27 Fēpueli–5 Māʻasi

Mātiu 8; Maʻake 2–4; Luke 7

“Kuo Fakamoʻui Koe ʻe Hoʻo Tuí”

Tokanga ke ʻoua naʻá ke fakavavevaveʻi hoʻo ako e folofolá. Tuku ha taimi ke fakalaulauloto ai ʻi he faʻa lotu, neongo kapau ʻoku ʻuhinga ia he ʻikai ke ʻi ai haʻo taimi ke lau e veesi kotoa pē. ʻOku faʻa iku ʻa e ngaahi momeniti ko ʻeni ʻo e fakalaulaulotó ki ha maʻu fakahā fakataautaha.

Lekooti e Ngaahi Ongo ʻOkú ke Maʻú

Ko e taha ʻo e ngaahi pōpoaki mahino taha ʻi he Fuakava Foʻoú ko e hoko ʻa Sīsū Kalaisi ko ha faifakamoʻuí. ʻOku lahi ha ngaahi fakamatala ki hono fakamoʻui ʻe he Fakamoʻuí ʻa e mahakí mo e faingataʻaʻiá—mei ha fefine naʻe mofi ki ha foha ʻo ha uitou ne pekia. Ko e hā ʻoku fakamamafa ai ki he fakamoʻui fakatuʻasinó? Ko e hā nai ha ngaahi pōpoaki heni maʻatautolu ʻi he ngaahi mana ko ʻení? Ko hono moʻoní ko ha pōpoaki mahino ʻe taha ko Sīsū Kalaisi ko e ʻAlo Ia ʻo e ʻOtuá, ʻokú Ne maʻu ʻa e mālohi ki he meʻa kotoa pē, ʻo kau ai hotau ngaahi mamahi fakatuʻasinó mo e ngaahi melé. Ka ko ha ʻuhinga ʻe taha, ʻoku hā ia ʻi Heʻene folofola ki he kau tangata tohi taʻetuí: “Koeʻuhí ke mou ʻilo ʻoku ʻi he Foha ʻo e tangatá ʻa e mālohi ʻi māmani ke fakamolemole ʻa e angahalá” (Maʻake 2:10). Pea ʻi hoʻo laukonga fekauʻaki mo hano fakamoʻui ʻo ha tokotaha kui pe kilia, ʻe lava ke ke fakakaukau ki he faifakamoʻui—fakalaumālie mo fakatuʻasino fakatouʻosi—te ke lava ʻo maʻu mei he Fakamoʻuí pea fanongo ki Heʻene folofola atu kiate koe, “Kuo fakamoʻui koe ʻe hoʻo tuí” (Luke 7:50).

Ngaahi Fakakaukau ki Hono Ako Fakataautaha ʻo e Folofolá

Mātiu 8; Maʻake 2–3; Luke 7

ʻE lava ʻe he Fakamoʻuí ʻo fakamoʻui ʻa e faingataʻaʻiá mo e mahamahakí.

ʻOku lekooti ʻi he ngaahi vahe ko ʻení ha ngaahi sīpinga ʻo e ngaahi faifakamoʻui fakaofo ne fakahoko ʻe he Fakamoʻuí. ʻI hoʻo ako e ngaahi faifakamoʻui ko ʻení, fekumi ki ha ngaahi pōpoaki ʻe ala ‘aonga kiate koe. Mahalo te ke fehuʻi loto pē kiate koe: Ko e hā ʻoku akoʻi mai ʻe he fakamatalá fekauʻaki mo e tui kia Sīsū Kalaisí? Ko e hā ʻoku akoʻi mai ʻe he fakamatalá fekauʻaki mo e Fakamoʻuí? Ko e hā ʻoku finangalo e ‘Otuá ke u ako mei he mana ko ʻení? Ko ha ngaahi sīpinga ʻeni ʻe niʻihi, ka ʻoku ʻi ai ha ngaahi sīpinga lahi ange:

• Ko ha tangata naʻe kilia (Mātiu 8:1–4)

• Ko ha tamaioʻeiki ʻa ha ʻeikitau (Mātiu 8:5–13; Luke 7:1–10)

• Ko e faʻē ʻi he fono ʻa Pitá (Mātiu 8:14–15)

• Ko ha tangata naʻe mahaki tete (Maʻake 2:1–12)

• Ko ha tangata naʻe nima mate (Maʻake 3:1–5)

• Ko e foha ʻo e uitou ʻo Neiní (Luke 7:11–16)

Vakai foki e David A. Bednar, “Ko Hono Tali e Finangalo mo e Taimi ʻa e ʻEikí,” Liahona, ʻAokosi 2016, 17–23; Neil L. Andersen, “Kuo Kafo,” Liahona, Nōvema 2018, 83–86.

Maʻake 2:15–17; Luke 7:36–50

Naʻe ʻikai hāʻele mai ʻa Sīsū Kalaisi ke fakamalaʻiaʻi ʻa e kau angahalá ka ke fakamoʻui kinautolu.

ʻI hoʻo lau ʻi he ngaahi veesi ko ʻení fekauʻaki mo e ngaahi fengāueʻaki ʻa Sīsū mo e kau tangata tohí mo e kau Fālesí, mahalo te ke fakakaukau pe ʻokú ke vakai nai kiate koe ʻi he ngaahi fakamatala ko ʻení. Hangē ko ʻení, ʻoku tatau nai hoʻo ngaahi fakakaukaú mo e tōʻongá mo ia ʻo Saimone ko e tangata Fālesí? Te ke fakamatalaʻi fēfē e faikehekehe ʻi he vakai ʻa Sīsū ki he kau angahalá mo e vakai ʻa e kau Fālesi hangē ko Saimoné kiate kinautolú? Fakakaukau ki he ongo ʻe maʻu ʻe kinautolu ʻoku mafasia ʻi he angahalá ʻi heʻenau feohi mo e Fakamoʻuí. ʻOku nau ongoʻi fēfē ʻi heʻenau feohi mo koé?

Te ke lava foki ʻo fakalaulauloto ki he founga ʻokú ke hangē ai ko e fefine ʻoku fakamatalaʻi ʻi he Luke 7:36–50. Ko e fē nai e taimi kuó ke aʻusia ai e ʻofa ongoʻingofua mo e ʻaloʻofa naʻe fakahā ʻe he Fakamoʻuí kiate iá? Ko e hā ʻokú ke ako mei heʻene sīpinga ʻo e tuí, ʻofá, mo e loto fakatōkilaló?

Vakai foki Sione 3:17; Luke 9:51–56; Dieter F. Uchtdorf, “Ko e Meʻaʻofa ʻo e ʻAloʻofá,” Liahona, Mē 2015, 107–10.

Mātiu 8:18–22; Maʻake 3:31–35

ʻOku ʻuhinga e hoko ko ha ākonga ʻa Sīsū Kalaisí ke u fakamuʻomuʻa Ia ʻi heʻeku moʻuí.

Naʻe akoʻi ʻe Sīsū ʻi he ngaahi veesi ko ʻení, ʻi heʻetau hoko ko ia ko ʻEne kau ākongá ʻoku fie maʻu ke tau fakamuʻomuʻa Ia ʻi heʻetau moʻuí, ʻo tatau ai pē kapau ʻe iku ke tau feilaulauʻi ai e ngaahi meʻa kehe ʻoku tau mahuʻingaʻia aí. ʻI hoʻo ako e ngaahi potufolofola ko ʻení, fakalaulauloto ki hoʻo tuʻunga fakaākongá. Ko e hā kuo pau ai ke loto-fiemālie e kau ākongá ke ʻuluaki fakamuʻomuʻa ʻa e Fakamoʻuí? Ko e hā ʻe fie maʻu ke ke tukuange kae lava ke ʻuluaki fakamuʻomuʻa ʻa Sīsū? (Vakai foki Luke 9:57–62.)

Mātiu 8:23–27; Maʻake 4:35–41

ʻOku maʻu ʻe Sīsū Kalaisi ʻa e mālohi ke fakanonga e ngaahi haʻahaʻa ʻo e moʻuí.

Kuo ʻi ai nai ha taimi kuó ke ongoʻi tatau ai mo e kau ākonga ʻa Sīsuú ʻi heʻenau fepaki mo e matangi ʻi he tahí—ne nau mamata ki hono fakafonu ʻe he ngaahi peaú ʻa e vaká pea nau fehuʻi, “ʻEiki, ʻoku ʻikai te ke tokangaʻi te tau mate?”

Te ke maʻu ʻi he Maʻake 4:35–41, ha ngaahi fehuʻi ʻe fā. Hiki takitaha kinautolu, pea fakalaulauloto ki he meʻa ʻokú ne akoʻi atu fekauʻaki mo e fehangahangai ko ia mo e ngaahi faingataʻa ʻo e moʻuí ʻaki e tui kia Sīsū Kalaisí. ʻOku fakanonga fēfē ʻe he Fakamoʻuí e ngaahi matangi ʻi hoʻo moʻuí?

Vakai foki, Lisa L. Harkness, “Fiemālie, Peá ke [Nonga],” Liahona, Nōvema 2020, 80–82.

Mei he Ilifiá ki he Tuí, tā ʻe Howard Lyon

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Mātiu 8; Maʻake 2–4; Luke 7.Fakakaukau ke faʻu ha lisi ʻo e ngaahi mana ʻoku fakamatalaʻi ʻi he ngaahi vahe ko ʻení. Feinga ke kumi pe tā ha fakatātā ʻo hanau niʻihi (vakai ki he Tohi Fakatātā ʻo e Ongoongoleleí pe ChurchofJesusChrist.org). ʻE lava ke fakaʻaongaʻi ʻe he mēmipa takitaha ʻo e fāmilí ha ngaahi fakatātā ke fakamatalaʻi ha taha ʻo e ngaahi maná pea vahevahe ʻa e meʻa ʻoku nau ako mei aí. Te ke lava ʻo vahevahe ha niʻihi ʻo e ngaahi mana kuó ke mātātonu pe laukonga ki ai ʻi hotau kuongá.

 

Mātiu 8:5–13; Luke 7:1–10.Ko e hā ne hōifua ki ai ʻa Sīsū ʻi he tui ʻa e ʻeikitaú? Te tau fakahā fēfē ʻa e tui tatau kia Sīsū Kalaisí?

Maʻake 2:1–12.ʻE lava e “Vahe 23: Ko e Tangata Pipikí” (ʻi he Ngaahi Talanoa ʻo e Fuakava Foʻoú, 57–58) ʻo tokoni ke aleaʻi ʻe homou fāmilí e Maʻake 2:1–12. (Vakai foki ki he vitiō “Ko e Fakamolemoleʻi ʻe Sīsū e Ngaahi Angahalá mo Fakamoʻui ha tangata ne Mahaki Tete” ʻi he ChurchofJesusChrist.org.) Te tau lava fēfē ʻo hangē ko e ngaahi kaungāmeʻa ʻo e tangata naʻe ʻikai lava ʻo lué? Ko hai kuo hoko ko ha kaungāmeʻa pehē kiate kitautolu?

Maʻake 4:35–41.ʻE lava nai ke tokoni e fakamatala ko ʻení ki he kau mēmipa ʻo e fāmilí ʻi he taimi ʻoku nau ongoʻi manavahē aí? Mahalo naʻa lava ke nau lau ʻa e veesi 39 pea vahevahe ha ngaahi aʻusia ʻi hono tokoniʻi kinautolu ʻe he Fakamoʻuí ke nau ongoʻi nonga.

Mahalo ʻe fiefia e fānaú ʻi haʻanau ʻai ke pehē ʻoku nau ʻi ha vaka ʻi ha tahi hou lolotonga hono lau ʻe ha taha ʻa e Maʻake 4:35–38. Pea ʻi he taimi ʻoku lau ai ʻe ha taha ʻa e veesi 39, ʻe lava ke nau ʻai ke pehē ʻoku nau ʻi ha vaka ʻi ha tahi malū. Te mou lava foki ʻo hivaʻi fakataha ha foʻi hiva fekauʻaki mo hono maʻu ʻo e melinó ʻi he Fakamoʻuí, hangē ko e “Naʻe Tala pē ʻe Sīsū” (Ngaahi Himí, fika 51). Ko e hā ha ngaahi kupuʻi lea ʻi he hivá ʻoku nau akoʻi mai fekauʻaki mo e melino ʻoku ʻomi ʻe Sīsuú?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “Naʻe Tala pē ʻe Sīsū,” Ngaahi Himí, fika 51.

Ko Hono Fakatupulaki ʻo ʻEtau Founga Akoʻí

Fakafaingamālieʻi mo anga fakafaingofua. ʻOku kamata ha niʻihi ʻo e ngaahi momeniti akoʻi lelei tahá ko ha ngaahi fehuʻi pe loto-hohaʻa ʻa e kau mēmipa ʻo e fāmilí. Tuku ke ʻiloʻi ʻe he kau mēmipa ʻo e fāmilí ʻi hoʻo leá mo e tōʻongá ʻokú ke vēkeveke ke fanongo kiate kinautolu. (Vakai Ko e Faiako ʻi he Founga ʻa e Fakamoʻuí, 16.)

Ko Kalaisi mo e Tangata Mahaki Teté, tā ʻe J. Kirk Richards