6–12 Māʻasi

Mātiu 9–10; Maʻake 5; Luke 9

“Ko e Toko Hongofulu Mā Toko Ua ʻEni Naʻe Tuku Atu ʻe Sīsuú”

ʻI hoʻo lau ʻa e Mātiu 9–10; Maʻake 5; mo e Luke 9, te ke ala maʻu ha ngaahi ueʻi mei he Laumālie Māʻoniʻoní. ʻE lava ke tokoni atu ʻa e ngaahi ueʻi fakalaumālie ko ʻení, fakataha mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e fokotuʻutuʻu ko ʻení, ki hoʻo teuteu ke faiakó.

Fakaafeʻi e Feʻinasiʻakí

Fakaafeʻi e fānaú ke nau vahevahe ha meʻa naʻa nau fai ke tokoni ki ha taha kehe he uiké ni. Ko e hā naʻe fai ʻe he ʻEikí ke tokoniʻi ai e niʻihi kehé?

Akoʻi e Tokāteliné: Fānau Iiki Angé

Mātiu 9:18–30; Maʻake 5:22–43

‘Oku maʻu ʻe Sīsū e mālohi ke fakamoʻui au.

Naʻe toutou fakahaaʻi ʻe he Fakamoʻuí ʻa Hono mālohi ke fakamoʻui ʻa kinautolu naʻe tui kiate Iá. Te ke lava ʻo tokoni ki he fānau ʻokú ke akoʻí ke langaki ʻenau tui ki Hono mālohi faifakamoʻuí.

Ngaahi ʻEkitivitī ʻe Ala Fakahokó

• Talanoa ki he fānaú ʻa e talanoa ki he ʻofefine ʻo Sailosí (vakai ki he Maʻake 5:22–23, 35–43). ʻI he taimi totonu ʻi he talanoá, lau ʻa e folofola ʻa Sīsū “ʻoku ou pehē kiate koe, tuʻu hake” (veesi 41), pea fakaafeʻi ʻa e fānaú ke nau tuʻu ki ʻolunga. Tokoni ke mahino ki he fānaú ʻoku maʻu ʻe Sīsū ʻa e mālohi ke fakamoʻui ʻa e kakaí mo foaki ʻa e moʻui taʻengatá kiate kitautolu.

• Fakaʻaliʻali ange ha fakatātā ʻo e talanoa ʻi he Mātiu 9:20–22 lolotonga hoʻo lau e ngaahi veesi ko ʻení. Tokoniʻi e fānaú ke nau ako maʻuloto e kupuʻi lea “Kuo fakamoʻui koe ʻe hoʻo tuí” (veesi 22). Te ke lava ʻo fai ʻeni ʻaki hono vahe ki he fānau takitaha ha foʻi lea, pea tuku leva ke nau toutou lea ʻaki ʻenau ngaahi leá. Naʻe fakahaaʻi fēfē ʻe he fefiné ʻokú ne tui kia Sīsū Kalaisi? Ko e hā ha meʻa ʻe lava ke tau fai ke fakahaaʻi ʻaki ʻetau tui kia Kalaisí?

• Kole ki he fānaú ke kuikui honau matá pea fakafanongo ki hoʻo laukonga mei he Mātiu 9:27–30. ʻI hoʻo lau fekauʻaki mo hono fakamoʻui ʻe Sīsū e kau tangata kuí, fakaafeʻi e fānaú ke ʻāʻā honau matá. Fakaafeʻi ʻa e fānaú ke nau talanoa fekauʻaki mo e ongo te nau maʻu kapau naʻe fakamoʻui kinautolu ʻe Sīsū.

• Fakaʻaongaʻi ʻa e peesi ʻekitivitī ʻo e uike ní ke tokoni ki he fānaú ke nau ako ʻa e talanoa ʻo hono fokotuʻu ʻe he Fakamoʻuí ʻa e ʻofefine ʻo Sailosí mei he maté.

Falala ki he ʻEikí, tā ʻa Liz Lemon Swindle

Mātiu 10:1–10

Naʻe ui ʻe Sīsū e Kau ʻAposetolo ʻe Toko Hongofulu Mā Uá pea foaki kiate kinautolu e mālohi ke fai ʻa ʻEne ngāué.

ʻOku ʻilo nai ʻe he fānau ʻokú ke akoʻí, ʻoku ʻi ai ʻetau Kau ʻAposetolo ʻe toko hongofulu mā ua he kuongá ni? Te ke lava fēfē ʻo fakaʻaongaʻi e ngaahi veesi ko ʻení ke akoʻi kiate kinautolu fekauʻaki mo e mahuʻinga ʻo e kau ʻAposetolo ʻi he onopōní mo e meʻa ʻoku ui kinautolu ke nau faí?

Ngaahi ʻEkitivitī ʻe Ala Fakahokó

• Fakamatalaʻi fakanounou e Mātiu 10:1–10 ʻi ha ngaahi lea faingofua. Fakamatalaʻi ange naʻe ui ʻe Sīsū e Kau ʻAposetoló ke tokoni kiate Ia ʻi hono langa hake Hono Siasí. Tuku ki he fānaú ke nau lau e tokolahi ʻo e Kau ʻAposetolo ʻi he fakatātā Ko e Fakanofo ʻe Kalaisi ʻa e Kau ʻAposetoló (Tohi Fakatātā ʻo e Ongoongoleleí, fika 38) pea mo ha laʻitā ʻo e Kōlomu ʻo e Kau ʻAposetolo ʻe Toko Hongofulu Mā Ua lolotongá (vakai ki he ChurchofJesusChrist.org pe ko ha pulusinga konifelenisi lahi ʻo e Liahona). Fakamatalaʻi ange ʻoku tau maʻu e kau ʻAposetolo ʻe toko hongofulu mā ua ʻi he kuongá ni, ʻo hangē pē ko ia ʻi he taimi ʻo Sīsuú. Vahevahe hoʻo fakamoʻoni ki he kau ʻAposetolo ʻa e ʻEikí pea mo ha meʻa kuo nau toki akoʻi kimuí ni.

• Fufuuʻi takai ʻi he lokí ha ʻū tā ʻo e kau ʻAposetolo he taimi ní (vakai ki ha makasini fakamuimui ʻo e konifelenisi lahí ʻi he Liahona ki he ʻū taá). Fakaafeʻi e fānaú ke nau fekumi e ʻū fakatātaá, pea talanoa ange kiate kinautolu kau ki ha kiʻi meʻa siʻi fekauʻaki mo e ʻAposetolo takitaha.

• Fakaafeʻi ha tamasiʻi pe taʻahine ke ne puke hake ha fakatātā ʻo e Kau Palesitenisī ʻUluakí mo ha fakatātā ʻo e Kau ʻAposetolo ʻe Toko Hongofulu Mā Uá. Kole ki he tokotaha ko iá ke ne tataki takai e fānaú ʻi he lokí ki ha fakatātā ʻo Sīsū. Fakamoʻoniʻi ange ʻoku tataki kitautolu ʻe he kau palōfitá mo e kau ʻaposetoló kia Sīsū Kalaisi.

Akoʻi e Tokāteliné: Fānau Lalahi Angé

Mātiu 9:18–30; Maʻake 5:22–43

‘Oku maʻu ʻe Sīsū e mālohi ke fakamoʻui au.

ʻE lava ke tokoni hono lau e ngaahi talanoa ʻo hono fakamoʻui ʻe he Fakamoʻuí e kakaí, ke langaki ai e tui ʻa e fānau ʻokú ke akoʻí kiate Ia. ʻE lava foki ke tokoni e ngaahi talanoa ko ʻení ke nau ongoʻi ʻEne manavaʻofá mo e ʻofá.

Ngaahi ʻEkitivitī ʻe Ala Fakahokó

• Lau fakataha e ngaahi talanoa ʻo hono fakamoʻui ʻe Sīsū ʻa e kakaí ʻa ia ʻoku maʻu ʻi he Mātiu 9:20–22, 27–30 mo e Maʻake 5:22–23, 35–43. Naʻe fakahaaʻi fēfē nai ʻe he kakai ʻi he talanoa ko ʻení ʻa ʻenau tui kia Sīsū Kalaisí? Ko e hā ʻoku tau ako mei he ngaahi talanoa ko ʻení fekauʻaki mo e Fakamoʻuí?

• Fakaafeʻi e fānaú ke nau vahevahe ʻenau ngaahi aʻusia ʻi he taimi ne nau maʻu ai, pe ko ha tokotaha ʻoku nau ʻilo, ʻa e tāpuaki ʻo e lakanga fakataulaʻeikí ki hono fakamoʻui ʻo e mahakí. Naʻe fakamoʻui pe tāpuakiʻi fēfē nai kinautolú? Fakamatalaʻi ange ko e taimi ʻe niʻihi ʻoku ʻikai ko e finangalo ʻo e ʻEikí ha fakamoʻui fakaofo, ka ʻe kei lava pē ke tāpuekina kitautolu ʻe Heʻene ʻofá mo e fakafiemālié.

Mātiu 10:1–10

ʻE lava ke akoʻi au ʻe he Kau ʻAposetolo ʻe Toko Hongofulu Mā Uá fekauʻaki mo Sīsū.

ʻE tokoni fēfē ʻa e ako fekauʻaki mo e Kau ʻAposetolo ʻe Toko Hongofulu Mā Ua ʻi he kuonga ʻo Sīsuú, ke mahino lelei ange ai e ngaahi meʻa ʻoku fai ʻe he Kau ʻAposetolo ʻe Toko Hongofulu Mā Ua ʻi hotau kuongá?

Ngaahi ʻEkitivitī ʻe Ala Fakahokó

• Fakaʻaliʻali ha ʻū fakatātā ʻo e Kau ʻAposetolo ʻi he kuonga ʻo Sīsuú mo hotau kuongá (vakai Ko e Fakanofo ʻe Kalaisi ʻa e Kau ʻAposetoló, [Tohi Fakatātā ʻo e Ongoongoleleí, fika 38] mo ha makasini fakamuimui ʻo e konifelenisí ʻi he Liahona). Kole ki he fānaú ke nau lau ʻa e Mātiu 10:7 ke ʻiloʻi pe ko e hā e meʻa ʻoku fai ʻe he kau ʻAposetoló (vakai foki, Luke 9:1–2, 6; Tokāteline mo e Ngaahi Fuakava 107:23).

• Fakaafeʻi ʻa e fānaú ke nau hiki ʻi he palakipoé ʻa e lahi taha ʻo e ngaahi hingoa ʻo e kau fuofua ʻAposetoló te nau lava ʻo manatuʻí. Kole ange leva ke nau lisi ki he tokolahi tahá ʻa e kau ʻAposetolo moʻui te nau lava ʻo manatuʻí. Tuku ke nau fakatatau ʻenau lisí ki he Mātiu 10:2–4 mo ha pulusinga kimuí ni ʻo e konifelenisí ʻi he Liahona. Te ke lava foki ʻo fai ha kiʻi vaʻinga fakatauhoa ʻa ia ʻoku fakatauhoa ai ʻe he fānaú ʻa e hingoa ʻo e ʻAposetolo moʻui takitaha mo hono laʻitaá. ʻE lava ke maʻu ʻa e ʻū fakatātā ko ʻení ʻi he ChurchofJesusChrist.org.

• Fakaafeʻi ha fānau ʻe niʻihi ʻi ha ngaahi ʻaho kimuʻa ʻi he kalasí, ke nau haʻu mateuteu ke vahevahe ha talanoa ne fakahoko ʻe ha taha ʻo e kau ʻAposetolo moʻuí (vakai ki he ngaahi makasini Liahona ki ha ngaahi fakakaukau). Naʻe fakaʻaongaʻi fēfē ʻe he ʻAposetolo ko iá ʻa e talanoá ke ueʻi fakalaumālie kitautolu ke tau hoko ʻo tatau ange mo e Fakamoʻuí?

• Vahevahe ki he fānaú ha ngaahi sīpinga ʻo e ngaahi fakamoʻoni ʻa e kau ʻAposetolo ʻo e kuonga ní, kia Kalaisí (vakai ki he ngaahi pōpoaki fakamuimuitaha ʻo e konifelenisi lahí pe “Ko e Kalaisi Moʻuí: Ko e Fakamoʻoni ʻa e Kau ʻAposetoló” [ChurchofJesusChrist.org]).

• Tokoniʻi e fānaú ke nau ako maʻuloto mo mahino kiate kinautolu e Tefito ʻo e Tuí 1:6.

Luke 9:23–25

ʻOku fie maʻu ʻa e feilaulaú ki he muimui kia Sīsū Kalaisí.

Te ke tokoni fēfē ke mahino ki he fānaú ʻa e ʻuhinga ke “mole” ʻenau moʻuí ʻi heʻenau muimui ki he Fakamoʻuí?

Ngaahi ʻEkitivitī ʻe Ala Fakahokó

• Talanoa ki he fānaú kau ki ha taimi naʻá ke tukuange ai ha meʻa kae lava ke maʻu ha meʻa ʻoku lelei angé. Fakaafeʻi e fānaú ke nau vahevahe ha ngaahi sīpinga ʻanautolu pē. Lau fakataha leva ʻa e Luke 9:23–25. Fakamatalaʻi ange ʻoku finangalo ʻa Sīsū ke tau loto-fiemālie ke tukuange ha faʻahinga meʻa pē kae muimui ʻiate Ia. Neongo ʻoku ʻikai ke Ne kole mai ke tau tukuange ʻetau moʻuí, ka ko e hā ʻokú Ne kole mai ke tau foakí? (vakai ki he Liliu ʻa Siosefa Sāmita, Mātiu 16:26).

• Hiki ha ngaahi ʻulungaanga faka-Kalaisi ʻe niʻihi ʻi ha fanga kiʻi laʻipepa pea mo e fehangahangai ʻo e ngaahi ʻulungaanga ko iá ʻi ha ʻū laʻipepa kehe (hangē ko e ʻofá mo e siokitá, loto-fakatōkilaló mo e hīkisiá, mo e alā meʻa pehē). Hiki ʻa e ongo foʻi lea fakahaofi mo e liʻaki ko ha ʻuluʻitohi ʻi he palakipoé, pea fakaafeʻi ʻa e fānaú ke nau fokotuʻutuʻu ʻa e ngaahi tuʻunga ʻulungāngá ʻi lalo ʻi he ʻuluʻitohi totonú. ʻOange ki he fānaú ha taimi ke nau fakalaulauloto ai ki he ngaahi ʻulungaanga faka-Kalaisi ʻi he palakipoé pea fili ha taha ke fakatupulaki kakato ange.

Poupouʻi e Ako ʻi ʻApí

Fakaafeʻi e fānaú ke fakaʻaongaʻi e peesi ʻekitivitī ʻo e uike ní ke akoʻi honau ngaahi fāmilí fekauʻaki mo hono fakamoʻui ʻe Sīsū ʻa e ʻofefine ʻo Sailosí.

Fakatupulaki ʻEtau Founga Akoʻí

Poupouʻi ʻa e ʻapasiá. Tokoni ke mahino ki he fānaú, ko ha konga mahuʻinga ʻo e ʻapasiá ko e fakakaukau ki he Tamai Hēvaní mo Sīsū Kalaisi. Te ke ala fakamanatu ki he fānaú ke nau loto-ʻapasia ʻaki ʻenau hiva leʻosiʻi pe ngūnguuʻi ha foʻi hiva pe fakaʻaliʻali ha fakatātā ʻo Sīsū.