Korinto, Kuriiti Maiaki, te Forum ao Civic Center, korobanna n te been iroun Balage Balogh/www.ArchaeologyIllustrated.com

Aokati 21–27

1 I-Korinto 1–7

“Kam na Bo Raoi n te Nano ae Ti te Arona”

Korei am namakin ngkai ko wareka 1 I-Korinto 1–7. Namakin aikai a kona n kairaki ma kairi mai karawa ni kamatebwai iango riki, n tibwai ma tabeman te bwai are ko reiakinna, ke ni karaoa te bitaki inanon maium.

Korei Am Namakin

Inanon namwakaina are kabanea Bauro i Korinto, “I-Korinto aika bati ngke a ongo [irouna] ao a kakoauaa, ao a bwabetitoaki” (Mwakuri 18:8). Ngaia are e bon karekea te nano ae uruaki Bauro ngke e ongo, tabeua te ririki imwina, are iai te “raurenako” ao te “itabaraara” ibuakoia I-Korinto aika Itiaki ao n akean ngaia ibuakoia a moanna n ongo nakon “wanawanan te aonaaba” (1 I-Korinto 1:10–11, 20). Ni kaekana, Bauro e korea te reta are ti aranna bwa 1 I-Korinto. E bon onrake n reirei aika a rang nano, ao ma n te tai naba anne, Bauro e taraa n un bwa aika Itiaki aki tauraoi ni butimwaea reirei ni kabane ake e tangiria n anganiia. “Ngai, tari, I aki kona n taetae nakoimi ngke kanga ana bai te tamnei ngkami,” e baebaeti, “bwa ana bai te rabata naba ngkami” (1 I-Korinto 3:1–3). Ngkai ti tauraoi ni wareka ana taeka Bauro, e na bon ibuobuoki n taraa raoi oin tauraoira ni butimwaea te koaua—n ikotaki ma kukurein nanora n ongo nakon te Tamnei ao ni kataia ni katiteuanaaki ma ara utu, ma raoraora aika Itiaki, ao ma te Atua.

Iango ibukin te Kamatebwai i bon Iroum ni Koroboki aika Tabu

1 I-Korinto 1:10–17; 3:1–11

Kaain ana Ekaretia Kristo a kataia ni katiteuanaaki.

Ti aki atai ni kabanerongorongon akean te katiteuanaki ibuakoia kaain Korinto aika Itiaki, ma ti bon ti ataa taekan akean te katiteuanaki inanon oin ara reitaki. Iangoa te reitaki n iraorao inanon maium are e kona ni uaana man te katiteuanaaki riki; ngkanne tarai bwa tera ana reirei Bauro n 1 I-Korinto 1:10–17; 3:1–11 ibukin akean te katiteuanaaki ibuakoia kaain Korinto aika Itiaki. Tera te atatai ake ko kona ni karekea iaon karikirakean te katiteuanaaki ae korakora ma tabeman?

Taraa naba Motiaea 18:21; 4 Nibwaai 1:15–17; Reirei ao Berita aika Tabu 38:23–27; 105:1–5; Atuun te Euangkerio, “Katiteuanaki,” topics.ChurchofJesusChrist.org.

1 I-Korinto 1:17–31; 2

Ni katiaan ana mwakuri te Atua, I kainanoa rabakaun te Atua.

Ngkai e bon tamaroa—riki e kaungaaki—ukoran te rabakau n taabo nako are ti kunea iai (taraa 2 Nibwaai 9:29; Reirei ao Berita aika Tabu 88:118), Bauro e anga tabeua matoan ana taeka ni kauring ibukin buakakan rabakaun te aomata, are e atongnga bwa “rabakaun te aonaaba.” Ngkai ko wareka 1 I-Korinto 1:17–25, iangoia bwa tera ae nanonaki n te kibu n taeka aei. Tera n am iango are e nanonna Bauro n “rabakaun te Atua”? Bukin tera ae ti kainanoa rabakaun te Atua ni katiaa ana mwakuri?

Inanon am mwakuri korakora ni kakoroa bukin katabeam ni katiaan ana mwakuri te Atua, ko atia n rinanon te “maaku, ao … te ruru ae bati” are e namakinna Bauro ngke e reireiniia kaain Korinto aika Itiaki? (1 I-Korinto 2:3). Tera ae ko kunea n 1 I-Korinto 2:1–5 are e anganiko te ninikoria? Iangoia bwa ko na kanga ni kaotia are ko kakoaua “mwaakan te Atua” riki nakon “ rabakaun te aomata.”

Tara naba Reirei ao Berita aika Tabu 1:17–28.

1 I-Korinto 2:9–16

I kainanoa te Tamnei ae Raoiroi n te aro bwa N na mataata n ana bwai te Atua.

Ngkana ko tangiria n reiakina riki taekan mwakaeneke iaon taian kaa ke karaon kateitein rimoa, ko na kanga ni karaoia? Ni kaineti nakon 1 I-Korinto 2:9–16, e kanga reiakinan “ana bwai te Atua” ni kaokoro man reiakinan “ana bwai te aomata”? Bukin tera kai ti riai ni karekea te Tamnei ae Raoiroi n te aro bwa ti mataata n ana bwai te Atua? Imwiin kamatebwaian kiibu aikai, tera ae ko namakinna bwa ko riai ni karaoia ni kabwanina riki mataatam ni bwain te tamnei? E na kanga ana taeka Bauro ni buoka temanna are e ikakorakora ma ana kakoaua teuanne ke neienne?

1 I-Korinto 6:13–20

E tabu rabwatau.

Angiia aomata i Korinto a namakinna bwa te wenenibure are e tukaki bwa e bure e bon kariaiakaki bwa rabwataia a moan karikaki ibukin te kakukurei. N taekana teuana, Korinto e bon aki kaokoro ma te aonaaba n te bong aei. Tera ae reirei Bauro n 1 I-Korinto 6:13–20 are e kona ni buokiko ni kabwarabwara nakoia tabeman bwa bukin tera ko tangiria ni maiuakina te itiaki?

N ai aron Bauro, Titita Wendy W. Nelson e kaungaiia aika Itiaki n riki n itiaki; taraa ana rongorongo “Love and Marriage” (te taromauri ni kabuta te aonaaba ibukiia kairake n ikawai, Tianuare. 8, 2017, broadcasts.ChurchofJesusChrist.org). Ni kaineti ma Titita Nelson, tera kakabwaia ake a roko man maiuakinan ana kainibaire te Uea n taekan te tangira ao te iraorao ni koaua?

1 I-Korinto 7:29–33

E reireia Bauro bwa e tamaroa te aki mareaki nakon te mareaki?

Tabeua kiibu n 1 I-Korinto 7 e taraa n taekinaki are ngkai te mareaki e bon kariakaki, te tiku n aki iein ao n akean karaoan te wenenibure e tangiraki riki. E ngae n anne, Ana Rairairi Iotebwa Tiimiti, 1 I-Korinto 7:29–33 (abenteketi n te Baibara) e buokiira ni mataata bwa Bauro e bon katuruturua nakoia koraki ake a weteaki bwa mitinare ake a bwanin aia tai, n taraia raoi bwa e na tamaroa riki aroia n toro iroun te Atua ngkana a tiku n aki iein inanon aia tai n te mition. Te Uea e reirei rinanoia Ana toro, n ikotaki ma Bauro, ae te mareaki bon mwakoron Ana babaire ae akea tokina ao e riai ibukin te karietataaki (taraa 1 I-Korinto 11:11; Reirei ao Berita aika Tabu 131:1–4).

Iango ibukin Kamatebwai ni Koroboki aika Tabu n te Utu ao te Bootaki n te Tairiki

1-Korinto 1:10–17; 3:1–11.Ngkai kain am utu a wareki kiibu aikai, kaoiia ni kakaea nonoori ake ana kona ni buokiia n riki ni katiteuanaaki.

1 -Korinto 3:1–2.Tao ko na kona ni wareki kiibu aikai ngkai a tabe n amwarake n te miriki ao te iriko. Ko kona ni kabotaua aroia ataei n ikawairake n riki bwa ikawai ma aron kawaira n rikirake ni maiu n tamnei.

1 I-Korinto 3:4–9.Bauro e kabotaua ana mwakuri ni mitinare ma unikakin taian koraa. Tera ana kabotau n reireiniira taekan tibwauan te euangkerio?

1 I-Korinto 6:19–20.Kabotauan rabwatara nakon te tembora, n aron ae karaoia Bauro, konaa n riki bwa te kawai n reirei ae baiti iaon kakawakin rabwatara. Tao ko kona ni kaota tamnei taian tembora, n aron ake a raonaki n te kamataata aei. Bukin tera a tabu tembora? E na kanga rabwatara n riki n ai aron te tembora? Tera ae ti kona ni karaoia ni kawakin rabwatara n ai aron tembora? (Taraa naba te Aokati 2020 special edition man te Riaona iaon te wenenibure.)

Ibukin iango aika a mwaiti ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Kuuna aika rineaki: “The Lord Gave Me a Temple,” Aia Boki n Anene Ataei, 153.

Kanakoraoan Am Kamatebwai

Bwaina te taotaonaki n nano. Bauro e reirei bwa te miriki e roko imwain te iriko ngkana ti reiakina te euangkerio (taraa 1 I-Korinto 3:1–2). Ngkana ko kunea bwa tabeua reirei a bon kangaanga te mataata iai ngkai, bwaina te taotaonaki n nano. Kakoaua bwa taian kaeka a na roko ngkai ko karekea te onimaki ao ko kamatebwai mwaaka.

Bauro e kabotaui rabwatara ma aron tabun te tembora. Taraakina man te angamaing mai eta: Tijuana Mexico Tembora, Taipei Taiwan Tembora, Tegucigalpa Honduras Tembora, Houston Texas Tembora.