6–12 Fēpueli

Sione 2–4

“ʻOku Totonu Ke Mou Fanauʻi Foʻou”

ʻI ha kalasi Palaimeli nounou pē, he ʻikai ha taimi feʻunga ke ke akoʻi ai e tefitoʻi moʻoni mahuʻinga kotoa pē ʻi he Sione 2–4. Fekumi ki ha tataki fakalaumālie fekauʻaki mo e meʻa ke fakamamafaʻi ke feau lelei taha ʻaki e ngaahi fiemaʻu mo e meʻa ʻoku mahuʻingaʻia ai e fānaú.

Fakaafeʻi e Feʻinasiʻakí

Koeʻuhi ke poupouʻi e fānaú ke nau vahevahe e meʻa ʻoku nau ako mo aʻusiá, ʻeke kiate kinautolu pe ko e hā ne nau fai kimuí ni mai ke nau hoko ai ko ha kau “toutai tangata” (Mātiu 4:19). Mahalo ʻe fie maʻu ke toe vakaiʻi mo kinautolu e lēsoni ʻo e uike kuo ʻosí.

Akoʻi e Tokāteliné: Fānau Iiki Angé

Sione 3:1–10

ʻOku fie maʻu ke papitaiso mo hilifakinima au ke u foki ʻo nofo mo e Tamai Hēvaní.

ʻOku teuteu e fānau ʻokú ke akoʻí ke nau hoko atu ki ha ngaahi sitepu mahuʻinga ke nau toe nofo mo e Tamai Hēvaní ʻaki hono papitaiso (fanauʻi ʻi he vai) mo hilifakinima (fanauʻi ʻi he Laumālie) kinautolu. Te ke tokoniʻi fēfē nai ke mahino kiate kinautolu e mahuʻinga ʻo e ongo ouau ko ʻení?

Ngaahi ʻEkitivitī ʻe Ala Fakahokó

• Fakamatalaʻi nounou ʻa e talanoa ʻo hono akoʻi ʻe Sīsū ʻa Nikotimasí (vakai, Sione 3:1–10). Palōmesi ange ki he fānaú, ko e taimi te nau papitaiso aí, ʻe foaki ange ʻe he Tamai Hēvaní e meʻafoaki ʻo e Laumālie Māʻoniʻoní.

• Fakaʻaliʻali ki he fānaú ʻa e peesi ʻekitivitī ʻo e uike ní, pea kole ange ke nau fakamatalaʻi ʻa e ʻū tā fakatātaá. Lau ʻa e Sione 3:5, pea fakamoʻoni ange ʻoku fie maʻu ke tau papitaiso mo hilifakinima ka tau toe nofo fakataha mo e Tamai Hēvaní.

• Kole ki he fānaú ke nau vahevahe fekauʻaki mo e meʻa ʻoku nau fai ke fanofano ai honau nimá. Fakaʻaliʻali ʻa e fakatātā Ko Hono Papitaiso ʻo ha Taʻahine (Tohi Fakatātā ʻo e Ongoongoleleí, fika 104), pea tokoniʻi e fānaú ke nau fakafehoanaki e fanofano hotau nimá ʻaki e vaí, ki he hoko ʻo maʻa fakalaumālie ʻo fakafou ʻi he papitaisó.

Sione 3:16

ʻOku ʻofaʻi au ʻe he Tamai Hēvaní, ko ia naʻá Ne ʻomi ha Fakamoʻui maʻaku.

Te ke tokoni fēfeeʻi e fānaú ke nau ako e moʻoni pelepelengesi ko ʻení?

Ngaahi ʻEkitivitī ʻe Ala Fakahokó

• Kole ki he fānaú ke nau fakakakato e ngaahi sētesi hangē ko ʻení: “Koeʻuhí ʻoku ʻofa ʻeku ongomātuʻá ʻiate au, ʻokú na …” Lau ʻa e Sione 3:16. Tokoniʻi leva e tamasiʻi pe taʻahine takitaha ke ne toutou lau ʻa e Sione 3:16, ʻo fetongi e foʻi lea “ki māmaní” ʻaki hono hingoa pē ʻoʻoná. Tokoniʻi e fānaú ke nau fakatokangaʻi e meʻa ʻoku pehē ʻe he veesi ko ʻení naʻe fakahoko ʻe he Tamai Hēvaní koeʻuhí ko ʻEne ʻofa ʻiate kitautolú. Fakaafeʻi e fānaú ke nau tā ha fakatātā ʻo Sīsū. Tuku ke nau fevahevaheʻaki ʻenau ʻū fakatātaá pea fakahaaʻi ʻenau ʻofa ki he Fakamoʻuí.

• Hivaʻi fakataha ha foʻi hiva fekauʻaki mo Sīsū, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20–21). Tuku ki he fānaú ke nau puke hake ha fakatātā ʻo Sīsū ʻi he taimi kotoa pē ʻoku nau hivaʻi ai ha foʻi lea hangē ko e “ʻAlo,” “Sīsū,” pe “Fakamoʻui.”

Sione 4:5–15

Ko Sīsū Kalaisi ʻeku “vai moʻuí.”

ʻOku lava ke fakafehokotaki kotoa e fānau ʻi ho kalasí, ki he ongoʻi fieinuá. Te ke fakaʻaongaʻi fēfē ʻa e aʻusia ko iá ke tokoni ke mahino kiate kinautolu e lahi ʻo ʻetau fie maʻu e vai moʻui ʻoku foaki mai ʻe Sīsū Kalaisí?

Ngaahi ʻEkitivitī ʻe Ala Fakahokó

• Fakaʻaongaʻi e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fai e talanoa ʻo Sīsū mo e fefine ʻi he veʻe vaitupú (vakai, Sione 4:5–15). Kole ki he fānaú ke nau toe fai e talanoá.

• Fakaʻaliʻali ha ipu vai, pea talanoa mo e fānaú fekauʻaki mo e ʻuhinga ʻoku tau fie maʻu ai ha vaí. Fakamatalaʻi fakanounou e Sione 4:5–15, pea fakamoʻoniʻi ange ʻoku ʻomi ʻe Sīsū Kalaisi mo ʻEne ongoongoleleí ʻa e moʻui ki hotau laumālié, ʻo hangē ko hono ʻomi ʻe he vaí e moʻui ki hotau sinó.

Akoʻi e Tokāteliné: Fānau Lalahi Angé

Sione 2:1–11

Te u lava ʻo fakaʻapaʻapaʻi ʻeku faʻeé hangē ko ia ne fai ʻe Sīsuú.

ʻI he taʻane ʻi Kená, ne talaange ʻe Mele kia Sīsū kuo ʻosi ʻa e uainé. Fakatatau ki he Liliu ʻa Siosefa Sāmitá, naʻe tali ʻa Sīsū ki Heʻene faʻeé ʻaki ʻEne fehuʻi ange pe ko e hā e meʻa ʻokú ne loto ke fai ange maʻaná, pea te Ne fai ia. Ko Sīsū ʻa e sīpinga ke tau muimui ki ai ʻi heʻetau feohi mo ʻetau ngaahi faʻeé.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Sione 2:1–11 pea nau taufetongi hono toe fakamatalaʻi e talanoá ʻi he lea pē ʻanautolu.

• Kole ki he fānaú ke nau lisi e ngaahi meʻa ʻe ala fie maʻu tokoni ai ʻenau faʻeé. Fakaafeʻi ke nau akoako fakahoko ʻa e meʻa ʻe lava ke nau lea ʻaki kiate iá, ʻaki haʻanau fehuʻi ange ha fehuʻi ʻoku faitatau mo e fehuʻi ʻa Sīsuú: “Ko e hā e meʻa ʻokú ke loto ke u fai maʻaú?”  

• Fakaafeʻi ha ngaahi faʻē ke nau ʻaʻahi mai ki hoʻo kalasí pea vahevahe e meʻa ‘oku fai ʻe heʻenau fānaú ke fakahaaʻi ʻaki ʻenau fakaʻapaʻapá.

Naʻe folofola ʻa Sīsū ki heʻene faʻeé, “Ko e hā ʻokú ke loto ke u fai maʻaú?”  

Sione 3:1–8

ʻOku hangē hono papitaiso mo hilifakinima kitautolú ko hano toe fanauʻi foʻoú.

ʻI he taimi ʻoku papitaiso ai kitautolú, ʻa ia ne ui ʻe Sisū ko hono “papitaiso ʻi he vaí,” ʻoku tau maʻu ha fakamolemole ʻo ʻetau ngaahi angahalá pea lava ke tau “hū ki he puleʻanga ʻo e ʻOtuá” (Sione 3:5). Te ke tokoniʻi fēfē e fānau ʻokú ke akoʻí ke mahino kiate kinautolu e ʻuhinga ʻo hono toe fanauʻi foʻoú?

Ngaahi ʻEkitivitī ʻe Ala Fakahokó

• Faʻu ha ʻū laʻipepa kuo hiki ai e ngaahi lea ʻa e Fakamoʻuí ʻi he Sione 3:3, pea tuku ki he fānaú ke nau fakahokohoko totonu ia. Ko e hā e founga ʻoku tatau ai hono papitaiso mo hilifakinima kitautolú mo e toe fanauʻi foʻoú?

• Fakaʻaliʻali ha fakatātā ʻo ha pēpē ne toki fāʻeleʻi pea mo ha tokotaha ʻoku papitaiso mo hilifakinima (vakai, Tohi Fakatātā ʻo e Ongoongoleleí, fika 104–5). ʻOku tau faitatau fēfē mo ha kiʻi pēpē toki fāʻeleʻí, hili hono papitaiso mo hilifakinima kitautolú? (vakai, Sione 3:3–5).

• Fakaafeʻi e fānaú ke nau vahevahe ha ngaahi meʻa ʻoku nau manatuʻi ʻi hono papitaiso kinautolú. Lau e Mōsaia 18:8–10 mo e Tokāteline mo e Ngaahi Fuakava 20:37 ke toe vakaiʻi e fuakava ʻo e papitaisó. Akoʻi ange ki he fānaú, ko hono maʻu ʻo e sākalamēnití ʻi he faʻa fakakaukau he uike kotoá, ko ha founga ia ʻoku tau hokohoko atu ai he ngāue ke tau hoko ai ʻo toe fanauʻi foʻou.

• Tokoniʻi e fānaú ke nau maʻuloto e Tefito ʻo e Tuí 1:4.

Sione 3:16–17

ʻOku ʻofaʻi au ʻe he Tamai Hēvaní, ko ia naʻá Ne ʻomi Hono ʻAló.

Te ke tokoniʻi fefe ʻa e fānaú ke nau ʻiloʻi naʻe ʻomi ʻa Sīsū Kalaisi ki he māmaní ke fakahaaʻi e ʻofa ʻa e Tamai Hēvaní?

Ngaahi ʻEkitivitī ʻe Ala Fakahokó

• Kole ki he fānaú ke nau tā ha fakatātā ʻo e meʻaʻofa ʻoku nau manako taha aí pea mo e tokotaha naʻá ne foaki ange e meʻaʻofá kiate kinautolú. Pea kole ki ha tamasiʻi pe taʻahine ke ne lau e Sione 3:16. Ko e hā ha meʻaʻofa naʻe foaki mai ʻe he Tamai Hēvaní maʻatautolu? ʻOku fakahaaʻi fēfē ʻe he meʻaʻofa ko ʻení ʻEne ʻofá?

• Kole ki he fānaú ke nau fakafanongo ki ha ngaahi tali ki he fehuʻi, “Ko e hā e ʻuhinga naʻe fekauʻi mai ai ʻe he Tamai Hēvaní ʻa Sīsū Kalaisí?” ʻi heʻenau lau ʻa e Sione 3:16–17 pe hivaʻi pe fakafanongo ki he “Naʻá Ne Fekau Hono ʻAló” (Tohi Hiva ʻa e Fānaú, 20–21).

Sione 4:5–23

ʻOku foaki mai ʻe Sīsū Kalaisi kiate au ʻa e “vai moʻuí.”

Hangē ko hono fakaʻaongaʻi ʻe Sīsū ʻa e vaí ke akoʻi e fefine Samēliá, te ke lava ʻo fakaʻaongaʻi ʻa e vaí ke akoʻi ki he fānaú e ʻuhinga ʻoku mahuʻinga ai kiate kitautolu e ongoongolelei ʻo Sīsū Kalaisí.

Ngaahi ʻEkitivitī ʻe Ala Fakahokó

• Ngāue ʻaki ʻa e Sione 4:5–23, ke hiki ha ngaahi sētesi fakaikiiki mei he talanoa ʻo e fefine ʻi he veʻe vaitupú. Kole ki he fānaú ke nau vakai ki he ngaahi veesi ko ʻení ke fokotuʻutuʻu totonu ʻa e ngaahi sētesí. Ko e hā naʻe feinga ʻa Sīsū ke akoʻi ki he fefiné?

• ʻOange ki he fānaú ha vai ke inu, pea kole ange ke nau vahevahe ha ngaahi aʻusia ki ha taimi ne nau fieinua ai. Talanoa fekauʻaki mo e ongo naʻe maʻu ʻi he faifai angé pea nau inu ha meʻi vaí. Fakaafeʻi ʻa e fānaú ke nau fakalau e ngaahi meʻa ʻoku nau feau fakataimi ʻetau fiemaʻú, hangē ko ha ipu vai. Ko e hā ha ngaahi meʻa ʻokú ne fakafiemālieʻi kitautolu ʻo taʻengata, hangē ko e “vai moʻuí”?

• Hiki ʻi he palakipoé ʻa e ʻOku founga fēfē e tatau ʻa e ongoongoleleí mo e vaí? Kole ki he fānaú ke nau fakakaukau ki he founga te nau tali ʻaki e fehuʻi ko ʻení ʻi heʻenau lau e Sione 4:5–23.

Poupouʻi e Ako ʻi ʻApí

Fakakaukau ke kole ki he fānaú ke nau ʻave ha ipu vai ki he kau mēmipa honau fāmilí, ʻi heʻenau aʻu ki ʻapí. ʻI heʻenau fai iá, ʻe lava ke nau vahevahe e meʻa ne nau ako fekauʻaki mo e vai moʻuí.

Fakatupulaki ʻEtau Founga Akoʻí

Fakaʻaongaʻi e ngaahi peesi ʻekitivitií. ʻI hono fakakakato ʻe he fānaú ʻa e ngaahi peesi ʻekitivitií, fakaʻaongaʻi e taimi ko iá ke toe vakaiʻi e ngaahi tefitoʻi moʻoni mei he lēsoní.