Turai 24–30

Mwakuri 16-21

“E Bon Weteira te Atua bwa Ti na Tataekina te Euangkerio”

Ngkai ko wareka taekan ana konabwai Bauro n tataekina te euangkerio, e na kairiko te Tamnei n am iango ao am namakin. Korei namakin aika ko karekei, ao karaoa am babaire bwa ko na karaoi nanoia.

Korei Am Namakin

Ibuakon ana kabanea n taeka te Uea nakoia Ana Abotoro bon te tua bwa “A na nako ni kakiritianiia botanaomata ni kabaneia, ni bwabetitoia nako nanon aran te Tama, ma te Nati, ma te Tamnei ae Raoiroi, n reireia bwa a na kabanei baike I tuangingkami n tau” (Mataio 28:19–20). Ngkai e aki koro nanon aei irouia Abotoro ni kawari aba ni kabane, Makuri 16–21 e kaotia bwa Bauro ma raona a karaoa te rikirake ae moan te kamimii ni katean te Ekaretia. A reirei, ni bwabetito, ao n anga te bwaintituaraoi ae te Tamnei ae Raoiroi. A karaoi taian kakai, ni kamaiua naba te mwaane man te mate, ao ni kaman taekina Kitanan te Koaua ae Moan te Korakora (Mwakuri 20:7–12, 28–31). Ao e reitinako te mwakuri are a karaoia ma Abotoro aika a maiu ni boong aikai, n raonaki ma reirei aika a babane nanoia ni kakaonimaki n ai arom, are a buoka ni kakoroa nanon ana mwakuri te Tia Kamaiu ni kawai are akea kantaningaakina iroun Bauro. Tao ko bae n ataia aomata ake aki ataa Tamaia are i Karawa ke Ana euangkerio. Tao ko bae n namakina ae “e kaunaki [nanona] iroun te tamnei” bwa e na tibwaua nakoia are ko ataia Ibukina (Makuri 17:16). Ngkana ko ira ana katoto Bauro n nanorinano ao n ninikoria n tibwauakin te euangkerio, ko na kona ni kunea temanna “are [e] kauka nanona te Uea” (Makuri 16:14).

Iango ibukin te Kamatebwai i bon Iroum ni Koroboki aika Tabu

Mwakuri 16-21

E na kairi au konabwai te Tamnei ni tibwaua te euangkerio.

E kabwarabwara te Burabeti Iotebwa Timiti, “Bon akea te aomata ae kona n tataekina te Euangkerio n akea te Tamnei ae Raoiroi (Aia Reirei Beretitenti n te Ekaretia: Iotebwa Timiti [2007], 332). Ngkai ko wareka Makuri 16–21, iangoia bukin tera ngkai e koaua aia taeka Burabeti. Atai katooto ike e buokaki iai Bauro ma toana iroun te Tamnei. Baikara kakabwaia ake a kaoti ngke a ira te Tamnei? Nningai ae ko namakina iai ana wirikiriki te Tamnei inanon am konabwai n tibwaua te euangkerio?

Mwakuri 16-21

I kona n tataekina te euangkerio inanon aro nako.

Ni karenakoaki n te karabuti ibukin tataekinan te euangkerio kanga taraan ae iai bukina ae matata bwa e nang toki am kabwarabwara. Ma iroun Bauro ao Tira, e reke aia tai n raira te aomata ae kamatawarikaki (taraa Makuri 16:16–34). N iteran nako Makuri 16–21, kakaei tabeua katoto n ana tatauraoi Bauro n tibwaua ana kakoaua ma aomata nako. N am iango bukin tera ngkai e rangi n ninikoria ao n aki mamaaku? Tera ae ko reiakinna man ana katooto Bauro?

A mwaiti riki rongorongo ibukin tibwauaakin te euangkerio n Makuri 16–21. Ngkai ko kamatebwai mwakoro aikai, kakaei tabeua ake a kaineti nakoim.

Taraa Dieter F. Uchtdorf, “Mwakuri ni Mitinare: Tibwa te Bwai are i Nanom,” Riaona,, Meei 2019, 15–18.

Bon natin te Atua ngaira n tatabemaniira.

Mwakuri 17:16–34

“Ngaira bon kanoan te Atua.”

I Atenai, Bauro e kuneia aomata ma aia iango aika a kakokoro ao aia nonori n te aro. A aki toki n ukoukora “te ongora n te rongorongo ae boou,” ao te bwai are e na anga Bauro e rangi ni boou irouia (taraa Makuri 17:19–21). A taromauria bouananti, n ikotaki ma teuana are aranna bwa “ te Atua are e aki ataaki (Mwakuri 17:23), ma a kakoaua bwa iai mwaakaia ao aia kairoro bouananti, aika aki maiu, aomata aika onoti, ao n te koaua bon tiaki Tamara. Iangoa raoi te bwai are e taekinna Bauro ni buokiia bwa a na ataa te Atua. Tera ae nanonaki iroum bwa “kanoan te Atua ngaira? (Makuri 17:29). N am iango, e kanga te riki bwa natin te Atua ni kaokoro man te riki bwa temanna Ana karikibwai? E kanga ataakin te koaua aei n roota arom n taraiko ao aomata?

Ngke arona bwa ko tei irarikin Bauro ngke e tabe ni kaota ana kakoaua, tera ae ko na tuangiia kaain Ebera ibukin Tamara are i Karawa? Iai temanna ae ko ataia are e na kabwaia man ongoraean am kakoaua?

Taraa naba I-Rom 8:16; 1 Ioane 5:2; “We Are the Offspring of God” (witeo), ChurchofJesusChrist.org.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Makuri 16–21.Ni kananoa riki aia atatai am utu man Makuri 16–21, ko kona ni kamatebwaia te mwabe ni banen te kamatata aei, kakaei kaawa ike e tataekina iai te euangkerio Bauro inanon mwakoro aikai. Tera bwaai aika iai iroura bwa ti na buokia iai ni uota te euangkerio nakoia aba nako?

Ni kaungai nanoia am utu n tibwaua te euangkerio, ko kona ni kaota teuana te witeo ke e nako riki n “Sharing the Gospel” te mwakoro man te Gospel Library.

Makuri 17:10–12; 18:24–28.Ti na kanga n riki bwa aekakiia Aika Itiaki inanon kiibu aikai? Tera ae kananonaaki n “[kaaki] i nanora ana taeka te Atua”? (Makuri 17:11). Tera ae ti na karaoia bwa ti aonga n “atatai ni kanoan koroboki aika tabu”? (Makuri 18:24).

Makuri 19:1–7.A kona kiibu aikai ni buokiia am utu ni karaoa te maroro ibukin kakawakin te bwabetitoaki ao te kamatoaaki. Bwa e aonga ni mataataa riki taian koaua n Mwakuri 19:1–7, ko kona ni maroroakinna ma tabeua bwaai ake a akea bonganaia, n aron te tareboon ae akea baeterena. Ke ko kona ni tibwaua ana reirei te Burabeti Iotebwa Timiti: “Te bwabetito n te ran bon te bwabetito ae itera, ao akea bongan tamaroana ngkana akea iterana are teuana—bon anne, te bwabetitoaki n te Tamnei ae Raoiroi” (Ana Reirei: Iotebwa Timiti, 95). Bukin tera ngkai te bwabetito “e tamaroa n akea nanona” ngkana e aki reke te bwaintituaraoi are te Tamnei ae Raoiroi? (taraa 3 Nibwaai 27:19–20; Mote 6:59–61).

Mwakuri 19:18–20.Ngkai ko wareka Makuri 19:18–20, ataa kakawakin bwaai are a nang tauraoi aomata ni kanakoi n te aro are aonga ni kona ni butimwaea te euangkerio (taraa te kibu 19). Iai kaubwain te aonaaba ke waaki ake ti riai ni kanakoi n te aro bwa ti aonga ni karekei kakabwaia mai karawa?

Mwakuri 20:32–35.Nningai te tai are am utu a tia n rinanon ana reirei Kristo ae “e kakabwaia riki te anga nakon te anganaki”? (Makuri 20:35). Iai riki temanna ae na kona ni kakabwaiaki man te mwakuri n ibuobuoki, te tai, ke bwaintangira ake a kona n anga am utu? N aron te utu, marooroakin tabeua iango ao karaoa am babaire ni beku ibukin temanna. E kanga ara namakin ngkana ti buokiia tabeman? Bukin tera ngkai e korakora riki te kakabwaia ngkana ko anga nakon ae ko anganaki?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Ngai Natin te Atua,” Aia Boki n Anene Ataei, 2–3.

Kanakoraoan Am Kamatebwai

Korei am namakin. “Ngkana ko koroi am namakin n tamnei, ko kaotia nakon te Uea bwa ko moanibwaia Ana kawai, ao E na kakabwaiako ma kaotioti aika a teimatoa n riki” (Reirei n ana Kawai te Tia Kamaiu, 12; taraa naba te iteraniba 30).

Mwanangan ni Mitinare te Abotoro ae Bauro.