“27 Fēpueli–5 Māʻasi. Mātiu 8; Maʻake 2–4; Luke 7: ‘Kuo Fakamoʻui Koe ʻe Hoʻo Tuí,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“27 Fēpueli–5 Māʻasi. Mātiu 8; Maʻake 2–4; Luke 7,” Haʻu, ʻo Muimui ʻIate Au—Maʻá e Palaimelí: 2023
27 Fēpueli–5 Māʻasi
Mātiu 8; Maʻake 2–4; Luke 7
“Kuo Fakamoʻui Koe ʻe Hoʻo Tuí”
ʻI hoʻo lau ʻa e Mātiu 8; Maʻake 2–4; mo e Luke 7 ʻi he uike ní, fakakaukau ki he fānau ʻokú ke akoʻí. Lotua ke ueʻi fakalaumālie koe ʻe he Laumālie Māʻoniʻoní ʻaki ha ngaahi fakakaukau te ne tokoniʻi kinautolu ke nau ʻiloʻi e ngaahi moʻoni ʻi he ngaahi vahe ko ʻení.
Fakaafeʻi e Feʻinasiʻakí
Kole ki he fānaú ke nau vahevahe ha talanoa ne fakahoko ai ʻe Sīsū ha mana (vakai ki he lisi ʻo e ngaahi maná ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Te ke lava foki ʻo fakaʻaliʻali ha ʻū fakatātā ʻoku fekauʻaki mo iá (hangē ko e Tohi Fakatātā ʻo e Ongoongoleleí, fika 40).
Akoʻi e Tokāteliné: Fānau Iiki Angé
ʻOku maʻu ʻe Sīsū e mālohi ke fakahoko ha ngaahi mana.
ʻI hoʻo laukonga fekauʻaki mo e ngaahi mana ʻo e Fakamoʻuí, fakalaulauloto ki he ngaahi mana ke vahevahé. Te ke tokoniʻi fēfē e fānau ʻokú ke akoʻí ke mahino e fatongia ʻo e tuí ʻi he ngaahi mana ne fakahoko ʻe Sīsuú?
Ngaahi ʻEkitivitī ʻe Ala Fakahokó
-
Vahevahe e talanoa ʻo e tangata naʻe mahaki teté mei he tohi ʻa Maʻake 2:1–12. Ki ha tokoni, vakai ki he “Vahe 23: Ko e Tangata Pipikí” (ʻi he Tohi Talanoa ʻo e Fuakava Foʻoú, 57–58, pe ko e vitiō fekauʻaki mo iá ʻi he ChurchofJesusChrist.org). Fakamatalaʻi ange naʻe ʻikai lava e tangata ne mahaki teté ʻo lue. Tokoniʻi ke mahino kiate kinautolu, naʻe fakamoʻui e tangata ko ʻení ʻe he Fakamoʻuí.
-
Fakaafeʻi ʻa e fānaú ke nau talanoa fekauʻaki mo ha taimi ne nau puke ai. Fai ha taha ʻo e ngaahi talanoa ʻo hono fakamoʻui ʻe Sīsū ʻa e mahakí, hangē ko e Mātiu 8:1–4, 5–13, 14–15; Maʻake 3:1–5; Luke 7:11–16. Fakaafeʻi e fānaú ke nau toe fakahoko ʻa e talanoá ʻi heʻenau lea pē ʻanautolu. Fakamoʻoni ange ʻe lava ʻe he mālohi ʻo Sīsuú ʻo fakamoʻui, tāpuakiʻi, mo fakafiemālieʻi kitautolu.
Te u lava ʻo fakahaaʻi ʻeku ʻofá ki he niʻihi kehé ʻo hangē pē ko Sīsuú.
Naʻe fakahaaʻi ʻe Sīsū ha ʻofa lahi ʻaki hano fakamoʻui e mahakí mo e faingataʻaʻiá. Fakalaulauloto ki he founga te ke lava ʻo akoʻi ki he fānaú, ke nau ʻofa ki he kakai ʻoku faingataʻaʻiá.
Ngaahi ʻEkitivitī ʻe Ala Fakahokó
-
Fili ha talanoa ʻe taha pe lahi ange, fekauʻaki mo e ʻofa ʻa Sīsū ki ha taha fiemaʻu tokoni, hangē ko ia ʻi he Mātiu 8:1–4, 5–13, 14–15; Maʻake 2:1–12; 3:1–5; Luke 7:11–16. Vahevahe ki ha taimi naʻe fakahaaʻi atu ai ʻe ha taha ha ʻofa kiate koe ʻi ha taimi naʻá ke faingataʻaʻia ai pea ko e hā e ongo naʻá ke maʻú. Fakaafeʻi e fānaú ke nau vahevahe ʻenau ngaahi aʻusiá.
-
Fakaafeʻi ʻa e fānaú ke vahevahe ha ngaahi tūkunga kehe ne fie maʻu tokoni ai ha taha. Ko e hā te tau lava ʻo fai ke tokoniʻi ai kinautolú?
-
Hivaʻi ha foʻi hiva fekauʻaki mo e angaʻofá, hangē ko e “Ko e Angaʻofá ʻe Kamata ʻIate Au” (Tohi Hiva ʻa e Fānaú, 83).
Mei he Ilifiá ki he Tuí, tā fakatātā ʻa Howard Lyon
ʻI he taimi ʻoku ou manavasiʻi ai pe ʻi ha tuʻunga fakatuʻutāmakí, ʻoku lava ʻe Sīsū ʻo tokoniʻi au ke u ongoʻi nonga.
ʻE lava ke tokoni e talanoa ki hono fakanonga ʻe Sīsū e matangí, ke ʻiloʻi ʻe he fānaú ʻe lava ke Ne foaki kiate kinautolu e nongá ʻi he taimi ʻoku nau ongoʻi manavasiʻi aí.
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fakakaukau ʻoku nau ʻi ha vaka ʻi hoʻo lau e Maʻake 4:35–41. (Vakai foki ki he “Vahe 21: Ko Hono Lolomi ʻe Sīsū ʻa e Matangí mo e Tahí,” ʻi he Ngaahi Talanoa ʻo e Fuakava Foʻoú, 53, pe ko e vitiō fekauʻaki mo iá ʻi he ChurchofJesusChrist.org.) Kole ki he fānaú ke nau fakamatalaʻi ha ongo ne nau mei maʻu kapau ne nau ʻi ai. Ko e fē nai e taimi ne ilifia ai e fānaú? Ne nau maʻu fēfē e nongá?
-
Fakaafeʻi ʻa e fānaú ke nau ʻai e ongo ʻo ha matangi pea taʻofi ʻi he taimi ʻe pehē ai ʻe ha tokotaha “Fiemālie, peá ke toka lelei.” Fakamoʻoni ange, ʻoku tatau pē ʻa e lava ʻe Sīsū ke ʻomi e nongá he taimi ʻoku matangi ai ʻa tuʻá, mo ʻEne lava ke ʻomi e nongá ki hotau lotó, ʻi he taimi tau ongoʻi mamahi ai ʻi lotó.
-
Akoʻi ki he fānaú ha founga fakatātaaʻi ke fakahoko fakataha mo e veesi tolu ʻo e “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 36), pea hivaʻi ʻa e vēsí fakataha mo hono fakatātaaʻí.
Akoʻi e Tokāteliné: Fānau Lalahi Angé
ʻE lava ke fakahoko ʻe Sīsū ʻa e ngaahi mana ʻi heʻeku moʻuí ʻi heʻeku tui kiate Iá.
Naʻe fakahoko ʻe Sīsū ha ngaahi mana lahi lolotonga ʻEne ngāue ʻi he māmaní. Te ke lava fēfē ʻo tokoniʻi e fānaú ke nau fakatokangaʻi ʻoku hoko ha ngaahi mana ʻi he kuongá ni?
Ngaahi ʻEkitivitī ʻe Ala Fakahokó
-
Kole ki he fānaú ke nau fili ha taha ʻo e ngaahi mana ko ʻení ke lau mo tā fakatātaaʻi: Mātiu 8:1–4, 5–13, 14–15; Maʻake 2:1–12; 3:1–5; Luke 7:11–16. Fakaafeʻi e fānaú ke nau fakamatalaʻi ʻenau ʻū fakatātaá ki he kalasí. Ko e hā ʻoku tau ako mei he ngaahi talanoa ko ʻení fekauʻaki mo e Sīsuú?
-
Kole ki he fānaú ke nau fakatātaaʻi ʻenau ongo ʻi he taimi ʻoku nau puke, loto-mamahi, manavahē, pe loto-hohaʻa aí. ʻE tokoniʻi fēfē kitautolu ʻe Sīsū ʻi he taimi ʻoku tau maʻu ai e ngaahi ongo ko ʻení? Fakamoʻoniʻi ange ʻoku lava ke tokoniʻi ʻe Sīsū ʻa e fānaú ʻi he ngaahi tūkunga kotoa ko ʻení.
-
Fakaafeʻi e fānaú ke nau vahevahe ʻenau ngaahi aʻusia ʻi he taimi ne nau maʻu ai pe ko ha tokotaha ʻoku nau ʻilo, ʻa e tāpuaki ʻo e lakanga fakataulaʻeikí. Naʻe fakamoʻui pe tāpuekina fēfē e tokotaha ko iá?
ʻOku ʻofa ʻa Sīsū ʻiate kitautolu naʻa mo e taimi ʻoku tau faiangahala aí pea ʻokú Ne finangalo ke tokoniʻi kitautolu ke tau fakatomala.
ʻE lava ke tokoni ʻa e ngaahi talanoa ʻi he Maʻake 2:15–17 mo e Luke 7:36–50 ke mahino ki he fānaú ʻoku ʻofa ʻa Sīsū Kalaisi ʻiate kitautolu ʻo aʻu ki he taimi ʻoku tau faiangahala aí. ʻOkú Ne finangalo ke tokoniʻi kitautolu ke tau fakatomala pea ʻunu ke ofi kiate Ia.
Ngaahi ʻEkitivitī ʻe Ala Fakahokó
-
Tohiʻi ʻi he palakipoé ʻa e Ko e hā e ongo ʻa Sīsū fekauʻaki mo e angahalá? mo e Ko e hā e ongo ʻa Sīsū kiate kitautolu ʻi he taimi ʻoku tau faiangahala aí? Kole ki he fānaú ke nau fakakaukau ki he ngaahi fehuʻi ko ʻení ʻi heʻenau lau fakataha ʻa e Maʻake 2:15–17 pea vahevahe leva ʻenau ngaahi talí. (Mahalo te ke fie maʻu ke mou lau fakataha ʻa e “Tangata Tānaki Tukuhaú” ʻi he Fakahinohino ki he Ngaahi Folofolá [scriptures.ChurchofJesusChrist.org].) Ko e hā ʻoku mahuʻinga ai ke ʻiloʻi ʻoku ʻofa ʻa Sīsū ʻiate kitautolu, neongo e ʻikai ke tau haohaoá? ʻE tokoniʻi fēfē nai kitautolu ʻe hono ʻiloʻi ʻení ʻi he taimi ʻoku fie maʻu ai ke tau fakatomalá?
-
ʻI ha ngaahi ʻaho siʻi kimuʻa ʻi he kalasí, fakaafeʻi ha taha ʻi he fānaú mo ha mēmipa ʻo e fāmilí ke haʻu mateuteu ki he kalasí ke vahevahe ʻa e talanoa ʻi he Luke 7:36–50. Te nau lava ʻo tā ha ʻū fakatātā ʻoku nau fakamatalaʻi ha ngaahi konga ʻo e talanoá ke fakaʻaliʻali ki he kalasí. Aleaʻi mo e fānaú ʻa e meʻa ʻe ala finangalo ʻa e ʻEikí ke tau ako mei he talanoa ko ʻení.
ʻI he taimi ʻoku ou manavasiʻi ai mo ʻi ha tuʻunga fakatuʻutāmakí, ʻoku lava ʻe Sīsū ke Ne tokoniʻi au ke u ongoʻi nonga.
ʻOku fie maʻu ke ʻiloʻi ʻe he fānaú, ʻe lava ke foaki ʻe he Fakamoʻuí ʻa e nongá kiate kinautolu, ʻi he taimi ʻoku nau fehangahangai ai mo e ngaahi faingataʻa ʻo e moʻuí—ʻi he taimí ni pea ʻi he kahaʻú.
Ngaahi ʻEkitivitī ʻe Ala Fakahokó
-
Kole ki ha taha ʻi he fānaú ke ngāue ʻaki e Maʻake 4:35–41 mo e fakatātā Ko Hono Fakanonga ʻe Sīsū ʻa e Matangí (Tohi Fakatātā ʻo e Ongoongoleleí, fika 40) ke fai e talanoa ʻo hono fakanonga ʻe Sīsū ʻa e matangí. Kole ki he fānaú ke nau fakamatalaʻi ha ongo ne nau mei maʻu kapau ne nau ʻi ai.
-
Fakaafeʻi e fānaú ke nau vahevahe ʻenau ngaahi aʻusia ʻi he taimi ne nau ongoʻi nonga ai hili haʻanau lotua ha tokoni. Fakamanatu ange, ʻoku maʻu e nonga ko ʻení mei he Fakamoʻuí.
-
ʻOange ki he fānau takitaha ha laʻipepa ʻoku fuo hangē ha konga ʻao ʻuhá, pea kole ange ke nau tohiʻi ai ha faingataʻa ʻoku ala tofanga ai ha taha. Fakatahatahaʻi e ngaahi konga ʻaó ʻi he palakipoé, ʻo fakapuliki ha fakatātā ʻo e Fakamoʻuí. Fakaafeʻi e tokotaha ke ne toʻo ha taha ʻo e ngaahi konga ʻaó, pea fokotuʻu ange e ngaahi founga te tau ala tokoniʻi ai ha tokotaha ʻokú ne tofanga ʻi he faingataʻa ko iá, ke ne maʻu ha nonga. ʻI he ʻosi kotoa e ngaahi konga ʻaó hono toʻó, fakamoʻoniʻi ange e mālohi ʻo e Fakamoʻuí ke fakanonga e ngaahi faingataʻa ʻi heʻetau moʻuí.
Poupouʻi e Ako ʻi ʻApí
Tokoniʻi e fānaú ke nau hiki ha foʻi ngāue tokoni te nau fakahoko maʻa ha tokotaha ʻi he uiké ni.
Fakatupulaki ʻEtau Founga Akoʻí
ʻOku longomoʻui ʻa e fānaú. Te ke ongoʻi ʻi ha ngaahi taimi ʻoku hoko e longomoʻui ʻa e fānaú ko ha meʻa ke tohoakiʻi ʻenau tokangá mei he akó. Ka te ke lava ʻo langa ʻi honau ngaahi natula longomoʻuí ʻaki hono fakaafeʻi kinautolu ke nau fakatātaaʻi ha talanoa pe fai ha ngaahi ngāue ʻoku fehokotaki mo ha ngaahi meʻa ʻoku hoko ʻi ha foʻi hiva pe folofola. (Vakai Ko e Faiako ʻi he Founga ʻa e Fakamoʻuí, 25.)