Jisōs ej kōnono ippān Nicodemus

Pāpode 6–12

Jon 2–4

“Kom̧win Bar Ļotak”

Ilo am̧ riiti Jon 2–4, Jetōb enaaj katakin eok men ko kōn oktak eo am̧ make. Je kōn im̧we ko An. Kwomaron̄ lo ļōmņak ko jet an jetōb itok jān itia in ekkatak ko ilo laajrak in.

Je En̄jake ko Rej Im̧we Eok

Ilo iien kwojkwoj in m̧are eo ilo Cana, Kraist ekar ukōt dān n̄an wain—juon m̧akūtkūt me Jon ekar likūt etan “jinoin menin bwilōn̄” (Jon 2:11). Em̧ool menin ilo elōn̄ ļo̧k jān juon un ak meļeļe ko. Ilo an menin kar menin bwilōn̄ eo jinoin tata Jisōs ekar kōm̧m̧an ilubwiljin armej ro, emaron̄ bar juon kōkaļļe kōn bar jinoin juon menin bwilōn̄—wāween an buruōd oktak ilo ad erom̧ āinwōt ad Rilo̧mo̧o̧r. Menin bwilōn̄ in ilo mour ej jino kōn kālet eo n̄an ļoor Jisōs Kraist, n̄an ukōt im mour juon mour em̧m̧anļo̧k kōn E. Menin bwilōn̄ in emaron̄ lukkuun ukōt mour bwe “bar ļotak” ej juon iaan wāween ko rem̧m̧antata n̄an kōmeļeļeiki (Jon 3:7). Ak bar ļotak ej jinoin iaļ n̄an mour āinwōt rikaļoor. Naan ko an Kraist n̄an kōrā in Samaria eo ilo aibōj laļ eo ej kakeememej kōj bwe eļan̄n̄e jej wōnm̧aanļo̧k wōt ilo iaļ in, āliktata gospel eo enaaj erom̧ “aibōj” ilo kōj, “to̧o̧rtok n̄an mour indeeo” (Jon 4:14).

pija ej bōk jikin ekkatak an juon make

Ļōmņak ko n̄an Ekkatak Jeje Ko Rekwojarjar Ippam̧ Make

Jon 2:1–11

Menin bwilōn̄ ko an Jisōs Kraist “kwaļo̧k An aiboojoj.”

Ilo am̧ riit kōn Rilo̧mo̧o̧r ilo an ukōt dān n̄an wain ilo Jon 2:1–11, kwomaron̄ bōk ļōmņak eļapļo̧k ilo am̧ ļōmņak kōn kōļmenļo̧kjeņ an kajjojo armej ro rekar pād ijeņ, ekoba Meri, rikaļoor ro, im ro jet. Eļan̄n̄e kwon kar kam̧oole m̧akūtkūt ko me kar kōmeļeļeiki ijin, ta eo kwon kar bwilōn̄ kake kō Jisōs? Ta menin bwilōn̄ eo ej katakin eok kōn E?

Jon 3:1–21

Ij aikuj bar ļotak bwe in deļon̄e aelōn̄ in Anij.

Ke Nicodemus ekar itok n̄an Jisōs e wōt, ekar juon armej eo ej mejmej karuo wōt bwe en jab pād ilo jorreen. Tokālik, ijoke, ekar jojomar e Jisōs ilubwiljin armej (lale Jon 7:45–52) im kar kobaļo̧k ippān ritōmak ro ilo iien kalūb eo an Rilo̧mo̧o̧r (lale Jon 19:38–40). Ta katak ko me kwoj loe ilo Jon 3:1–21 me emaron̄ kar im̧we Nicodemus n̄an ļoor Jisōs im bar ļotak?

Rikanaan Josep Smith ekar katakin, “Bar ļotak, ej itok jān Jetōb an Anij kōn kain̄i ko” (Teachings of Presidents of the Church: Joseph Smith [2007], 95). Ta eddo eo am̧ kōn peptaij im kapen—bar “ļotak jān dān im jetōb” (Jon 3:5)—ej kōm̧m̧an ilo am̧ bar ļotak? Ta eo kwoj kōm̧m̧ane n̄an wōnm̧anļo̧k wōt kōn jerbal in oktak in? (lale Alma 5:11–14).

Bar lale Mosaia 5:7; 27:25–26; David A. Bednar, “Kom̧win Bar Ļotak,” Liaona, Māe 2007, 19–22.

Jon 3:16–17

Jemedwōj Ilan̄ ej kwaļo̧k iakwe eo An n̄an eō kōn Jisōs Kraist.

Elder Jeffrey R. Holland ekar katakin, “M̧ool eo m̧oktata eļap an aolep indeeo ej bwe Anij ej iakwe kōj kōn aolepān buruōn, maron̄, ļōmņak im kajoor” (“Ilju Irooj Enaaj Kōm̧m̧an Men in Bwilōn̄ ko Ippāmi.,” Liaona, Māe 2016, 127). Ewi wāween am̧ kar en̄jake iakwe eo an Anij itok jān menin letok eo an Eo Nejin?

Kwojkwoj eo ej letok juon iien n̄an kejokļo̧kjeņ kōn iakwe eo an Anij im menin letok eo an Eo Nejin. Al in kwojkwoj rōt eo ej jipan̄ eok en̄jake iakwe in? Ta eo kwomaron̄ kōm̧m̧ane n̄an kōm̧m̧an bwe kwojkwoj eo en ļap ļo̧k meļeļein?

Ilo am̧ wōnm̧aanļo̧k wōt im riiti katak ko im iien ko eo an Jisōs, kajjitōk ippam̧ make wāween an men kein kwoj riiti jipan̄ eok meļeļe im en̄jake iakwe eo an Anij.

Jon 4:24

Anij ej ke juon jetōb?

Jet remaron̄ pok kōn naan eo an Jisōs ke Anij ej juon jetōb. Ukok eo an Josep Smith ilo eoon in ej letok juon kam̧ool eaorōk: “Bwe n̄an rein Anij em̧ōj an kallim̧uri Jetōb eo An” (ilo Jon 4:24, footnote a). Revelesōn ko raan kein rej barāinwōt bwe Anij ewōr juon ānbwin im di (lale Katak im Bujen Ko 130:22–23; bar lale Jenesis 5:1–3; Hibru 1:1–3).

Jon 4:5–26

Kraist ej letok n̄an eō dān in mour eo An.

Ta meļeļein naan eo an Jisōs ke Ekar ba n̄an kōrā in Samaria eo ke jabdewōt eo ej daak jān dān E ej ejamin bar maro? Ewi wāween an gospel eo āinwōt dān in mour?

le in dān

Gospel eo an Kraist ej dān in mour me ej kōmourur jetōb ko ad.

Juon iaan ennaan ko an Rilo̧mo̧o̧r n̄an kōrā in Samaria eo ej bwe wāween ad kabun̄ jar eaorōk ļo̧k jān ijo jej kabun̄ jar ie (lale Jon 4:21–24). Ta eo kwoj kōm̧m̧ane n̄an “kabun̄ n̄an Jemeri ilo Jetōb im ilo m̧ool”? (Jon 4:23).

Bar lale Unin Tōl eo n̄an Jeje Ko Rekwojarjar, “Worship,” scriptures.ChurchofJesusChrist.org; Dean M. Davies, “The Blessings of Worship,” Liaona, Nob. 2016, 93–95.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Nokon in Jota an Baam̧le

Jon 2–4.Ilo an baam̧le eo am̧ riiti jebta kein ilo wiik in, lukkuun lale wāween an Rilo̧mo̧o̧r kar kōjerbal men ko kajjojo raan—ļotak, kōto, dān, im m̧ōn̄ā—n̄an katakin m̧ool ko an jetōb. Ta men ko ilo m̧weo im̧ōm̧ me kwomaron̄ kōjerbale n̄an katakin m̧ool ko an jetōb?

Ilo am̧ ekkatak jebta kein, ļōmņak in alooje bitio kein ippān doon me ej kwaļo̧k kōn m̧akūtkūt: “Jisōs ar ukot dān n̄an wain,” “Jisōs ar kaddeoik Tampeļ,” “Jisōs ar katakin kōn bar ļotak,” im “Jisōs ar katakin Kōrā in Samaria eo” (ChurchofJesusChrist.org).

Jon 2:13–17.Ta im̧we ko rejjab erreo me baam̧le eo am̧ eaikuj kattoļo̧ki bwe en erom̧ juon jikin erreo—āinwōt tampeļ eo? Ta eo kwonaaj kōm̧m̧ane n̄an kōjparoki men kein?

Jon 3:1–6.Kōnono ippān baam̧le eo am̧ kōn menin bwilōn̄ ko kōn bōroro̧ im ļotak—jerbal in ejaake juon armej emour im e māletlet. Jisōs ekar katakin bwe jej aikuj bar ļotak m̧okta jān ad deļon̄e aelōn̄ in Anij. Etke bar ļotak ej juon waanjon̄ak em̧m̧an n̄an oktak eo me emenin aikuj n̄an kōj m̧okta jān ad deļon̄e aelōn̄ in kiin̄ eo an Anij? Ewi wāween ad en̄jake ta eo ej kōm̧m̧an ilo aer bar ļotak ilo jetōb?

Jon 3:16–17.Kūr ro uwaan baam̧le eo n̄an bar ba eoon ko ilo naan ko an make tarin ke rekar kōmeļeļeiki n̄an juon m̧ōttan. Ewi wāween an Jisōs Kraist kar jipan̄ kōj en̄jake iakwe an Anij?

Jon 4:5–15.Ta eo Rilo̧mo̧o̧r ej katakin kōj ke Ekar keidi gospel eo An n̄an dān in mour? Bolen baam̧le eo am̧ emaron̄ lale dān ko rej toor im kōmeļeļeik tokjen dān eo. Etke jej aikuj idaak dān aolep raan? Ilo wāween ta gospel eo an Jisōs Kraist ej āinwōt “aibōj ilo e im naaj to̧o̧rtok n̄an mour indeeo”? (Jon 4:14).

N̄an ļōmņak ko reļļapļo̧k ikkijeen katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “God’s Love,” Children’s Songbook, 97.

Kōkōm̧anm̧anļo̧k Am̧ Ekkatak Ippam̧ Make

Pukot kōkaļļe ko. Jeje ko rekwojarjar rej kōjerbal m̧weiuk ko, m̧akūtkūt ko, ak jerbal ko me rej bōk jikin m̧ool ko an jetōb. Kōkkaļļe kein remaron̄ kōļapļo̧k meļeļe eo am̧ kōn katak in. N̄an waanjon̄ok, Rilo̧mo̧o̧r ekar keidi oktak tok n̄an bar ļotak.

Jisōs im kōrā in Samaria eo ilo aibōj laļ eo

Dān in Mour, jān Simon Dewey