Turai 31–Aokati 6

Mwakuri 22–28

“Te Minita ao te Tia Kaotioti”

Te namakin mairoun te Tamnei ae Raoiroi e roko n taainako ni maraara ao tabetai e itiaki inanon te tai ae uarereke. Korean mwiin am namakin e kona n anganiko am tai n iangoia riki. Ngkai ko wareka Mwakuri 22–28, korei iango ao namakin are e roko nakoim, ao anaa am tai n iangoi raoi.

Korei Am Namakin

“Ngkana ti karaoa ana mwakuri te Uea” Beretitenti Thomas S. Monson e berita, “ti bon katauaki bwa tina buoka te Uea” (“To Learn, to Do, to Be,” Riaona, Nob. 2008, 62). Ti aki tau, ma e ngae n anne, nakon te kawai are akea te kataaki iai ao karekean te tokanikai ni bwaai ae akea tokiia. Ibukin kakoauan aei, ti riai ngaira ni kabane n taraa maiun te Abotoro ae Bauro. Ana mwakuri mairoun te Tia Kamaiu bwa “e na uota arau nako mataia Tientaire, ma uea, ma tibun Iteraera” (Mwakuri 9:15). Ni mwakoro 22–28 man Mwakuri, ti noora Bauro ni kakoroa bukin te mwakuri aei ao e kaitarai korakoran kakaitara—taurekereke, kabureakina, iowaawa nakon rabwatana, uruakin te kaibuke, ao riki tenakina n te naeta. Ma ti nooria naba bwa Iesu e “tei irarikina, ao e taku, Kabebetea nanom, Bauro” (Mwakuri 23:11). Ana taneiai Bauro bon te kauring ae kairaki mai karawa are ana wewete te Uea ni “tataekina [Ana] euangkerio ma te bwanaa ni kimwareirei” e airi ma te berita aio: “Tabekaarake nanom ao bwaina te kukurei, bwa I mena ibuakomi” (Reirei ao Berita aika Tabu 29:4–5; taraa naba Mataio 28:19–20).

Iango ibukin te Kamatebwai i bon Iroum ni Koroboki aika Tabu

Mwakuri 22:1–21; 26:1–29

Ana reirei Iesu Kristo a kaoti aia koaua ma te aki mamaaku.

Ngke Bauro e anga ana koaua ae mwaaka roiroi are e koreaki n Mwakuri 22 ao 26, e tauaki ni kabureaki irouia tautian Rom. Aomata are e taetae nakoia iai mwaakaia ni kabuakaka nakon te kamateaki. Ma e rineia bwa e na kaota koauan Iesu Kristo ao “te mii ae kaoti mai karawa” (Mwakuri 26:19) are e karekea. Tera ae kaungako n taekan ana taeka? Iangoi tibwanga ake ko karekei bwa ko na tibwaua am koaua. Ibukin te katooto, ataia raoraom bwa e kanga am namakin ibukin Iesu Kristo? Ke ningai te kabanea n tai are ko tuangiia am utu aron reken am koaua n te euangkerio?

Ngke te kairake Iotebwa Timiti e bon bwainingareaki ibukin taetaekinan ana Moan Mii ni Burabeti, are e kaungaaki man ana kawai Bauro ni kakoaua miina ni burabeti (taraa Iotebwa Timiti—Rongorongo 1:24–25). Ko na kanga ni kataunariia bwa tera ae reiakinna Iotebwa Timiti mairoun Bauro? Tera ae ko reiakinna mairouia uakai ni kakoauan Iesu Kristo?

Taraa naba Neil L. Andersen, “We Talk of Christ,” Riaona, Nob. 2020, 88–91.

Mwakuri 23:10–11; 27:13–25, 40–44

Te Uea e boutokaiia koraki ake a kekeiaki ni beku Ibukina.

N aron ana mwakuri Bauro are e kaotaki ni mataata, kangaanga inanon maiura bon tiaki kanikinaean ae te Atua e aki kukurei iroura ke ara mwakuri are ti karaoia. Ni koauana, n tabetai bon inanon taai ni kangaanga are ti namakina iai Ana boutoka ae e rang korakora. E na bon kakukurei rinanoana bwaai are ko a tia ni warekia n taekan ana mwakuri Bauro ao ni korei tabeua man bwaai are e rinanona (taraa, ibukin te katooto, Mwakuri 14:19–20; 16:19–27; 21:31–34; 23:10–11; 27:13–25, 40–44). E kanga te Uea n tei irarikina? E kanga n Tia n tei irarikim?

Mwakuri 24:24–27; 26:1–3, 24–29; 27

Iai te kamanoaki ao te rau n ongoraeakinan raoi aia taeka ana toro te Atua.

Rinanon nako ana mwakuri, Bauro e kaokaota ana koaua ae mwakaroiroi iaon Iesu Kristo ao Ana euangkerio. A mwaiti aomata ake a kariaia ana kakoaua, ma tiaki aomata ni kabane. Ngkai ko wareka Mwakuri 24:24–27 ao Mwakuri 26:1–3, 24–29, tarai taeka ao kibu n taeka are a kaotaki bwa a kanga kaain Rom ake taan tautaeka aika mena iaon Iuta ni kaeka nakon ana angreirei Bauro:

• Berika

• Beteto

• Te Uea are Akeriba

Ngke a ieie nako Rom bwa e na kataaki iroun Kaitara, Bauro e taetae ni burabetia are te “kamamate ao kabuanibwai” e na roko nakon te kaibuke ao batintiana (Mwakuri 27:10). Wareka mwakoro 27 ni kakaea bwa a kanga raon Bauro iaon te kaibuke ni kaeka nakon ana kauring. Iai reirei ae ko kunei ibukim n aia taneiai?

Ko a tia ni kaeka n aroia aomata aikai ngkana ko ongo aia reirei taan kairiiri n te Ekaretia? Tera tabeua bwaai aika a kona n riki ngkana ko kaeka n aekan aikai? Tera ae ko reiakinna man rongorongo aikai iaon taekan te kakauongo raoi nakon ana reirei te Uea rinanoia Ana toro?

Taraa naba 2 Nibwaai 33:1–2; D. Todd Christofferson, “The Voice of Warning,” Riaona, Meei 2017, 108–11; “Follow the Living Prophet,” Teachings of Presidents of the Church: Ezra Taft Benson (2014), 147–55.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mwakuri 24:16.Imwain rairakina, Bauro iai rongorongona ae abwabwaki n ana kaitara nakon te Atua. Ma ibukina e bon kukurei n rairananona, e kona n taekina, “N te bwai aei I kamwakura rabwatau, ni karekea n taainako au iango ae akea kairuana nakon te Atua ao nakoia aomata ni kabaneia” (taraa naba Reirei ao Berita aika Tabu 135:4–5). Ti na kangaa ni kanakoa ara iango ni kakaitara nakon te Atua ao tabeman?

Mwakuri 26:16–18.Inanon kiibu aikai, tera ae e tua te Uea nakon Bauro bwa e na karaoia? Tera aanga ae ti na kona ni karaoi bwaai aekaki aikai?

Mwakuri 28:1–9.Iai kaain am utu ae e tatangira te naeta? Ko na bon tangira te aomata anne ke temanna kaain te utu bwa e na karakina te karaki ae kuneaki n Mwakuri 28:1–9. Am ataei a na bon kukurei ni korea tamnein karaki aikai ke ni kaotioti iaona. Tera taian reirei aika ti kona n reiakin man rongorongo aikai? Teuana te reirei bon are te Uea e kakoroa nanon Ana berita nakoia Ana toro. Ibukin te katooto, ko kona ni kabotaui berita ake a karaoaki n Mareko 16:18 ma kakoroan bukiia n ana taneiai Bauro. Ko kona naba ni kunei inanon marooro man te maungatabu ni kabuta taekan berita are karaoaki iroun temanna ana toro te Uea—tao teuana are e uaana nakoia am utu—ao katekea inanon mweengam. Ti na kanga ni kaota ara onimaki bwa te berita aei e na bon kakoroaki bukina?

Te Atua e kamanoa Bauro ngke e tenaaki iroun te naeta.

Mwakuri 28:22–24.N aron te Ekaretia n ana bong Bauro (aranaki bwa te “aro” n kibu 22), te Ekaretia n te bong aei e taekinaki ni “kabuakakaaki.” Ngkana aomata a taetae ni kaitaraa te Tia Kamaiu ao Ana Ekaretia, e kanga ana kaeka Bauro? Tera ae ti kona n reiakinna man ana taneiai Bauro?

Ibukin riki iango ibukin reiakinaia ataei taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “I Ataia Bwa E Maiu Iesu,” Anene n Taromauri,, nambwa 135.

Kanakoraoan Ara Anga reirei

Iangoi reirei aika a na kakabwaiaia am utu. Ngkana kam kamatebwaia koroboki aika tabu, bon titirakiniko i bon iroum, “Tera ae I kunea ikai ae e na bongana nakon au utu?” (Taraa Reirei n Ana Kawai te Tia Kamaiu,, 17.)

Bauro e tei imatan te Uea ae Akeriba. Ninikoria ni Kakoaua iroun Iesu, iroun Daniel A. Lewis