Ebwe Ke Aō Em̧m̧an? Inaaj Ke Tōpare?
Eļan̄n̄e kwonaaj kajjieon̄ im jab jekpen ņae ak ellotaan—emakijkij ukweļo̧k im akweļap kōn tūriam̧o̧—enaaj “ke bwe am̧ em̧m̧an.”
Ro jeiū im jatū, ej juon kōjeram̧m̧an n̄an kōj n̄an kuk ippān doon n̄an ekkatak jān ro rikarejerān Irooj. Ejjab juon men aiboojoj ke kōn jon̄an an lōn̄ wāween ko Jemedwōj Ilan̄ ej tōl im kōjeram̧m̧an kōj? Elukkuun kōņaan bwe jān ro̧ol n̄an kapijuknen eo ad.
Kōn kōro̧ro in jouj ko āinwōt juon taktō edik ej kab diwōj ļo̧k jān jikuuļ in taktō, iaar bōk jerbal in kaminene taktō an ajri ilo juon būrookraam̧ ebun̄bun̄, eļap. Ke iaar ioon taktō ro jet, iaar en̄jake n̄a eo ejjab ļap jeļā im dik aō pojak iaan aolep. Iaar ļōmņak ejjeļo̧k wāween imaron̄ kar tōpar keidi n̄an aolepān kumi eo.
Ilo jino in allōn̄ eo kein kajilu am, iaar jijet ilo juon jikin nōōj ilo juon bon̄, jan̄ ippa make im kiki ļo̧k ke iaar kajjieo̧n̄ je peba ko n̄an kadeļo̧n̄ juon ļaddik jidikdik kōn nim̧oonia (pneumonia). Ijjan̄in kar kanooj en̄jake ebbwer ilo mour eo aō. Iaar jab jeļā ekōjkan kōmadm̧ōd niimoonia (pneumonia) n̄an juon ajri 10 an iiō. Iaar jino ļōmņake ta eo iaar kōm̧m̧ane ijo.
Ilo ejja iien eo wōt, juon iaan taktō ro eto an jerbal ekar likūt pein ioon aera. Eaar kajjitōk ippa ejiet aō kar pād, im ikar kwaļo̧k inepata eo aō im aō mijak. Uwaak eo an ekar ukōt mour eo aō. Eaar jiron̄ eō kōn jon̄an an im taktō ro jet eto aer jerbal bun̄ būruweer kōn n̄a im ekōjkan aer kar en̄jake kōn aō naaj erom juon taktō em̧m̧an. Ilo kōkaduki, eaar tōmak ilo n̄a ilo tōre eo ke iaar jab em̧ool tōmak ilo n̄a make.
Einļo̧k wōt en̄jake eo aō, emakijkij ad ron̄ an membōr ro ad kajjitōk, “Ebwe ke aō em̧m̧an āinwōt juon armej?” ak “Inaaj ke lukkuun tōparļo̧k aelōn̄ in kiin̄ an jiļiejtōļ?” Aaet, ejjeļo̧k men āinwōt “ebwe an em̧m̧an.” Ejjeļo̧k iaad emaron̄ in kar “bōk” ak “karbōb” ad lo̧mo̧o̧r, bōtaab ekkā n̄an ļōmņak eļan̄n̄e jej karbōb im̧aan Irooj, eo ekōjkan aō ukōt kajjitōk in.
Jet iien n̄e jej ilo̧k n̄an im̧ōnjar eo, jemaron̄ ebbwer em̧ool kōn kūr ko reļļap n̄an kōkōm̧anm̧an ļo̧k kōj make. Kōm̧ kar ikōn̄ wōt im ļōmņak, “Ijjab maron̄ kōm̧m̧ane aolepān men kein” ak “Ijjamin naaj erom juon armej em̧m̧an āinwōt aolepān armej rein.” Bōlen jej en̄jake āinwōt wōt ke iaar en̄jake ilo aujpitōļ bon̄ōn eo.
Jouj, ro jeiū im jatū jitōn bōro, jej aikuj bōjrak ad keidi kōj make n̄an ro jet. Jej kaen̄taan kōj make waan jān jiāe im keidi kōj n̄an ro jet. Ebōd ad ekajet aorōk-an juon make eo ad kōn men ko jej kōm̧m̧ani ak ejjeļo̧k ippād im kōn ļōmņak ko an ro jet. Eļan̄n̄e jej aikuj keidi kōj, jān keidik ekōjkan kar kōj jem̧aan n̄an kōj rainin—im em̧ool ta eo jekōņaan erom ilju im jekļaj. Ļōmņak eo wōt kōn kōj eaorōk ej ta eo Jemedwōj Ilan̄ ej ļōmņak kōn kōj. Jouj lukkuun kajjitōk Ippān kōn wāween an ļōmņak kōn eok. Enaaj iakwe im kajim̧we kōj bōtaab ejjamin kabbweer kōj; kabbweer ej kōl an Satan.
In kajju im alikkar. Uwaak ko n̄an kajjitōk ko “Ebwe ke aō em̧m̧an?” im “Inaaj ke tōpare?” rej “Aaet! Kwonaaj em̧m̧an” im “Aaet, kwonej tōpare to̧o̧n wōt am̧ naaj ukweļo̧k im jab jekpen ņae ak jum̧ae.” Anij an lan̄ ejjab juon am̧bai an jiļiejtōļ eo ej kappukōt jabdewōt kein jekpen ņae n̄an bōbrae kōj jān ad bōk kuņaad. E ej Jemed eweppān, eo an ikdeelel eļap jān jabdewōt men n̄an ad aolep bar jepļaak n̄an kapijuknen im mour Ippān ilo nememe in baam̧le indeeo. Em̧ool ekar letok Juon Wōt Nejin Emake Wōt bwe jabdewōt en jab jako ak en bōk mour indeeo!1 Jouj tōmak, im jouj kōjatdikdik im aenōm̧m̧an jān, m̧ool indeeo in. Jemedwōj Ilan̄ ekōņaan bwe jen tōprak! En̄in ej jerbal eo An im aiboojoj eo An.2
Em̧m̧an ippa wāween eo Būreejtōn Gordon B. Hinckley ekar katakin pedped in katak in. Iaar ron̄ an ba ilo jet iien ko, “Ro jeiū im jatū, aolepān ta eo Irooj ej kōtmāne jān kōj ej n̄an kajjieon̄, bōtaab kwoj aikuj in lukkuun kajjieon̄!”3
“Lukkuun kajjieon̄” ej meļeļe in kōm̧m̧ane ijo em̧m̧an tata jemaron̄e, kile ia eo jej aikuj kōkōm̧anm̧an ļo̧k, innām bar kajjieon̄. Kōn āliji ilo ad kōm̧m̧ane menin, jej epaake ļo̧k im epaake ļo̧k Irooj; eļap ļo̧k im ļap ļo̧k ad en̄jake Jetōb eo An,4 im jej bōk eļap ļo̧k tūriam̧o̧ eo An, ak jipan̄.5
Jet iien ij ļōmņak jejjab kile ewi jon̄an an ļap an Irooj kōņaan jipan̄ kōj. Ij iakwe naan ko an Elder David A. Bednar, eo ekar ba:
“Elōn̄ wōt iaad ealikkar an meļeļe bwe Pinmuur eo ej n̄an rijerawiwi ro. Ijjab kanooj jeļā, mekarta, bwe jen jeļā im meļeļe bwe Pinmuur eo ej barāinwōt n̄an rikwojarjar ro. …
“… Pinmuur eo ej letok jipan̄ n̄an kōj n̄an anjo̧ im joļo̧k nana im n̄an kōm̧m̧an im erom em̧m̧an. …
“‘… ej … kōn jouj eo an Irooj bwe kajjojo … ej bōk kajoor im jipan̄ n̄an kōm̧m̧ani jerbal ko rem̧m̧an me rejjab maron̄ in kar [kōm̧m̧ani]. … Jouj in ej juon kajoor in kōmaron̄ …’ [Bible Dictionary, “Grace”; naan eo eaorōk kar kobaiktok] … ak jipan̄ jān lan̄ n̄an kajjojo iaad ilo lukkuun aikuji n̄an karbōb n̄an aelōn̄ in kiin̄ an jiļiejtōļ.”6
Im aolepān ta eo jej aikuj kōm̧m̧ane n̄an bōke jipan̄ in jān lan̄ ej n̄an kajjitōk kake innām jerbale en̄jake ko rejim̧we jej būki.
Ennan eo em̧m̧an ej bwe eļan̄n̄e jej m̧ool in ukweļo̧k, jerawiwi ko ad m̧okta rejjamin naaj dāpij kōj jān ad mour ijo ilōn̄ tata. Moronai ej jiron̄ kōj kōn rijerawiwi ro ilo raan ko an: “A jon̄an emmakijkij in aer ukeļo̧k im kappukot jeorļo̧k bōd, kōn jibadbad em̧ool, kar jeorļo̧k aer bōd.”7
Im Irooj E make eaar ba kōn rijerawiwi:
“Eļan̄n̄e e ej kwaļo̧k bōro kōn jero̧wiwi ko an im̧aam̧ im Im̧aō, im ukeļo̧k ilo m̧ool in būruōn, e kwōnaaj jeorļo̧k ruōn, im Inaaj jeorļo̧k an bōd barāinwōt.
“Aaet, im jon̄an emakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō.”8
Eļan̄n̄e jenaaj m̧ool in ukweļo̧k, Anij enaaj lukkuun jeorļo̧k ad bōd, jekdo̧o̧n n̄e jaar kōm̧m̧ane ejja jerawiwi eo wōt alen im bar alen. Āinwōt Elder Jeffrey R. Holland ekar ba: “Jekdo̧o̧n ewi lōn̄ in iien ko kwoj ļōmņak kwar likjab, jekdo̧o̧ņ ewi lōn̄ in bōd ko kwoj en̄jake kwar kōm̧m̧ani … , Ij kam̧ool bwe kwoj jan̄in itok itak eļapļo̧k jān iakwe eo ekwojarjar maron̄ tōpare. Ejjab pidodo n̄an kwe bwe kwon maron̄ wanlaļļo̧k jān ilaļ in meram in Pinmuur eo an Kraist ej rom̧aak.”9
Menin ejjab ilo jabdewōt jekjek me jerawiwi EMMAN. Jerawiwi iien otemjej ewōr kaje ko ie. Jerawiwi iien otemjej ej kakkure im kōmetak jim̧or rijerawiwi eo im ro rejelet jān jerawiwi ko an. Im m̧ool in ukweļo̧k ejjab pidodo.10 Ijello̧kin, jouj meļeļe bwe men̄e Anij ej bōk ļo̧k bōd eo im māār in jerawiwi ko ad n̄e jej m̧ool in ukweļo̧k, E emaron̄ jab m̧ōkaj an bōk ļo̧k aolep kaje ko an jerawiwi ko ad. Jet iien remaron̄ pād wōt ippād n̄an ilo aolepān mour ko ad. Im kain jerawiwi eo enana ej jerawiwi eo ļōmņake im̧aan ļo̧k eo juon ej ba, “Imaron̄ jerawiwi kiiō im ukweļo̧k tokālik.” Ij tōmak bwe menin ej juon kajirere epen an katok im en̄taan ko an Jisōs Kraist.
Irooj Make eaar kwaļo̧k, “Bwe N̄a Irooj ijjab maron̄ kalimejek jabdewōt jero̧wiwi n̄an jidik.”11
Im Alma eaar kean̄, “Lo Ij ba n̄an eok jerawiwi ejjan̄in kar m̧ōņōņō.”12
Juon iaan un ko me ennaan eo an Alma ej lukkuun m̧ool ej bwe kōn ālij jerawiwi, jej kōttoļo̧k kōj make jān Jetōb eo, ebbweer, innām bōjrak jān ukweļo̧k. Bōtaab ij bar āliji, kōn Pinmuur eo an Rilo̧mo̧o̧r eo, jemaron̄ ukweļo̧k im lukkuun jeorļo̧k ad bōd, ilo tōre eo im ukweļo̧k ad em̧ool.
Ta eo jejjab maron̄ kōm̧m̧ane ej jekpen ņae ijello̧kin ukweļo̧k. Ejjamin naaj jerbal n̄an kapolel ad make ilo jerawiwi ko ad kōn ba, ekanooj pen n̄an n̄a, kōn menin Ej watōk eō āinwōt n̄a.” “Lukkuun kajjieon̄” meļeļein jej lukkuun kajjieon̄ wōt m̧ae iien jej tōpar jon̄ak eo an Irooj, eo alikkar an kōmeļeļeik kōj ilo kajjitōk ko kajjitōk ippād n̄an maron̄ bōk juon peba in mālim an tampeļ.
Men eo bar juon me enaaj ilo m̧ool dāpij kōj jān lan̄ im kōjepeļļo̧k kōj jān jipan̄ eo jej aikuji kiiō ej jum̧ae. Jān bok in Moses, jej katak bwe Setan kar jolaļtak jān lan̄ kōn jum̧ae.13 Jej pād ilo jum̧ae jabdewōt iien jej ba ilo būruwōd, “Ijjab aikuji Anij, im ijjab aikuj in ukweļo̧k.”
Āinwōt juon taktō in jikin rinan̄inmej edo̧lool, ijeļā bwe n̄e juon ej m̧akoko in bōk kōm̧admōd ko n̄an kōmouri, emaron̄ tōlļo̧k n̄an mej. Āinļo̧k wōt, n̄e jej jum̧ae Anij, jej kōjekdo̧o̧n jipan̄ im kōjatdikdik eo, eo ej Jisōs Kraist, eo ej tōl n̄an mej ilo jetōb. Ejjeļo̧k iaad emaron̄ kōm̧m̧ane menin kōn kajoor eo ad make. M̧ool eo ej bwe ejjeļo̧k iaad enaaj indeeo erom “ebwe an em̧m̧an,” ijello̧kin kōn tōllo̧ke ko im tūriam̧okake an Jisōs Kraist,14 ak kōn an Anij kautiej anemkwōj in kālet eo ad, jejjab maron̄ barāinwōt mour kōn ad jab kajjieon̄. En̄in ej wāween jon̄e kōtaan tūriam̧o̧ im jerbal rej jerbal. Ewōr ippād kōjatdikdik in ilo Kraist kōnke Ekōņaan jipan̄ im ukōt kōj. Ilo m̧ool, em̧ōj An kadede jipan̄ eok. Bōjrak im kejōkļo̧kjeņ im kile An jipan̄ ilo mour eo am̧.
Ij kam̧ool n̄an kom̧ bwe eļan̄n̄e kom̧ naaj lukkuun kajjieon̄ im naaj jab jekpen ņae ak jum̧ae, kōmakijkij ukweļo̧k im akweļap kōn jouj, ak jipan̄ an Kraist, kwonaaj erom “ebwe im em̧m̧an,” karbōb im̧aan Irooj; kwonaaj tōprak aelōn̄ in kiin̄ an jiļiejtōļ weppān ilo Kraist; im kwonaaj bōk kōjeram̧m̧an ko im aiboojoj im lan̄lōn̄ eo me Anij ej ikdeelel kake n̄an kajjojo ro Nejin raorōk—ekoba eļap tata kwe im n̄a. Ij kam̧ool bwe Anij ej mour im ekōņaan bwe jen jepļaak n̄an kapijuknen eo eo ad. Ij kam̧ool bwe Jisōs ej mour. Ilo āt eo ekwojarjar an Jisōs Kraist, amen.