Aokati 14–20

I-Rom 7–16

“Kataea ana Kai te Buakaka n te Raoiroi”

Tii tabeua mai buakon reirein te euangkerio n I-Rom 7–16 ake a kona ni karinaki n te kamataata aei, ngaia are tai tiana arom n te bwai are e maroroakinaki ikai. Kakauongo nakon ana kairi te tamnei are ko karekea ngkai ko kamatebwai.

Korei Am Namakin

Ngkai e kauka ana reta nakoia i Rom, Bauro e kamauriia kaain te Ekaretia n araniia bwa “a tangiraki iroun te Atua” ake a “weteaki bwa ana aomata.” E taku bwa “[a] taekinaki aia onimaki i aonaba ni bane” (I-Rom 1:7–8). E ngae ngke Bauro e kabanea angin ana reta ni kaeti iango aika a kewe ao anua aika a kairua, taraan ae e kan kakoaua bwa Kiritian aika a boou aika a rairaki aika bon ngaiia ngkoa Aika Itiaki ake a tangiraki iroun te Atua. Ana taeka n reirei aika a marau a kakabwaiaira ngaira ni kabane ake ti ikakorakora n namakina ana tangira te Atua ao ake a riki bwa Aikai Itiaki a namakina ae a katinanikuaki. N ana namakin n nanorinano, e ataia Bauro kanga e namakinna bwa “te aomata ae kai nanou ngai” n tabetai (I-Rom 7:24), ma ana euangkerio Iesu Kristo e anganna te mwaaka n tokanikai iaon te bure (taraa Ana Rairairi Iotebwa Timiti, I-Rom 7:22–27 [n te Bible appendix]). N te mwaaka anne, mwaakan te Tia Kamaiu ni kaboan maiura, ti kona ni “kataea ana kai te buakaka”—te buakaka n te aonaaba ao te buakaka are i nanora—“n te raoiroi” (I-Rom 12:21).

Iango ibukin te Kamatebwai i bon Iroum ni Koroboki aika Tabu

I-Rom 7–8

Naake a iriira te Tamnei a kona n riki bwa “taan ibuokanibwai ma Kristo.”

E ngae ngke imwiin riniia nakon “te maiu nabangkai” rinanon te otenanti n te bwabetito (I-Rom 6:4), tao ko a tia n namakini tabeua kakaitara mai i nanom ake e kabwarabwarai Bauro n I-Rom 7—te “bua” imarenan te aro n aomata ao nanom ae raoiroi (I-Rom 7:23). Ma Bauro e taekina naba te kantaninga n I-Rom 8:23–25. Tera bukin te kantaninga aei are ko kunea n te mwakoro 8? Ko na kona naba ni kakaeai kakabwaia ake a roko man karekean “tamnein te Atua i roumi” (I-Rom 8:9). Ko na kanga n ukora ana iraorao te Tamnei ae Raoiroi n ae bwanin riki i nanon maium?

I-Rom 8:16–39

Mimitongin te bwaintituaraoi ae akea tokina e kabebetea au kanganga i aon te aba.

Tabeua te ririki imwiin korean te reta aei iroun Bauro, Aika Itiaki mai Rom a rootaki n te bwainikirinaki ae moan te kakamaaku. Tera ae ko kunea n I-Rom 8:16–39 are e a tia ni buokiia Aika Itiaki ngke e kaoti te bwainikirinaki? A kanga taeka aikai ni kaineti nakoim ao kakatai ake ko kaitarai n te tai aei?

Kakaei reitaki imarenan kiibu aikai ao te reirei aei mairoun Titita Linda S. Reeves: “I aki ataia bwa bukin tera ngkai e rangi ni mwaiti ara kanganga, ma n au namakina ae onoti bwa e rang korakora te kaniwanga, e kakikimwareirei ao e riaon ara atatai bwa i nanon bongin te kaniwanga anne, ti na namakina ae ti na kangai nakon Tamara ae nanoanga, man tangira, ‘Bon akanne ni kabane ake a kainnanoaki?’ I kakoaua bwa ngkana ti uringnga ni katoa tai ao n ataa mwaitin ana tangira ara Tia Kamaiu ibukira, ti na tauraoi ni karaoi bwaai nako bwa ti na kona ni manga oki nakon mweengaia, n ramwaneaki n Aia tangira ae akea tokina. Tera ae na kakawaki … tera ae ti na karawawataki ikai ngkana, n te kabane, kataaki akanne bon bwaai raoi are ti na kona n tau iai ibukin te maiu are akea tokina ao te karietataaki n abanuean te Atua ao Tamara ao ara Tia Kamaiu?” (“Worthy of Our Promised Blessings,” Liahona, Nov. 2015, 11). Baireia bwa tera ae ko na kona ni karaoia “n uringnga n taainako ao n ataa” ana tangira te Atua ibukim.

I-Rom 8:29–30; 9–11

Tera ae nanonna Bauro man “motiki bukiia naba rimoa,” “a rineaki,” ao “ataia rimoa”?

Bauro e kabonganai taeka “motiki bukiia naba rimoa,” “a rineaki,” ao “ataia rimoa” n reireia bwa imwaain te maiu aio, te Atua e rineia Natina bwa a na riki bwa mwakoron Iteraera, Ana aomata ni berita. Nanon aio bwa a na karekei kakabwaia aika a onoti ao katabeaki bwa a aonga ni kakabwaiaia aomata ni kabane n te aonaaba (taraa Bwai ni Kairi nakon Koroboki aika Tabu, “Election,” scriptures.ChurchofJesusChrist.org). Ma e ngae n anne, e katuruturua Bauro n I-Rom 9–11 bwa ni kabane natin te Atua a kona n riki bwa Ana aomata ni berita, ao ti bane ni karekea te maiu are akea tokina n te kawaki ae ti te arona—rinanon te onimaki iroun Iesu Kristo ao te ongotaeka nakon Ana tua.

Taraa naba I-Ebeto 1:3–4; 1 Betero 1:2; Aramwa 13:1–5; Gospel Topics, “Foreordination,” topics.ChurchofJesusChrist.org.

I-Rom 12–16

E kaoai Bauro bwa N na riki bwa te Aomata ae Itiaki ni koaua ao te tia iriira Iesu Kristo.

Kabanea ni mwakoro aika nimaua n I-Rom iai i nanona tebwi ma uoua kaetieti aika onoti ni maiu n aron te Aomata ae Itiaki. Teuana te kawai ni kamatebwai kaetieti aikai bwa ko na kakaei atuun rongorongo aika a kaokiokaki. Ko na kanga n kakimototoa ana reirei Bauro?

Ko bae n aki kona ni maiuakina ana reirei aei n te taina, ma e kona ni buokiko te Tamnei ni kakaea teuana ke uoua reirei are kona waakina karaoana n te bong aei. Tibwaa am iango ma Tamam are i Karawa n te tataro, ao butia Ana ibuobuoki.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

I-Rom 8:31–39.Tera ae ti kunea n I-Rom 8:31–39 are e reireiniira bwa e kanga ana namakin Tamara are i Karawa ao Iesu Kristo ibukira? Nningai ae ti a tia n namakina iai ana tangira te Atua ibukira?

Ni kabwarabwarai kiibu 38–39, a kona kaain te utu ni kakaei katotoon bwaai ake, n ai arora ao ana tangira te Atua, aki kona ni kamaenakoaki.

E reirei Unimwaane Wilford W. Andersen bwa, “Anenen te euangkerio bon [te] namakin n tamnei ae kakukurei.”

I-Rom 9:31–32.Ana rongorongo Unimwaane Wilford W. Andersen “The Music of the Gospel” (Liahona, May 2015, 54–56; taraa naba te witeo i aon ChurchofJesusChrist.org) e kona ni buoka ni kamatata te bwai are e reiakinna Bauro ibukin te tua, te mwakuri, ao te onimaki. Imwiin maroroakinan ana taeka, a kona kaain am utu ni mwaie n akea te katangitang. E kona te onimaki ni buokiira n rinanon kakimwareirein te euangkerio?

I-Rom 10:17.Aranii tabeua taian kiraati n ran ma bwai n ibuobuoki n ana taeka te Atua (n aron koroboki aika tabu, te kaotioti ae onoti, ao te maungatabu ni kabuta). Maroroakinna e kanga ana taeka te Atua ni karikirakea ara onimaki ngkai ko kabwaraoi kanoan taian kiraati nakon te boora ae aranaki bwa “te Onimaki.”

I-Rom 12.Tera nanon ae ti na anga rabwatara bwa “te karea ae maiu, ae itiaki, ae kakukureia te Atua? (te kibu 1).

I-Rom 14:13–21.A na kona n reke aroia am utu man kamatebwaian ana reirei Bauro ibukin te motikitaeka ao ngureakinan tangira baika a onoti. Tao ko kona ni kabwarabwarai kawai aika a bon tau ni kaeka ngkana aomata tabeman, n ikotaki ma kaain te utu, a karaoia aia rinerine ake a kaokoro ma am rinerine. Ti na kanga n “kaei bwai n raoi”? (te kibu 19).

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “I Feel My Savior’s Love,” Aia Boki n Anene Ataei74–75.

Kanakoraoan Ara Anga reirei

Kariaia ataei bwa a na kaoti bwaai ake a karaoi man aia kakauiango. “Ngkana ko kaoia ataei bwa a na karaoa te bwai ae irekereke ma reirein te euangkerio, ko buokiia ni kamataataia riki n te reirei. … Kariaiia bwa a na katei, korotamnei, karanii, korei, ao ni karaoi” (Reirei n Ana Kawai te Tia Kamaiu, 25).

Tiku Irou, iroun Del Parson