“Aokati 7–13. I-Rom 1– 6: ‘Mwakan te Atua ni Karekea Maiun te Aomata ae Onimaki,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Aokati 7–13. I-Rom 1–6,” Nakomai, Iriirai—Ibukin te Moanrinan: 2023
Aokati 7–13
I-Rom 1–6
“Mwakan te Atua ni Karekea Maiun te Aomata ae Onimaki”
Tera ana wirikiriki te tamnei ae ko karekea ngkai ko wareka I-Rom 1–6? Ana wirikiriki te tamnei aikai a kona ni buokiko n rinei iango iaon te anga reirei aikai ke karaoa are bon iroum.
Kaunga te Tibwatibwa
Kaoiia ataei bwa a na tibwauai bwa tera ae a karaoia ni kaeka nakon te kakao are ko anganiia inanon te reirei n te wiiki ae nako.
Reirei te Reirei: Ataei aika a Uarereke Riki
I kona ni kaota au onimaki iroun Iesu Kristo man iriirakina.
E reirei Bauro bwa te euangkerio iai mwaakana ni karekea te kamaiu nakoia aomata ake a maiu man te onimaki iroun Iesu Kristo. Ko na kanga ni buokiia ataei bwa a na kaota aia onimaki iroun Iesu Kristo man Iriirakina?
Waaki ni Kakukurei aika a Kona ni Karaoaki
-
Wareka I-Rome 1:17 nakoia ataei, ao buokiia bwa a na kamatenanoa te kibu n taeka “E maiu ane raoiroi n te onimaki.” Ko kona ni katanakoia ataei n tatabemaniia ma teuana te taeka inanon te kibu n taeka ao tuangiia bwa a na taekina te taeka anne ngkana ko koteia. Kabwarabwaraa bwa te mwakoro n taeka aei e nanonaki bwa ti riai ni karekea ara onimaki iroun Iesu Kristo. Titirakiniia ataei ngkana ataia bwa tera te onimaki. Kaota tamnein Iesu Kristo ao kabwarabwaraa bwa ti kakoaua bwa bon iai Ngaia e ngae ngke ti tuai n noria. Aio bon te onimaki—kakoauaan te bwai teuana e ngae ngke ti tuai n noria.
-
Kabwarabwara bwa ti kaota ara onimaki iroun Iesu Kristo ngkana ti ongeaba Irouna. Karabai tamnei inanon te ruu ae tamneia aomata ae a karaoa te bwai are e tuangiira Iesu bwa ti na karaoia. Anganiia ataei te tai bwa a na ikaruoruo ni kakaei ao ni kabwarabwarai tamnei. Tera ae ti kona ni karaoia n iriira Iesu?
-
Tuanga temanna te ataei bwa e na kamakii matana, ao kaira teuanne ke neienne rinanon te ruu nakon tamnein Iesu. Ngkana e reke taina, karekea aia tai ataei ake tabeman bwa a na karaoia. Buokiia ataei ni mataata bwa a kona n iriira ana reirei Iesu Kristo n aron ae a iriira kairakiia mai iroum.
Ngkana ko tia ni bwabetitoaki ti tebo ma te aomata ae boou ngkoe.
Ataei ake ko reireiniia a katauraoi ibukin te bwabetitoaki. Tera ae a kona n reiakinna iaon te bwabetito man I-Rom 6?
Waaki ni Kakukurei aika a Kona ni Karaoaki
-
Kaoiia ataei bwa a na kaokioka taekinan te kibu n taeka “Nakonako i nanon te maiu naba ngkai” (I-Rom 6:4). Tuangiia ataei bwa tera nanon aei iroum. Te katooto, tao ko na tibwai baike ko uring n te bong are ko bwabetitoaki iai ao maroroakinna bwa e kanga bwabetitoakim ni buokiko n riki n aiaron Iesu Kristo. Kabongana te iteraniba ni waaki ni kakukurei n te wiiki aei n reireiniia ataei bwa te bwabetito e buokiira ni riki bwa aomata aika boou.
-
Ngkana iai mai ibuakoia ataei aika a tia n ira te bwabetito, tuangiia bwa a na tibwa aia taneiai. Ke kaota tamnein temanna are e bwabetitoaki (taraa Gospel Art Book,, nambwa 35, 103–4). Buokiia ataei bwa a na ataia bwa n tain te bwabetito ti karaoi berita bwa ti na riki n ai aron Iesu. Kaoiia bwa a na korea tamneia ae a bwabetitoaki ao n tibwaia bwa tera ae a kona ni karaoia ni katauraoia ibukin aia bwabetitoa.
-
Anene ma ataei n te kuna ae taekan te bwabetito, n aron “When I Am Baptized” (Aia Boki n Anene Ataei, 103). Tera ae ti reiakinna iaon te bwabetito man te anene aei?
Te bwabetito e kaota aron moanakin te maiu ae boou bwa ana reirei Kristo.
Reirei te Reirei: Ataei aika a Ikawai Riki
I kona ni kaota au onimaki iroun Iesu Kristo man iriirakina.
E reirei Bauro bwa te euangkerio iai mwaakana ni karekea te kamaiu nakoia aomata ake a maiu man te onimaki iroun Iesu Kristo. Te onimaki iroun Iesu Kristo bon te moan reirei n te euangkerio. E anga te unganano nakoira bwa ti na ongeaaba n taian tua. Ko na kanga ni buokiia ataei bwa a na mataata raoi n te onimaki?
Waaki ni Kakukurei aika a Kona ni Karaoaki
-
Tuanga te ataei bwa e na kakaea Rom iaon te mwabe. Buokiia ataei ni mataata bwa inanon wiiki aika imwaira, a na reirei man taian reta are e korei Bauro nakoia kaain te Ekaretia n taabo aika a kakaokoro, ni moanaki man te reta aei nakoia I-Rom.
-
Korei taeka man I-Rom 1:16 iaon te burakibooti, ao kanakoi taeka tabeua n aki korei. Kaoia ataei bwa a na kakaei ni koroboki aika a tabu ao ni kanoai bwangabwanga. Kaoia ataei bwa a na tibwaia bwa tera nanon “Bwa I aki maamaa n ana euangkerio Kristo” irouia.
-
Kaoa te ataei bwa e na kabaibati ni wareka I-Rom 1:17, ao tuangiia ataei ake tabeman bwa a na kakauongo nakon te taeka ae e okioki. Tera ae nanonaki ni “maiu n te onimaki”? Kaoiia ataei bwa a na kakaea nanon te taeka ae onimaki inanon bwai ni ibuobuoki n aron Kairi nakon Koroboki aika Tabu, “Onimaki” (scriptures.ChurchofJesusChrist.org). A na kanga maiura ni kaokoro ngke arona bwa akea ara onimaki iroun Iesu Kristo?
-
Kaota nakoia ataei te aroka ao te koraa, ao titirakiniia bwa ti kanga ni buoka te koraa n riki bwa te aroka. Kabwarabwara bwa ngkana ti unika ao n teboka te koraa, ti kaotia bwa iai ara onimaki ae e na bon rikirake. Ti kanga ni kaotia bwa iai ara onimaki iroun Iesu Kristo? Iangoia n anenea te anene iaon te onimaki, n aron “Faith” (Aia Boki n Anene Ataei, 96), bwa mwakoron te waaki aei.
Ti bane ni kainanoa Iesu Kristo bwa e aonga ni kabwaraaki are bure.
Bauro e tangiriia kaain I-Korinto bwa a na mataata bwa te kamaiuaki e roko rinanon Iesu Kristo ao Ana akoi. Iangoia bwa ko na kanga n reirei te koaua aei nakoia ataei.
Waaki ni Kakukurei aika a Kona ni Karaoaki
-
Anganiia ataei n tatabemaniia te kibu n taeka man I-Rom 3:23–24, ae koreaki iaon te moti ni beeba. Kaoiia ataei bwa a na katikui kibu n taeka n rinaniia ae eti ao uaia ni wareki kiibu. Titirakiniia ataei bwa tera ae a reiakinna man kiibu aikai. Kabwarabwaraa bwa te “akoi” ni kibu 24 e nanonaki iai ana bwai n tituaraoi n akoi ao n nanoanga te Tia Kamaiu, are e karikia nakoira bwa ti na karekea kabwaraan ara bure ao n riki n tamaroa.
-
Katekea ni karietaa te tamnei n te oo ke n te tabo teuana are a na aki kona ataei n rotia. Tuangiia bwa a na kataia n rotia, ao kabotaua aio ma te bwai are e reirei iaona Bauro n I-Rom 3:23. Ngkanne buokiia bwa a na roota te tamnei. Tera ae e a tia ni karaoia te Tia Kamaiu ibukira ae ti aki kona ni karaoia ibon ibukira? Kaoiia ataei bwa a na tibwaia bwa e kangaa aron aia namakin ibukin te Tia Kamaiu ngke a iangoa te bwai are E a tia ni karaoia ao ni kona ni karaoia ibukiia.
Ngkana ko tia ni bwabetitoaki ti tebo ma te aomata ae boou ngkoe.
Bauro e reirei bwa te bwabetito bon aekakin naba maten ao Mangautin Kristo. Bon aekakin naba ae ti teirake n “Nakonako i nanon te maiu naba ngkai” (I-Rom 6:4). Ti kaboowi ara motinano n nakonako i nanon te maiu naba ngkai ni katoa tai are ti anaa iai te toa.
Waaki ni Kakukurei aika a Kona ni Karaoaki
-
Kaoa te ataei bwa e na wareka I-Rom 6:3–6. Tera ae taku Bauro bwa te bwabetito “kanga ai aekakin tera”?
-
Maroroakinna bwa e kanga te bwabetito n tei bwa kanga aiaron te mate ao te mangauti. E na ibuobuoki ngkana e katekeaki tamnein te bwabetito ke kaota te witeo n aron “The Baptism of Jesus” (ChurchofJesusChrist.org). Bukin tera bwa te mate ao te mangauti bon kanikinaa aika tamaroa n te bwai ae e riki ngke ti bwabetitoaki?
-
Bane wareka tataron te toa (taraa Reirei ao Berita aika Tabu 20:77, 79). Kauringiia ataei bwa ngkana ti anaa te toa, ti kabooua te motinano n iriira Iesu Kristo n are ti karaoia ngke ti bwabetitoaki. E kanga te toa ni buokiira n “nakonako i nanon te maiu naba ngkai”?
-
Kaoiia ataei bwa a na korei tamnei aika a kaotia bwa tera ae nanonaki irouia n “nakonako i nanon te maiu naba ngkai.” A kona ataei ni katinei tamnei aikai n aia ruu ni buokiia n uringnga bwa a na karaoi rinerine aika tamaroa.
Kaungaa te Kamatebwai n te Mweenga
Tabekia nakoia ataei bwa a na tuangiia kaain aia utu bwa a na kaotia nakoia ngkana a karaoa te bwai ae e kaota te onimaki.
Kanakoraoan Ara Anga Reirei
Katea aia koaua raoi ataei. Kamoamoaiia ataei ngkana a ira buakon te reirei n te kiraati. Aio te kawai teuana ni katea bon onimakinaia ibon irouia bwa a kona ni reiakina te euangkerio.