“Aokati 21–27. 1 I-Korinto 1–7: ‘E na Kororaoi Reitakimi,’” Nakomai, Iriirai—Ibukin te Moanrinan: Nu Tetemanti 2023 (2022)
“Aokati 21–27. 1 I-Korinto 1–7,” Nakomai, Iriirai—Ibukin te Moanrinan: 2023
Korinto, Greece Maiaki, te Forum ao Civic Center, ana korotamnei Balage Balogh/www.ArchaeologyIllustrated.com
Aokati 21–27
1 I-Korinto 1–7
“E na Kororaoi Reitakimi”
Te Tamnei ae Raoiroi e na buokiko n atai reirein te euangkerio n 1 I-Korinto 1–7 ae e na buokiia am ataei aika ko reireiniia. Ngkai ko kamatebwai mwakoro aikai ma te tataromwaaka, korei am iango ao am namakin ake a roko nakoim mairoun te Tamnei ae Raoiroi.
Kaungaa te Tibwatibwa
Tuangiia ataei bwa ngkana a tibwaa reireiaia ma aia utu n te reire n te wiiki ae nako n te Moanrinan. (Ko kona ni kauringa teutana te reirei n te wiiki ae nako.) Ngkana a tibwatibwa, tera ae a tibwaia?
Reirei te Reirei: Ataei aika a Uarereke Riki
E reireinai koauan te euangkerio te Tamnei ae Raoiroi.
Teuana ana mwakuri te Tamnei ae Raoiroi bon reiakinau taian koaua. Tera rongorongom ae ko kona n tibwaia nakoia ataei bwa a na mataata riki n aei?
Waaki ni Kakukurei aika a Kona ni Karaoaki
-
Kaotii bwaai ke tamnei ake a ti reiakin iai bwain te aonnaaba (n aron te reirei, te boki, ke te tareboon). Tera ae ti kona n reiakinna ngkana ti kabonganai bwaai aikai? Kabwarabwaraa bwa n 1 I-Korinto 2:11, 14, E reirei Bauro bwa ti kona n kinaa te Atua tii rinanon tamnein te Atua, are bon te Tamnei ae Raoiroi. Tera ae ti kona ni karaoi n reiakin “bwaai mairoun te Atua”?
-
Uboi baimi ngkana kam taekina te kibuntaeka ae kangai “Te Tamnei ae Raoiroi e reieiniira taian koaua.” Tuangiia ataei bwa a na ubouboi baia ngkana a wareka te botantaeka aei. Tibwaa rongorongom nakoia ataei ike te Tamnei ae Raoiroi e buokiko n ataa koauan te reirei teuana.
-
Bootaki n anenea te kuna ae taekan te Tamnei ae Raoiroi, n aron “The Holy Ghost” (Aia Boki n Anene Ataei, 105). Buokiia ataei ni kakaei taeka ma botantaeka n te anene ake a reirei aron te Tamnei ae Raoiroi n taetae nakoira ao tera ae E reireiniira.
Iesu Kristo bon aan au kateitei.
Ataei a katea aan aia koaua, ao ko kona ni buokiia ni katea aaia ae matoatoa iaon Iesu Kristo.
Waaki ni Kakukurei aika a Kona ni Karaoaki
-
Wareka 1 I-Korinto 3:11 nakoia ataei, ao kabwarabwara bwa Iesu bon aara. Kaoti tabeua tamnei nakoia ataei ake a kona n reke iai ara koaua, n aron tamnein Iesu Kristo. Buokiia ni barongai tamnei bwa e aonga n ae e mena tamnein Iesu mai nano, kanga aan te kateitei, ao tamnei ake tabeua a “kateitei” i Aona.
-
Karaoi kain te anene ae “The Wise Man and the Foolish Man” (Aia Boki n Anene Ataei, 281), ao aneneia ma ataei. Angania ataei te atibu ae mwakoro iaon ae kangai “Iesu Kristo bon aan au kateitei” . Tuangiia bwa a na uoti rikaaki nakon mweengaia bwa kauringan te bwai ae a tia n reireia.
-
Kaotii tamnei ake a tei ibukin karaki aika mateakinaki ni maiun te Tia Kamaiu, ao tuangiia ataei bwa a na tuangko bwa tera ae riki n te tamnei anne. Tuangiia bwa a na tibwai karakinan Iesu aika mamamate nanoia iai. Kaota am koaua bwa Iesu Kristo bon aan ara onimaki.
Rabwatau ai aron te tembora.
Ko na kanga ni buokiia ataei ni kakaitau ibukin rabwataia ngkai taian bwaintangira mairoun te Atua ao ni karekea te nano n tararuaia?
Waaki ni Kakukurei aika a Kona ni Karaoaki
-
Kaotii tamnein tembora nakoia ataei (taraa te kamataata n te wiiki aei n Nakomai, Iriiriai—Ibukiia Aomata n Tatabemaniia ao Utu), ao warekii taeka aikai man 1 I-Korinto 6:19: “Rabwatam bon ana tembora te Tamnei ae Raoiroi.” Buokiia ataei bwa a na mataata bwa Tamara are i Karawa e tangiria bwa ti na kaitiaka man tabua rabwatara, n aron te tembora.
-
Kaota tamnein te ataei, ao katobibia te tamnei aei ni bwaai aika raoiroi ibukin rabwatara ao aika a buakaka. Kaoiia ataei bwa a na ikaruoruo n katebenakoi bwaai aika a tamaroa ao ni kanakoi bwaai aika aki tamaroa.
-
Bootaki anenea te kuna iaon te rabwata, n aron “Atuu, Angau, Bubuan waeu, ao Rangaau” (Aia Boki n Anene Ataei, 275), ao titirakiniia ataei bwa bukin tera a kakaitau ibukin rabwataia.
Reirei te Reirei: Ataei aika a Ikawai Riki
Te wanawana bon onimakinan wanawanan te Atua.
Am ataei a na bon kunea—ao ngkana a tuai—ae tabeman aomata a reirei bwaai aika a kaitaraa wanawanan te Atua. Kamatebwaian 1 I-Korinto 1:23–25 e kona ni buokiia ataei ni mataata bwa ti kona n onimakin wanwanan te Atua ibukina bwa e rietata riki nakoira.
Waaki ni Kakukurei aika a Kona ni Karaoaki
-
Tuangiia ataei bwa a na wareka 1 I-Korinto 1:23–25 ao ni kakaei taeka n aron wanawana ao nanobaba. Kabwarabwara bwa e mwaiti aomata ake a taku bwa e nanobaba ana reirei Bauro, ma e kabwarabwara Bauro bwa kakoauaan ana euangkerio Kristo bon te wanawana ni koaua. Bukin tera e tamaroa rinean ana reirei te Atua?
-
Buokiia ataei bwa a na kataneiai n aia kaeka nakoia aomata ake a taku bwa ana tua te Atua a bon “nanobaba”—n aron te tua bwa ti na onimakina te Tia Kamaiu, kawakinan Tuan te Mauri, ke te ongeaba nakon tuan te kabwianibwai. N aron ae kangai, a kona ni kaota aia koaua n aia kakabwaia ake a karekei man maiukinan reirei aikai.
-
Tibwaa rongorongom ngke aomata a taku bwa e nanobaba am koaua, ke tibwaa te katooto teuana man booki aika tabu. Kariaia ataei bwa a na tibwauai aeka n taneiai aikanne. E na kanga 1 I-Korinto 1:25 ni buokiira bwa ti na teimatoa ni kakaonimaki ngkana a taku tabeman aomata bwa e nanobaba ara koaua?
E reireinai koauan te euangkerio te Tamnei ae Raoiroi.
Ko na kanga ni buokiia ataei ni kina bwa a kainnanoa te Tamnei ae Raoiroi bwa a na karekea te oota n “ana bwai te Atua”?
Waaki ni Kakukurei aika a Kona ni Karaoaki
-
Tuangiia ataei bwa a na korei kawai ake ti kona iai n reiakina te aonaaba—n aron, booki, te reirei, ao te intanete. Ngkanne bootaki ni wareka 1 I-Korinto 2:11–14. Tera ae a reirei kiibu aikai n aron reiakinan “ana bwai te Atua”?
-
Tuangai te tai are ko reiakina iai te koaua rinanon Tamnein te Atua. Buokiia ataei bwa a na kinai taai ake a namakina iai te Tamnei. Tera “ana bwai te Atua” (1 I-Korinto 2:11) are e a tia ni buokiira te Tamnei bwa ti na ataia?
-
Kaoa temanna te ataei bwa e na wareka teuana man kiibu aikai 1 I-Korinto 2:11–14; 1 Nibwaai 10:17; Moronaai 10:3–5; ao Reirei ao Berita aika Tabu 8:2–3. Tuangiia ataei bwa a na tibwaa reireiaia man kiibu aikai n aron ana anga reirei te Tamnei ae Raoiroi nakoira. Bukin tera ti kakaitau n ana bwaintituaraoi te Tamnei ae Raoiroi?
I riai n tararua rabwatau ma te karinerine ao n tabuia.
Ngkana ti ataia ae rabwatara bon ana bwaintangira Tamara are i Karawa e na ibuobuoki nakoia ataei n tabui rabwataia, inanon kakatai nakoia.
Waaki ni Kakukurei aika a Kona ni Karaoaki
-
Uota te turumwa ma kanoana tamnein te ataei ao te tembora. Kaoiia ataei bwa a na wareka 1 I-Korinto 6:19–20 ao ni keetinna bwa tera kanoan te turumwa. Tuangiia bwa a na kaukia ao ni maroroakinna bwa a kanga rabwatara n ti tebo ma taian tembora.
-
Maroro ma ataei bwa tera arora inanon te tembora. Ngkana arona bwa rabwatara ai aron taian tembora, tera arora n tararua rabwatara? Anenean ke warekan taekan te anene iaon taian tembora, n aron “The Lord Gave Me a Temple” (Aia Boki n Anene Ataei, 153), e kona ni buokai ni kaekaa te titiraki aei. Ngkana ti karaoa ae kairua, ti na kanga ni manga kaitiaka ara “tembora”?
-
Kaai ni wareka “E tabu Rabwatam” (inanon Ibukin Kakorakoraia Kairake [kairi, 2022], 22–29). Kaoiia ataei bwa a na korei iaon te burakibooti reirei ake a kunei n aron tararuaan rabwatara.
Kaungaa te Kamatebwai n te Mweenga
Kaoiia ataei bwa a na tibwaa te anene nakoia aia utu are a aneneia n te kiraati ao te reirei are a karekea mai iai.
Kanakoraoan Ara Anga reirei
Kaota am koaua iroun Iesu Kristo. Teuana mai ibuakon bwaai aika kakaawaki n tabem bwa te tia reirei bon kaotan am koaua iroun Iesu Kristo. Aio e na buokiia ataei ni kakorakorai aia koaua ao n namakina ana tangira te Tia Kamaiu ibukiia.