Ikdeleel Em̧ool ilo Bōro
Kajojo iien ko raorōk ilo jar emaron̄ erom iien ko rekwojarjar im kwoj ajeļo̧k n̄an Jemed, ilo etan Nejin, kōn kajoor eo an Jetōb Kwojarjar.
Ilo iien ko reppen ilo mour in, jej jāmin make iaad kadedeļo̧k jerbal ko ad, n̄an pukōt mejļan apan̄ kein ad, n̄an jelm̧ae lōkabokbok ko ak kajjitōk ko ejjeļo̧k uwaakier. Jisōs Kraist ekar katakin “bwe armej ren jar iien otemjej, im jab n̄ate.” Eaar ba kake juon rikōjdat eo ejjab kautiej Anij bwe en ekajet E kōn an rikōjdat. Aolep raan, juon kōra eo ejako pāleen eaar itok n̄an ippān, kajjitōk bwe en ekajet e kōn an rikōjdat. Ālkin jet iien, riekajet eo ekar jab kabun̄ būruwōn kōrā in. Ak kōn an kōrā in tōmak im ikūtkūt an kajjitōk, riekajet eo ekar ļōmņak bwe, “A kōn an kōrā in ejako pāleen an̄ōte eō, inaaj ekajet kōn e, eļan̄n̄e jab āinwōt, kōn an itok makij enaaj kanooj kam̧ōk eō.”
Innām Jisōs ekar ba:
“Im Anij e jāmin ekaje kōn ro Ear kāālōt er, ro rej lam̧ōj n̄an E raan im bon̄ ke … ?
“Ij ba n̄an kom̧, enaaj m̧ōkaj An ekajet kōn er.”
Innām Irooj ej kajjitōk kajjitōk in: “Ijoke n̄e Nejin armej enaaj itok, Enaaj lo tōmak ioon laļ ke?”1
Jar ej juon men elukkuun aorōk n̄an kōkajoorļo̧k tōmak. Eļan̄n̄e Irooj enaaj bar itok, Enaaj ke lo juon armej eo ejeļā wāween jar ilo tōmak im eo epojak n̄an bōk lo̧mo̧o̧r? “Bwe ro otemjej rej kūr etan Irooj renaaj mour.”2 Kōj jej ro nejin Jemedwōj Ilan̄ eo ej iakwe kōj, im jej maron̄ m̧ōņōņō ilo ad kōnono ippān eļan̄n̄e jej jar “kōn juon bōro em̧ool, kōn lukkuun kōttōpar, im ewōr tōmak ilo Kraist”3 im kōm̧m̧an ekkar n̄an uwaak ko jej bōki jān unoojdikdik eo an Jetob Kwojarjar. Kōn tōmak jej jar, jej ron̄jake, im jej pokake, bwe jen maron̄ erom juon wōt ippān Jemed im Nejin.4
Jar ej juon men elukkuun aorōk n̄an kōkajoorļo̧k tōmak. Rilo̧mo̧o̧r ekar katakin:
“Kajjitōk, im naaj lewōj n̄an kom̧, kappukot im kom̧ naaj lo, kaļļaļļaļ, im naaj kapeļļo̧k n̄an kom̧:
“Bwe eo ej kajjitōk ej bōk, im eo ej kappukot ej lo, im eo ej kaļlaļlaļ naaj kapeļļo̧k n̄an e.”5
N̄e jej kōtmāne n̄an bōk, jej aikuj kajjitōk, kappukot, im kaļļaļļaļ. Ilo an kar kapukōt mool eo, Joseph Smith ekar riit, “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej im jab eņouk kake, im Enaaj leļo̧k n̄an e.”6 Ilo an jar ilo tōmak, lan̄ ko rekar peļļo̧k. Anij Jemed im Nejin, Jisōs Kraist, raar wanļaļtak ilo aiboojoj im kōnono n̄an Josep, im tōl epepen in tarlep in iien kein. Menin kabwilōn̄lōn̄ ilo kemour, kōjparok eo ekajoor, jeļāļo̧kjeņ ekwojarjar, jeerļo̧k bōd, im aenōm̧m̧an rej jet iaan uwaak ko rej itok n̄an kōj eļan̄n̄e jej kwaļo̧k “ad lukkuun m̧ool im ikdeleel ”7 ilo tōmak.
Jej jar n̄an Jemed ilo etan Rilo̧mo̧o̧r eo ad, Jisōs Kraist, kōn kajoor eo an Jetōb Kwojarjar, im kobaik aolep membōr in Anij ilo jar eo ad.
Jej jar n̄an Jemedwōj Ilan̄ im E wōt bwe E ej “Anij ilo lan̄, eo ej indeeo im ejjeļo̧k jem̧ļo̧kin, jān indeeo n̄an indeeo … , ribooje an lan̄ im laļ, im men ko otemjeļo̧k ilowaer.” Āinwōt Rikōm̧m̧an eo Ad, Ekar letok kien ko bwe jej “ren iakwe im jerbal n̄an E, eo wōt ej Anij emour im em̧ool, im bwe E aikuj in eo wōt im ren kabun̄-jar.”8
Ilo ami jar n̄an Jemedwōj Ilan̄ ilo tōmak, “Enaaj kaenōm̧m̧an kom̧ ilo en̄taan ko am̧, … [im kom̧ maron̄] im kwōjkwōj ioon iakwe eo An.”9 Būreejtōn Henry B. Eyring ekar kwaļo̧k bwe jar eo an jemān kōn juon eo ekar wōr kāānjer ippān ekar kōm̧m̧an bwen ļapļo̧k iakwe eo an ikōtaan Anij im ajri ro nejin:
“N̄e metak ko rej ļapļo̧k, kōm̧ ej lo ilo jibbon̄ ej bukwelōlō iturin peet eo. Ear lukkuun ļap an mōjņo in bar rool n̄an peet eo. Ekar ba n̄an kōm̧ ke ekar jar n̄an Jemadwōj Ilan̄ etke ej ļap an en̄taan ke aolep iien ej kajjeon̄ kōm̧m̧an em̧m̧an. Ekar ba bwe juōn uwaak em̧m̧an ekar itok n̄an e: ‘Anij ej aikuij ro nejin reperan.’
“Im ekar wōnm̧aanļo̧k im niknik n̄an jem̧ļo̧kin, kōjatdikdik bwe Anij ej iakwe e, ron̄jake e, im enaaj jipan̄ e. Ekar jeraam̧m̧an bwe emaron̄ kar jeļā ke ej dik im jāmin maron̄ meļo̧kļo̧k bwe juon Anij eo eļap an iakwe elukkuun epaak āinwōt juon jar.”10
Jej jar ilo etan Jisōs Kraist kōnke ad lo̧mo̧o̧r en pād ilo Kraist, im “bwe ejjeļo̧k juon āt ium̧in lan̄, im letok n̄an armej bwe jen mour ilo E.”11 Jen maron̄ itok n̄an Jemān ilo Eta, Jisōs Kraist12 kōnke E eo ej rijojomar ippān Jemān, eo ej akweļap kōn kom̧ im̧aan Mejān.13 Ekar en̄taan, toorļo̧k bōtōktōkin, im mej n̄an kōm̧anm̧an ankilan Jemād, im jouj eo an n̄an kōj bwe en kōppeļļo̧k iaļ n̄an kōj kajjojo n̄an ad bōk aenōm̧m̧an ilo mour in im mour indeeo ilo mour eo tok juon. Ejjab kōņaan bwe jen bar en̄tan ak ioone elōn̄ļo̧k mālijjon̄ jān jon̄an in je pād ie. Ekōņaan bwe jen oktakļo̧k n̄an e bwe en kapidodo ļo̧k eddo ko ad, kaenōm̧m̧an būruwōd, im n̄an karreoik kōj kōn kajoor eo an. Jejjab kōņaan ba pata Etan jān ekkatak im naan in ālij ko. Ilo am jar ilo ettā ilo etan JIsōs Kraist ekwojarjar rej jet wāween ko jej kwaļo̧k ad lukkuun iakwe, m̧ōņōņō ejjeļo̧k jem̧ļo̧kin, im ad pen, ikdeleel n̄an jar ilo ejja jekjek in an jar, im kōm̧m̧an āinwōt Ekar kōm̧m̧ane, bwe jen maron̄ āinwōt E.
Jej jar kōn kajoor eo an Jetōb Kojarjar kōnke “E eo ej kajjitōk ilo Jetōb ej kajjitōk ekkar n̄an ankilaan Anij.”14 Eļan̄n̄e jej jar kōn tōmak, Jetōb Kwojarjar eo enaaj tōl ļōmņak ko ad bwe naan ko ad ren em̧m̧an ekkar n̄an ankilaan Anij. “Jab kajjitōk, bwe kom̧in maron̄ kan̄i ilo jurjurmelea ko ami, a kajjitōk kōn juon pen eo jamin kōm̧akūti, bwe kom̧in naaj kōtļo̧k n̄an ejjeļo̧k kapo, a bwe kom̧in naaj jerbal n̄an Anij eo em̧ool im emour.”15
“Ejjab aorōk wōt bwe jen wāween jar, ak ebar aorōk bwe jen jeļā wāween bōk uwaak in jar ko ad, n̄an jeļā ta em̧m̧an im nana, n̄an pojak wōt, im maron̄ lo kōn juon visōn eo ealikkar im meļeļe kōn kōņaan eo ealikkar ilo ankilaan Anj im un ko rekkar n̄an kōj.”16
Būreejtōn Eyring ekar kwaļo̧k: “Elōn̄ aō jar rekar uwaak. Uwaak kein rekar lukkuun alikkar ke ta eo ikar kōņaan iaar jab jeļā kōnke kajoor in kōņaan jeļā ta eo Anij ej kōņaan. Ej iien eo im uwaak eo jen Jemedwōj Ilan̄ emaron̄ kōnono n̄an kōļmenļo̧kjeņ ko ad ilo ainikien elur im mera, unoojdikdik im emaron̄ ilo buruōd.”17
Ke Rilo̧mo̧o̧r eo ej deļo̧n̄e jikin kallip Gethsemane, Aō ekanooj būrom̧ōj, āinwōt n̄an mej. Ilo An lukkuun en̄taan, juon wōt ekar maron̄ reilo̧k n̄an E ej Jemān. Ekar akwelap, “Eļan̄n̄e e maron̄e en ilo̧k kab in jān Eō.” Ak Eaar wōnm̧aanļo̧k wōt, “A en jab ankil Aō, a ankil Am̧.”18 jekdo̧o̧n n̄e ejjeļo̧k An jerawiwi, Rilo̧mo̧o̧r eo ekar kūr n̄an bōk ioon “en̄taan kōn metak ko im kaen̄tanaan ko im kapo ko otemjeļo̧k,” ekoba metak ko im nan̄inmej ko an armej ro An. “[E] ekar en̄taan ekkar n̄an kanniōk bwe En maron̄ bōk Ioon jero̧wiwi ko an armej ro An, bwe En maron̄ jeorļo̧k bōd ko aer ekkar n̄an kajoor in lo̧mo̧o̧ren eo An.”19 Jilu alen ekar jar, “Jema, a ankil Am̧.”20 Kap eo kar jab bōke. Ilo ettā, tōmak ilo jar, E ekar kajoor im wōnm̧aanļo̧k im kadedeļo̧k mijen eo ekar kōpooje n̄an ad bōk lo̧mo̧o̧r, bwe jen maron̄ ukweļo̧k, tōmak, pokake, im bōk kōjeraam̧m̧an ko n̄an indeeo.
Uwaak in jar ko jej būki jen ad jar emaron̄ jab ta ko im jej kōņaan. Ak ilo iien ko repen, jar ko ad rej jet ko renaj jipan̄ kōj kōn iakwe im jouj. Ilo iien jej akweļap, jemaron̄ kōkajoorļo̧k kōj im jutak ioon need, wōnm̧aanļo̧k im kadedeļo̧k aolep ta ko jekar kallim̧ur bwe jenaaj kōm̧m̧ani. N̄an armej ro An im rej mour ilo iien kein reppen, “Būruōm̧i ren aenōm̧m̧an … ; bwe aolep kanniōk rej pād ilo Peiū; ikōn̄ wōt im jeļā ke N̄a Anij.”21
Eļan̄n̄e jej jar ippād make, ippān baam̧le ko ad, ilo m̧ōnjar eo, ilo tampeļ eo, ak jabdewōt ijoko jej pād ie; Eļan̄n̄e jej jar kōn bōro ko rerub im jetōb ko rettā, pukōt jeorļo̧k bōd, mālōtlōt jān lan̄, ak kajoor eo n̄an niknik n̄an jem̧ļo̧kin, jej jar aolep iien kōn aolepān būruwōd, leļo̧k mour ko ad n̄an Anij aolep iien n̄an mour ko ad im mour ko an ro rej pād ipeļaakid. Kōņaan ko ad rej itok ilo jetōb in m̧ōņōņō kōn kōjeraam̧m̧an ko rellōn̄ im m̧ōņōņō kōn katak ko jān mour im rej pād ilo būruwōd im dim ilo tōmak ilo Kraist, juon “juon kōjatdikdik emeram, iakwe n̄an Anij im armej otemjeļo̧k.”22
Jar ej juōn menin letok jān Anij. Jej jab aikuij in jebabwe ak make iaad. Ij kam̧ool bwe aolep iien ko raorōk ilo jar remaron̄ erom iien ko rekwojarjar im kwoj ajeļo̧k n̄an Jemād, ilo etan Nejin, kōn kajoor eo an Jetōb Kwojarjar. Ilo āt eo ekwojarjar etan Jisōs Kraist, amen.