaar en̄jake eo ekar pād ippān jinō, kanooj kōņaan jipan̄ eō.
“Eaar en̄jake eļap būrom̧ōj ke ej lo aō en̄taan ilo jekjek in. Bōtaab edik ijo kom̧ jeļā kake jekdo̧on jekjek eo eaar āinwōt nana ļo̧k wōt, kōm kar jejjo wōt iien jān en̄jake juon kabwilōn̄lōn̄ ekabwilōn̄lōn̄.
“Ilo an awa eo aitok wōnm̧aanļo̧k wōt, jinō eaar unojdikdik im bar unojdikdik im bar unojdikdik, ‘ikōnaan kōm̧m̧an jabdewōt n̄an bōkļo̧k menin jān eok.’
“Ilo iien in, marok lep eaar ļapļo̧k, im ke iaar anjo̧ ikar maron̄ jab bar bōke, innām juon men ekamijak eaar waļo̧k.
“Juon kajoor eļap im em̧m̧an ejidimkij kar kobrak ānbwinnū. Innām, kōn juon ‘kajoor ilōn̄ in aō maron̄,’14 Ikar kwaļo̧k n̄an jinō kōn kam̧ool eļap ilo jiljilimjuon naan ko rej ukōt mour ilo aō uwaak e kōņaan eo aō n̄an aō ineek metak eo aō. Iaar ba, ‘Kwojjab aikuj in; Juon ededeļo̧k an bōke.’”
Jān tōre eo emarok ekauwōtata an nann̄inmej in kōmālij, Josie ekar leļo̧k kajoor eo n̄an kam̧ool kōn Jisōs Kraist im Pinmuur eo An.
Liin eaar jab lukkuun mour raan jab eo, bōtaab eaar bōk meram in kōjatdikdik eo ilo juon tōre emarok lep. Rainin, rie kōn juon meļeļe edim kōn katak an Kraist im kōkajoor ļo̧k raan otemjej kōn dān in mour an Rilo̧mo̧o̧r, Josie ej wōnm̧aanļo̧k wōt ilo iaļ eo an n̄an kemour im kōjerbal tōmak eo ekijn̄en̄e ilo M̧aajta Rikemour eo. Liin ej jipan̄ ro jet ilo iaļ in. “N̄e maroklep ekūjn̄en̄e an waļo̧k, ij pedped ioon ememej eo kōn tūriam̧o ko rem̧m̧an An. Rekar jerbal āinwōt juon meram ej aō iaļ ilo aō jelm̧ae iien ko reppen.”15
Kōrā ro, Ij kam̧ool bwe—
Kwojjab aikuj wōnm̧aanļo̧k wōt n̄an ineek eddo eo an būrom̧ōj kar waļo̧k jān jerawiwi—make ļo̧k.
Kwojjab aikuj ineek metak eo kar waļo̧k jān m̧akūtkūt ko rejōbwānōk an ro jet—make ļo̧k.
Kwojjab aikuj en̄jake kōmettak ko rem̧ool an mour wabanban—make ļo̧k.
Rilo̧mo̧o̧r eo ej akweļap:
“Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?
“… Eļan̄n̄e kom̧ naaj itok n̄an Eō kom̧ naaj lo mour indeeo. Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok … e Inaaj bōk.”16
“[E] enaaj kōm̧m̧an jabdewōt n̄an bōk menin jān eok.” Ilo m̧ool, “[E] ededeļo̧k an bōke.” Ilo etan Jisōs Kraist, M̧aajta Rikemour eo, amen.