“Itok, Ļoor Eō” n̄an Kwaļo̧k Iakwe im Jipan̄ an Rikūrijin
Āinwōt rijilōk ro an Rilo̧mo̧o̧r ilo raan kein āliktata, jej itok n̄an E kōn iakwe im jerbal n̄an ro nejin Anij.
Elie Wiesel eo eaar bōk nōbar eaar pād ilo aujpitōl kōttar an mour jān m̧wijm̧wij in menono ke ļaddik eo jibun ļalem an iiō eaar loļo̧k. Ke ļaddik in edik ej reilo̧k n̄an mejen jim̧m̧an, eaar lo an metak. “Eaar ba,” jim̧m̧a,“n̄e eļapļo̧k aō iakwe eok, en [ke dikļo̧k] am metak?”1 Rainin ij kajjitōk ejja kajjitōk in wōt: “Eļļan̄n̄e eļapļo̧k ad iakwe Rilo̧mo̧o̧r eo, en ke dikļo̧k ad en̄taan?”
Ke Rilo̧mo̧o̧r eaar kūr rijilōk ro An n̄an ļoor E, raar mour kōn kien Moses, ekoba pukot “Mej en ņa oņean mej, im n̄i en ņa oņean n̄i,”2 ak Rilo̧mo̧o̧r eaar itok n̄an kakūrm̧ool kien in kōn Pinmuur eo An. Eaar kwaļo̧k juon katak kāāl: “Kom̧in iakwe ro rikōjdate kom̧, jouj n̄an ro rej kanejnej e kom̧, im jar kōn ro rej ikkure kake kom̧ im matōrtōre kom̧.”3
Kar katakin rijilōk ro bwe ren joļo̧k piktok in armej n̄an iakwe im kea ilo wāween ko an Rilo̧mo̧o̧r n̄an pinej jenkwan jum̧ae n̄an joļo̧k bōd , jouj, im tiriam̧o. Kien eo ekāāl n̄an “yokwe doon”4 eaar jab aolep iien pidodo n̄an kōm̧m̧ane. Ke rijilōk ro rej inepata n̄an iaio ippān rijerawiwi ro im jet kurup in armej, Rilo̧mo̧o̧r eaar kwaļo̧k, “Em̧ool Ij ba n̄an kom̧, ilo ami kōm̧anm̧an jabdewōt n̄an juon iaan rein ro jatū ediktata, kom̧ ar kōm̧anm̧ane n̄an Eō.”5 Ak, ilo an juon rikanaan in Bok in Mormon ba, “Em̧ōj aō lukkuun jeļā bwe “elan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”6
Āinwōt rijilōk ro an Rilo̧mo̧o̧r ilo raan kein āliktata, jej itok n̄an E kōn iakwe im jerbal n̄an ro nejin Anij. Ilo ad kōm̧m̧ane menin, jemaron̄ jab joļo̧k inepata, apan̄, im en̄taan ilo kanniōk, ak emaron̄ dik ad metak ilo mour in jetōb. Men̄e ilo apan̄ ko ad jemaron̄ en̄jake m̧ōņōņō im aenōm̧m̧an.
Ad iakwe im jerbal in jipan̄ eaikuj in lukkuun ijjino ilo m̧weo. Mam̧a im baba ro, kom̧ kar kūr bwe kom̧in rikatakin ro rej iakwe im mijinede n̄an ro nejūmi. Rej ami rikatak. Ewōr ami eddo n̄an jipan̄ er jino oktak. Ilo m̧ool, jej aolep pukot oktak—eo ej meļeļein obrak kōn iakwe eo an Rilo̧mo̧o̧r.
Ilo ad ļoor Jisōs Kraist, iakwe eo An ej ļōn̄aj kōj n̄an jipan̄ doon ilo iaļen mour in. Jeban make kōm̧m̧ane.7 Kwar ron̄ aō ba jabōn kennaan in m̧oktaļo̧k: “Kwoj kotak eō, Ij kotak eok, im jej jim̧or kotak doon.”8 Āinwōt rijilōk ro, jej jino kōm̧m̧ane menin ilo iien eo jaar peptaij, kwaļo̧k ad kōņaan “n̄an ineek eddo ko an ro jet, bwe ren maron̄ mera.”9
“Katak[in] doon pedped in katak ko an aelōn̄ in kiin̄ eo”10 ej juon wāween ilo iakwe im jerbal n̄an doon. Mam̧a im baba bubu im jim̧m̧a, jej jino ioon anjiwiwi ko an laļin—jikuul ko rejjab katakin kōn m̧ōm̧ ko an kanniōk. Ak elōn̄ men ko jemaron̄ kōm̧m̧ane. Jemaron̄ bōk menin n̄an katakin baam̧le ko ad make—kiiō. Jab jerwane. N̄e iien ej itok n̄an kwaļo̧k ļōmņak ko am kōn gospel in im katak ko an mour, kabbōjrak men otemjeļo̧k im jijet im kōnono kake ippān ro nejūm̧ im jibūm̧.
Jejjab aikuj inepata bwe jejjab rikatakin ro retijem̧ļo̧k ilo gospel in. Ejjeļo̧k kūlaaj in kaminene ak bok in katakin elapļo̧k an jipan̄ jen ad make riiti jeje ko rekwojarjar, jar, kōļmenļo̧kjeņ, im pukot tōl eo an Jetōb. Jetōb enaaj tōl eok. Ij kallimuri eok: kūr eo n̄an juon m̧am̧a ak baba ekoba menin letok eo n̄an katakin ilo wāween ko rejim̧we n̄an kwe im ajri ro nejūm̧. Keememej, kajoor eo an Anij n̄an im̧we kōj ilo jim̧we ej iakwe eo An. “Jej yokwe bwe Ear yokwe kōj m̧okta.”11
Jodikdik ro, kwomwij jet ro am rikatakin ro rewejabdik ilo gospel in. Kwomwij itok n̄an jar im ekkatak bwe kwon ro̧o̧l n̄an m̧weo im katakin im jipan̄ baam̧le eo am̧, ro riturum̧, im ro m̧ōttam̧. Jab mijak. Bōk tōmak n̄an kam̧ool kōn ta eo kwojeļā em̧ool. Ļōmņak elemen an mijinede ro rej jerbal aolep raan eddōkļo̧k kōnke rej lukkuun ajeļo̧k mour ko aer—kōjerbal iien ko aer im taļōn ko aer im kwaļo̧k naan in kam̧ool ko n̄an jipan̄ im kōjeram̧m̧an ro jet. Ilo am kwaļo̧k naan in kam̧ool eo am̧ kōn gospel in, tōmak eo am̧ enaaj kajoorļo̧k im leke eo am enaaj ļapļo̧k!
Jet iaan mour in Kūrijin ko ad rej ilo iien an baam̧le eo riiti jeje ko rekwojarjar, baam̧le eo jar, im kweilo̧k in ko̧o̧njeļ ko an baam̧le. Enan̄in bukwi iiō ko rem̧o̧o̧tļo̧k, ritōl ro ad ilo Kabun̄ in raar kūr kōj n̄an kōjeno̧ļo̧k juon iien ilo kajjojo wiik. Ak elōn̄ iaad rejjan̄in bo̧kkōjeram̧m̧an kein. Nokon in jota an baam̧le ejjab juon katak jen m̧am̧a ak baba. Ej iien n̄an an baam̧le eo ad kwaļo̧k katak ko im en̄jake ko reim̧we, n̄an jipan̄ ajri ro nejid jeļā n̄an kea im kwaļo̧k, limo ippān doon, kwaļo̧k naan in kam̧ool ippān doon, im kajoor im eddōkļo̧k ippān doon. N̄an kōm̧m̧an nokon in jota aolep wiik, ad iakwe n̄an doon enaaj kajoorļo̧k, im enaaj dikļo̧k ad en̄taan.
Jen keememej, bwe jerbal eo eaorōktata jen kōm̧m̧ane ilo baam̧le ko ad ej ilo kajoor eo an Jetōb Kwojarjar. N̄e jenaaj kotak ainikiied ilo illu, Jetōb enaaj etal jen jem̧jerā ko ad im baam̧le ko. N̄e jenaaj kōnono ilo iakwe, Jetōb enaaj pād ippād. Jen barāinwōt keememej bwe ajri ro nejid im jibwid rejeļā jon̄an iakwe eo ad ilo wāween eo jon̄an jej pād ippāer. Ilōn̄in men otemjej, jab kijeļo̧k im ebweer!
Jeje ko rekwojarjar rej jiron̄ kōj bwe n̄e jet iaan jetōb ro nejin Jemedwōj Ilan̄ rejjab kālet n̄an ļoor karōk eo An, lan̄ ebūrom̧ōj12 Jet m̧am̧a im baba ro rej iakwe ajri ro nejier im kar katakin er rej barāinwōt būrom̧ōj n̄e ro nejier rejjab kālet n̄an ļoor karōk eo an Irooj. Ta eo m̧am̧a im baba ro remaron̄ kōm̧m̧ane? Jeban jar n̄an bukweļo̧k anemkwoj eo an juon. Keememej eo jemen im nejin eo ejerwan, eo eaar lukkuun kōttar an nejin “[itok] n̄an ippān,” im ej jutak wōt “a ke ej ettoļo̧k wōt.”13 Jemaron̄ jar kōn tōl n̄an kōnono im ta eo n̄an ba,im n̄āāt eo ikūn̄. Keememej, ajri ro nejid im ro uwaan baamle ko ad raar kālet n̄an ļoor Rilo̧mo̧o̧r ilo mour eo aer m̧okta. Jet iien emaron̄ wōr ilo mour ko aer make me rej bar en̄jake en̄jake ko rekwojarjar. Aaet, ijoke kālet eo n̄an iakwe im ļoor Irooj ej aer make kālet.
Ebar wōr juon iaļ rijilōk ro rej kwaļo̧k aer iakwe n̄an Rilo̧mo̧o̧r. Rainin ikōņaan leļo̧k kam̧m̧oolol n̄an ro otemjej rej jerbal n̄an Irooj āinwōt rikōjparok ro. Irooj ej iakwe eok! Ilo am make, kōn jerbal eo etinkwadik, kwoj ļoor E eo eaar kallim̧ur, “Jemāmi eo ej lo ilo ittino, E naaj ņa o̧ņeam̧.”14
Ij ļōmņak kōn kōrā eo ippān eo riturū me eaar nan̄inmej in Alzhemer. Aolep Jabōt ej kanuknuki kōn nuknuk in jar, kum̧wi bōran, mekaap e mejen, im kadedeki. N̄an kōm̧m̧ane menin, eaar juon waanjon̄ok n̄an aolep em̧m̧aan im kōrā ilo ward ilo eo am̧. Juon raan kōrā eo ippān eaar ba n̄an e, “Ikōņaan bar lo ļeo ippa im pād ippān.”
Eaar ba, “N̄a ļeo pālele.”
Eaar ba, “O, em̧m̧an!”
Ijamin kōnono kōn rikōjparok n̄e ijjab kōnono kōn rikōjparok eo ejeno̧lo̧k ilo mour e aō—rijilōk eo an Rilo̧mo̧o̧r ejeno̧lo̧k n̄an eō—eo paleō indeeo, Mary. Eaar letok aolepen an kea im iakwe. Pein eaar kakememej eō kōn Pein, kabwijer. N̄e eban kar e iban kar pād ijin. Im kōn e, inaaj niknik n̄an jem̧ļo̧kin im naaj pād ippān indeeo.
N̄e kwoj en̄taan make iaam̧ ak kōn ro jet, ij rōjan̄ eok bwe kwon kōtļo̧k bwe Rilo̧mo̧o̧r en am rikōjparok. Jirōk likatōttōt ilo iakwe eo An.15 Bōk An in naan: Eaar kallim̧ur. “I jāmin likūt kom̧ atajinemjen: I naaj iwōj n̄an kom̧:”16
Ro jeiū im jatū, eļan̄n̄e jejjan̄in kōm̧m̧an āindein, jen oktakļo̧k n̄an joļo̧k bōd, jouj, im iakwe. Jen juļo̧k aolep m̧ōttan en̄jake ko an piktok in armej im kwaļo̧k kea eo an Kraist ilo, iakwe, im aenōm̧m̧an.17
Ak “eļan̄n̄e kom̧ ar itok n̄an jeļāļo̧kjeņ eo kōn aiboojoj [im em̧m̧an] eo an Anij”18 im barāinwōt “kōn pinmuur eo kar kōpooje jān ļon̄tak ko an laļ,”19 ““aaet enaaj ejjeļo̧k ļōmņak in kōmetak doon, ak n̄an mour inem̧m̧an. … Im kom̧in jab naaj kōtļo̧k bwe ro nejimi … ren rupi kien ko an Anij, im ire ak aitwerōk ippān doon. … A kom̧ naaj katakin er … n̄an iakwe doon, im jipan̄ doon.”20
Mokta jen debwāāl eo an Rilo̧mo̧o̧r, Eaar kwaļo̧k n̄an rijilōk ro An: “Kien ekāāl Ij lewōj n̄an kom̧, kom̧win yokwe doon; āinwōt Iar yokwe kom̧,”21 im “Eļan̄n̄e kom̧wij yokwe eō, kōjparok kien ko Aō.22
Ij kam̧ool kōn en̄jake eo em̧ool an Rilo̧mo̧o̧r n̄an kōj Christus Ej wōnmaanļo̧k wōt im erlo̧ke Pein23 im ba, “Itok, ļoor eō.” Jej ļoor E ilo iakwe im jerbal n̄an doon ilo kōjparok kien ko An.
Ij kwaļo̧k kam̧ool eo aō ejeno̧lo̧k bwe Ej mour im ej iakwe kōj kōn juon iakwe eweppān. En̄in ej Kabun̄ eo An. Thomas S. Monson ej rikanaan eo An emour im ej kōnono rainin. Bwe jen maron̄ iakwe Jemedwōj Ilan̄ im Nejin, bwe en dikļo̧k ad en̄taan, ej aō jar. Ilo etan Jisōs Kraist, amen.