Katak jān Alma im Amulek
Ej aō kōjatdikdik ke ro emōj aer eļļo̧k jen ial eo an rikaļoor renaaj loe kōn būruweir im katak jen Alma im Amulek.
Alma eo Edik
Ilubwilijin elōn̄ iaan armej ro ban meļo̧kļo̧k ilo jeje ko rekwojarjar ej Alma eo Edik. Mekarta ekar l̗addik eo nejin juon rikaanan em̧m̧an, eaar jōbwābwe jān iaļ eo an ilo juon iien im erom juon “em̧m̧aan ekanooj nana im rikabun̄-jar n̄an ekjab.” Kōn wūn ko jemaron̄ wōt kajidedeki, eaar niknik ilo jumaeki jemen im kappukōt n̄an kakkure Kabun̄ eo. Im kōn wejepedik im karreel ko an, eaar bōk eļap tōbrak.1
Ak mour eo an Alma eaar oktak ke juon enjeļ an Irooj ekar waļo̧k n̄an e im kōnono āinwōt n̄e eaar kōn juon ainikien jourur. Ium̧win jilu raan im jilu bon̄, Alma eaar “en̄taan kōn en̄taan ejjelo̧k jemlo̧kin… em̧ool kōn metak ko an juon jetōb eo eatajinemjān. Innām, ilo juon wāween, juon ememej eo eaar bōkļo̧k meram n̄an marok in ļōmņak eo an—juon m̧ool eo ejjeļo̧k jem̧ļo̧kin, katakin jān jemen: bwe Jisos Kraist enaaj itok “n̄an pinmuur kōn jerawiwi ko an laļ.” Alma eaar jab bōk kaļmānļo̧kijeņ kein, ak kiiō an “kaļmānļo̧kijeņ ar pen ilo ļōmņak in,” im eaar ilo juon bōro eo ettā, kanooj in, likūt an lōke ilo kajoor in pinmuur eo an Kraist.2
Ke Alma eaar ro̧o̧ltok jān iminene in, eaar juon em̧m̧aan eo eoktak. Jān tore eo m̧aanļo̧k, eaar kōmaatļo̧k mour eo an n̄an ukōt jorrāān ko eaar kom̧m̧ani. E ej juon waanjon̄o̧k ekajoor kōn ukweļo̧k, jeerļo̧k bōd, im tōmak eo eniknik.
Āliktata kar kālet Alma bwe en bōk jikin jemān āinwōt juon eo ej ejm̧aan n̄an Kabun̄ eo an Anij.
Aolep armej ro jān laļ an armej in Nipai ro raar maron̄ in jeļā kōn bwebwenato in Alma. Twitter ko, Instagram ko, im Facebook ko ilo raan ko an remaron̄ kar obrak kōn pija im bwebwenato kōn e. Ej bōlen waļo̧k jān iien n̄an iien ilo tum̧aan in bok an Zarahemla Weekly im eaar bwebwenato eo an rijeje ro, im network special ko. Ilo tukaduin, eaar bōlen eo eļap an bun̄bun̄ tata kar jeļā kake ilo raan ko an.
Ak ke Alma ar loe an armej ro an meļo̧kļo̧ke Anij im kotak er make ilo utiej bōro im aitwerōk, eaar kālet bwe en kam̧ōje jān opiij eo n̄an aolep armej im ajeļo̧k e make “priesthood eo eutiej in laajrak ekwōjarjar an Anij,”3 katakin kōn ukweļo̧k ilubwilijin armej in Nipai ro.
Jinoin, Alma eaar ļap an tōprak—ekar, m̧ae an ilo̧k n̄an jikin kweilo̧k Ammonaia. Armej ro an jikin kweilo̧k in raar kanooj jeļā ke ejako an Alma juon ritōl in kien n̄an er, im edik aer kautieje mālim in priesthood eo an. Raar ba ņae e, kajjirere kake, im joļo̧k e jān jikin kweilo̧k eo aer.
Kōn juon bōro erub, Alma eaar oktak lik jān jikin kweilo̧k Ammonaia.4
Ak juon enjeļ eaar ba n̄an e bwe en bar ro̧o̧l.
Baj ļōmņak kake m̧ōk: Em̧ōj ba n̄an e bwe en ro̧o̧l n̄an armej ro rōdike im raar akkōjdete Kabun̄ in. Ekar juon jerbal eo ekauwōtata bōlen n̄an juon mour. Ak Alma eaar jab bōjrak kake. “Eaar ro̧o̧l kakaiururļo̧k.”5
Alma eaar jitlo̧k elōn̄ raan ko ke eaar deļo̧n̄ļo̧k n̄an jikin kweilo̧k eo. Ilo ijo eaar kajjitōk ippān juon keien ruwamāejet n̄e emaron “leļo̧k ke n̄an juon rittā karejeran Anij kijān n̄an mōn̄ā.”6
Amulek
Etan em̧m̧aan in ej Amulek.
Amulek eaar juon rim̧weie, eļap an bun̄bun̄ ilo jikin kweilo̧k Ammōnaia. Mekarta eaar itok jān juon ļain aitok in ritōmak, tōmak eo an make em̧ōj an m̧ōļo. Eaar kwaļo̧k bōro, “kar kūr eō elōn̄ iien im iaar m̧akoko in ron̄; kōn menin iaar jeļā kōn men kein, ak iaar kōņaan jab [tōmak]; kōn menin iaar ilo̧k im kabun̄pata ņae Anij.”7
Ak Anij eaar kōpooj Amulek, im ke Amulek eaar ione Alma, eaar karuwaineneik rijerbal eo an Irooj n̄an m̧weo im̧ōn, ijo Alma eaar jokwe elōn̄ raan ko.8 Ilo iien eo, Amulek eaar kapeļļo̧k būruōn n̄an ennaan eo an Alma, im juon oktak eļap eaar itok ioon. Jān iien eo m̧aanļo̧k, Amulek eaar jab tōmak wōt, ak eaar barāinwōt erom juon eo elukkuun jeļā kōn m̧ool eo.
Ke Alma eaar diwōjļo̧k bar juon alen n̄an katakin ilubwilijin armej in Ammōnaia ro, eaar bar wōr juon rikam̧ool iturin—Amulek, eo ej jān er.
Iien ko ālkin raar ejaake juon iaan bwebwenato ko eļap aer kam̧ōņōņō im kabūromo̧jmo̧j ilo aolepān jeje ko rekwojarjar. Komaron̄ riiti ilo Alma jepta 8–16.
Rainin, ikōņaan kajjitōk ippāmi n̄an ļo̧mņak kōn ruo kajjitōk ko:
Juon: “Ta eo imaron̄ katak jān Alma?”
Ruo: “Ewi wāween aō āinwōt Amulek?”
“Ta eo imaron̄ katak jān Alma?
M̧o̧ktata inaaj jino kōn juon aō kajjitōk n̄an aolep ritōl ro, kiiō, ak ro renaaj ritōl ilo Kabun̄ in an Jisos Kraist, ij ba, “Ta eo komaron̄ katak jān Alma?”
Alma eaar juon em̧m̧aan eo eļap an kapeel im maron̄. Emaron̄ kar bidodo n̄an ļōmņak ke eaar jab aikuj jipan̄ eo jān bar juon. Mekarta, ta eo Alma eaar kom̧m̧ane ke eaar bar ro̧o̧l n̄an Ammōnaia?
Alma eaar loe Amulek im kajjitōk jipan̄.
Im Alma eaar bok jipan̄.
Kōn jabdewōt wun ko, jet iien kōj āinwōt ritōl ro jej abōb in loe im kajjitikin Amulek ko ad. Bōlen jej ļōmņak ke em̧m̧anļo̧k ad jerbal ilo ad make iaad, ak jej abōb in kabūņōņōik ro jet, ak jej ļōmņak ke ro jet reban kōņaan bōk kuņaer. Ewi jon̄an emakijkij in ad āliklik in karuwaineneik armej n̄an kōjerbale kapeel ko emōj liļo̧k jān Anij im m̧ōņōņō in boub ilo jerbal eļap an lo̧mo̧o̧r.
Ļōmņak kōn Rilo̧mo̧o̧r eo—Eaar ke jino kalōke Kabun̄ eo An make ļo̧k?
Jaab.
Ennaan eo An ejjab “Jutak ilūk. Inaaj kōm̧m̧ane.” Ijjelo̧kin ej “Itok, loor Eō.”9 Eaar kōketak, karuwaineneik, katakin, innām lōke ro rikaļoraan “n̄an kōm̧m̧an men ko kom̧ ar lo Aō kōm̧m̧an.”10 Ilo wāween in, Jisos Kraist eaar jab kalōk wōt Kabun̄ eo An, ak Eaar barāinwōt kalōk rijerbal ro An.
Ilo jabdewōt eddo kwōj jerbale—āinwōt n̄e kwoj juon bureejitōn an doulul an tikōn ro, juon stake bureejtōn, ak juon Area Bureejtōn—bwe kom̧ en lo tōbrak ro, kom̧ij aikuj in loe Amulek ko ami.
Emaron̄ juon eo me ejjeļo̧k ami katmene ak kom̧ ejjab loe ilubwiljimi. Emaron̄ juon eo me ejjab m̧ōņōņō ak maron̄ jerbal. Amulek ko ami remaron̄ em̧m̧an ded ak rūtto, em̧m̧aan ak kōrā, jabminene, m̧ōk, ak jab niknik ilo Kabun̄ in. Ak men eo jab loe ilo jinoin ej ke rekole n̄an ron̄ jān kwe naan kein“Irooj ej aikuji eok! Ij aikuji eok!
Ilo tum̧wilaļ in, elōn̄ rej kōņaan jerbal n̄an aer Anij. Rej kōņaan bwe ren juon kein jerbal ilo pein. Rej kōņaan bun̄raake sickle ko aer im kajjieon̄ kōn maron̄ ko aer n̄an kōpooj laļ in n̄an ro̧o̧ltok eo an Rilo̧mo̧o̧r eo ad. Rej kōņaan kalōke Kabun̄ in An. Bōtab rej mijak in jinoe. Ekkā aer kōttar n̄an kajjitōk ippāer.
Ij karuwaineneik kom̧ n̄an ļōmņak kōn ro ilo branch im ward ko ami, iloan mijān im stake ko ami, ro rej aikuj in ron̄ juon kūr n̄an jerbal. Irooj ej pād im jerbal ippāer—kōpooj er, kōmeraikļo̧k būruwier. Lo er ilo am̧ loe kōn būruōm̧.
Pukōtļo̧k er. Katakin er. Im̧we er. Kajjitōk ippāer.
Tilmaake n̄an er naan ko an enjeļ eo n̄an Amulek—bwe kōjeram̧m̧on eo an Irooj enaaj pād ioer im m̧weo im̧weer.11 Kom̧ maron̄ bwilōn̄ n̄e kom̧ loe juon rijerbal eberan eo an Irooj eo me ilo bar juon wāween emaron̄ kar ittiņo wōt.
“Eo waween aō āinwōt Amulek?”
Ilo an jet iaad aikuj in bukōte juon Amulek, n̄an ro jet kajjitōk eo emaron̄ “Ewi wāween aō āinwōt Amulek?”
Bōlen em̧ōj am̧, ilo iiō ko remootļo̧k, erom kijek eo edikļo̧k ilo am̧ mour āinwōt rikaļoor. Bōlen kijek in kam̧ool ņe am̧ em̧ōj an marokļo̧k. Bōlen em̧o̧j am̧ kōttoļo̧k eok make jān anbwinnin Kraist. Bōlen em̧ōj am̧ oktak im inepata ak illu barāinwōt. Āinwōt jet ro jān Kabun̄ eo etto an Epesōs, emaron̄ m̧ōj am̧ etal jān “iakwe eo am kein kajuon”12—m̧ool ko indeeo relaudin̄din̄ an gospel eo an Jisōs Kraist.
Bōlen, āinwōt Amulek, kwojeļā ilo būruwōm̧ bwe Irooj eaar “kūr [eok] elōn̄ alen” botab kwe “kwar jab ron̄.”
Mekarta, Irooj ej lo ilo kwe ta eo ej loe ilo Amulek—maron̄ in oktak eo n̄an juon rijerbal eberan kōn juon jerbal aorōk aikuj kōm̧m̧an im juon naan in kam̧ool n̄an tilmaake. Elōn̄ jerbal ejjeļo̧k bar juon eņ emaron̄ leļo̧k āinwōt wāween in. Irooj em̧ōj an lōke eok kōn priesthood eo An ekwojarjar, eo ej kabwijere maron̄ in lan̄ im kotak ro jet. Ron̄jake kōn būruōm̧ im loor im̧we ko an Jetōb eo.
Ito-tak Eo An Juon Uwaan
Iaar m̧weiur kōn ito-itak eo an juon būratōr eo eaar kajjitōk ippān make, “N̄e Irooj ej kūr, inaaj ke ron̄?” Inaaj ņa etan būratōr in em̧m̧an David.
David eaar oktak n̄an Kabun̄ in 30 jima iiō ko remootļo̧k. Eaar jerbale juon an mijān innām kar katak jikuul in kakien. Ilo an kar katak im jerbal n̄an jipan̄ juon baamle em̧m̧an dettan, eaar itok jet meļeļe ko kōn Kabun̄ in me ekapoke. Eļak lapļo̧k an riiti meļeļe nana kein, eļapļo̧k an inepata. Ālkin jet iien ko, eaar kajjitōk n̄e emaron̄ joļo̧k etan jān ļo̧o̧k ko an Kabun̄ in.
Jān iien eo m̧aanļo̧k, āinwōt Alma ilo raan in jum̧ae ko an, David eaar joļo̧k eļap iien ilo an akwāāl ippān ro uwaan Kabun̄ in, boub ilo ekōnono ko ilo online, im ekajete tōmak ko aer.
Eaar kanooj in m̧ōkade ilo men in.
Juon iaan ro uwaan eaar akwāāl ippān inaaj ņa etan Jacob. Jakab ar jouj im kautieje David iien otemjej, bōtaab eaar barāinwōt pen ilo jojomar n̄an Kabun̄ in.
Ilo iiō ko remootļo̧k, David im Jacob raar ejake juon aero kautiej im m̧ōttā n̄an doon. David eaar jab jeļā bwe Jacob eaar jar kake David im eaar kōn tōmak ilo elōn̄ļo̧k jān jon̄oul iio ko. Eaar barāinwōt likūt etan ļeo mōttan n̄an jar ilo temple ko an Irooj im kōjatdikdik bwe būruwōn David enaaj meraļo̧k.
Ilo iien ko remootļo̧k, ilo rum̧wij, David eaar oktak. Eaar jino in kememej kōn kōņaan en̄jake an jitōb ko kar ippān, im eaar kememeje m̧ōņōņō eo eaar en̄jake ke eaar juon uwaan Kabun̄ in.
Āinwōt Alma, David eaar jab lukkuun meļo̧kļo̧ke m̧ool ko an gospel in eaar kaorōki kar juon iien. Im āinwōt Amulek, David eaar enjake an Irooj kajjieon̄ tōpare David eaar kiiō juon m̧ōttā ilo juon firm in law—juon jerbal eutiej. Eaar ejake juon etan āinwōt juon riekajet an Kabun̄ in, im eaar ļap an utiej būruōn n̄an kajjitōk an bar deļo̧n̄tok.
Mekarta, eaar wōnm̧aanļōk im an Seperd eo kepaakeļo̧k.
Eaar bōke ilo būruwōn eoon eo“A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej, im jab eņo̧uk kake, im Enaaj leļo̧k n̄an e.”13 Eaar jar, “Anij jitenbōro, ikōņaan bwe in juon eo Ekojarjar ilo Raan kein bar juon alen, botab elōn̄ aō kajjitok ko rej aikuj uwaak.”
Eaar jino ron̄jake unojdrikdrik ko an Jetōb im uwaak ko rōkōbōkakkak an ro m̧ōttanāinwōt an kar jab m̧oktaļo̧k. Juon ālkin eo juon, pere ko an raar erom tōmak, m̧ae āliktata eaar kile ke, bar juon alen, ej maron̄ en̄jake juon kam̧ool kōn Jisos Kraist im Kabun̄ eo An kar kōjepļaaktok.
Ilo iien eo, eaar jeļā ke enaaj maron̄ in anjo̧ ioon utiej bōro eo an im kōm̧m̧ane jabdewōt ta ko renaaj bōk n̄an bar ro̧o̧l tok n̄an Kabun̄ in.
Ālkin jet tōre ko, David eaar deļo̧n̄ ilo dānnin baptaij innām jino bōnbōn n̄an raan ko m̧ae an maron̄ ro̧o̧l tok kōjeram̧m̧an ko an.
Ij m̧ōņōņō in ripoot bwe ilo jam̧ōr eo ej mootļo̧k, jeram̧m̧on ko an David em̧ōj aer bar jepļaak n̄an ippān. Ej bar lukkun bōk kuņaan ilo Kabun̄ in im jerbal āinwōt juon rūkaki in Katak Gospel eo ilo ward eo an. Ej bōk aolep iien ko n̄an kōnnaan n̄an ro jet kōn oktak eo an, n̄an kamokļo̧k jorrāān eo eaar kom̧m̧ane, im n̄an kwaļo̧k kam̧ool kōn gospel eo im Kabun̄ eo an Jisos Kraist.
Kōjem̧ļo̧ke
Būratōr ro, ro m̧ōtta jitōnbōro, jān kappukōt, lo, kōketak, im reilo̧k ioon Amulek ro ilo ward im stake kein ad. Bōlen kwojeļā kōn juon. Bōlen kwojeļā juon.
Bōlen kwojeļā kōn juon. Bōlen kwojeļā juon.
Bōlen Irooj eļakkar unojdikdik n̄an eok, kōketake eok n̄an ro̧o̧l n̄an iakwe eo am̧ kein kajuon, kōjerbale kapeel ko am̧, erreo ilo am̧ kōjerbale priesthood eo am̧, im jerbal ikōjaan doon ippān Rikwojarjar ro jet ilo kepaakeļo̧k kōj n̄an Jisos Kraist im kalōke aelōn̄ in kiin̄ eo an Anij ilo laļ in.
Rilo̧mo̧r eo ad Ejeļā kwōj pād ia. Ejeļā būruōm̧. Ekōņaan lo̧mo̧oren eok. Enaaj pukōt waj eok. Kōppeļļo̧k būruwōm̧ n̄an E. Ej aō kōjatdikdik bwe ro em̧ōj aer jōbwābweļo̧k jān iaļ an mour in rikaļoor—emaron̄ kōn jet jon̄an ko reddik—renaaj ļōmņak kake em̧m̧an im jouj eo an Anij, loe kōn būruweer, katak jān Alma im Amulek, im ron̄jake naan in kooktak mour ko an Rilo̧mo̧r eo: “Itok, lore Eō.”
Ij kōketak kom̧ n̄an ron̄jake kūr eo, bwe ilo m̧ool n̄e kwonaaj kōm̧m̧ane kwonaaj bōk leen eo jān lan̄. Kōjeraam̧m̧an ko an Irooj renaaj bun̄leplep ioom̧ im m̧weo imōm̧.14
Kōn menin Ij kam̧ool im ij likūt aō kōjeram̧m̧an āinwōt juon Rijilōk an Irooj ilo etan Jisōs Kraist, amen.