E taetae Iesu nakon Betero i mataniwin te aba

Kamwarakeia au Tiibu, iroun Kamille Corry

Tuun 26–Turai 2

Mataio 28; Mareko 16; Ruka 24; Ioane 20–21

“E A Uti”

Ataei aika iai aia koaua ni koaua aika ni mwakoro aikai e matoa aaia are a katea iai aia onimaki. Ko na kanga ni kaoa te Tamnei bwa e na kaotii koauan koaua aikai?

te aikaon ibukin te tibwatibwa

Kaunga te Tibwatibwa

Taraan te tamnei e kona n buokiia ataei n uringa te reirei are e reke ni mweengaia ke n taabo riki tabeua. Tao ko kona ni kaota te tamnei n te kanoa n reirei n te wiiki aei n Nakomai, Iriirai—Ibukiia Aomata n Tatabemaniia ao Utu ao tuangiia ataei bwa a na tibwaua rongorongon te tamnei anne.

te aikaon ibukin te anga reirei

Reirei te Reirei: Ataei aika a Uarereke Riki

Mataio 28; Mareko 16; Ruka 24; Ioane 20:1–23

N na manga maiu kaua imwin mateu, n ai aron Iesu.

Ana mwakuri ni kamaiu Iesu Kristo, ao Mangauti, bon te bwai ae moan te kakawaki n rongorongon aonnaba, ao bon aan te onimaki ni kiritian. Ngkai ko wareka taekan te Mangauti, iangoia bwa tera am ibuobuoki nakoia am ataei ni karikirakea aia onimaki iroun Iesu Kristo.

Waaki ni Kakukurei aika a Kona ni Karaoaki

• Karakina Mangautin Iesu n oin am taeka. (Ngkana e riai, kabonganaa “Mwakoro 54: E a uti Iesu,” n Karaki man te Nu Tetemanti, 139–44, ke tamnei are irekereke ma te reirei n ChurchofJesusChrist.org.) Kabwarabwara bwa ngke e mate Iesu, Tamneina e kitana rabwatana. Ngke E a mangauti, Tamneina ao rabwatana a manga bootaki. Tuangiia ataei bwa a na ikaruoruo n taekina te karaki aei nakoim. Tuangiia ataei bwa tera aia namakin ngkana noora Iesu ae maiu.

• Kaota te tamnei ae “What Happens after We Die?” (ChurchofJesusChrist.org), karakina te aomata ae ko kina ae ea tia ni mate. Kaota am koaua bwa aomata ni kabane a na mangauti. Kaoiia ataei bwa a na kaotii aia koaua.

• Anenea te kuna ae taekina Mangautin te Tia Kamaiu, n aron “Did Jesus Really Live Again?” (Aia Boki n Anene Ataei, 64). Tuangiia ataei bwa e na tera aia namakin ngkana a noora Iesu. Tuangiia bwa a na tibwai aia iango ma kaain te reirei.

Ioane 20:24–29

I kona n onimakina Iesu Kristo e ngae ngke I aki n nooria.

Iangoa am ibuobuoki nakoia ataei bwa a na mataata bwa tera nanon te onimaki ao aroia ni karikirakea aia onimaki iroun te Tia Kamaiu.

Waaki ni Kakukurei aika a Kona ni Karaoaki

• Kaota te tamnei ae Christ Approaches Thomas (ChurchofJesusChrist.org) ao karakina rongorongon Tooma are koreaki n Ioane 20:24–29. Manga karakinna te kauatai, ma ngkanne tuangiia ataei bwa a na anga tabeua kabwaninakin te karaki.

• Kaota te bwaoki ae iai kanoana ae aki kona n nooria ataei, ao kabwarabwara bwa tera kanoana nakoia ataei. Titirakiniia bwa a kakoauaa ae iai kanoan te bwaoki ao bukin tera. Ngkanne kaota nakoia kanoana, ao kabwarabwara bwa te onimaki bon kakoauaan bwaai aika ti aki noori. Te kabanea ni kakaawaki n onimaki bon te onimaki iroun Iesu Kristo.

Iesu ngke e kaotii baina nakoia Abotoro

Noori Baiu, iroun Jeff Ward

Ioane 21:15–17

I kona ni kaota au tangira ibukin Iesu man te beku ibukiia tabemwaang.

Ko na kanga ni kaungiia ataei bwa a na tangiriia mani buokiia aomata?

Waaki ni Kakukurei aika a Kona ni Karaoaki

• Wareka Ioane 21:15–17, ke kaota te tamnei “Feed My Sheep” (ChurchofJesusChrist.org). Buokiia ataei ni kamaataata te bwai are tangiria Iesu bwa e na karaoia Betero: e na tibwaua te euangkerio nakoia aomata bwa aonga ni kakoauaa Iesu. Anganiia ataei tamnein te tiibu, ao tuangiia bwa a na korea iaona te bwai ae a kona ni karaoia ni buoka te aomata ni kaania Iesu.

• Buokiia ataei n iangoi bwaai aika a kona ni karaoi n tangiriia mani beku ibukiia tabemwaang. Tera riki ae ti kona ni karaoia ni kaota ara tangira?

• Korei araia ataei n am kiraati iaon taian mwakoro ni beeba ake katotongan te tiibu, ao kamaenakoi inanon te umwanreirei. (Korei naba araia ataei ake a aki bati n roroko.) Kaoiia ataei bwa a na booti tiibu ao ni kakaei ake e mwakoro iai araia. Buokiia ataei n iangoi kawai ake a kona iai ni buoka raoraoia are e aki bati n roroko n te taromauri.

te aikaon ibukin te anga reirei

Reirei te Reirei: Ataei aika a Ikawai Riki

Mataio 28; Mareko 16; Ruka 24; Ioane 20:1–23

Ibukina bwa e uti Iesu, aomta ni kabane a na mangauti.

E koaua bwa ataei a bae n titiraki bwa tera ae e na riki mwiin te mate. Iangoia bwa ko na reirei te Mangauti n te aro are e na kakorakoraa aia onimaki.

Waaki ni Kakukurei aika a Kona ni Karaoaki

• Koaiia ataei bwa a na kamakii mataia ao n iangoia ae a tekateka n ruanimaten Iesu ngkae ko wareka Ioane 20:1–17 ke kakimototoa karakinan Mangautina (taraa naba “Mwakoro 54: E a uti Iesu,” n Karaki man te Nu Tetemanti, 139–44, ke te tamnei are irekereke ma te reirei n ChurchofJesusChrist.org). Tera nanon te mangauti? Tera ara namakin ngkana ti noora te Tia Kamaiu ngke e uti?

• Tuangiia ataei bwa a na kamatebwaia rongorongon te aomata are e noora te Tia Kamaiu n uti ao n tibwaia nakon te kiraati bwa tera ae e reiakinna.

• Mataku n teuana ke e raka riki te tamnei ae: “E wene Iesu n te Bwaro ni Mate,” “E Mangauti Iesu,” “E kaoti Iesu n te Kawai are Emauti,” ao “Te Uea n Utina e Kaoti nakoia Abotoro” (ChurchofJesusChrist.org). Kaoiia ataei bwa a na tibwauaia bwa bukin tera e kakawaki Mangautin te Tia Kamaiu irouia.

Ioane 20:24–29

I kona n onimakina Iesu Kristo e ngae ngke I aki n nooria.

Ko na kanga ni buokiia ataei ni kakorakoraa aia onimaki iroun Iesu Kristo?

Waaki ni Kakukurei aika a Kona ni Karaoaki

• Kaoiia ataei bwa a na wareka Ioane 20:24–29. (Taraa naba te tamnei ae “Blessed Are They That Have Not Seen, ao Yet Have Believed” n ChurchofJesusChrist.org.) Ti na kanga n ataia bwa e maiu Iesu Kristo, e ngae ngke ti aki nooria?

• Korei taekan te mwakoro n taeka aei “A kabwaia akana a aki noorai ni mataia, ao a kakoauaai” iaon mwakoro ni beeba teuana. Kaoiia ataei bwa a na barongai taeka aikai. Kaoiia bwa a na karakin taai ake a namakina iai ana tangira te Tia Kamaiu e ngae ngke aki nooria.

• Kaoiia ataei bwa a na korei tamnein bwaai ake a kona ni karaoi ni kakorakoraa aia onimaki n te wiiki aei. Tuangiia bwa a na kaota aia tamnei, ao ni kabwarabwara te bwai ae a karaoia ni kakorakora aia onimaki iroun Iesu Kristo.

Ioane 21:1–17

I kona ni kaota au tangira ibukin Iesu mani kamwarakean Ana tiibu.

Ataei e korakora ae a kona ni karaoia ibukiia aomata. Ko na kanga ni kaungaia ni kakorakoraia aomata n te euangkerio?

Waaki ni Kakukurei aika a Kona ni Karaoaki

• Bootaki wareka Ioane 21:1–17 . Ngkana ko wareka kiibu 9–13, tuangiia ataei bwa a na iangoa te tai are e kukanaki kanaia ae kangkang, ao kaoiia bwa a na iangoi kawai are e kamwarakeira Iesu n te maiu n tamnei. Ngkana ko warekii kiibu 15–17, onea mwiin aran Timon n araia am ataei. Antai ana tiibu te Uea? Ti na kanga ni buokia ni kamwarakeia?

• Tibwaa te amwarake nakoia ataei. N aia tai n amwarake, tuangiia bwa tibwauaan te euangkerio nakon te aomata ai aron kamwarakeaia.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na kabonganaa te iteraniba ibukin mwakuri ni kauring n te wiki aei ni Mangautin te Tia Kamaiu.

Kanakoraoan Ara Anga Reirei

Rimwiin kakao ake a karaoaki ao mwakuriia. Ngkana ko kaoiia ataei bwa a na karaoa nanon are a reiakinna, manga rimwiia te kakao anne n te kiraati are imwiina. Aio are e kaotia nakoia ataei bwa ko mwannanoiia bwa e kanga ni kakabwaiaaki maiuia n te euangkerio. N tibwauan rongorongoia, a kona ni kakorakoraaki ao n ibuobuoki i marenaia ni maiuakina te euangkerio.

iteraniba ibukin te mwakuri ni kauring: kioina ngkai e mangauti Iesu, a na mangauti aomata ni kabane