“20–26 Fēpueli. Mātiu 6–7: ‘Naʻá Ne Akonakiʻi ʻa Kinautolu ʻo Taau Mo Ia ʻOku Mālohí,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“20–26 Fēpueli. Mātiu 6–7,” Haʻu, ʻo Muimui ʻIate Au—Maʻá e Palaimelí: 2023
Ko Hono Akoʻi ʻe Sīsū ʻa e Kakaí ʻi he Veʻe Matāfangá, tā ʻa James Tissot
20–26 Fēpueli
Mātiu 6–7
“Naʻá Ne Akonakiʻi ʻa Kinautolu ʻo Taau mo Ia ʻOku Mālohí”
Kamata ʻaki hano lau e Mātiu 6–7, ʻo fakakaukau ki he fānau ʻokú ke akoʻí. Ko e hā e ngaahi pōpoaki mei he ongo vahe ko ʻení ʻoku fie maʻu ke nau fanongoá? ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e fokotuʻutuʻu ko ʻení ke ʻoatu ha ngaahi fakakaukau ki hono akoʻí, ʻo fakatatau mo e fiemaʻú.
Fakaafeʻi e Feʻinasiʻakí
Kole ki he fānaú ke nau vahevahe e meʻa ne nau fai ʻi he uike kuo ʻosí ke hoko ai ko ha maama pe sīpinga ki ha taha kehe.
Akoʻi e Tokāteliné: Fānau Iiki Angé
Te u lava ʻo lotu ki heʻeku Tamai Hēvaní ʻo hangē ko ia ne fai ʻe Sīsuú.
ʻE lava ke ako ʻa e fānaú ke lotu ʻaki ʻenau fanongo ki he ngaahi lotu ʻa e niʻihi kehé. Te ke tokoniʻi fēfē kinautolu ke nau ako mei he lotu ʻa Sīsū Kalaisi ʻi he ngaahi veesi ko ʻení?
Ngaahi ʻEkitivitī ʻe Ala Fakahokó
-
Toe vakaiʻi e ngaahi akonaki ʻa Sīsū fekauʻaki mo e lotú ʻi he Mātiu 6:5–13. ʻE lava ke ke fakaʻaongaʻi ʻa e “Vahe 20: Akoʻi ʻe Sīsū ʻa e Lotú” (ʻi he Ngaahi Talanoa ʻo e Fuakava Foʻoú, 51–52, pe vitiō fekauʻaki mo iá ʻi he ChurchofJesusChrist.org).
-
Fakaʻaongaʻi e peesi ʻekitivitī ʻo e uike ní ke tokoniʻi e fānaú ke nau manatuʻi e ngaahi konga kehekehe ʻo e lotú.
-
Fakaʻilongaʻi ʻa e nima ʻo e kiʻi tamasiʻi pe taʻahine takitaha ʻi ha laʻipepa. Talanoa fekauʻaki mo e meʻa ʻoku totonu ke fai ʻe hotau ongo nimá mo e umá ʻi he lolotonga ʻetau lotú. ʻI he fakaʻilonga takitaha, tohiʻi ha meʻa te tau fai ke fakahaaʻi ʻaki ʻetau loto-ʻapasia ʻi he taimi ʻoku tau lotu aí (hangē ko ʻení, punou hotau ʻulú, kuikui hotau matá, mo e alā meʻa pehē).
-
Hivaʻi mo e fānaú ha hiva fekauʻaki mo e lotú hangē ko e “Punou Ho ʻUlu” (Tohi Hiva ʻa e Fānaú, 18b), pea vahevahe hoʻo fakamoʻoni ki he mālohi ʻo e lotú. Fakaafeʻi e fānaú ke vahevahe mo ʻenau ngaahi aʻusia ʻi he lotú.
Te u lava ʻo lotu ki heʻeku Tamai Hēvaní ʻo hangē ko ia ne fai ʻe Sīsuú.
ʻOku totonu ke u fai ki he niʻihi kehé ʻa e founga ʻoku ou loto ke fai kiate aú.
ʻOku ʻomi ʻe he akonaki ʻa Sīsū ʻi he Mātiu 7:12—ʻoku toe ʻiloa foki ko e Lao Koulá—ha fakahinohino faingofua ki he founga ke tau fakaʻapaʻapaʻi ai e niʻihi kehé. Ko e hā ha meʻa te ne tokoniʻi e fānau ʻokú ke akoʻí ke nau moʻui ʻaki e tefitoʻi moʻoni ko ʻení?
Ngaahi ʻEkitivitī ʻe Ala Fakahokó
-
Lau e Mātiu 7:12, pea toe fakalea ia ʻi ha ngaahi lea faingofua ʻe lava ke mahino ki he fānaú. Tokoniʻi e fānaú ke nau fakakaukau ki ha ngaahi founga ʻe niʻihi ke fakakakato ai ha sētesi hangē ko ʻení: “ʻOku ou saiʻia ʻi he taimi ʻoku ai e niʻihi kehé maʻakú.” Hili e sētesi takitaha, fakaafeʻi ke nau toutou lea fakataha mo koe, “Ko ia ai ʻoku totonu ke u ki he niʻihi kehé.”
-
Hivaʻi mo e fānaú ha hiva ʻokú ke ongoʻi ʻokú ne fakamamafaʻi mai e Mātiu 7:12, hangē ko e “Folofola ʻa Sīsū ʻFeʻofaʻaki’” (Tohi Hiva ʻa e Fānaú, 39). Faʻu hano fakatātaaʻi faingofua ʻo e foʻi hivá. Fehuʻi ki he fānaú pe ko e hā ʻoku nau ako mei he sīpinga ʻo e Fakamoʻuí fekauʻaki mo e founga ʻoku tau feohi ai mo e niʻihi kehé.
-
Fakaafeʻi e fānaú ke nau lisi e ngaahi meʻa lelei ne fai heʻenau mātuʻá pe kau mēmipa kehe ʻo e fāmilí maʻanautolú. Lau e Mātiu 7:12, pea fakaafeʻi e fānaú ke nau ʻoatu ha ngaahi meʻa lelei te nau lava ʻo fai maʻa honau fāmilí.
Te u lava ʻo langa ha fakavaʻe mālohi ʻaki ʻeku muimui kia Sīsū.
ʻE lava ke hoko hono fakaʻaongaʻi e talanoa fakatātā ʻa e Fakamoʻuí fekauʻaki mo hono langa ʻo ha fale ʻi he ʻoneʻoné pe ʻi ha maká, ko ha founga fakangalongataʻa ke akoʻi e fānaú fekauʻaki mo e mahuʻinga ʻo hono ngāueʻi e meʻa ʻoku tau akó.
Ngaahi ʻEkitivitī ʻe Ala Fakahokó
-
Hivaʻi mo e fānaú ʻa e “Ko e Tangata Potó mo e Tangata Valé” (Tohi Hiva ʻa e Fānaú, 132), pea ngāue ʻaki hano fakatātaaʻi ʻo fakatatau mo e fakalea ʻo e hivá.
-
Fakaʻaongaʻi e Mātiu 7:24–27 ke akoʻi fekauʻaki mo e ngaahi faikehekehe ʻi he vahaʻa ʻo e tangata potó mo e tangata valé. Fakaafeʻi ʻa e fānaú ke nau pehē pē ʻoku nau langa ha fale. Te tau lava fēfē ʻo tatau mo e tangata potó?
-
Tuku ki he fānaú ke nau tā ha ʻū fakatātā ʻo e talanoa fakatātā ki he tangata potó mo e tangata valé.
Akoʻi e Tokāteliné: Fānau Lalahi Angé
ʻOku ʻi ia ha ngaahi pōpoaki maʻaku ʻi he Malanga ʻi he Moʻungá.
ʻOku ʻi ai ha ngaahi pōpoaki lahi ʻi he ngaahi vahe ko ʻení ʻa ia ʻe lava ʻo ʻaonga ki he fānau ʻokú ke akoʻí. Lau ia mo ke fakakaukau ki he fānaú. Ko e hā e meʻa ne hā makehe kiate koé?
Ngaahi ʻEkitivitī ʻe Ala Fakahokó
-
Fakamanatu ki he fānaú, kuo nau ako eni fekauʻaki mo e meʻa ne akoʻi ʻe Sīsū lolotonga e Malanga ʻi he Moʻungá. Ko e hā ha ngaahi moʻoni ʻoku nau manatuʻi ne nau ako ki ai ʻi he uike kuo ʻosí?
-
Hiki he palakipoé ha ngaahi kupuʻi lea mei he Malanga ʻi he Moʻungá mo ha ngaahi kupuʻi lea ʻe niʻihi ʻa ia ʻoku ʻikai mei he folofolá. Fakaafeʻi e fānaú ke nau feinga ke ʻiloʻi pe ko e ngaahi kupuʻi lea fē ʻoku mei he Malanga ʻi he Moʻungá. Kole ange ke nau vahevahe e meʻa ʻoku nau ako mei he ngaahi akonaki ko ʻení.
-
Fili ha ngaahi veesi mei he Mātiu 6–7 ʻa ia ʻokú ke ongoʻi ʻe ʻuhingamālie ki he fānaú. Hiki ʻa e ngaahi fakamoʻoni fakafolofolá ʻi ha ʻū kaati, pea fufuuʻi holo ia ʻi he lokí. Tuku ki he fānaú ke nau kumi ia, lau ʻa e ngaahi vēsí, pea fakamatalaʻi e ʻuhinga ʻoku mahuʻinga ai ʻa e ngaahi akonaki ko ʻení kiate kinautolú.
-
Vahevahe ha taha ʻo e ngaahi potufolofola ʻokú ke manako taha ai mei he Mātiu 6–7, pea fakamatalaʻi e ʻuhinga ʻokú ke saiʻia ai aí. Kapau ʻoku maʻu ʻe he fānaú ha potufolofola ʻoku nau manako ai, fakaafeʻi ke nau vahevahe e ʻuhinga ʻoku nau saiʻia ai aí mo e meʻa ʻoku nau ako mei aí.
-
Hivaʻi mo e fānaú ha foʻi hiva fekauʻaki mo e Fakamoʻuí mo ʻEne ngaahi akonakí, hangē ko e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41). Taʻofi e foʻi hivá ʻi he taimi ʻokú ke aʻu ai ki ha kupuʻi lea ʻoku fekauʻaki mo ha tefitoʻi moʻoni naʻe akoʻi mai ʻi he Mātiu 6–7. Tokoniʻi e fānaú ke nau fakafehokotaki ki he ngaahi meʻa ʻoku nau ako mei he ongo vahe ko ʻení.
ʻE fanongoa mo tali mai ʻe he Tamai Hēvaní ʻi he taimi ʻoku ou lotu aí.
ʻI hoʻo ako e Mātiu 6:5–13; 7:7–11, ko e hā ʻokú ke ongoʻi ʻoku fie maʻu ke mahino ki he fānaú fekauʻaki mo e lotú?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau leʻolahi e Mātiu 6:9–13 pea nau lisi e ngaahi meʻa ne lea ʻaki ʻe he Fakamoʻuí ʻi Heʻene lotú. Te tau muimui fēfē ʻi Heʻene sīpingá ʻi he taimi te tau lotu aí?
-
Hivaʻi mo e fānaú ha foʻi hiva fekauʻaki mo e lotú, hangē ko e “Fai Haʻo Lotu” (Ngaahi Himí, fika 70). Tokoniʻi e fānaú ke nau fekumi ʻi he ngaahi lea ʻo e hivá ke maʻu e ngaahi ʻuhinga ʻoku tau lotu aí mo e ngaahi tāpuaki ʻoku maʻu mei he lotú.
-
Tokoniʻi e fānaú ke nau maʻuloto e Mātiu 7:7 ʻaki hano fakahoko ha foʻi vaʻinga hangē ko ʻení: Lau maʻuloto ʻe ha tokotaha ʻa e ʻuluaki foʻi lea pe kupuʻi lea mei he vēsí pea lī ha foʻi pulu ki ha tokotaha kehe, ʻa ia te ne lau maʻuloto mai leva e foʻi lea pe kupuʻi lea hokó.
-
Fakatātaaʻi mo e fānaú ʻa e Mātiu 7:9–10 ʻaki hano fakaʻaongaʻi ha ʻū meʻateuteu (props) faingofua. Kole ki he fānaú ke nau vahevahe ʻa e meʻa ʻoku akoʻi mai heni kiate kinautolu fekauʻaki mo e lotú.
-
Vahevahe ha aʻusia ʻa ia naʻe tali ai ho ngaahi lotú.
ʻE lava ke u fekumi ki ha ngaahi koloa taʻengata kae ʻikai ko e ngaahi koloa fakamāmaní.
Te ke tokoniʻi fēfē ʻa e fānau ʻokú ke akoʻí ke nau fakamahuʻingaʻi ʻa e ngaahi meʻa taʻengatá ʻo laka hake ʻi he ngaahi meʻa fakamāmaní?
Ngaahi ʻEkitivitī ʻe Ala Fakahokó
-
ʻOmi ha puha “tauhi koloa” ‘oku fonu ʻi ha ʻū meʻa pe fakatātā ʻa ia ʻokú ne fakafofongaʻi e ngaahi meʻa ʻoku fakamahuʻingaʻi ʻe he māmaní—hangē ko e paʻangá pe meʻavaʻingá. Lau fakataha e Mātiu 6:19–21 pea kole ki he fānaú ke tokoni atu ke ke fakakaukau ki he ngaahi koloa fakalangi ʻe lava fetongi ʻaki e ngaahi meʻa fakamāmani ʻi he puhá.
-
Fakaafeʻi e fānaú ke nau fakahingoa pe tā ha ngaahi meʻa te nau lava ʻo fai ke “fokotuʻu … ʻa e koloa ʻi he langí” (Mātiu 6:20).
Poupouʻi e Ako ʻi ʻApí
Fakaafeʻi e fānaú ke nau vahevahe mo honau ngaahi fāmilí ʻa e akonaki ʻoku nau saiʻia ai mei he Malanga ʻi he Moʻungá.
Fakatupulaki ʻEtau Founga Akoʻí
Feinga ke mahino kiate koe e kau mēmipa hoʻo kalasí. ʻOkú ke ʻiloʻi e fānau ʻokú ke akoʻí. ʻE ala fie maʻu ke liliu e ngaahi fakakaukau ʻi he ngaahi lēsoni ko ʻení, ke feau e ngaahi fiemaʻu ʻo hoʻo kalasí. Mahalo ʻe fie maʻu ke ke toe vakaiʻi e ngaahi ʻekitivitī kotoa ʻoku lisi ʻi he lēsoni ko ʻení, ʻo ʻikai ko e ʻekitivitī pē ʻoku fakataumuʻa maʻá e taʻu motuʻa ʻo e fānau ʻokú ke akoʻí, ke lava ke maʻu ha ngaahi fakakaukau ki hoʻo kalasí. (Vakai, Ko e Faiako ʻi he Founga ʻa e Fakamoʻuí, 7.)