“Tuun 26–Turai 2. Mataio 28; Mareko 16; Ruka 24; Ioane 20–21: ‘E A Uti,’” Nakomai, Iriirai—Ibukiia Aomata n Tatabemaniia ao Utu: 2023 (2022)

“Tuun 26–Turai 2. Mataio 28; Mareko 16; Ruka 24; Ioane 20–21,” Nakomai, Iriirai—Ibukiia Aomata n Tatabemaniia ao Utu: 2023

Tamnei

E taetae Iesu nakon Betero i mataniwin te aba

Kamwarakeia Au Tiibu, iroun Kamille Corry

Tuun 26–Turai 2

Mataio 28; Mareko 16; Ruka 24; Ioane 20–21

“E A Uti”

Tataromwaaka ni wareka Mataio 28; Mareko 16; Ruka 24; ao Ioane 20–21, iangoa te kimwareirei are ko karekea ibukin Mangautin Kristo. Antai ake a na kakabwaiaaki man ongoraean am kakoaua n taekan te tai aei?

Korei Am Namakin

Irouia ake a tia n karaoa aia kakamatebwai, maten Iesu mai Natareta e tia ni karekea taraana ae ai aron taeka ni kaenaena nakon tokin te maiu ae tamaroa. Bon tiaki teuaei are kauta Rataro man te mate? Tiaki Ngaia are e kaitarai moan kakamakana mairouia Baritaio n taai aika okioki? E a tia ni kaota te mwaaka ni kamaiua te matakii, rebera, ao nakibaina. Te ang ao taari a ongotaeka Irouna. Ao ngkai ngaia aio E bon, tine n te kaibangaki, n atonga, “E a tia” (Ioane 19:30). A bon iai tabeua kakubanako ae koaua inanon taeka ni kaenaena “E kamaiua tabeman, ma E aki kona ni kamaiua” (Mataio 27:42). Ma ti ataia bwa maten Iesu bon tiaki tokin te karaki. Ti ataia bwa te mabu man te ruanimate bon te tai ae uarereke ao are ana mwakuri ni kamaiu Kristo e bon tibwa moanaki. E bon kuneaki n te bong aei tiaki “ibuakoia maate” ma ibuakoia aika maeu (Ruka 24:5). Ana reirei ana bon aki mabu, ibukina bwa Ana reirei aika a kakaonimaki a na bon kabwarabwara te euangkerio nakon “aaba ni kabane,” man kakoaua Ana taeka are E na bon memena “ma [ngaiia] taainako, riki ni karokoa tokin aonaaba” (Mataio 28:19–20).

Tamnei

te aikaon ibukin te kamatebwai i bon iroum

Iango ibukin te Kamatebwai i bon Iroum ni Koroboki aika Tabu

Mataio 28; Mareko 16; Ruka 24; Ioane 20

E a mangauti Iesu Kristo.

Inanon mwakoro aikai, ko na wareka taekan te tai teuana ae moan te kakawaki inanon rongorongon maiun te aomata: Mangautin Iesu Kristo. Ngkana ko wareware iangoia bwa ko mena ibuakoia aomata ake a kakoaua te tai are a katobibia te Mangauti. Tera ae ko reiakinna man aia taneiai?

E kanga am namakin ngke ko wareka taekan Mangautin te Tia Kamaiu? Iangoia bwa e kanga n rootiko—am taratara n te maiu, am irekereke, am onimaki iroun Kristo, ao am onimaki ni koauan te euangkerio.

Taraa naba Bible Dictionary, “Resurrection”; Atuun te Euangkerio, “Mangauti,” topics.ChurchofJesusChrist.org.

Ruka 24:13–35

I kona ni kaoa te Tia Kamaiu ni “maeka ma [ngai].”

Ngkai ko wareka aia taneiai ana reirei ake uoman ake a mwamwananga ao ni kaitibo ma te Tia Kamaiu are e maungauti, taraa are ti te arona ma am taneiai n aron ae te tia iriira Iesu. Ko kanga n nakonako ma Ngaia n te bong aei ao ni Kaoia n “tiku” teutana te tai? (Ruka 24:29). Ko na kanga ni kinaa Kaotina inanon maium? N te kawai raa are e a tia te Tamnei ae Raoiroi ni kakoaua mimitongin Iesu Kriso nakoim?

Taraa naba “Abide with Me; ’Tis Eventide,” “Abide with Me!,” Anene n Taromauri, nambwa 165–66.

Ruka 24:36–43; Ioane 20

Te mangauti bon ikotan te tamnei ma te rabwata n ae teimatoa.

Rongorongon Mangautin Iesu Kristo e kona ni buokiko ni kamataata bwa tera ae nanonaki n te manga kautaki. N te katooto, tera koaua are ko kunei n Ruka 24:36–43 ao Ioane 20 n taekan manga utin taian rabwata? Ko kona naba ni ukori tabeua koroboki aika tabu n taekan te mangauti, n aron 1 I-Korinto 15:35–44; I-Biribi 3:20–21; 3 Nibwaai 11:13–15; Reirei ao Berita aika Tabu 88:27–31; 110:2–3; 130:1, 22.

Ioane 20:19–29

“A kabwaia akana a onimaki ngkana a tuai noorai, ao a kakoaua.”

Tabeman aomata a namakin n ai aron Tooma, ngke a taku, “ngkana I aki noori … , I bon aki kakoaua” (Ioane 20:25). N am iango, bukin tera ko kona ni kakoaua man aki nooria e na riki bwa te kakabwaia? (taraa Ioane 20:29). Iangoia bwa ko na kanga ni kakabwaiaaki ibukin kakoauaan bwaai ae ko aki noori. Tera buokam n reken am onimaki iroun te Tia Kamaiu ngkana ko tuai Nooria? Ko na kanga n reitinako ni kakorakora am onimaki ni “bwaai ake ko aki noori ao a koaua”? (taraa Aramwa 32:16–21; Ita 12:6). Iangoia n korei mwiia inanon am tieno n taneiai are a tia ni buokiko ni kakoauaan Iesu Kristo, ke tibwauai nakoia tabeman ake ko kinaia.

Ioane 21:1–17

E kaoaiTe Tia Kamaiu bwa n na kamwarakeia Ana tiibu.

E na bon kakaongora kabotauan ana marooro te Tia Kamaiu ma Ana Abotoro ni Ioane 21 nakon te moan tai are E tuangiia ni kabwaka aia karaun, e koreaki n Ruka 5:1–11. Tera ae titebo ao te kaokoroare ko kunei? Tera te atatai n taekaia ana reirei ae ko kunei?

Iangoia bwa e kanga ana taeka te Tia Kamaiu nakon Betero n Ioane 21:15–17 are e na mwakuri nakoim. Iai te bwai ae tuukiko man mwakuri n ibuobuoki nakon ana tiibu te Uea? Tera aron am kaeka ngkana te Uea e titirakiniko “Ko tangirai?” Iangoia bwa ko na kanga ni kaota am tangira ibukin te Uea.

Taraa naba 1 Betero 5:2–4, 8; Jeffrey R. Holland, “The First Great Commandment,” Riaona, Nob. 2012, 83–85.

Tamnei

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Ruka 24:5–6.Beretitenti Thomas S. Monson e taku man Ruka 24:5–6, “Akea taeka inanon booki aika tabu ni Kiritian ae nano riki irou” (“E a Uti!,” Riaona, Meei 2010, 89). Tera ae nanonaki n taeka aikai nakoim ao am utu?

Mataio 28; Mareko 16; Ruka 24; Ioane 20–21.Ngkai am utu a wareki mwakoro aikai, kinaia aomata ake a marooro ma Iesu inanon rongorongoia n tatabeua. Ibukin te katooto, tera ae kakukureiko n taekaia aomata ake a kawara ruanimaten te tia Kamaiu? Tera ae ko reiakinna man aia taeka ke aia mwakuri Abotoro ke mairouia ana reirei iaon te kawai nako Emmauti?

Iangoia n anene n ikotaki “Did Jesus Really Live Again?” (Aia Boki n Anene Ataei,, 64). Taetae iaon temanna are a kinaa kain am utu are e a tia ni mate, ao marooroakinna bwa e kanga te koaua inanon te anene aei ni uota te kabebete.

Te Kawai nako Emmauti, iroun Wendy Keller

Mataio 28:16–20; Mareko 16:14–20; Ruka 24:44–53.Inanon kiibu aikai, tera are e tuangiia Iesu Ana Abotoro bwa a na karaoia? Ti na kanga ni buoka katiaan te mwakuri aei? Kaain te utu a kona n tibwaua aia taneiai ngkana a namakina “mwakurin te Uea irouia” ni katiaa Ana mwakuri (Mareko 16:20).

Ioane 21:15–17.Iangoia ni wareki kiibu aikai ngkai kam amwarake n ikotaki. Aio are e kona n karekea riki te oota n ana taeka te Tia Kamaiu “kamwarekeia au tiibu.” Boboto iaon ana reirei Iesu n taekaia tiibu inanon te Nu Tetemant (taraa, ibukin te katooto, Mataio 9:35–36; 10:5–6; 25:31–46; Ruka 15:4–7; Ioane 10:1–16), bukin tera kamwarakeaia tiibu bon te kawai ae tamaroa ni kabwarabwaran te beku ibukiia natin te Atua? Tera ae reireiniira te kabootau aio ibukin taekan aia namakin Tamara are i Karawa ao Iesu ibukira?

Ibukin iango riki tabeua ibukin reireinakiia ataei, taraa te kamataata n te wiiki aei n Nakomai, Iriirai—Ibukin te Moanrinan.

“Te anene ae rineaki, “Did Jesus Really Live Again?,” Aia Boki n Anene Ataei, 64.

Kanakoraoan Am Kamatebwai I Bon Iroum

Kabonganai katangitang ni kaoa te Tamnei ao n reiakin reirei iaon te reirei. Ongora nakon ke anenea te anene n taromauri n aron “E A Uti!” (Anene n Taromauri, nambwa 199) e kona ni kaoa te Tamnei ao ni buokiko n reiakina taekan Mangautin te Tia Kamaiu.